Wase 10

Na iVolanikalou—Na Vuliyaga Duadua ni Vuli Kecega

“Me da sa qai … toro voleka vua na Tamada Vakalomalagi kei na Luvena Daulomani ena noda vulica vagumatua na ivolanikalou tabu.”

Na Bula nei Howard W. Hunter

Sa dau taleitaka dina vakalevu o Peresitedi Howard W. Hunter na ivolanikalou ka dua e vulica vakaidina sara. Na nona taleitaka kei na nona vulica e laurai ena nona veivakavulici, ka vakasinaiti tu ena italanoa kei na veimalanivosa mai na ivolanikalou e va. Vakavuqa ni dau vakavulica e dua na ivakavuvuli ni kosipeli, vakabibi ena dua na koniferedi raraba, e dau digitaka mada ga e dua na italanoa mai na ivolanikalou, vakamacalataka vakamatata, ka tomika mai kina na kena me bulataki.

Me vakataka, ni vakavulica na veika baleta na yalodina vua na Kalou, ena talanoataki Josua; o Setareki, Mesaki, kei Apetiniko; kei ira eso ena Veiyalayalati Makawa era vakaraitaka na yalodina vakaoqo (raica na wase 19). Ni vakavulica na veika ni veiqaravi, e vakayagataka na iVola i Momani me vakaraitaka eso na tamata era sega sara ni dokai “ka sega ni lailai na nodra veiqaravi” ni vakatauvatani kei ira e laurai levu na nodra veiqaravi (raica na wase 23). Ni vakavulica na veika me tiko kina e lomada na vakacegu ena gauna veilecayaki eso, e vakayagataka tale na veimalanivosa mai na ivolanikalou, oka kina na italanoa ni nona taubale o Pita e dela ni wai (raica na wase 2). Ni vakavulica na veika me baleta na sakaramede, e vakarautaka na vakasama ena nona talevalesu na kedra italanoa na kawa i Isireli kei na Lakosivia (raica na wase 15).

E kila vinaka o Peresitedi Hunter na bibi ni ivolanikalou ena nona vukei e dua na tamata me rawata e dua na nona ivakadinadina baleti Jisu Karisito. Sa yaco kina, me sa dau veivakavulici mai na itukutuku ena ivolanikalou me baleta na cakacaka vakalotu, mate ena kauveilatai, kei na tucaketale ni iVakabula. A kaya kina o koya:

“Au vakavinavinakataka na veiivola ni ivolanikalou ni da na vakavukui kina vakalevu me baleti Jisu Karisito ni da vulica vagumatua sara. Au vakavinavinaka me baleta na Veiyalayalati Makawa kei na Veiyalayalati Vou, ni sa mai vakuria kina na Turaga, mai vei ira na parofita ni Lotu i Jisu Karisito ni Yalododonu Edaidai na ivolanikalou tale eso sa vakatakilai mai me sa ikuri ni ivakadinadina i Karisito-na iVola i Momani, na Vunau kei na Veiyalayalati, kei na Mataniciva Talei-au kila ni o ira kece oqo era vosa ni Kalou. Sa ivakadinadina kina ni ko Jisu na Karisito, na Luvena na Kalou sa bula tiko”¹

era vulica na ivolanikalou na matavuvale — “Keitou nuitaka ni ko ni sa wilika ka vulica tiko na ivolanikalou vakayadua ena veisiga ka vakamatavuvale.”

iVakavuvuli nei Howard W. Hunter

Na vulici ni ivolanikalou sai koya na vuliyaga duadua eda na rawa ni vakayacora.

Na iusutu ni veika dina kecega sai koya na ivakadinadina ni ko Jisu na kai Nasareci na Karisito, o Jiova sa Cecere, na iVakabula kei Vuravura, na Luvena Duabauga sa Vakatubura na Kalou sa Bula Tiko. Oqo na itukutuku ni ivolanikalou. Mai na ivolanikalou tabu yadua oqo e tiko kina e dua na veivakauqeti meda vakadinata ka vakabauta na Kalou na Tamada Tawamudu kei na Luvena, o Jisu Karisito; ka vakatekivu mai na imatai ki na iotioti ni ivolanikalou kece oqo sa voqa kina na kaci meda cakava na loma ni Kalou ka muria na Nona ivakaro.²

Ni da vakamuria na nodra ivakasala na iliuliu meda wilika ka vulica na ivolanikalou, ena yaco kivei keda na veika vinaka kei na veivakalougatataki e vuqa sara. Oqo na vuliyaga duadua ni vuli kece eda na rawa ni vakayacora. …

Sa umani tu ena ivolanikalou na ivakatakila ni Kalou, ka sa dau vosa mai kina na Kalou vua na tamata. Evei tale na vanua meda vakayagataka kina na veigauna yaga me vakataka na noda wilika na veiivola ni ivolanikalou e vakavulica meda kila na Kalou ka kila vinaka na noda veimaliwai kei koya? Sa dau vakasakiti na gauna vei ira na tamata osooso, ka dau kautani mai vei keda na kena yaga ni da vakamaumautaka na veiauwa ena wiliki se saravi ni veika cacawale ka tawayaga.³

Keitou nuitaka ni ko ni sa wilika ka vulica tiko na ivolanikalou vakayadua ena veisiga ka vakamatavuvale. Sa dodonu meda kakua ni taura vakamamada na ivakaro ni Turaga, “Dou sa vakasaqaqara ena ivolatabu ni dou sa nanuma ni dou sa rawata kina na bula tawamudu: ia na ivola oqo sa tukuni au” (Joni 5:39). Ena lako mai na Yalotabu ki na nomu vale kei na nomu bula ni ko wilika na vosa sa vakatakilai mai.⁴

Sa gadrevi sara ki na Lotu e vuqa na yalewa kei na tagane era kila vakamatata na ivolanikalou, era veidutaitaka ka makataki ira, era vakarautaka na lesoni kei na nodra vosa mai na Topical Guide, era kenadau ena mape, na Bible Dictionary, kei na veivuke tale eso era tiko ena ivolanikalou totoka e va oqo. Sa tiko vakaidina kina e levu cake ka da rawa ni kenadau vakatotolo. Sa dina sara na were ni ivolanikalou e sa “matua … ka sa gauna ni tatamusuki” [raica na V&V 4:4]. …

E sega ena itabagauna oqo, sega ena itabagauna cava tale, me yaco kina na ivolanikalou—na gugumatua, kei na veivakararamataki ni vosa ni Kalou—me sa rawati tu vakarawarawa ka tuvai vakaveivuke me baleta na nodra vakayagataka na turaga, marama, kei na gone yadua era na vakasaqaqara. Na vosa ni Kalou volai sai koya na ituvaki vakarautaki e wiliki ka rawati rawa duadua kivei ira na lewenilotu raraba ena itukutuku kei vuravura. Sa dina sara ni da na tarogi kevaka eda sega ni wiliki ira.⁵

Na vulici ni ivolanikalou ena vukea meda kila ka talairawarawa ki na loma ni Kalou.

Me rawa ni da talairawarawa ki na lawa ni kosipeli ka talairawarawa ki na ivakavuvuli i Jisu Karisito, sa dodonu meda kila vakamatata taumada na lawa ka vakadikeva na loma ni Turaga. Ena rawati vakavinaka oqo ena noda vakasaqara ka vulica na ivolanikalou kei na nodra vosa na parofita. Ena sala oqo eda na kila vinaka kina na veika sa vakatakila na Kalou ki na tamata.

E umani tu ena Yavu ni Vakabauta na itukutuku oqo, “Keimami vakabauta na veika sa vakatakila oti na Kalou, na veika sa vakatakilai mai oqo, ka keimami vakabauta ni na levu tale na veika ena qai vakatakilai mai me baleta tiko ga na Matanitu ni Kalou” (Yavu ni Vakabauta 1:9).

Sa vakatakilai tu na loma ni Kalou ena ivolanikalou, ena vuku ni ka oqo eda sa vakaroti meda wilika meda kila kina na dina. A vakamacalataka na Turaga vei Oliver Cowdery na sala me vakadikeva kina na dina oqo. A kaya o Koya,“A ka oqo au sa vakaroti iko kina mo muria na veika sa volai tu; raica sa volai tu kina na veika kece sa baleta na noqu lotu, na noqu ivakavuvuli, kei na noqu uluvatu” (V&V 18:3–4).

A volavola o Paula vei nona itokani vinaka o Timoci, ka vakamasuti koya me dau wilika na ivolanikalou, ka kaya ena nona ivola, “Ni ko sa kila na iVola Tabu ni ko a gone, oqori sa vakavukui iko rawa mo bula ni ko sa vakabauti Karisito Jisu.” A qai tomana, “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli ena ka e dodonu” (2 Timoci 3:15–16). …

Era sa dau vakabibitaka tiko na noda iliuliu ni Lotu na kena gadrevi meda wilika na ivolanikalou kei na nodra vosa na parofita, ena gauna makawa kei na siga nikua. Era sa kerei tiko na tama kei na tina mera dau wilika na ivolanikalou me rawa ni ra vakavulici ira kina vakavinaka na luvedra. Era sa wilika tiko na luveda na ivolanikalou ena vuku ga ni nodra ivakaraitaki na itubutubu. Eda sa vulica tiko na ivolanikalou ena noda lotu vakamatavuvale, ka so na matavuvale era sa wilika vata tiko na ivolanikalou ena mataka caca. … Oqo na sala eda vuli kina meda kila na loma ni Turaga, me rawa ni da talairawarawa kina.⁶

Navuca na veitaravi vakaivolanikalou e tekivu ena kena gumatuataki na vosa ni Kalou ka qai tete yani ki na yalayala ni kevaka eda cakava vakakina, eda na rawa ni gole ki na nona itikotiko serau:

“Ia au sa vakarota … ka gumatua ni muria na ivakavuvuli ni bula tawamudu.

“Raica mo dou muria na vosa kecega sa lako mai na gusu ni Kalou.

“Io na vosa ni Turaga sa vu ni dina, raica na ka dina sa vu ni rarama; ia na rarama sai koya na Yalo ni Turaga, io na Yalo i Jisu Karisito. …

“Ia ko ira sa muria na nona ivakasala na Yalo ni Turaga, era sa kila na Kalou ko Tamada” (V&V 84:43–45, 47).

Oqori na ilakolako totoka e vakatekivuna na vosa ni Kalou ka na vakacavari ena bula vakacerecerei. “Na vosa i Karisito sa tukuna vei kemudou na veika kece mo dou kitaka” (2 Nifai 32:3).⁷

Au sa solia vei kemuni na ivakatakila ni Kalou me sa ivakatagedegede meda bula voli kina ka sa ivakarau meda tuvanaka kina na noda vakatulewa kei na cakacaka yadua. Sa vakakina, ni yacovi iko na lomaleqa kei na bolebole eso, sotavi ira ena nomu gole ki na ivolanikalou kei ira na parofita.⁸

e wili ivolanikalou tiko e dua na cauravou — Na vuli ivolanikalou “sai koya na vuliyaga duadua ni vuli kecega eda na rawa ni vakayacora.”

Me kilai vakamatata na ivolanikalou sa gadrevi kina na vuli vakatabakidua, gugumatua, kei na masumasu.

Keimami sa vakauqeti kemuni mo ni raica sara vakabibi na levu ni gauna ko ni vakayagataka tiko ena kena vakasamataki vakatitobu ena masumasu na ivolanikalou.

Me vaka niu dua na italai ni Turaga, au bolei kemuni mo ni vakayacora na veika oqo:

1. Wilika, vakasamataka vakatitobu, ka masulaka na ivolanikalou ena veisiga ni ko dua na lewe ni Lotu.

2. Ni wilika vakamatavuvale na ivolanikalou ena nomuni gauna sa tuvanaki tu. Keimami vakavinavinaka kivei kemuni ko ni sa vakayacora tiko na ka oqo ka ko ni sa vakauqeti o kemuni ko ni se bera tiko ni cakava mo ni sa tekivu sara ga oqo. …

Me da sa qai dui gumatua yani ena yaloqaqa ni daumasu vakalevu; ni vakasaqara meda bula vakalevu cake kei na Yalotabu; ka toro voleka sara vua na Tamada mai Lomalagi kei na Luvena Daulomani ena vulici vagumatua ni ivolanikalou tabu.⁹

Na iwalewale ni wiliwili e levu tu na kena mataqali. E tiko o ira na dauwiliwili vakatotolo kei ira era vakamalua, ka so era wilika ga na veitikina lalai ena dua na gauna kei na so era guta sara ka sega ni cegu me yacova ni sa oti na ivola. Ia o ira era ilova vakatitobu na veivolanikalou, era kunea kevaka me kilai vakamatata ena gadrevi me levu cake mai na wiliwili vagauna tu ga se vakatikina—e dodonu me vakatabakiduataki na kena vulici. Sa dina sara ni dua e vulica na ivolanikalou ena veisiga ena rawa-ka vakalevu cake mai vua e dua e vakayagataka e dua na gauna levu ena dua na siga ka qai biuta ena vica na siga ka qai tekivu tale. E sega walega meda vulica ena veisiga, ia e dodonu me tiko e dua na gauna tudei vakatikitiki meda na vakatabakiduataka kina ka sega ni vakataotaki.

E sega tale ni dua na ka e veivuke vakalevu cake mai na noda rawa ni masu me tadolavi na noda kila vinaka na ivolanikalou. Mai na masu sa rawa ni da vakaduavatataka na noda vakasama meda vakasaqara na isau ni noda vakadidike. E kaya na Turaga: “Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou” (Luke 11:9). Sa tiko kina na veivakadeitaki i Karisito ni gauna eda kerekere, vakasaqara, ka tukituki kina, ena dusimaka na lomada na Yalo Tabu kevaka eda sa tu vakarau ka dina meda ciqoma.

E vuqa era raica ni gauna vinaka duadua ni wiliwili o ya ena mataka lailai ni oti mai na vakacegu ena bogi ka sa takali na lomaleqa e vuqa e dau vakataotaka na vakasama. Eso era taleitaka mera wiliwili ena gauna vakanomodi ni oti na cakacaka ka vakanadakui na lomaleqa ni veisiga, ka sa mai cava na siga ena vakacegu kei na maravu e yaco mai ena veiyaloni kei na ivolanikalou.

E rairai ni bibi cake me vakatikitikitaki e dua na kena gauna vakatabakidua mai na gauna cava ena loma ni dua na siga me caka kina na vuli. Ena uasivi sara ke me vakayagataki e dua na auwa ena veisiga; ia ke mani sega ni caka rawa oqo, me veimama na auwa ena kena gauna tudei ena rawati kina e levu na ka. Na tinikalima na miniti e lekaleka sara, ia e veivakurabuitaki na levu ni veivakararamataki kei na kila-ka ena rawati ena dua na ulutaga e vakaibalebale cake. Na ka bibi duadua o ya me kakua ni vakatarai e dua tale na ka me vakataotaka na noda wiliwili.

Eso era taleitaka mera wiliwili vakai ira ga, ia na wiliwili vakaveitokani e rawa ni yaga sara. Era na vakalougatataki vakalevu na matavuvale ni rau vakasoqoni ira mai na luvedrau o tama kei tina, wiliwili vata mai na draunipepa ni veivolanikalou, ka veivosakitaka ena galala na italanoa kei na vakasama totoka me vaka na ivakarau ni nodratou kilaka yadua. E dau vakasakiti na nodra rai kei na nodra taleitaka na itabagone kei ira na lalai na itukutuku taumada ni lotu.

E sega ni dodonu me vakaveitalia tu na noda wiliwili ia me tauyavutaki e dua na ivakarau tudei ni vuli. Eso era dau wilika na levu ni draunipepa se iwiliwili ni wase ena veisiga se dua na macawa. Oqo e na donu vinaka beka ka marautaki sara ke dua e wiliwili tu ga me ivakawele, ia e sega ni o koya qori na vuli e vakaibalebale vakalevu cake. E vinaka cake me dua na ituvatuva ni gauna ni kena vulici na ivolanikalou ena veisiga mai na kena wiliki tu ga e vica na wase. Eso na gauna eda raica ni kena vulici e dua ga na tikina ena taura na gauna taucoko.¹⁰

Ni vakasamataki na itukutuku vakaivolanikalou i Jairo e kauta mai na titobu cecere ni kena kilai vinaka kei na kena ibalebale.

Na bula, cakacaka, kei na ivakavuvuli i Jisu Karisito ena rawa ni wiliki vakatotolo. Ena so na vanua e rawarawa sara na italanoa ka vakaitukuni tu ga na itukutuku. E vakayagataka walega e vica na vosa na Vakavuvuli ena nona ivakavuvuli, ia era matata yadua na kedra ibalebale ni kovuti vata e vakaraitaka e dua na iyaloyalo matata vei koya e wilika. Ia, eso na gauna, e dau vakayagataki e vuqa na auwa ena kena vakasamataki na veika bibi e vakamacalataki ena vica ga na vosa rawarawa.

Dua na ka a yaco ena nona bula na iVakabula eratou tukuna o Maciu, Marika, kei Luke. E dua na tiki bibi ni italanoa oqo a tukuna o Marika ena rua walega na tikina leleka ka lima na vosa na tikina e tarava. …

“Ka raica, sa lako mai e dua na turaga ni valenilotu, ko Jairo na yacana; ia ni sa raici koya [o ya ni sa raici Jisu], sa cuva sobu ki na yavana,

“A sa vakamasuta vakalevu, ka kaya, Na luvequ yalewa lailai sa voleka sara ni mate: mo ni lako mai mo ni tabaki koya ena ligamuni, me vakabulai kina; ena qai bula ko koya.

“A sa lako vata kaya ko koya” (Marika 5:22–24).

Na balavu ni gauna ni kena wiliki na tikina o ya e via tolusagavulu na sekodi. E lekaleka wale ka sega ni dredre. E matata na kena raitayaloyalotaki ka sega ni dredre vua e dua na gone me cavuta. Ia ni da taura na gauna meda vakanananu ka vakasamataka, ena yaco me titobu sara na noda kila kei na kena ibalebale. …

…Ia ni oti nodratou kosova tale o Jisu kei na nona ilawalawa na Wasawasa o Kalili, a ra sa sotavi koya mai e lewevuqa na tamata ena baravi voleka i Kapenaumi. “Ka raica, sa lako mai e dua na turaga ni valenilotu.” Ena gauna o ya era dau veiliutaki ena veivalenilotu na ilawalawa italatala qase ena veidusimaki ni dua na tui se daunilewa. Oqo e dua na tamata e vakaitutu cecere ka kilai levu ka raici cake mai vei ira na Jiu ena veidokai.

A sega ni vola o Maciu na yacai koya na qase iliuliu oqo, ia a vakatakila o Marika ena nona kuria ki na nona itutu na vosa,“ko Jairo na yacana.” E sega tale ni dua na ivolanikalou e kune kina na yacai koya na turaga oqo vakavo ga ena tikina oqo, ia e dau nanumi tu ga na kena italanoa baleta na nona sota lekaleka kei Jisu. E vuqa, ka vuqa sara na bula ni tamata era sa daunanumi tu ga ke sega era sa guileca yani vakavo ga ni a tara na nodra bula na iVakavuvuli ka yaco kina e dua na veisau levu ni vakasama kei na ivalavala kei na dua na bula vou ka vinaka cake.

“Ia ni sa raici koya [o ya ni sa raici Jisu], sa cuva sobu ki na yavana.”

Oqo e ka vou sara ki na dua na tamata e vakaitutu cecere ka kilai levu, e dua na iliuliu ni valenilotu, me cuva e yavai Jisu-ena yavai koya e kilai tu me dua na qasenivuli veilakoyaki ena isolisoli ni veivakabulai. E vuqa tale na tamata vuku ka kilai levu era a raici Jisu talega ia era a sega ni via kilai koya. E tabonaki tu na nodra vakasama. E sega ni duidui na siga nikua; era vakataotaki e vuqa mera na ciqomi koya.

“A sa vakamasuta vakalevu [ko Jairo], ka kaya, Na luvequ yalewa lailai sa voleka sara ni mate.” Oqo na ivakarau tudei ni yaco me gole e dua na tamata kivei Karisito, sega walega me baleta na nona leqa, ia sa baleta talega na leqa levu ni dua e lomana. Na sautaninini ni domoi Jairo ni sa cavuta “Na luvequ yalewa lailai” e vakayavalata na lomada ena yalololoma ni da vakasamataka na turaga vakaitutu cecere oqo ni valenilotu e cuva sobu e yavana na iVakabula.

Sa qai yaco e dua na ivakaraitaki levu ni vakabauta: “Mo ni lako mai mo ni tabaki koya ena ligamuni, me vakabulai kina; ena qai bula ko koya.” Oqo era sega walega ni vosa ni vakabauta ni dua na tama e mavoa ena rarawa ia sa veivakananumi talega kivei keda ni cava ga e tara na ligai Jisu sa yaco kina na bula. Kevaka e tara o Jisu e ligana e dua na vakamau, ena bula. Kevaka e vakatarai me tara e ligana e dua na matavuvale, ena bula.

E tarava sara na vosa, “a sa lako vata ko koya”. Eda na sega beka ni nanuma ni ka sa yaco oqo sa tuvanaki tu me yaco ena siga o ya. A takosova lesu mai na Vakavuvuli na wasawasa ka ra sa waraki koya tu mai na lewevuqa ena matasawa me vakavulici ira. … A vakataotaki o Koya ena nona vakamamasu e dua na tama. A rawa sara ga vua me raibaleta na vakamamasu o ya baleta ni vuqa tale era sa wawa tiko mai. E rawa sara ga me kaya vei Jairo ni na mai raici luvena yalewa ni mataka, ia “a sa lako vata ko koya.” Kevaka meda na muria na weniyava ni Vakavuvuli, eda na osooso beka ka da raibaleta na nodra leqa na wekada?

E sega ni gadrevi me tomani tale na kena wiliki na vo ni italanoa. Ni ratou sa yaco yani ki na vale nei iliuliu ni valenilotu, a taura na ligai goneyalewa lailai ko Jisu ka vakabulai koya mai na mate. Ena sala vata oqo, ena taura ka laveta cake na tamata yadua ki na dua na bula e vou ka vinaka cake kivei koya ena vakatara na iVakabula me taura na ligana.¹¹

Na iVola i Momani kei na Vunau kei na Veiyalayalati ena kauti keda vakavoleka vua na Karisito.

Na iVola i Momani

E dua vei ira na ivurevure bibi sa vakarautaka tu na Turaga me vukei keda meda rawata na cakacaka vakalou oqo o ya na iVola i Momani, e vakatokai “E Dua Tale na iVakadinadina kei Jisu Karisito.” E vakasalataki keda vakadodonu o [Peresitedi Ezra Taft Benson] meda kakua ni guce ena wilika ka muria na ivakavuvuli era tiko ena ivolanikalou tabu oqo. “Na kena ilesilesi cecere,” e vakavulica vei keda, “ o ya me kauta mai na tamata vua na Karisito [ka vakakina vua na Tamada], ka sa kena isasavu ga na veika tale eso.” (Ensign, Me 1986, t. 105.) Keimami nuitaki kemuni na tacida kei na ganeda ko ni sa vakania tiko na yalomuni ena kena wiliki tiko vakawasoma na iVola i Momani kei na ivolanikalou tale eso ka vakayagataka ena nomuni cakacaka vakalotu.¹²

Na iVola i Momani e vosa ni Kalou. Keimami sa sureti kemuni mo ni wilika na itukutuku totoka oqo. Sai koya na ivola totoka dina e tiko ena gauna oqo. Wilika vakavinaka ena masumasu, ni ko cakava oqo, na Kalou ena solia vei iko e dua na ivakadinadina ni sa ka dina me vaka a yalataka o Moronai (raica na Moronai 10:4).¹³

Mai na kena wiliki ka vulici na iVola i Momani, ka vakasaqara ena masumasu ni sa dina na kena itukutuku, eda na ciqoma e dua na ivakadinadina ni o Josefa Simici a parofita ni Kalou kei na Lotu i Jisu Karisito sa vakalesui mai ki vuravura.¹⁴

Ena yaco na veika mana ki na nomu bula ni ko wilika na [iVola i Momani]. Ena vakarabailevutaka na nomu kila na sala e veimaliwai kina na Kalou kei ira na tamata ka na yaco mo gadreva vakalevu mo bula vata kei na nona ivakavuvuli ni kosipeli. Ena vakarautaka talega vei iko me dua na nomu ivakadinadina kaukauwa baleti Jisu.¹⁵

Na Vunau kei na Veiyalayalati

Sa dua na ivola cecere na Vunau kei na Veiyalayalati. Sai koya na ivola duadua ga e vuravura taucoko e vakarautaka sara ga na Dauniveibuli na kena ivakamacala taumada. Me kena ikuri, e tiko ena ivolanikalou oqo e vuqa sara na nona vosa na Turaga ni vakatauvatani kei ira na veiivolanikalou tale eso.

E sega ni vakadewataki kina e dua na itukutuku makawa, ia e buli vou sara ga. Oqo na ivola ni ivakatakila me baleta na noda siga edaidai. Sai koya e dua na vakasoqoni ni ivakatakila veivakauqeti e cecere ka vakalou e tadu mai vei ira na parofita ni Kalou ena noda siga edaidai me saumi kina na lomatarotaro, kauwai, kei na bolebole era sotava kei ira tale eso. Era tiko kina na isau ni taro vakalou me baleta na leqa era sotava dina tu na tamata. …

O kila beka ni gauna o wilika kina na Vunau kei na Veiyalayalati o sa na rogoca na domo ni Turaga mai na ivolanikalou? [raica na V&V 18:33–36]. … Na domo o ya ni veivakararamataki ena dau yaco mai ki na nomu vakasama me “vakanananu” ka yaco me “vakila” na yalomu (raica na V&V 8:1–3). Na yalayala me baleta na ivakadinadina o ya sa … vakarautaki tu me nodra na tagane, yalewa kei na gone yadua bula kilikili era vakasaqara ena masumasu na ivakadinadina vakaoqo. Sa qai sega beka ni dodonu vei keda yadua meda wilika, vulica, ka masulaka na ivakatakila tabu oqo?¹⁶

Vakatutu ni Vuli kei na Veivakavulici

Taro

Na veika cava e sa vukei iko mo kila ni vulica na ivolanikalou “sa vuliyaga duadua ni vuli kecega”? (Raica na iwasewase e 1.) Eda na vaqaqacotaka rawa vakacava na noda dina meda “yalewa kei na tagane era kila vinaka na ivolanikalou”?
Ena vukei keda vakacava na noda vulica na ivolanikalou meda talairawarawa cake kina? (Raica na iwasewase e 2.) O sa bau raica vakacava ni “vosa i Karisito sa tukuna vei kemudou na veika kece mo dou kitaka”? (2 Nifai 32:3).
Na iusutu cava ni ivakasala nei Peresitedi Hunter me baleta na vulici ni ivolanikalou ena rawa ni vukei iko? (Raica na iwasewase e 3.) E sa vakalougatataki iko vakacava ni ko vulica tikoga ena masumasu na ivolanikalou?
Na veivakararamataki cava eda rawa ni taura mai na itukutuku nei Peresitedi Hunter me baleta na nona vakabula na iVakabula na luvei Jairo yalewa? (Raica na iwasewase e 4.) Ena vakabulabulataka rawa vakacava na nomu vulica na ivolanikalou ni ko vakasamataka vakatitobu e vica walega na tikina?
E sa veivuke vakacava na iVola i Momani kei na Vunau kei na Veiyalayalati mo toro voleka kina vua na iVakabula? (Raica na iwasewase e 5.) Na cava eso tale na sala sa vakauqeti iko kina na veivola tabu oqo? Sa rawa mo wasea na nomu ivakadinadina baleta na ivolanikalou oqo vei iratou e vale kei na so tale.

iVolanikalou Veisemati

Josua 1:8; Vakaibalebale 30:5; 1 Nifai 15:23–24; 2 Nifai 3:12; Alama 31:5; 37:44; Ilamani 3:29–30; V&V 98:11

Veivuke ni Veivakavulici

“Na wilika, vulica, ka tugana e sega ni tautauvata. Eda na wilika ka kunea beka eso na vakasama. Eda na vulica ka kunea na iwalewale kei na veisemati tiko ni ivolanikalou. Ia ni da tugana, eda sa sureta tiko na ivakatakila mai vua na Yalotabu. Vei au, na tugana, sa ikoya na kena vakasamataki kei na masu ni oti na noqu wilika ka vulica vakavuku sara na ivolanikalou” (Henry B. Eyring, “Veiqaravi ena Yalotabu,” Ensign se Liaona, Nove. 2010, 60).