Mataupu 18

Ia Tumau i le Itu a le Alii

Ua tuuina mai e le Alii poloaiga ia i tatou ina ia mafai ai ona tetee atu i le leaga ma maua le fiafia.

Mai le Soifuaga o Siaosi Alapati Samita

O le tamamatua o Siaosi Alapati Samita o Siaosi A. Samita, e tele tausaga sa i ai o ia i le Korama a Aposetolo e Toasefululua ma le Au Peresitene Sili o se fesoasoani ia Polika Iaga. E masani ona ta’u soo e Siaosi Alapati Samita le fautuaga a lona tamamatua e masani ona tuu atu i lona aiga: “Ua manino se laina tuaoi i le va o le itu a le Alii ma le itu a le tiapolo. Afai o le a e tumau i le itu a le Alii o le a e i lalo o lana uunaiga ma o le a leai sou manao e faia mea sese; ae afai e te laasia le itu a le tiapolo tusa lava pe tasi le inisi, ua e i ai i le mana o le tiapolo ma afai e manuia ana taumafaiga, o le a le mafai ona e mafaufau pe fetuunai faalelei aua o le a e le maua le Agaga o le Alii.”

Fai mai Siaosi Alapati Samita sa ia faaaogaina lenei fautuaga i lona olaga atoa e taialaina ai ana filifiliga: “Pe a tofotofoina au i nisi taimi e faia se mea patino, ou te fesili ifo ia te au lava, ‘o lē fea itu o le laina lea ou te i ai?’ Afai ou te iloa o loo ou i ai i le itu e saogalemu, le itu a le Alii, ona ou faia lea o le mea sa’o i taimi uma. O le mea lea, a oo mai tofotofoga, mafaufau ma le loto tatalo i lou faafitauli ma le uunaiga a le Alii o le a fesoasoani ia te oe e filifili ai ma le poto. E na o le itu a le Alii o loo i ai le saogalemu mo i tatou.”¹ [Tagai fautuaga 1 i le itulau e 204.]

Aoaoga a Siaosi Alapati Samita

O le tumau ai i le itu a le Alii e manaomia ai le usitai atoatoa i poloaiga.

O le saogalemu uma, o le amiotonu uma, o le fiafia uma o loo i ai lea i le itu a le Alii. Afai o loo e tausia poloaiga a le Atua e ala i le tausia o le Aso Sapati, ua e i ai i le itu a le Alii. Afai o fai au tatalo faalilolilo ma tatalo faaleaiga, ua e i ai i le itu a le Alii. Afai e te lotofaafetai mo meaai ma faaali atu lena lotofaafetai i le Atua, ua e i ai i le itu a le Alii. Afai e te alofa i ou tuaoi e pei o oe lava ia te oe, ua e i ai i le itu a le Alii. Afai o e faamaoni i au fegalegaleaiga ma ou uso a tagata, ua e i ai i le itu a le Alii. Afai o e tausia le Upu o le Poto, ua e i ai i le itu a le Alii. O lea la, e mafai ona ou ta’ua Poloaiga e Sefulu ma isi poloaiga ua tuuina mai e le Atua mo lo tatou taitaiga ma toe fai atu, o na mea uma e faamauoa ai o tatou olaga ma tatou fiafia ai ma saunia ai i tatou mo le olioli e faavavau i le itu a le Alii. O le faitio i mea ua tuuina mai e le Atua ia i tatou mo lo tatou taitaiga, e le o le itu lea a le Alii.² [Tagai fautuaga 2 i le itulau e 204.]

[Na fetalai mai le Alii]: “E le mafai ona ou vaai atu i le agasala ma faatagaina ai sina mea itiiti lava [MFF 1:31]. Aisea? Aua ua Ia silafia afai tatou te talia le agasala, ua tatou le maua se faamanuiaga semanu tatou te olioli ai pe ana tatou le lafoaia le ala e tau atu ai i lena faamanuiaga.³

O nisi taimi tatou te faalogo ai o fai mai se tasi, “E, e leai se mea e soona faaeteete ai fua. O le a lē soona mateletele le Alii ia i tatou pe a na o sina masepu laitiiti lava.” O le tagata e talanoa faapena, o lena ua i ai i le itu a le tiapolo, e e te le fia faalogo la i Ana upu aua a e faalogo i ai, e mafai ona taitaiseseina oe. E leai se tagata o i ai le Agaga o le Alii e talanoa faapena. O le Alii lava ia na fetalai mai e tatau ona tatou tausia ana poloaiga. “O loo i ai se tulafono, na faavaeina e lē matatalaina i le lagi a o le’i faavaeina lenei lalolagi, e autu ai faamanuiaga uma lava.” (MFF 130:20.) E aoaoina i tatou e le talalelei a Iesu Keriso i le ala e maua ai lena faamanuiaga.⁴

Ua tuuina mai e lo tatou Tama alofa i le Lagi poloaiga e fesoasoani ai ia tatou maua le fiafia.

O le Alii, i Lona agalelei, ina ua silasila atu i uiga o Ana fanau, ma silafia latou te manaomia le taitaiga, na Ia aumaia ai Poloaiga e Sefulu ma isi poloaiga na tuuina mai i lea taimi ma lea taimi, e fesoasoani ai ia tatou maua le fiafia. Ua outou matauina tagata o fetaufetulia’i i le lalolagi e saili le fiafia ae le maua. Maimau pe ana sei lava so latou taimi e mapu ai e talia le fautuaga a le Alii, semanu o le a mulimuli mai ai le fiafia, ae o le a leai lava se isi auala latou te maua ai.⁵

A o ou tamaitiiti, sa ou iloaina pe ou te manatu foi sa ou iloa, o poloaiga a le Alii o Ana tulafono ia ma aiaiga e taiala ai au. Sa ou manatu na ou iloaina o le le usitai i na tulafono, o le a mulimuli mai ai le faasalaga, ma i le avea ai o se tamaitiiti, sa ou manatu ua ou lagona na faatulagaina e le Alii taualumaga ma atofaina tulaga uma i lenei olaga ina ia tatau ai ona ou usita’ia tulafono patino a leai o le a vave ona mulimuli mai le faasalaga. Ae a’o agai ina ou matua, sa ou aoaoina le lesona mai le vaai atu i se isi itu, o lea la ia te a’u lava ia o tulafono ua ta’ua o tulafono a le Alii, o fautuaga o loo maua i Tusitusiga Paia, o faaaliga a le Alii mo i tatou i lenei vaitau i le lalolagi, o se musika malie lea o le siufofoga o lo tatou Tama i le lagi i Lona alofa tunoa mo i tatou. O ni fautuaga ma apoapoaiga a se matua alofa, o Lē ua sili atu ona popole mo lo tatou soifua manuia nai lo le mea e mafai ona manatu ai matua faalelalolagi, ma o le taunuuga o na fautuaga sa foliga mai ia te au i nisi taimi o se tulafono matuia, ua avea nei ma fautuaga alofa ma le agalelei a se Tama Faalelagi e tumu i le poto. Ma o lea la ou te fai atu ai, e le faigata ia te au ona talitonu e sili ia te au le tausia o poloaiga a le Atua.⁶

O le fiafiaga uma ua maua e a’u ma lo’u aiga, o le taunuuga o le taumafai e tausi poloaiga a le Atua ma le ola agavaa ai mo faamanuiaga na Ia folafola mai ia i latou o e faamamalu ia te Ia ma tausi Ana poloaiga.⁷

Afai o le a tatou mulimuli i fautuaga ma apoapoaiga ua tuuina mai e le Alii, o lo tatou ala o le ala lava i le fiafia. O se auala, atonu e le faigofie ma sologa lelei pea, ae o le iuga o le a faamuta i le afioaga o lo tatou Tama Faalelagi, ma o le mamalu, tino ola pea ma le ola e faavavau o la tatou vaega lea.⁸ [Tagai fautuaga 3 i le itulau e 205.]

E taumafai le tiapolo e taitaisese i tatou i ana mea taufaasese ma faatogafiti.

E lua ni uunaiga i le lalolagi i le taimi nei ma sa i ai talu mai le amataga. O le tasi o se uunaiga e aoga, e aumaia ai le fiafia ma galueaiina ai uiga lelei. O le isi uunaiga e faataumaoi, e faaliliu ai tagata i temoni, e saeia ma faalotovaivaia le tagata. E tosina uma i tatou i nei uunaiga e lua. O le tasi e sau mai lo tatou Tama Faalelagi a o le isi e sau mai le puna o mea leaga lea na i ai i le lalolagi mai lava i le amataga e taumafai e aumaia le faafanoga i le aiga o tagata.⁹

O le a tofotofoina i tatou uma; e leai se tagata o le a le tofotofoina. O le a faaaoga e le tiapolo auala uma e mafai e faasese ai i tatou; sa taumafai o ia e fai lena mea i le Faaola o le lalolagi ae sa le faamanuiaina. Sa ia taumafaia i le tele o isi tamalii sa umia le pule paia, ma o nisi taimi na te maua ai se vaivaiga o se tagata ma lē maua ai e lena tagata le mea semanu o se faamanuiaga tele pe ana faamaoni.¹⁰

Sa fai mai se tasi tagata ia te au—pe sa saunoa i se mea sa ou i ai—“E foliga mai ua manatu nei tagata ou te tiapoloa, ae leai.” Ma sa ou fai atu ia te ia, “Uso, na i ai se taimi na e iloa ai se tagata ua tiapoloa ma sa na iloaina?” O se tasi na o togafiti a le tiapolo: Ia maua oe ma taofia oe mai lou iloaina. Ma o se tasi lena o o tatou faigata.¹¹

Ua fiaselau tausaga talu ai, na vaai ai le Perofeta o Nifae i le mea o le a tupu, o le a faatautava tagata ma faafitia le mana o le Agaga Paia ma Lē Paia o Isaraelu, ma latou aoao e fai ma aoaoga faavae ia poloaiga a tagata. Ua i ai se uunaiga i le lalolagi i nei ona po e taumafai e faatalitonu tagata e faapea, o lo latou lava poto ma lo latou lava malosi e mafai ai ona latou maua le ola e faavavau. Se’i ou … faitau atu mai le Nifae:

“E toatele foi e faapea mai, Ina aai ma inu, ma ia olioli, a e ui i lea, ia tatou matatau i le Atua, na te ta’uamiotonuina le faiga o agasala laiti.”

Ou te manao ia outou matauina lea: “Na te ta’uamiotonuina le faiga o agasala laiti.” Ua iloa e lena tiapolo faitogafiti afai e mafai tau lava ina faia e se alii po o se tamaitai o sina sese laitiiti, o si na lava mea ua oo atu ai i lona itu, ua i ai i latou i lona mana.

“A e ui i lea, ia tatou matatau i le Atua, Na te ta’uamiotonuina le faiga o agasala laiti; ioe, ia tala pepelo laitiiti, ia faaaimamago foi i tagata ona o a latou upu, ia eli foi le lua ina ia pau ai le lua te tuaoi, e le afaina lava nei mea. Ia tatou faia foi nei mea uma, aua o a taeao e oti ai i tatou, afai foi e agasala i tatou, e sasa foi le Atua ia te i tatou i ni nai ta itiiti, a o le iuga e faaolaina i tatou i le malo o le Atua.” [2 Nifae 28:8.]

Pe le o le mea tonu lea o loo fai atu ai le tiapolo i le fanau a tagata i le taimi nei e pei ona manino lona tusia iinei? Se, fai se agasala laitiiti, e le afaina lava, ia talapepelo laitiiti, e leai lava se afaina tele, o le a faamagalo e le Alii lena mea ma o le a na o ni nai ta laiti foi e sasa ai ae o le a faaolaina lava i tatou i le malo o le Atua. O le mea lena na te fai atu ai i se alii po o se tamaitai sa aoaoina i le Upu o le Poto pe fai atu, inu na o sina ti laitiiti, e te le afaina ai lava; ula sina tapaa laitiiti, e leai a se mea o i ai; e leai a se afaina o sina meainu malosi laitiiti. O mea laiti nei; na te faia auaua’i pea lava nai mea iti, e le faia uma i le taimi e tasi. O le mea lena ou te manao ia tatou manatua. … O nei musumusuga faalēamana’ia ae faataumaoia, e faalataina ai le tagata ma tuu ai i tatou i le mana o le tiapolo. …

Na toe fai mai Nifae:

“A o nisi na te faalotomalie, ma faamoe ia te i latou i le filemu i la le tino, latou te fai mai, Ua lelei mea uma i Siona, e moni, ua manuia Siona, ua lelei mea uma; e faapena ona olegia e le tiapolo o latou agaga.”

Ia, ou te manao ia outou matauina le mea lea: “e faapena ona olegia e le tiapolo o latou agaga ma taitai ifo ai i latou ma le faaeteete i seoli.” [2 Nifae 28:21.] Ma o le auala lena na te faia ai, o le auala tonu lava lena na te faia ai. E le sau ma toso faatātā atu oe i lana itu, ae e musumusu mai, “Fai si mea leaga laitiiti lea,” a manuia lena taumafaiga, ia fai se isi tama’i mea leaga ma se isi, ma, sei faaaoga le faaupuga na sii mai, “Na te olegia o latou agaga.” O le mea lena na te faia. Na te faatalitonuina oe o loo e manumalo i se mea ae o lena e te faia’ina. O lea la o taimi uma lava tatou te le tausia ai se tulafono a le Atua pe tausia se poloaiga, ua olegia i tatou, aua e leai se e maua i lenei lalolagi po o le lalolagi a sau, sei vagana ua usitai i tulafono a lo tatou Tama Faalelagi.

… O lena fautuaga uiga ese, “Ma taitai ifo ai i latou ma le faaeteete i seoli” e maoae, o lana auala lena. E mafai ona tosina alii ma tamaitai o le lalolagi o aso nei i lena uunaiga, ma ua fetosoa’iina i latou i i ma o, ma o loo i ai lena musumusuga, latou te le malamalama foi i le mea o loo finagalo le Alii latou te fai, ae ua latou nonofo ai pea i le itu a le tiapolo, ua apoia e lona mana i le mea e le alu i ai le Agaga o le Alii.

Na ia toe fai mai:

“O nisi foi na te viivii i ai, ma fai atu ia te i latou e leai se seoli; ma ia fai atu ia te i latou e le se tiapolo a’u nei, aua e leai se tiapolo; e faapena ona musumusu o ia i o latou taliga seia faamauina i latou e ia i ana filifili matautia e le malaveaiina mai ai.” [2 Nifae 28:22.]

O lenei, o’u uso e ma tuafafine, o le tulaga lena ua i ai le lalolagi i ona po nei. Semanu e leai se isi faaupuga e sili atu ona manino e mafai e Nifae ona faaupu ai pe ana faapea o i ai nei i le lalolagi. Ma o loo galue le tiapolo, ma ona e finagalo lo tatou Tama Faalelagi e faasaoina Lana fanau mai le leaga o na aoaoga ma na talitonuga, na Ia auina mai ai le perofeta taulealea, o Iosefa Samita, i le lalolagi, tofiaina o ia faatasi ma le pule paia, faatulagaina Lana Ekalesia, ma toe amataina ona aoao mai upumoni i le fanau a tagata, ina ia mafai ai ona taitaiese mai le sese o o latou ala.¹²

E tatau ona tatou aoao e faatoilalo o tatou tuinanauga, o tatou faanaunauga faatiapolo. E tatau ona tatou aoao e tetee atu i faaosoosoga. O le mea lena ua tatou i ai iinei, ma ina ia mafai ona atoatoa lo tatou faia o lena mea, o lea ua toefuatai mai ai le talalelei i le lalolagi, ma ua tatou tofusia ai, ma ua ia te i tatou le malosi e maua mai o se taunuuga o le mana o le Agaga Paia. E le gata ua tatou maua le mana faaletagata le taualoa e tetee ai tofotofoga, ma tapulaa e i ai i le ituaiga tagata o sē e lei maua le malamalama i le upumoni—ua tutusa le mana tetee o ia i tatou ma ia, ae faaopoopo i ai ma le mana tetee lea e maua mai i le iloa o le upumoni ma le iloaina o le faamoemoega o o tatou olaga.¹³ [Tagai fautuaga 4 itulau e 205.]

E mafai ona tatou tetee atu i le leaga e ala i le filifili e gauai atu i tatou lava i le uunaiga a le Alii.

Ou te manatua i ni nai tausaga ua mavae, sa i ai se tamalii lelei sa taitaifono i lena taimi i le komiti faatonu o le Ekalesia Soofaatasi a Amerika. Sa sau o ia e asiasi mai i le [Aai o Sate Leki] ma sa auai i ni a tatou Aoga Sa se lua. I se tasi o vasega a [tamaiti] sa matua naunau lava o ia i ai. Na oo ina o le a faauma le [vasega], ona fai atu lea i ai o le peresitene o le Aoga Sa, “E te le manao e fai atu sina upu i le [vasega]?” … Fai mai a ia, “Ou te fia fai atu sina upu.” Sa ia fai mai, “Maimau e pe a na mafai ona ou ola i le siosiomaga lea sa ou maua i lena tama’i… vasega i le Aoga Sa i le taeao nei, e le mafai ai ona ou taofia le avea o a’u ma se tagata lelei.” [Tagai fautuaga 5 i le itulau e 205.]

E tele taimi ou te mafaufau ai lava i lena mea. Tatou te filifilia ma le faaeteete le siosiomaga tatou te manava ai, ina ia tatou ola maloloina ai. Ae o nisi taimi, i lo tatou lava faatamala, tatou te tuu ai i tatou lava e faavaivaia i uunaiga lē mama, e faataumaoia ai lo tatou mana e tetee ai i mea leaga, ae taitai atu ai i tatou e faia mea e le tatau ona tatou faia ma o le a tatou le faia lava pe afai o tatou maua uunaiga a le Alii. Pe a na tau lava ina tatou lotomaulalo, pe a na tau lava ina tatou loto tatalo, pe a na tau lava ina tatou ola ai faapena e mafai ai ona tatou fai atu ma le faamaoni i itula taitasi o o tatou olaga, “Tama i le lagi, ua ou manao ma naunau e fai le mea E te finagalo ou te faia,” o le a faamauoaina o tatou olaga i aso taitasi a o tatou ola ai i lenei lalolagi.¹⁴

Tatou te filifilia le mea o le a tatou i ai. Ua tuuina mai e le Atua ia te i tatou le faitalia. O le a Ia le aveesea lava mai ia te i tatou, ma afai ou te faia le mea sese ma ou alu ai i le itu a le tiapolo, ou te faia aua ua ia te au le naunautaiga ma le malosi e fai ai. E le mafai ona ou tuua’ia se isi, ma afai foi ou te filifili e tausi poloaiga a le Atua ma ola e pei ona tatau ona ou ola ai ma tumau i le itu a le Alii, ou te faia aua e tatau ona ou faia, ma o le a ou mauaina o’u faamanuiaga i le faia. O le a le o se taunuuga o mea atonu o fai e se isi tagata.¹⁵

O i tatou o Au Paia o Aso e Gata Ai, e tatau lava ona tatou ola faaeteete i aso uma o o tatou ola ina ia mafai ai ona uunaia i tatou e le mana o le Alii, ma mafai ai ona tatou faliu ese mai na mea e tauau ina motusia ai lo tatou mana e maua ai le malo selesitila.¹⁶

Ia mautinoa ua tutu mausali ou vae i luga o le papa. Ia mautinoa ua e iloa le finagalo o le Matai mo oe, ma i le iloa ai o Lona finagalo, ia mautinoa ua e tausia Ana tulafono ma poloaiga. Ia mautinoa o le mama a’ia’i o o outou olaga o le a maua ai e outou le mafutaga ma le Agaga Paia, aua afai tou te mama a’ia’i ma amioatua ma amiotonu, o le a leai se malosi o le tiapolo e faaumatia ai outou.¹⁷

Ou te tatalo ia tatou suesue ifo ia i tatou lava ia iloa po o lē fea itu o le laina tuaoi o tatou i ai; ma afai o tatou i ai i le itu a le Alii, tumau ai iina, aua o lona uiga o le a maua le fiafia e faavavau i le mafutaga a alii ma tamaitai aupito sili ua ola ai i le fogaeleele.

Afai ua tatou se’e ese po o le a lava le ala, afai sa tatou faatamala; afai ua tatou faalogo atu i lē taufaaosooso ma e kolosia ai le laina tuaoi e tofo i na mea e manatu le lalolagi e matua manaomia tele ae na fetalai mai le Alii e le lelei mo i tatou, ia vave ona tatou toe foi i le isi itu, ole atu i le Alii e faamagalo lo tatou faavalevalea, ona ola ai lea faatasi ma lana fesoasoani i le olaga e ta’ua o le fiafia e faavavau.¹⁸

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau e v–vii.

Faitau “Mai le Soifuaga o Siaosi Alapati Samita” (itulau e 191) ma le Moronae 7:10–19. E faapefea ona e iloa ua e i ai “i le itu a le Alii”? O le a se mea e mafai ona tatou faia e fesoasoani ai le tasi i le isi ia tumau i le itu a le Alii o le laina tuaoi?
I le parakalafa muamua i le itulau e 192, o loo ta’ua ai e Peresitene Samita ni poloaiga e tatau ona tatou usita’ia e tumau ai i le itu a le Alii. O a isi tulaga faatonuina ua tuuina mai e le Alii e fesoasoani ai tatou te tumau i Lana itu?
A o e faitauina le vaega o loo amata i le itulau e 193, mafaufau pe mafai faapefea ona e faaaogaina aoaoga a Peresitene Samita e fesoasoani ai i se tasi ua manatu ua saisaitia tele poloaiga.
A o e iloiloina itulau e 194–97, vaai auala a Satani o loo faamatalaina e Peresitene Samita, ma mafaufau i taimi na e vaai ai i faamaoniga o nei auala. E mafai faapefea ona tatou fesoasoani i tupulaga talavou ia latou iloa ma faatoilaloina? E faapefea ona fesoasoani le “iloa o le faamoemoega o lo tatou i ai i lenei olaga” (itulau e 97) tatou te teetee atu ai i faaosoosoga?
Mafaufau pe faapefea ona faatatau le tala i le itulau e 197 ia te oe. O a ni nofoaga po o ni tulaga e te le lagona ai se manao e fai mea leaga? O le a se mea e mafai ona tatou faia e faatupu ai se siosiomaga faapena i o tatou aiga? i o tatou falefaigaluega? i o tatou nuu? i o tatou lava olaga?

Mau E Faatatau I Ai: Mataio 4:1–11 (e aofia ai fuaitau mai le Faaliliuga a Iosefa Samita i vaefaamatalaga); Iakopo 4:7; 1 Ioane 5:3–4; Alema 13:27–28; Helamana 5:12; Mataupu Faavae ma Feagaiga 82:8–10

Fesoasoani faafaiaoga: “O fesili e tusi i luga o le laupapa a o lei amataina le vasega, o le a fesoasoani i le au a’oa’o e amata ai ona mafaufau i autu a o le’i amataina le lesona. (O Le Aoao Atu E Leai Se Isi Valaauga E Sili Ai, 93).

“Afai o le a tatou mulimuli i fautuaga ma apoapoaiga ua tuuina mai e le Alii, o lo tatou ala o le ala lava i le fiafia.”

“O faaaliga a le Alii mo i tatou i lenei vaitau i le lalolagi, o se musika malie lea o le siufofoga o lo tatou Tama i le lagi i Lona alofa tunoa mo i tatou.”

“O i tatou o le Au Paia o Aso e Gata Ai, e tatau lava ona tatou ola faaeteete i aso uma o o tatou ola ina ia mafai ai ona uunaia i tatou e le mana o le Alii.”