Wase 2

“Au sa Laiva Vei Kemudou na Noqu Vakacegu”

Na vakacegu ena rawa duadua ga ni lako mai vua e dua ena nomu sorovaki iko vakadua—sorovaki iko vua na Tui ni Sautu, o koya e tu vua na kaukauwa me solia na vakacegu.”

Na Bula nei Howard W. Hunter

E dua na itokani nei Peresitedi Howard W. Hunter ena Kuoramu ni iApositolo Le Tinikarua e vakamacalataki koya ni dua na turaga e “matalia na vosota vakadede e tu vua ka vu mai na vakacegu cecere e loma.”¹ E dau vosa vakavuqa o Peresitedi Hunter me baleta na vakacegu e loma, ka vakavuvulitaka ni na qai ciqoma ga e dua na tamata ni sa gole vua na Kalou—ena nona vakabauti Koya, vakabauta, ka segata me cakava na Lomana. Na vakacegu oqori a vukea nona tokoni tiko ena vuqa na gauna dredre.

Ena mua ni 1975 a vakatura kina e dua na vuniwai me sele na mona nei wati Peresitedi Hunter o Claire. A vakasamataka vakabibi o Peresitedi Hunter se na vinaka vei Claire na veisele oya, baleta ni na vakaoca na yagona malumalumu ka sega ni vakavinakataka cake na ituvaki ni nona bula. A lako ki na valetabu, veitalanoa kei ira na lewe ni matavuvale, ka vakila ni inuinui vinaka duadua ni vakacegu vei Claire me sele. Ni vakamacalataka na ivakarau ni yalona ena siga ni veisele, a vola kina vaqo:

Au sala vata kei koya ki na katuba ni valeniveisele, reguci koya, ka curutaki yani e katuba. Ni toso na gauna, au wawa ka lomatarotaro. … Vakasauri sa vuki na nuiqawaqawa ki na dua na yalovakacegu. Au kila ni sa tau na lewa dodonu ka sa saumi na noqu masu.”²

Ena 1989, a sotava tale o Peresitedi Hunter e dua na ka a vakila kina na vakacegu ena loma ni dua na gauna leqaleqa. A tiko mai Jerusalemi me vakatabuya na Brigham Young University Jerusalem Center me baleta na Near Eastern Studies. E vica vata na ilawalawa era kudruvaka na kena tiko na Lotu mai Jerusalemi, ka so era veivakarerei ni na yaco eso na ivalavala kaukauwa. E dua vei ira na vosa ena vakatatabu o Elder Boyd K. Packer ena Kuoramu ni iApositolo Le Tinikarua, a qai talanoataka e muri na veika a yaco:

“Niu vosa tiko, a yaco eso na maqusa ena olo e muri. Era curu mai eso na tamata vakaunifomu ni sotia. Era kauta e dua na ivola vei Peresitedi Hunter. Au vuki ka kerea na veidusimaki. Qai kaya mai ko koya, ‘E tukuni mai ni na kacabote e dua na gasaukuro. O bau rere?’ Au kaya, ‘Sega.’ Qai kaya mai o koya, ‘O au talega e sega; vakaotia nomu vosa”³ A toso ga na lotu ni vakatatabu ka sega ni dua na ka e leqa; a sega ni dua na gasaukuro.

Ena veigauna vakaoqo, e dau vakanuinui o Peresitedi Hunter ena yalayala oqo ni vakacegu mai vua na iVakabula, ka dau cavuta vakavuqa o koya: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa na yalomudou se rere.” (Joni 14:27).

Karisito vata kei Pita e wai — Sa dodonu me “coba dei tiko na matada vei Jisu” ka kakua sara ni “vagolea tani na matada mai vua e dodonu me da vakabauta.”

iVakavuvuli nei Howard W. Hunter

O Jisu Karisito na ivurevure ni vakacegu tudei.

Ena nona sa tukuna rawa tiko na sucu i Karisito sivia na 700 na yabaki ni se bera ni yaco, a vakayagataka na parofita o Aisea na itutu eso ka vakaraitaka kina na nona qoroqoro. … E dua vei ira na itutu oqori ka taleitaki vakalevu ena noda vuravura ena gauna oqo na “Tui ni Sautu” (Aisea 9:6). “Ena sega ni oti na kena tubu na nona lewa kei na sautu,” e kaya o Aisea (t. 7). Sa dua na inuinui vakasakiti ena vuravura ni veivaluvaluti ka sinai ena ivalavala ca!⁴

Na vakacegu e gadreva o vuravura e gauna ni veilecalecavi; e sega tiko ni kila na tamata ni vakacegu e dua na ituvaki ni bula ena qai yaco ga mai vua na tamata ena ivakarau sa virikotora na Kalou, ka sega tale ni dua na sala.

Ena dua na same ena iVola i Aisea: “Ko koya sa lomadei vei kemuni ko ni na vakacegui koya dina sara: ka ni sa vakararavi vei kemuni.” (Aisea 26:3.) Na vakacegu uasivi sara oqo ka tukuna o Aisea ena yaco ga vua e dua ena vakabauta na Kalou. Oqo e sega tiko ni ciqoma rawa e dua na vuravura tawavakabauta.

Ena iotioti ni gauna e vakayakavi kina vata kei iratou na Lewe Tinikarua, a vuya na yavadratou, dovia na madrai ena vukudratou, ka solia yani vei iratou na bilo; oti, ni sa biuti iratou o Jutasa, a vosa vakabalavu vei iratou na Mesaia. Ena maliwa ni veika tale eso, a tukuna me baleta na nona mate sa voleka mai kei na ivotavota sa laiva koto me baleti iratou yadua. E sega ni dua na ka vinaka, iyau, se na ilavo e taukena. E tukuni vei keda ena kena itukutuku ni sega tale ni dua na ka e taukena, na isulu ga e daramaka, ia ena siga ka tarava ni oti na nona mate ena kauveilatai era na wasea na sotia, ka ra na vakawirimadigitaka na nona kote. A tau na nona isolisoli vei iratou na nona tisaipeli ena veimalanivosa rawarawa ka bibi oqo: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa na yalomudou se rere.” (Joni 14 : 27)

A vakayagataka na ivakarau vaka-Jiu ni veivakacaucautaki kei na veitalatala: “Au sa laiva vei kemudou na noqu vakacegu.” Na veivakacaucautaki kei na isolisoli oqo me kakua ni tauri me vaka na kena ivakarau, ni kaya vakaoqo o koya, “… au sa sega ni solia vei kemudou me vaka sa solia ko vuravura.” Sega ni gagadre lala, sega ni soqo vakalomavinaka ga, me vaka nodra vakayagataka na kai vuravura na vosa me kena ivakarau ga; ia me vaka ni o koya a vakatekivuna ka Tui ni sautu, a solia kina ko koya vei ira. A solia ko Koya vei ira ka kaya, “Me kakua ni rarawa na yalomudou, se rere.” Ena loma ni vica na auwa era sa na rawa ni sotava na leqa, ia ena nona vakacegu era na vakadruka kina na rere ka tudei tu.

Na iotioti ni Nona malanivosa vei iratou ena yakavibogi guiguilecavi dredre ko ya ni bera na isogomasu ni soqoni e vaqo: “… Dou na kunea e vuravura na rarawa: ia mo dou vakacegu; au sa vakamalumalumutaki vuravura.” (Joni 16:33.)⁵

Eda na vakatubura na vakacegu ni da bulataka na ivakavuvuli ni kosipeli.

E dua ga na liga ni veituberi ena vuravura taucoko, e dua ga na rarama dina ka sega ni guce rawa, dua ga na bikeni sega ni druka rawa ni vuravura. Na rarama sai Jisu Karisito, na rarama kei na bula ni vuravura, na rarama ka vakamacalataka e dua na parofita ni iVola i Momani me “rarama sa tawamudu ka sega ni tabonaki rawa.” (Mosaia 16:9.)

Ni da vakasaqara na baravi ni veitaqomaki kei na vakacegu, se da tamata yadua tagane kei na yalewa, matavuvale, mataitikotiko, se veimatanitu, sai Karisito duadua ga na bikeni e rawa ni da vakararavi vakatabakidua kina. Sai Koya ga a tukuna me baleta na nona itavi, “Koi au na sala, kei na vu ni dina, kei na vu ni bula.” Joni 14:6 …

Vakasamataka mada, me kena ivakaraitaki, na ivakasala oqo nei Karisito vei ira nona tisaipeli. E kaya vaqo, “Ia raica au sa kaya vei kemudou dou lomani ira na nomudou meca dou vosavinakataki ira sa rukaki kemudou dou cakavinaka vei ira sa cati kemudou ka masulaki ira sa vakacacani kemudou ka vakararawataki kemudou.” Maciu 4:10

Vakasamataka mada na ka e rawa ni vakayacora ena nomu itikotiko kei na noqu na ivakasala duadua ga oqo, ena veitikotiko dou tiko kina o iko kei ira na luvemu, ena veimatanitu ka ra lewena na noda matavuvale cecere ni vuravura raraba. Au kila ni ivunau oqo e tiko kina e dua na bolebole bibi, ia e bolebole vinaka cake mai na itavi rerevaki e kauta mai vei keda na ivalu kei na bula dravudravua kei na mosi e sotava tiko na vuravura.⁶

Ni da tovolea me da vukei ira era dau vakacudrui keda, ni da masulaki ira era vakayagataki keda vakatawadodonu, ena rawa ni totoka na noda bula. E rawa ni da vakacegu ni da mai duavata kei na Yalo kei keda vakataki keda ni da qarava na Turaga ka rokova na nona ivunau.⁷

Na vuravura eda bula tiko kina, se da voleka ki vale se yawa sara, e gadreva na kosipeli i Jisu Karisito. E vakarautaka na sala duadua ga ena kila kina ko vuravura na vakacegu. … Eda gadreva e dua na vuravura ni vakacegu vakalevu cake, ka tubu mai na veimatavuvale, veiyasanikoro kei na itikotiko sautu. Me vakadeitaka ka vakabulabulataka na vakacegu vakaoqori, “e dodonu me da lomani ira na tani, ko ira mada ga na keda meca ka vakakina ko ira na noda itokani” [Nodra iVakavuvuli na Peresitedi ni Lotu: Josefa Simici (2007), 453]. … Ena gadrevi me da dodoka yani na liga ni veitokani. Eda na gadreva me da dau yalovinaka vakalevu cake, ivalavala malua vakalevu cake, dau veivosoti vakalevu cake, ka berabera ni cudru.⁸

Na nona ivalavala cecere ni bula na Kalou sai koya na veivakauqeti kei na dauvosota kei na vosota vakadede, sega na vakasaurara se veivakatotogani. E dau cakacaka o Koya ena vakatakekere malumu kei na veivakauqeti kamica.⁹

E sega ni dua na yalayala ni vakacegu vei ira era besetaka na Kalou, vei ira era na sega ni rokova na nona ivakaro, se o ira era voroka na nona lawa. E tukuna na Parofita o Aisea me baleta na torosobu kei na vakaveitalia ni nodra bula na iliuliu ka tomana na nona ivakasala ena nona tukuna: “Ia ko ira na tamata ca era sa vaka na wasawasa seuseua, ni sa sega ni cegu rawa, na kena wai sa uana tiko mai na qele kei na lolobo. Sa sega na vakacegu, sa kaya na noqu Kalou, vei ira na tamata ivalavala ca.” Aisea 57:20–21 …

… Na vakaduiduile vua na iVakabula se ni sega ni muri na ivakaro ni Kalou ena kauta mai na sega ni taqomaki, na duiyaloyalo kei na veiqati. O ira oqo na veibasai ni vakacegu. Na vakacegu ena yaco ga vua e dua ni sa soro vakadua—soro vei koya na Tui ni sautu, o koya e tu vua na kaukauwa me solia na vakacegu.¹⁰

Na leqaleqa ni vuravura ka dau kacivaki ena veiulutaga matailelevu e dodonu me vakananuma vei keda me da dau vakasaqara na vakacegu ka dau yaco mai ni da bulataka na ivakavuvuli rawarawa ni kosipeli i Karisito. O ira na lewevica domo kaukauwa era na sega ni vakacacana na vakacegu ni yaloda kevaka eda lomani ira na kainoda ka vakabauta na isoro ni veivakaduavatataki ni iVakabula kei na veivakadeitaki malumu e dau solia me baleta na bula tawamudu. Evei eda na kunea kina na vakabauta vakaoqori ena dua na vuravura leqaleqa? E kaya na Turaga, “Dou kerekere ka na soli vei kemudou dou vakasaqara ka dou na kunea dou tukituki ka na dolavi vei kemudou. Ni sa rawata ko koya yadua sa kerekere ka sa kunea ko koya sa vakasaqara ka na dolavi vua sa tukituki.” (Luke 11:9–10.)¹¹

E kena irairai ni sa dodonu me na ciqoma na tamata kecega e rua na dina tawamudu kevaka me da na kunea na vakacegu ena vuravura oqo kei na bula tawamudu ena vuravura sa bera mai. (1) Ni o Jisu na Karisito, na luvena tawamudu na Tamada Vakalomalagi, ka lako mai ki vuravura ena inaki bibi ni noda vueti na kawatamata mai na ivalavala ca kei na ibulubulu, ka bula tiko me na kauti keda yani ki na iserau nei Tamada. (2) Ni o Josefa Simici e nona parofita, a tubucake ena gauna oqo me vakalesuya mai na dina ka sa yali mai na kawatamata ena vuku ni talaidredre. Kevaka e ciqoma ka bulataka na tamata kecega na dina bibi e rua oqo, ena yaco mai ki vuravura na vakacegu.¹²

Kevaka o iko, vakataki iko, o vorata … na veitemaki ka nakita mo sauma e veisiga na kena isau, mo bulataka na Lawa ni Tatamusuki ena vakanananu kei na ivalavala savasava, ena iwalewale dodonu ka dina, ena vuli ena ivakarau dokai, ena lolo, masu, kei na sokalou, o na tamusuka na vuana ena bulagalala na vakacegu kei na sautu e loma.¹³

Na bula e vakasinaiti ena veiqaravi sega ni nanumi koya ga ena vakasinaiti talega ena vakacegu ka sega ni vakasamataki rawa. … Na vakacegu oqori ena yaco duadua ga ena bulataki ni ivakavuvuli ni kosipeli. Na ivakavuvuli oqori e lewena na nona parokaramu na Tui ni Sautu.¹⁴

Sa rui levu na ka ena noda vuravura e nakiti me vakarusa… na vakacegu ni tamata yadua ena ivalavala ca kei na veitemaki e udolu na kena veimataqali. Eda masuta me bulataki na nodra bula na Yalododonu me salavata kei na ivakaraitaki sa mai virikotora vei keda o Jisu mai Nasareci.

Eda masuta me na vakamalumalumutaki na igu nei Setani, me sautu ka taumalua na bula ni tamata yadua, me veivolekati na matavuvale ka ra kauwaitaki na lewena yadua, me tarai cake ena tabanalevu kei na iteki, tabana kei na tikina na isoqosoqo i Karisito, me sotavi na gagadre kece sara, vakarurugi na mosi, vakamamacataki na mavoa kecega me yacova ni sa, me vaka a kerea o Nifai, “Mo dou toso ki liu ka tudei vei Karisito, ena nomudou vakanuinui taucoko sara, mo dou lomana na Kalou kei na tamata kecega. …

“Oi kemudou na wekaqu lomani,” e tomana o Nifai, “sai koya oqo na sala; ia sa sega sara e dua tale na sala.” (2 Nifai 31:20–21.)¹⁵

“Na bula e vakasinaiti ena veiqaravi sega ni nanumi koya ga ena vakasinaiti talega ena vakacegu ka sega ni vakasamataki rawa…”

E rawa ni vukei keda na iVakabula me da kunea na vakacegu veitalia na yavavala e tu wavoliti keda .

A sega ni vakuwai o Jisu ena yaluma kei na mosi kei na rarawa kei na veivakacacani. E sega na yame me na tukuna rawa na icolacola sega ni vakamacalataki rawa a colata ko koya, e sega talega vei keda na yalomatua me da ciqoma rawa na ivakamacala ni parofita o Aisea me baleti koya ni “tamata e dau rarawa na lomana.” (Aisea 53: 3.) A veisuayaki vakalevu na nona waqa ena vuqa na gauna ni nona bula, ia, ena mata vakatamata, a laki voca ena baravi veivatu mai Kalivari. Eda sa kerei me da kakua ni raica na bula ena mata vakatamata; ena rai vakayalo eda kila ni duatani na ka a yaco ena kauveilatai.

E koto na vakacegu ena tebenigusuna na iVakabula veitalia na voravora ni cagilaba a liwa tiko. Me vakakina vei keda—ena dui yaloda, ena noda veivale, ena noda veimatanitu e vuravura, kei na veivakacacani sara mada ga e dau sotava na Lotu ena veigauna eso. E sega ni dodonu me da namaka me da mai lakova na bula vakatamata yadua se vakaisoqosoqo ka sega na kena veisaqasaqa.¹⁶

Ena bula beka e dua ena maliwa ni veika totoka ka sautu ia, baleta na veisaqasaqa kei na sega ni veiyaloni e loma, eda dau sotava kina na bula yavavala e veigauna. Ena dua tale na yasana, ena tu beka e dua ena loma ni veivakarusai kei na vakadavedra ni ivalu ia e tu ga vua na bulamaravu ni vakacegu sega ni vakamacalataki rawa. Kevaka eda raica na tamata kei na sala vakavuravura, eda na kunea na bula yavavala kei na veilecayaki. Kevaka walega eda gole vua na Kalou, eda na kunea na vakacegu ni yalo ma-sa. Oqo a vakamatatataki mai na nona vosa na iVakabula: “Dou na kunea e vuravura na rarawa” (Joni 16:33); kei na nona isolisoli vei iratou na Le Tinikarua kei na kawatamata kecega, e kaya kina o koya, “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura. …” (Joni 14:27.)

Eda rawa ni kunea na vakacegu oqo ena gauna oqo ena dua na vuravura ni veilecalecavi kevaka walega eda ciqoma na nona isolisoli cecere kei na nona ikuri ni veisureti: “Dou lako mai vei au, koi kemudou vakaadua ga sa oca ka colata na icolacola bibi, kau na vakacegui kemudou.

Vakataqara vei kemudou na noqu ivua ka vuli vei au niu sa yalomalua ka yalomalumalumu dou na kunea kina na vakacegu ni yalomudou (Maci. 11:28–29.)

Na vakacegu oqo ena vakarurugi keda mai na tiko yavavala ni vuravura. Na kilaka ni bula tiko na Kalou, ni o keda na luvena, ka ni lomani keda o koya ena vakaruruya na lomaleqa. Na isau ni taro e koto ena vakabauta na Kalou kei na Luvena o Jisu Karisito. Oqo ena kauta mai vei keda na vakacegu ena gauna oqo kei na tawamudu ena muri mai.¹⁷

Ena vuravura oqo ni veilecayaki kei na vakatotolo, na toso vakayago, eda gadreva me da lesu ga ki na bularawarawa i Karisito. … Eda gadreva me da vulica na veika bibi rawarawa ni dina a vakavuvulitaka na iVakavuvuli ka biuta laivi na veika sega ni dina. Sa gadrevi me ka dina na noda vakabauta na Kalou ka sega ni ka e nanumi tu ga. Na kosipeli vakalesui mai i Jisu Karisito e rawa me dua na veivakauqeti vakasakiti ni toso, ni ciqomi vakaidina ena solia vei keda na kilaka vakalotu vakaibalebale. E dua na kaukauwa cecere ni vakabauta vaka-Momani oya na kena matanataki na vakabauta me ivakarau ni vakasama ka itovo ni bula e veisiga yadua. Oqo ena vakaisosomitaka na tiko yavavala kei na veilecayaki ena vakacegu kei na bulasautu.¹⁸

Ni vakanamata noda rai vei Jisu, eda na vakadruka na veika eso e dau vakarusa na vakacegu.

Meu nanuma lesu mada e dua na italanoa cecere ni qaqa nei Karisito ena veika e vaka me dau temaki keda ka vakatovolei keda ka kauta mai na nuiqawaqawa ki na lomada. Ni ra lako yani na tisaipeli nei Karisito ena dua na nodra ilakolako dau yaco wasoma, kosova na Wasawasa e Kaleli, e butobuto na bogi ka kaukauwa ka voravora na draki. E cudrucudru na ua ka tu doudou na cagi, era rere na tamata vakayago ka malumalumu oqo. E kalouca ni sega ni dua e tiko vata kei ira me vakabulai ira, ni a biu duadua tu yani mai baravi o Jisu.

Me vaka na kena ivakarau, a vakatawai ira tiko o koya. E lomani ira ka kauwaitaki ira. Ena gauna ni nodra rere levu duadua era rai yani ka raica ena loma ni butobuto na iyaloyalo ni dua ena icurucuru cecereburebu, ni lako voli yani vei ira ena dela ni ua. Era qolou ena domobula ena ka era raica, era nanuma ni dua na yalo sa lako yani ena dela ni wai. Ena loma ni cava kei na butobuto ki vei ira—me vaka e dau vakavuqa vei keda, ena maliwa ni veigauna butobuto ni bula, e vaka me dau vakaitamera na wasawasa ka ra somidi na noda waqa lalai—qai rogo mai na domo qaqa e veivakadeitaki ka veivakacegui ena itukutuku matata oqo, “Dou vakacegu; koi au ga; dou kakua ni rere.” A vosa vei koya ko Pita ka kaya, “Na Turaga, kevaka sai kemuni, kacivi au meu bau yani vei kemuni e dela ni wai.” Na nona isaunitaro o Karisito ki vua e tautauvata vei keda kece: “Lako ga mai.”

E rika o Pita mai na yasa ni waqa ki na wasawasa voravora, ia ni vakanamata tiko na matana vua na Turaga, ena cacaginagina beka na drauniuluna ena cagi ka suasua nona icurucuru ena sese ni ua, ia e vinaka tu na ka taucoko. Ia ena gauna ga sa yavala kina nona vakabauta ka vagolea tani na matana mai vua na iVakavuvuli me raica na ua cudrucudru kei na qakilo loaloa e rukuna, ena gauna ga oqori sa tekivu me lutudromu kina. Vakadua tale, me vaka e vuqa vei keda, a kacivaka, “Na Turaga, ni vakabulai au.” A sega ni laivi koya o Jisu. A dodoka yani na ligana ka taura mai na tisaipeli sa lutudromu ena vosa malua ni veivunauci, “O iko sa lailai na nomu vakabauta o sa vakatitiqa ena vuku ni cava?”

Ia ni ratou sa tiko ka taqomaki ena loma ni nodratou waqa lailai, eratou sa raica ni sa ruru na cagi ka malumu sara na ua. Sega ni dede eratou sa yaco ki na nodratou ivakavakacegu, nodratou toba maravu, na vanua eda gadreva kece me da tiko kina ena dua na siga. Era sa kurabui ka qoroqoro vakalevu na kaimua kei na nona tisaipeli. Eso vei ira era kacivi koya ena itutu au tukuna nikua: “Sa dina sara kemuni sa Luve ni Kalou.” (Tauri mai na Farrar, The Life of Christ, pp. 310–13; raica na Maci. 14:22–33.)

Sa noqu vakabauta tudei ni kevaka, vakatamata yadua, vakamatavuvale, vakamataitikotiko, vakamatanitu, e rawa vei keda, me vakataki Pita, me vakanamata noda rai vei Jisu, o keda talega eda na lako ena qaqa ena dela ni “ua voravora ni tawavakabauta” ka sega ni “rere ena maliwa ni cagi cevaruru ni vakatitiqa.” Ia kevaka eda vagolea tani na matada mai vua e dodonu me da vakabauta, me vaka e dau rawarawa vei keda ka dau temaki vakalevu na vuravura me cakava, kevaka eda raica na kaukauwa kei na voravora ni veika rerevaki dauveivakarusai e wavoliti keda tu ka sega vua e rawa ni vukei keda ka vakabulai keda, eda na luvu dina ena wasawasa ni veilecalecavi kei na rarawa kei na yaluma.

Ena gauna vakaoqori ni da vakila ni sa voleka ni vakaluvuci keda na ualuvu ka sa voleka ni tiloma na waqa veiciriyaki ni noda vakabauta na wasa titobu, au masuta me da dau rogoca tikoga ena maliwa ni cava kei na butobuto na veivakauqeti kamica ni iVakabula kei vuravura: “Dou vakacegu; koi au ga; dou kakua ni rere.” (Maci. 14:27.)¹⁹

Vakatutu ni Vuli kei na Veivakavulici

Taro

E vakavuvulitaka o Peresitedi Hunter ni sai Jisu Karisito na ivurevure ni vakacegu dina (raica na iwasewase e 1). Na cava soti o sa sotava sa vukei iko mo kila na dina oqo? Me da rawata vakacava na vakacegu e solia tu ko Jisu?
E kauta mai vakacava vei keda na vakacegu na noda lomani ira na tani? (Raica na iwasewase e 2.) Ena vukea vakacava noda rawata na vakacegu na noda bulataka na kosipeli? Na cava e gadrevi kina ena noda rawata na vakacegu na “soro vakadua” vua na iVakabula?
Railesuva na ivakavuvuli nei Peresitedi Hunter ena iwasewase e 3. O sa sotava beka vakacava na vakataucokotaki ni nona yalayala na iVakabula me “vakacegui iko” mai na nomu icolacola ni o lako mai Vua?
Vakananuma mada na italanoa nei Peresitedi Hunter ena nona taubale e dela ni wai o Pita (raica na iwasewase e 4). Na cava e rawa ni o vulica mai na italanoa oqo me baleta na ivakarau me da kunea kina na vakacegu ena gauna ni leqa? Sa vukei iko beka vakacava na iVakabula mo “vakacegu ga” ka “kakua ni rere” ena veigauna dredre?

iVolanikalou Veisemati

Same 46:10; 85:8; Aisea 32:17; Marika 4:36–40; Roma 8:6; Kalatia 5:22–23; Filipai 4:9; Mosaia 4:3; V&V 19:23; 59:23; 88:125

Veivuke ni Veivakavulici

Sureti ira na lewe ni kalasi me ra digia e dua na iwasewase ena iwase era vinakata me ra veivosakitaka ka me dua nodra ilawalawa vata kei ira era digitaka na iwasewase vata. Vakayaloqaqataka na ilawalawa yadua me ra veivosakitaka na taro e veiwekani vata ena mua ni iwase.