Mataupu 6

Lagolagoina o i Latou e Lagolagoina e le Alii

Ua filifilia o tatou taitai e le Alii, ma ua faamoemoe o Ia tatou te lagolagoina i latou i upu ma faatinoga.

Mai le Soifuaga o Siaosi Alapati Samita

Na lagolagoina Siaosi Alapati Samita e avea ma Peresitene o le Ekalesia i le konafesi aoao ia Oketopa 1945. Ina ua latalata i le faaiuga o le konafesi, sa faailoa mai e Peresitene Samita lona agaga faafetai mo le palota lagolago a le Au Paia: “Ou te faafetai atu ia te outou mo le talitonuga sa faaalia, o’u uso e ma tuafafine, i le faamoemoe ina ia ou mafaia, ma le folafola mai e pei ona faia e nisi o outou, o le a outou fesoasoani mai ina ia ou mafaia, aua ua na o a’u lava o se tagata, o sē aupito faatauvaa o outou, ae ua valaauina a’u i lenei galuega—ma semanu ou te le i ai iinei pe ana ou le iloaina na valaauina au—e ala i le pule a lo tatou Tama Faalelagi.”

Ona ia faaopoopo mai lea o le talosaga lenei: “O le a ou manaomia le fesoasoani a alii uma ma tamaitai uma ma tamaiti uma, e le mo so’u faamanuiaga, ae mo o outou faamanuiaga, ma mo faamanuiaga o le fanau a tagata i soo se mea o i ai i latou. E le o so’u tiutetauave lena, o lo tatou tiutetauave.”¹

E pei ona faapupula mai i aoaoga o i lenei mataupu, sa malamalama Siaosi Alapati Samita i avega mamafa sa tauaveina e le Au Peresitene Sili, e oo foi i le taimi a o le’i avea o ia ma Peresitene o le Ekalesia. Sa ia aoaoina le Au Paia o lo latou lotonuu ma le faamaoni e mafai ona fesoasoani e faamāmā ai na avega, ma sa ia soifua ai foi i lenei mataupu faavae i le taimi o lana auaunaga i le Korama a Aposetolo e Toasefululua.

I le 1946, a o ia taitaia se sauniga o le konafesi aoao, sa fofogaina mai ai e Peresitene Samita le lagolagoina o taitai o le Ekalesia, i le faamalamalama mai faapea e sili atu i le na o se taga faatino: “O le taimi nei e na o le tasi le faasologa o pisinisi e masani ai i nei Konafesi; o le tuuina atu lea o le Au Pulega o le Ekalesia ina ia lagolagoina e ala i le palota a tagata. Ou te faamoemoe o le a outou silafia, outou uma lava, o se avanoa paia lenei. … O le a le na o se faatusa, ae o le a avea o se faailoga faapea, e faatasi ai ma le fesoasoani a le Alii, o le a outou tauaveina la outou vaega o le galuega.”² [Tagai fautuaga 1 i le itulau e 67.]

Aoaoga a Siaosi Alapati Samita

O i latou o ē pulefaamalumalu i le Ekalesia ua saunia, filifilia, ma musuia e le Alii.

O lenei Ekalesia maoae sa pulefaamalumalu ai tamalii sa saunia faapitoa, aoaoina faapitoa, faaauupegaina faapitoa mo lena mamalu maualuga ua faaee atu i luga o i latou taitoatasi ao ia nofoia lea tulaga. I le atamai o lo tatou Tama Faalelagi ua Ia siosiomia ai nei taitai o Isaraelu i isi e faapei foi o i latou le faatuatua, ma o e e le ifo atu i lea tagata ona o ona uiga pe ona o lona tulai mai o le peresitene o le Ekalesia, ae latou te aloaia o ia o le fofoga taumomoli o lo tatou Tama Faalelagi, ma lagolagoina o ia ma faamalosiau atu ia te ia ma tatalo mo ia, ma alolofa ia te ia, ina ia maua ai foi e i latou o faamanuiaga mai lo tatou Tama Faalelagi.

E leai lava se isi faalapotopotoga faapea i lenei lalolagi. E leai nisi tagata [o loo] ta’ita’ia e faapei ona ta’ita’ia lenei nuu. E moni lava le tala o i latou o ē pulefaamalumalu ua na o ni tagata. O le a faatino e lo tatou Tama Faalelagi Lana galuega e ala mai ia i latou. E tatau ona aoao atu le talalelei e ala atu ia i latou. … O le tamalii o loo pulefaamalumalu nei ia i tatou, e le o pulefaamalumalu ona o sona lava tomai faaletagata. E le o pulefaamalumalu ona o ia o se alo o se alii sili, ae ua i ai o ia i le tulaga ua ia se’ei ai aua ua silafia e lo tatou Tama i le lagi le faamaoni a’ia’i o lona agaga. I le silafia ai o le naunautaiga o le a ia tauaveina atu ai lenei savali i atunuu uma o le lalolagi, na ia saunia ai o ia mo le valaauga maualuga lea ua faaee atu ia te ia. E pulefaamalumalu o ia o se sui o lo tatou Tama Faalelagi.³

Ua ou mafaufau lava i le aso i tamalii lotomaualalo ae maoae, o ē sa taitaia lenei Ekalesia mai lava i lona faatulagaga. … Ua ou masani lelei ma [le toatele o] Peresitene [o le Ekalesia] ma talitonu o i latou uma o ni tamalii o le Atua. E le talitonuina o le a filifilia e lo tatou Tama Faalelagi se isi lava ituaiga e pulefaamalumalu i lana Ekalesia.⁴

O le a le mea na tupu ina ua maliu [Iosefa Samita]? … E le i faia e [le Au Paia] se tauaofiaga, ma filifili se taitaifono ma tofi se taitai fou. Ua uma ona filifilia le taitai e le Alii. O ia o le uso sinia o le Korama a le Toasefululua, o Polika Iaga. … Sa lagolagoina o ia e le Ekalesia atoa i ana sauniga uma e avea ma Peresitene. Ina ua maliu o ia, e le’i faapea mai ona fesoasoani o i la’ua o le Peresitene, ae o le Korama a le Toasefululua sa pulefaamalumalu mo se taimi umi, ona lagolagoina ai lea o lo latou uso sinia e avea ma Peresitene o le Ekalesia. Sa faamanuiaina le faatulagaga atoatoa. …

Ua ou mulimulitaia nisi o nei mea ina ia leai se mea e sasi. E lei filifilia e Iosefa Samita ia lava e avea ma Peresitene o le Ekalesia. E faapena foi i e na sosoo mai ai. … O le tofiga e mai lo tatou Tama Faalelagi e ala mai i Ana musumusuga, ma e mauaina e alii le mana uma e aumai faatasi ma le tofiga.⁵

E ao lava ina tatou matua faafetai i lo tatou iloa o lenei galuega e le o se galuega a se tagata, ae o le galuega a le Alii; o lenei Ekalesia, o loo tauveina le suafa o Iesu Keriso, o loo faatonutonuina e ia, ma o le a ia le faatagaina lava se tagata po o se vaega o tagata e faatama’iaina. O le a Ia le faatagaina lava tamalii o loo pulefaamalumalu i lana Ekalesia e taitaia sese tagata, ae o le a Ia lagolagoina i latou i lona mana silisiliese. O le a Ia faalauteleina i latou i luma o alii ma tamaitai lelei ma le maoae. O le a Ia faamanuiaina la latou galuega ma o le a faatumulia i le manuia. O i latou e tetee ma vailiili masei, o le a latou le maua se fiafia i la latou tetee. O i latou e faitio ma saili e faataumaoia le uunaiga a taitai o le Ekalesia, o le a pagatia i taunuuga o a latou faiga sese.⁶

E i ai le tulaga manaomia mo i tatou ia i ai le faafetai i o tatou loto o loo taitaia i tatou e tamalii paia, o ē musuia e lo tatou Tama i le lagi e aoaoina i tatou i lea aso ma lea aso.⁷ [Tagai fautuaga 2 i le itulau e 67.]

E aoao mai e le Alii ia i tatou le ala i le fiafia ma le saogalemu, e ala mai i Ana auauna.

Mai le taimi o Atamu le Tamā seia oo mai i le taimi nei, o loo apoapoai mai le Alii e ala mai i ana auauna. Na Ia musuia i latou ia sili atu ni olaga ina ua latou faalogo ia te ia, ma mai lea tupulaga i lea tupulaga, e pei ona manaomia ai e lana fanau, sa Ia auina mai tamalii paia i le lalolagi, e tuuina mai faatonuga po o aoaoga e maua ai le fiafia, ma musuia i latou e aoao mai upumoni ofoofogia e faamamalu ma faamauoa ai le tagata.⁸

Ou te le iloa se mea e sili atu lona taua ua tupu i le lalolagi, e lei muai fautuaina ai le tagata e le Alii e ala mai i ana perofeta, o lea la e le’i tuua lava i latou e aunoa ma le silafia o mea o le a tutupu, ae ia mafai ona fuafuaina o latou olaga, pe afai latou te faia, mo lo latou manuia. …

O le tala ia Noa o se faataitaiga lea. Sa poloaiina o ia e le Alii e fau se vaa ina ia mafai ona faasaoina ai ē amiotonu mai le lolo o le a oo mai. Sa fau e Noa le vaa ma talai atu le salamo i lana augatupulaga mo se vaitaimi e selau luasefulu tausaga, ma o lea sa matuai lapataia atoatoa i latou. Peitai, sa matua amioleaga tagata ma sa latou le faautagia ai le lapataiga. O le i ai o la latou faitalia, sa latou filifili ai le amioleaga ae le o le amiotonu. Sa to mai timuga, ma ua oo mai ai le lolo, sa na o Noa lava ma lona aiga o tagata e toavalu sa faasaoina. Sa lapataia i le atoatoa tagata uma, peitai ona o lo latou lotomaaa ma lo latou mumusu e salamo, o lea sa malelemo ai. [Tagai Mose 8:13–30.]⁹

E finagalo le Alii ia tatou fiafia. O le mafuaaga lena na ia aumaia ai le talalelei a Iesu Keriso. O le mafuaaga lena na ia faaee mai ai le perisitua i o tatou luga. E finagalo o Ia ia tatou olioli. O le mafuaaga lena na ia faatulagaina ai lenei Ekalesia ma faatuina i tofi eseese, ma ua faatulagaina lelei nei mea uma. … Afai o le a e mulimuli i le taitaiga a le Alii, ma i latou ua lagolagoina e le Alii, o le a outou le pauu atu lava i le pogisa, le aveesea le malamalama, le solia tulafono a le Atua, ma lē lafoaia ai o outou avanoa o loo matua naunau o ia ina ia tatou sapi uma ai.¹⁰

E na o le tasi lava le ala i le saogalemu mo a’u i lenei taimi, o le mulimuli lea ia i latou ua tofia e le Alii e taitai. Atonu e i ai lava o’u manatu ma lagona, atonu e fai lava la’u faamasinoga e faatatau i mea, ae ou te iloa a feteenai a’u faamasinoga ma aoaoga a i latou na tuuina mai e le Alii e faasino mai le ala, ua tatau ona sui lo’u ala. Afai ou te manao i le faaolataga, o le a ou mulimuli i taitai ua tuuina mai e le Tama Faalelagi ia i tatou, tau lava ina ia ia lagolagoina i latou.¹¹ [Tagai fautuaga 3 i le itulau e 67.]

O i latou o ē lotomaulalo ma faamaoni, latou te lagolagoina ma puipuia auauna a le Alii.

Ua ou iloa le afe ma afe o tagata o tulaga eseese o lenei Ekalesia, o alii ma tamaitai o atunuu e tele ua latou talia i le lotomaualalo ma le faamaoni le talalelei ina ia iloa faatasi ai i latou ma le Ekalesia a Iesu Keriso o le Au Paia o Aso e Gata Ai. … Sa [latou] tatalo ma lagolagoina o latou taitai … , ma e mai lo’u aafiaga i le Ekalesia ou te lei iloa lava se tagata e toatasi sa tausia poloaiga a le Alii, ua si’i sona leo tetee e faasaga ia i latou ua tofia e pulefaamalumalu i lenei Ekalesia. O se mea ofoofogia tele lena. …

O se tasi o molimau aupito sili ia te a’u i le paia o lenei galuega, o se motu o tagata … e maua le avanoa i Konafesi Faalesiteki … e faaalia mai ai i latou lava e ala i le palota e lagolago ai pe teena ai foi i latou o loo pulefaamalumalu ia i latou (e faaalia e tagata uma lava lana faitalia saoloto) e faamalosiau ai i o latou taitai. E moni lava, e uunaia e le Agaga o le Alii tagata faamaoni, ma lotomaulalo e lagolagoina ana auauna filifilia.¹²

Ina ua taitai mai e Mose ia Isaraelu mai Aikupito ma ui atu i le vao agai i le nuu folafolaina, sa osofaia e Amaleka ia Isaraelu i Refiti. Sa faatonuina Iosua e Mose e filifili se autau e puipuia Isaraelu. Sa o atu Mose, Arona, ma Huro i le tumutumu o le mauga e iloa ifo ai le malae o le taua. A sii e Mose le tootoo o le Atua i luga a’e o lona ulu, ona malo lea o Isaraelu, ae a tuu i lalo ona lima ona ua vaivai, ona malo lea o Amaleka. Sa tuuina atu se maa e nofo ai, a o Arona ma Huro ua la si’i a’e ona lima i luga ina ia mafai ai ona tafe atu faamanuiaga a le Atua ia Isaraelu ma ia malo ai lana autau. Sa i ai le mana o le Atua ia Mose ma sa tumau ai ia te ia seia i’u lana galuega. [Tagai Esoto 17:8–13.] Ina ua ia maua le lagolago mai a tagata, sa manuia foi i latou, ma sa faapena foi i auauna uma a le Alii o ē sa pulefaamalumalu ia Isaraelu. …

… Pau lava le mea ia pulefaamalumalu [le Peresitene] i lenei Ekalesia, ae e le afaina pe fia tausaga o le a i ai, o le a tuuina atu e lo tatou Tama Faalelagi ia te ia le malosi, mana, atamai, faautauta, ma musumusuga e talanoa atu ai ia Isaraelu pe a manaomia ai. O i tatou, i le mulimuli ai i lana taitaiga, e tatau ona faapei o Arona ma Huro o aso anamua; e tatau ona tatou si’i a’e i luga ona lima, aua o le a tuuina ifo e le Alii ia faamanuiaga o le lagi i o tatou luga ma lenei nuu, e ala mai ia te ia.¹³

Ou te iloa o nei tamalii [le Au Pulega Aoao] o ni auauna a le Alii, ma ou te iloa o loo latou saili ia faamanuia i tagata. Ou te faamoemoe e leai se tasi o outou … o le a lē lagolagoina i latou, e le gata i lo outou faatuatua ma tatalo ae afai e ta’useseina i latou ma ta’useseina o latou uiga faaalia, o le a outou naunau ma filiga e puipuia i latou, pe a manaomia ai, aua o le a oo mai lava se taimi latou te manaomia ai la outou puipuiga. E le faagaloina i latou e le Tiapolo, ma o se tasi o faamaoniga ia te au o le paia o le valaauga o nei tamalii, o le ta’uleagaina lea o i latou e tagata leaga, ae ta’uleleia e alii ma tamaitai lelei i latou.¹⁴ [Tagai fautuaga 4 i le itulau e 67.]

A tatou faitioina o tatou taitai pe lē amanaiaina a latou fautuaga, ua tatou faataga le tiapolo e taitaisese i tatou.

E i ai i latou o tatou mafuta … ua faatauasoina e filosofia ma le faavalevalea o tagata. E i ai i latou e teena fautuaga ma tima’iga a le tagata ua tuu e le Atua i le ulu o lenei Ekalesia. …

E i ai tagata e le tele ni faamatalaga ua latou maua ae faafuasei ona latou o mai ma se manatu atamai, ma latou fautua mai “o le auala lenei’ po o le “auala le la,” ma e ui lava la ina feteenai ma le fautuaga a le Alii ae e i ai lava nisi ua sufi e faataitai. Ua tuuina mai e le Alii ia fautuaga saogalemu ma tofia le Peresitene o lana Ekalesia e faamatalaupu ma fautua mai. Afai tatou te lē amana’iaina mea ua ia fautua mai ai, o ia o le Peresitene o le Ekalesia, o le a tatou iloaina lava ua tatou faia se mea sese matautia.¹⁵

O le Au Peresitene o le Ekalesia … o sui o lo tatou Tama Faalelagi, e le gata mo lenei nuu, ae ua latou suia foi o ia i tagata uma o le lalolagi. O le a lelei i tatou pe afai tatou te faalauteleina ma faamamalu nei tamalii ua ia tuuina e taiulu ia i tatou. O i latou o ni tamalii e i ai vaivaiga faaletagata soifua, o le a i ai foi ni o latou sasi, ae afai o le a tatou agalelei i vaivaiga ma sese latou te faia, o le a tatou iloa ai o latou uiga mama e pei ona tatou vaai ia i tatou lava.

Ou te tu iinei ma aioi atu ia te outou, o’u uso e ma tuafafine, ia aua lava nei faatagaina ni upu faitio po o le agaleaga e pasi atu i o outou laugutu e uiga ia i latou ua valaauina e le Alii e taitai i tatou. Ia aua nei maua outou i mafutaga a i latou o ē ta’ufaatauvaaina i latou pe faavaivaia la latou uunaiga i le fanauga a tagata. Afai tou te faia, e mafai ona ou fai atu ia te outou o le a maua outou lava e le mana o le tiapolo. O le a uunaia outou e ia, tou te o ese atu i le mamao e mafai ai mai le ala o le upumoni, ma afai tou te le salamo atonu o le a tuai tele ma outou ma aveesea ai le “penina tau tele.” Ona o lo outou manatu faapito ma lo outou tauaso o le a taitaieseina ai outou, o i latou foi e pele ia te outou … o le a faanoanoa i le isi itu o le veli ona o lo outou vaivai ma lo outou valelea.¹⁶ [Tagai fautuaga 5 i le itulau e 67.]

E le o moe le tiapolo. O loo ia faaseseina le toatele ma taitai atu i latou i le agasala. … O loo i ai nisi o loo aoaoina aoaoga faavae sese; o nisi foi o loo latou saili e tauanau alii ma tamaitai ia solia poloaiga a lo tatou Tama Faalelagi. … Maimau pe ana mafai e tagata o lenei Ekalesia, o ē vaavaai masei i taitai o le Ekalesia ma faitioina i latou o ē ua ofoina atu o latou soifua ina ia faamanuiaina ai i tatou, ona nonofo mo se taimi umi ma fesili ifo ma le agaga tatalo, “O lē fea o nei faiaoga e saogalemu pe a mulimuli ai?” semanu o le a leai lava se faigata latou te iloa ai lo latou ala sa’o ma lagolagoina i latou ua lagolagoina e le Alii.¹⁷

A tatou lagolagoina o tatou taitai, tatou te tautino atu e mulimuli i a latou fautuaga ma faalauteleina o tatou foi valaauga.

Ai e avea ma punavai o le malosi i le Peresitene o lenei Ekalesia le vaavaai atu i foliga o le fiaafe o alii ma tamaitai faamaoni ma matauina i latou o si’i a’e o latou lima i feagaiga ma lo tatou Tama i le lagi, ma lagolagoina o ia i le tofi ua valaauina ai o ia, o le peresitene o lenei Ekalesia tele. O le matafaioi tatou te faia pe a sii a’e o tatou lima i lalo o ia tulaga, o se matafaioi e sili ona paia. E le faapea o le a tatou o atu gūgū ai i o tatou ala ma le naunau o le a taitaiina e le perofeta a le Alii lenei galuega, ae o lona uiga,—afai ou te malamalama i le matafaioi ou te tauaveina ina ua sii lo’u lima—o le a tatou lagolagoina o ia; o le a tatou tatalo mo ia; o le a tatou puipuia lona igoa lelei, ma o le a tatou taumafai e faatino ana faatonuga e pei ona taitaiina ai o ia e le Alii e tuuina mai ia i tatou a o i ai o ia i lena tulaga.¹⁸

A ou mafaufau i avega mamafa o loo tauaveina e le Peresitene o lenei Ekalesia ma ona fesoasoani, ma iloa ia tiutetauave ua faatietie atu i o latou tauau, faatasi ai ma lo’u loto atoa ou te manao e fesoasoani ia i latou, ia le avea lava a’u ma faasoesa, ae i le tulaga ua valaauina ai a’u, faatasi ma outou, o’u uso e ma tuafafine, e mafai ona tatou tulai ma tauave la tatou pito o le avega ma faalauteleina o tatou valaauga mo le mamalu ma le viiga o le Atua.¹⁹ [Tagai fautuaga 4 i le itulau e 67.]

Ia faia e le Atua ina ia mafai e i tatou o ē ua matuai faamanuiaina ona si’i i luga lima o auauna a le Alii o ē o loo pulefaamalumalu ia i tatou; ina ia mafai ona tatou fesoasoani ia te ia e le gata i lo tatou faatuatua ma tatalo, ae faapea foi i le alofa ma le agalelei pe a maua avanoa; ia mafai ona tatou savavali i lalo o le tagavai o lana taitaiga, a o faaauau pea ona lagolagoina o ia e le Atua e avea ma Peresitene o le Ekalesia, o le perofeta a le Alii i nei aso e gata ai.²⁰

Ia tatou lagolagoina nei tamalii ua faatuina mai e le Atua e pulefaamalumalu ia i tatou. Ia tatou faamanuiaina i latou, e le gata i o tatou laugutu, ae faapea i le fesoasoani atu i soo se auala e mafai ai e tauaveina lenei avega mamafatu ua i luga o o latou tauau. … Tatalo mo i latou ma faamanuia ma fesoasoani i ai.²¹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

Faitau le parakalafa mulimuli o le “Mai le Soifuaga o Siaosi Alapati Samita” (itulau 57–58). O le a “lau vaega o le galuega”? A o e suesueina lenei mataupu, mafaufau i auala e mafai ona e faaali atu ai e ala i au upu ma galuega, e te lagolagoina taitai o le Ekalesia.
Toe iloilo le vaega muamua o le aoaoga (itulau 57–59), aemaise le parakalafa lua ma le fa. E eseese faapefea auala a le Alii mo le filifiliga o taitai mai ala a le lalolagi? O le a sou aafiaga ua faamalosia ai lou faatuatuaga na filifilia e le Alii o tatou taitai?
Suesue le vaega o loo amata i le itulau e 59 ma faitau le Mataupu Faavae ma Feagaiga e 21:4–7. O le a se fautuaga patino na tuuina mai e le Alii e ala mai i le Peresitene o le Ekalesia o i ai nei? e ala mai i lou peresitene o le siteki po o le itu? e ala mai i lou epikopo po o le peresitene o le paranesi? O a faamanuiaga ua e maua i lou mulimuli ai i lenei fautuaga?
Toe iloilo le vaega o loo amata i le itulau e 61 ma faitau ia parakalafa muamua e lua i le itulau e 64. O le a le uiga ia te oe o le lagolagoina o taitai o le Ekalesia? E faamalolosia faapefea o tatou aiga ma auaiga i le lagolagoina o taitai o le Ekalesia?
Faitau le parakalafa atoa mulimuli i le itulau e 63. Aisea e matautia ai le faitioina o taitai o le Ekalesia? O le a se auala talafeagai e tali atu ai pe afai e ta’u mai e se tagata se masei o se tasi o ou taitai i le lotoifale?

Mau E Faatatau I Ai: Amosa 3:7; Efeso 4:11–14; Eperu 5:4; Mataupu Faavae ma Feagaiga 84:109–10; 107:22; 112:20

Fesoasoani faafaiaoga: O se tasi auala e faamalosiauina ai le aoao ma le maelega, o le faalogo lea ma le toto’a pe a fai se fesili a se tagata, pe faasoa se manatu. “O le faalogo o se faailoaga o le alofa. E masani lava ona manaomia ai le osigataulaga. A tatou faalogo moni i isi, e tele lava ina tatou taofia ai mea tatou te mananao e fai atu, ina ia mafai ai ona faasoa mai i latou lava” (O Le Aoao Atu, E Leai Se Isi Valaauga e Sili Ai, 69).

Ua na o a’u lava o se tagata, o sē aupito faatauvaa o outou, ae ua valaauina a’u i lenei galuega … e ala i le pule a lo tatou Tama Faalelagi.”

“O i tatou… e tatau ona faapei o Arona ma Huro o aso anamua; e tatau ona tatou si’i a’e i luga lima [o le perofeta].”

Tatou te lagolagoina o tatou taitai pe a tatou “tauave la tatou pito o le avega ma faalauteleina o tatou valaauga mo le mamalu ma le viiga o le Atua.”