Wase 8

Na Kaukauwa ni Masu

Na Kalou ena dusimaka ka liutaka na tamata ena “vakasaqarai Koya ena vakabauta ena nona kaukauwa taucoko kei na yalona taucoko.”¹

iVakamacala Taumada

Ena vulaitubutubu ni yabaki 1912 erau a lako yani ki Niu Siladi o Elder David O. McKay kei Brother Hugh J. Cannon ni rau tomana tiko na nodrau cakacaka ni Lotu ena veiyasai vuravura. Ena dua na Sigatabu e a lesi kina o Elder McKay me vosa vei ira na Yalododonu ena yakavi ni koniferedi o ya. Ia ena mataka ni siga o ya e sa tauvimate kina ka droga sara vakaca na domona ka sega ni rogo rawa na domana. Ia e a gole ga yani ki na koniferedi ena nona vakabauta ni na vosa rawa ga. Oqo na veika e a vola o koya:

Era a soqoni rawa e udolu na tamata … ena lotu ni yakavi o ya. Era lako tu mai ena lomatarotaro kei na vakanuinui levu. Sa tu oqo na noqu itavi meu solia vei ira e dua na itukutuku, ia e a sega walega ni sa sega niu vosa rawa, au sa tauvimate talega.

“Ia ena noqu vakamamasu e lomaqu meu na vukei ka dusimaki mai vua na Kalou, au sa taucake meu vosa. Sa tadre ka droga na domoqu. …

“E a qai yaco e dua na ka e a se bera ni yaco vakadua vei au, au a vagolea yani na yaloqu ki na ulutaga meu veivunauci ka voqataka cake yani na domoqu. Ena noqu sa vakila ni sa makare ka voqa vinaka mai na domoqu, au sa guilecava sara na irogorogo ni domoqu ka vakasamataka walega na dina me ra kila vakavinaka ka ciqoma o ira na ivavakoso. Sa laki yacova me vasagavulu na miniti na noqu vosa, ena noqu tinia, sa mai makare ka voqa vinaka yani na domoqu me vaka ga na kena ituvaki taumada. …

“Ena gauna au a tukuna kina vei Brother Cannon kei ira e so tale na veitacini na noqu masuta e lomaqu na veivakalougatataki au sa mai ciqoma oqo, e a kaya kina o koya, “Oi au talega au a masulaka tiko vakaukauwa e dua e vosa tiko me vaka au se bera ni vakayacora vakadua ena noqu bula!”²

iVakavuvuli nei David O. McKay

Na Kalou e ituvaki Vakatamata ka rawa me da vosa vua ena masu.

Sa dua na ka taleitaki vei au mai na gauna ni noqu tubucake tiko na dina ni sa ituvaki vakatamata na Kalou, ka sa ikoya dina ga na Tamada, ka rawa me da vosa vua ena masu ka saumi vakakina vei keda. Au taleitaka ni sa dua na ka taleitaki ni bula o ya na kila ni sa dau rogoca na Kalou na masu ena vakabauta. E ka dina ni sega ni dau saumi mai na noda masu ena kena gauna kei na ka e gadrevi, se kena iwalewale, eda vinakata; ia era na yaco ga mai, ena kena gauna dina kei na kena iwalewale ena vakavinakataki kina o koya e a kerekere.

Ia e so na gauna e a yaco mai vei au vakadodonu na veivakadeitaki ena gauna ga o ya ni sa vakadonui na noqu kerekere. Ena dua na gauna, me vaka sara ga e a tucake tu e yasaqu na Tamaqu Vakalomalagi ka vosa mai. Na veika au a sotava oqo sa na tiki tu ni noqu bula taucoko ka yacova ni sa takali yani na noqu vakasama kei na noqu vuku. E ka dina ka sa vaka me dau volekati au tu ga na iVakabula kei vuravura.

Au vakila me vaka ni se bera vakadua ni yaco vei au ni sa Tamaqu dina na Kalou. E sega walega ni o koya e dua na kaukauwa cecere, ka dua na ka qaqa dodonu e vuravura, ia sa ikoya talega na Kalou sa ituvaki vakatamata ka tiko vua na kaukauwa ni veibuli, na dauveitaqomaki kei vuravura, ka idusidusi ni yaloda. Au sa gadrevi ira na tamata taucoko, ka vakabibi o ira na itabagone ni Lotu, me ra volekata na Tamada mai lomalagi ka vosa tiko vua ena veisiga—sega walega e matadra na tamata, ia ena vanua vakaitaukei. Kevaka me na tiko vei ira na wekada na vakabauta vakaoqo, ena yaco mai vei ira na veivakalougatataki uasivi. Ena vakasinaiti vei ira na yalo ni vakavinavinakataki na Kalou ena veika e sa vakayacora vei ira; era na kila ni sa iyau levu oqo. E sega ni ka ni vakasama na noda dau dusimaki mai vua, ka sa na yaco me vakavoui na noda vakasama ka vakatakataritaka na yaloda na nona Yalotabu.³

Ena gauna o dau tekiduru kina ena bogi mo masu, o dau vakila na nona volekati iko, e rogoci iko dina tiko, ko vakila beka e dua na kaukauwa e cakacaka tiko me vaka na retio se dua na kaukauwa cecere mo vakila kina ni ko sa veivosaki tiko kei koya?⁴

Au gadreva me ra volekata na [Kalou] o ira na cauravou ni Isireli ka vosa tiko Vua ena veisiga, sega walega e matadra na tamata ia ena vanua vakaitaukei talega. Au sa gadreva me ra vakabauti Koya tikoga me vaka e a vakayacora na goneyalewa mataboko vei tamana. Ena loma ni sitimanivanua e a tene tiko vei tamana na goneyalewa lailai oqo, ka kaya mai e dua na itokani e dabe veitikivi tiko: “Mai meu vukei iko, ” a cuva yani ka taura na goneyalewa ka tenea vua. A kaya yani o tamana vua na luvena: “Ko kila beka o cei e tauri iko tiko.” “E sega” e a sauma mai na luvena, “ia o iko ga o kila.” Isa, sa vaka tu o ya na nona vakabauti tamana o luvena. … Sa dodonu me vaka dina tu oqo na nodra vakabauta na Tamadra Vakalomalagi o ira na cauravou kei na goneyalewa lalai Yalododonu edaidai.⁵

Sa dua na ka vinaka me ra vulica na cauravou kei na goneyalewa lalai ni sa rawa me ra sotava na Kalou ena masu. Ko ni na vulica na gonevuli ena univesiti, me vaka ga ni sa dodonu mo ni vulica e veikoronivuli, kevaka ko ni sotava na veika dredre e so sa rawa mo ni vukei ka dusimaki kevaka ko ni vakasaqara ena yalodina. Ena yaco beka vei kemuni me vaka keimami a vakayacora ena gauna ni itabagone ka vakila ni sa sega ni saumi mai na nomu masu, ia ena dua na siga ko na qai kila rawa ni a sauma dina na Kalou na nomu masu me vaka ga e dau vakayacora e dua na itubutubu yalomatua. Sa ikoya oqori e dua vei ira na iyau cecere ni itabagone me vakila ni sa rawa vei iko mo sotava na Tamada ka sovaraka vua na yalomu.⁶

Na masu e sega ni vakavosa walega; e gadrevi kina na vakabauta, cakacaka, kei na itovo vinaka.

Na masu sa ikoya na kena yavalati tiko e dua na yalo ni gagadre kei na loloma ni veivosaki tiko kei koya na Tawayalani. Sa ikoya oqo na itukutuku nei koya na yalo ki vua na Tamada dauloloma. Sa sega ni vakavosa walega na ka e cauraki tiko. …

Na imatai ka bibi duadua ki na kena rogoci na masu, o ya na vakabauta. Na vakabauti ni Kalou ena kauta mai na vakacegu ki na yalo. Na ivakadei ni sa Tamada na Kalou, ni sa ikoya ga eda na lako yani kina ka vakacegui ka dusimaki, sa dua na ivurevure ni vakacegu tawamudu.

E dua tale na ka dodonu bibi o ya na vakarokoroko. Na ka dodonu oqo sa mai vakaraitaki ena masu cecere nei koya na iVakabula ka kaya “Me vakarokorokotaki na yacamuni.” [Maciu 6:9.] Na ivakavuvuli oqo e dodonu me vakaraitaki ena gauna ni vuli, ka vakabibi ena noda veivale ni sokalou.

Na ikatolu ni kena gacagaca bibi o ya na yalododonu. Na masu sa nona gagadre na yalo. Na masu ena yalododonu e tukuna tiko ni gauna eda kerea kina e dua na ka dodonu se kalougata e dodonu me da na cakacakataka na kalougata o ya ka vakabulabulataka na dodonu o ya.

E dua tale na dodonu bibi o ya na yalodina. Na cava o masuta kina na Matanitu ni Kalou me yaco mai vakavo ga ke umani tu e lomamu e dua na gagadre kei na lewa e loma mo vukea na kena vakayavutaki? Na nomu masulaka me yaco na Nona lewa ka qai sega ni bulataka, ena solia mai e dua na kena isau e veicalati. Ko na sega ni solia vua e dua na gone e dua na ka e vakayacora na itovo vakaoqo ni kerea vakakina vei iko. Kevaka eda masulaka me vakayacori rawa e dua na ka se dua na cakacaka levu, sa dau kilai levu tu na nona solia kina na yaloda. Sa ikoya oqo na veibeci me masuti me yaco ga na lewa ni Kalou, ka qai sega ni bulataki na lewa oqo ena noda bula.

Na iotioti ni dodonu bibi oqo o ya na yalo raramusumusu. … Na ivakavuvuli ni yalo raramusumusu kei na masu ena muataka na tamata o ya me kila ni sa dodonu me dusimaki vakalou. Na bula rawati koya sa dua na ka dodonu, ia sa dodonu me yadravi tiko ni sa dau gadrevi tikoga na veivuke cecere—na nomu yadrava tiko ni ko lakova tiko na salatu ni veiqaravi, ena rawa mo na dau sikalutu; kei na kena yadravi sa ikoya na masu, e dua na vakatakerekere me na vakauqeti iko na Kalou mo qarauna mo kakua ni sikalutu.⁷

Na masu vakavuvale ena vakavulici ira na gone me ra vakabauta na Kalou.

Kevaka mo na tarogi au na vanua cava au ciqoma kina na noqu vakabauta tudei ni sa bula dina tiko e dua na kalou, au na sauma vei iko: ena loma ni vuvale au a tubucake kina—oqo ena gauna erau dau kacivi keitou kina na gone o Tata kei Nana ena mataka kei na yakavi ka vakatikora na veivakalougatataki ni Kalou ki na matavuvale kei na kawa tamata. E a vakilai na dina mai na voqa vinaka ni domoi peteriaki ka a vakabulabulataka na yalodratou na luvena, ka sa vakakina na totoka ni nona masu o Nana. Au sa sureti ira na tama yadudua ena loma ni Lotu me ra vakayacora ena yalodina na nodra vakauqeti ira na luvena ni sa bula dina tiko na Kalou ka sa dina talega ni na dusimaka ka taqomaki ira na luvena na Kalou. Sa nomuni ilesilesi oqo. Na vuvale sa dua vei ira na tikina—e dua na tikina yaga duadua—ena bula veimaliwai. Ni bera na noqu a rogoci tamaqu ni a vakadinadinataka ni a rogoca e dua na domo vakalou, au sa kila kina ni sa dau bula volekata na nona Dauniveibuli.⁸

Era a sa vakavulici ira na gone Yalododonu Edaidai me ra kila tiko na Kalou, ka masu vua ni sa ikoya e dau vakarorogo ka rogoca ka vakila na veika me vaka ga e dau vakayacora e dua na tama. Era sa umana vakakina ena nodra bula mai vei ira na nodra itubutubu, na ivakadinadina dina ni Kalou dina oqo ka sa mai vosa ena itabagauna oqo. E tiko na dina ni ka oqo.⁹

Au kila ni veitikotiko era na tuberi kina o ira na gone me ra veivolekati sara kei na Tamada Tawamudu ena sega ni veiyavalati kina na ivalavala ca se kune kina na ca ena loma ni vale o ya. Ena gauna e tara bi kina vua e dua na gone lailai na matetaka, ena rai cake yani vei tamana ka cavuta ena vakabauta, “Tata, masulaki au.” Au sa tukuna oqo vei kemuni ena lamata mai ena veivuvale oqo na qaqa kei na lagilagi ni dua na matanitu. Sa vaka tu oqo na nodra loma ni veivuvale na Yalododonu Edaidai.¹⁰

“Turaga, mo ni vakavulici keimami me keimami masu, ” sa ikoya oqo na nodratou vakamamasu na tisaipeli vei koya na iVakavuvuli [raica Luke 11:1]. Eratou a kerea na veidusimaki ena yalomalumalumu vakataki ira na gone ka a qai sega ni tawayaga na nodratou vakamamasu.

Me vaka ga na nodratou maqusa na tisaipeli, sa vakakina ena veigauna era vakila kina na gone na nodra gadreva na veidusimaki kei na veivakacegui vakalou, ka ra se bera tiko ni vakaraitaka mai e gusudra na gagadre oqo. O koya gona sa lesi ira na itubutubu na Turaga me ra “vakavulici ira talega na luvedra me ra daumasu.” [V&V 68:28.]

Na lomaleqa, veituyaki ni vakasama, kei na rarawa sa dau yaco vakakina ki na dua na bula ni gone me vaka ga ni dau yaco vei ira na qase, ka sa dodonu talega me ra vakacegui, karoni ka dusimaki mai vua na Kalou ni sa isau ni masu.

E sega ni o koya walega o ya, ia sa rawa talega mai na kena vakayavutaki ena vakabauta, yalodina, kei na veivakabauti dina, na nona masu e dua na gone tawacala ka na ciqoma vakaidina na kena isau sa vakarautaki oti tu mai vua na Tamada dauloloma.¹¹

Na veivakauqeti ni Kalou sa kena inaki me ra vaqaqacotaka kina o ira na Yalododonu Edaidai na nodra vuvale, ka vakavulici ira na luvedra ena ivakavuvuli ni kosipeli I Jisu Karisito. Ia, au sega ni tukuna oqo me na vakayacori vakalawa na veivakavulici oqo se ena dua na sala veivakasaurarataki. Au tukuna tiko eke ni dodonu me vakatakarakarataka na vuvale yadua, na kosipeli i Jisu Karisito, ka cabori ena yalodina na masu ena bogi kei na mataka; ka me ra kila tiko na gone ni da sa gadreva tiko na Kalou ena loma ni noda vuvale. Kevaka e rawa me da sureta na iVakabula ki na noda vuvale, eda na rawa ni kila ni sega walega ni ra lomadonu mai kina na agilosi ka ni ra vinakata talega me ra mai taqomaki ira na noda cauravou kei na goneyalewa lalai. Au vakabauta ni vuqa sara na nodra veivuvale na lalai oqo era sa vakavulici tiko kina me ra daumasu ni ra vakarau moce ena bogi. Au kila ni sa dau yaco talega me sega ni vakayacori na masu ena mataka. Ni da vakasamataka na ka oqo, sa dina sara ni ra sa gadreva vakalevu cake o ira na lalai oqo na veitaqomaki ni Kalou ena siga kei na veidusimaki ni Yalo Tabu, me vakalevutaki cake sara mai na gauna era moce kina.¹²

Ko ni sa vakayacora tiko beka na veivakasalataki nei Karisito mo ni masu vua na Tamada ka vakavulici ira na luvemuni me ra dau masu, me yaco na bula vakalou, vakarokorokotaki na Kalou kei na nona cakacaka ena veisiga me umanaki e lomadra na gone? E dodonu me yaco vakakina ena veivuvale yadua. Kakua ni masulaki iko duadua ga, ia masulaki ira talega na kemu meca.¹³

Oi kemuni na itubutubu, kevaka ko ni sega ni vakayacora tiko e dua na ka, tekiduru vata kei ira na luvemuni ena veimataka. Au kila ni dau osooso na veimataka lailai, … ia mo ni vagalalataka e dua na gauna e rawa mo ni tekiduru ka sureta na Kalou ki na nomuni loma ni vuvale. Sa dua na ka kaukauwa na masu.¹⁴

Na masu vakamatavuvale ena kauti ira yani na itubutubu kei ira na gone ki na itikotiko ni Kalou.¹⁵

Na masu ena kauta mai e levu na kalougata cecere.

Na kaukauwa ni masu ena loma ni Lotu e a yaco mai vei au e nanoa niu a taura kina e dua na ivola mai vua e dua na wekaqu mai na neitou tauni makawa. E a lobaka tiko na sucu ni nona bulumakau ena gauna sa rogovaki mai kina ena retio ka tiko e kea vua ni sa qai bale o Peresitedi [George Albert] Smith. E kila sara ga e kea o koya na cava na kena ibalebale vua na wekana mai na nona tauni makawa, e a lako tani mai na nodratou volau ka gole yani. Erau sa vakasoqoni ira sara na luvedrau, e kea gona ena nodratou loma ni vale lomani sa tu vakawawa na nodratou cakacaka, eratou sa tekiduru vakamatavuvale ka cabora e dua na masu. Na ivakaraitaki ni cakacaka o ya au sa laiva mo ni vakasamataka. Vakalevutaka vata kei na dua na drau na udolu, rua na drau na udolu, veimama na milioni na vuvale, ka qai raica kina eke na kaukauwa ni duavata kei na masu, kei na veivakauqeti veitokoni ki na loma ni Lotu.¹⁶

Kevaka me ra na tuberi o ira na noda itabagone me ra dau … vakabauta ka dau vosa vua na nodra Kalou ena vanua vuni, e dodonu me ra yaco taumada mai e va na kalougata cecere vei ira ena gauna oqo. Na imatai sa ikoya na vakavinavinaka—na kena vakavinavinakataki na veivakalougatataki ni se bera ni guilecavi. Ena vakasinaiti kina na yalodra ena vakavinavinakataki ni veika sa vakayacora vei ira na Kalou. Era na kunea ni ra sa vutuniyau ena veika vinaka. O koya na cauravou ena sogota na katuba, sogota na ilatilati ka qai masu e kea ena vakanomodi me vakamamasu vua na Kalou me vukei, e dodonu me taumada na nona vakavinavinakataka mai na yalona taucoko na ituvaki ni nona bula vakayago, o ira na itokani, o ira na nona daulomani, kei na kosipeli, ka sa ivakaraitaki ni bula tiko na Kalou, ka sa laurai ena vatu kei na veikau kei na qereqere kei na senikau, kei na veika kecega sa vakavolivoliti koya. E dodonu me wilika vakalevu, ka wilika yadudua, ena qai kurabuitaka na veika sa vakayacora na Turaga [raica “Count Your Blessings, ” Sere naba 241].

Na ikarua ni veivakalougatataki ni masu sa ikoya na veidusimaki. Au na sega ni ciqoma rawa me dua na cauravou me cidroi tikoga ni sa tekiduru oti ena yasa ni nona idavodavo ena mataka ka masu vua na Kalou me vukei koya me taqomaki mai na ivalavala ca ni vuravura oqo. Au vakabauta ni dua na goneyalewa ena sega ni cala sara ni sa na tekiduru ena masu ena mataka ka kerea me vakasavasavataki tikoga ka sega ni tauvi duka ena siga ka tarava. Au na sega ni vakasamataka rawa me dua na Yalododonu Edaidai me tiko vua na yalo ni veicacati ena nona sa masu vua na Kalou ena yalodina ki na dua na vanua vuni, me vagalalataki mai vua na yalo kece ni vuvu kei na veicacati vei ira na wekana. Na veidusimaki? Io, ena tu e kea na Kalou me dusimaka ka liutaka na tamata ena “vakasaqarai Koya ena vakabauta ena nona kaukauwa taucoko kei na yalona taucoko.”

Na ikatolu ni veivakalougatataki sa ikoya na nuidei. Ena loma ni vanua taucoko oqo era sasaga tiko e udolu vakaudolu na gonevuli me ra vuli vakavinaka. Me da vakavulici ira na gonevuli oqo kevaka me ra rawata na nodra lesoni, e dodonu me ra veitaratara kei na Kalou, ni ko koya na qasenivuli cecere duadua e kila o vuravura ka sa tu e yasadra me dusimaki ira. Ena gauna ga e vakila kina o koya na gonevuli ni sa rawa me vosa vua na Kalou ena masu, sa na yaco me nuidei na gonevuli ni sa na rawata na nona lesoni, sa rawa vua me vola na nona vosa, ka na tucake rawa e matadra na nona itokani vakavuli ka vosa ni sa sega ni rere se druka. Na nuidei sa vua ni masu ena yalodina.

Na kena iotioti, o ya ena vakauqeti o koya. Sa sega ni ka ni vakasama, ni sa rawa me da vosa vua na Kalou ka vakararamataki ka dusimaki mai vei Koya, ka vakavukui na noda vakasama, ka vakatakatari na yaloda mai vua na Nona Yalo Tabu. … E a sa kila tu na ka oqo o Josefa Simici; kei na ivakadinadina, na ivakadinadina ni nona veivakauqeti na Parofita o Josefa Simici sa ivakaraitaki bula vei ira era na dolava na matadra ka raica kei na yalodra me ra kila vakavinaka sara.¹⁷

Vakatutu ni Vuli kei na Veivosaki

E sa vaqaqacotaka vakacava na masu na nomu veimaliwai kei na Kalou? A cava e bibi kina mo kila ni ko sa masu tiko vua na Tamamu mai Lomalagi, sa kena ituvaki o sa buli kina? (Raica tabana 83–85.)
Na sala cava so sa dau sauma kina vei keda na Kalou na noda masu? (Raica tabana 83–85.) Na cava e vaka me sega kina ni dau saumi mai vakatotolo na masu? Na veivakalougatataki cava ni masu sa bau yaco mai vei iko?
Na veika vinaka se itovo cava e rawa me da vakayacora ka me vukea na noda masu me dina ka vakaibalebale vakalevu? (Raica tabana 83–84.) Eda na vakarautaki keda vakayalo vakacava ni bera na noda cabo masu?
Ena rawa vakacava me ra vakavulici ira na gone na itubutubu ena masu? (Raica tabana 83–84.) Ena sala cava era na vakauqeti kina na gone mai na masu duadua kei na masu vakamatavuvale e vakayacori e loma ni vale? (Raica tabana 84–86.) Na cava e dau tiki bibi kina ni kena vakaukauwataki ka vakaduavatataki na masu vata vakamatavuvale ena veisiga?
Na cava e so na kalougata e yaco mai ena vuku ni masumasu? (Raica tabana 87–88.) Na cava me da vakayacora me vakaibalebale vakalevu cake kina na noda masu ka sega ni dau tokaruataki se vakaiukuukutaki?
Ena rawa vakacava na masu e cabori ena yalodina me vukea na kena vakasavasavataki na yaloda mai na yalo ca se itovo ca vei ira na tamata?

iVolanikalou e Veisemati: Maciu 21:22; Jemesa 5:16; 2 Nifai 32:8–9; Alama 17:3; 34:17–28; 3 Nifai 18:18–21; V&V 19:38.