Wase 16

Na Vakamau—E Dua na Veitokani Tawamudu

“Na veitokani cecere duadua ni bula e tiko ena vakamau—na veiwekani e tawacava ka tawamudu na kena bibi.”

Na Bula nei Howard W. Hunter

Ni se qai yabaki 20 o Howard W. Hunter, a sotavi Claire Jeffs ena dua na danisi ni Lotu e Los Angeles, California, ena gauna a veigadivi voli kina o Claire vata kei na dua na nona [Howard] itokani. Ni oti na danisi, era a laki qalo ua eso na itabagone qase cake. A vakayalia o Howard na nona neketai, ka bolea o Claire me rau taubale vata tu e baravi me rau vakasaqara. A kaya emuri o Howard, “Na gauna tarava keimami a gole tale kina, au sa tauri Claire, ka gole [o noqu itokani] vata kei na dua tale.”¹

Ena yabaki e tarava sa kaukauwa sara na nodrau veigadivi, ka ni oti toka volekata ni tolu na yabaki na nodrau a sota ena dua na yakavi ni vulaitubutubu, a kauti Claire o Howard ki na dua na delana totoka e raicasobu tu na wasawasa. “Keirau a [sarava] na veise ni ua mai na Pasifika ka caroba ena veivatu ena rarama taucoko ni vula,” a vola okoya. Ena bogi o ya a vosaki Claire kina o Howard me watina, ka mani vakadonuya o Claire. “Keirau a veivosakitaka na neirau ituvatuva,” a kaya o koya, “[ka] cakava e vuqa sara na vakatulewa ena bogi o ya kei na navunavuci bibi eso me baleta na neirau bula.”²

Rau a vakamau o Howard kei Claire ena Valetabu e Salt Lake ena ika 10 ni June, 1931. Ena 52 na yabaki ka tarava, sa titobu sara na nodrau veilomani ni rau susugi ira voli na luvedrau tagane, veiqaravi ena Lotu, ka sotava na nodratou bolebole ena vakabauta.

A vakatakilai ki na nodratou matavuvale na nodrau bula marau vakaveiwatini. A kaya o Robert Hunter, na makubudrau ulumatua: “Na gauna au dau vakasamataki Tukaqu Hunter kina, au dau nanuma ga vakalevu na ivakaraitaki ni dua na tagane vakawati dauloloma. … O na rawa ni vakila saraga e dua na veilomani qaqaco vei rau ruarua.”³

A matata vakauasivi na loloma nei Peresitedi Hunter kivei watina ena nona qaravi koya voli donuya na iotioti ni tini na yabaki ni nona bula, ni sotava voli na leqa bibi ni bula eso. Ena gauna a takali kina o Claire ena ika 9 ni Okotova, 1983, e a “veivakamalumalumutaki” kivei Peresitedi Hunter.⁴ E vola ni gauna a yaco kina ki na itikotiko ena siga a mate kina o koya, “sa vaka e batabata na loma ni vale, ia niu veilakoyaki voli, na ka kece sara a vakananumi au me baleti koya.”⁵

Ni oti e volekata ni vitu na yabaki na nona tiko duadua, a vakamautaki Inis Stanton o Peresitedi Hunter ena Epereli 1990. A cakava o Peresitedi Gordon B. Hinckley na nodrau vakamau ena Valetabu e Salt Lake. E a ivurevure ni veivakacegui levu kei na kaukauwa o Inis kivei Peresitedi Hunter ena gauna ni nona veiqaravi vaka Peresitedi ni Kuoramu ni Le Tinikarua kei na Peresitedi ni Lotu. A tomani koya ena vuqa na nona ilakolako me laki sotavi ira na Yalododonu e vuravura taucoko.

A vakamacalataka o Elder James E. Faust ena Kuoramu ni Le Tinikarua na veivakalougatataki nei Inis kivei Peresitedi Hunter: “Ni oti na takali nei [Claire], e a dua tu na gauna galili me vica vata na yabaki me yacova ni sa vakamautaki Inis. Rau a wasea vata e vuqa sara na veigauna marautaki kei na veika rau a sotakaya.” Ia, ni tukuni Sister Hunter cake mai, a kaya okoya, “Sa vuabale na neimami vakavinavinaka kivei iko, Inis, ena vuku ni nomu veitokani kei na nomu veikauwaitaki loloma ka gugumatua me baleti koya. Ko sa kauta mai na marau ki matana kei na reki ki vua ena veiyabaki cecere ni nona bula kei na nona ilesilesi.”⁶

veiwatini ni rau vakanadakuya na valetabu — “Ena valetabu eda ciqoma kina na cakacaka vakalotu cecere duadua e vakarautaki tu kivei ira na tagane kei na yalewa, na nodrau vauci vata tawamudu e dua na veiwatini.”

iVakavuvuli nei Howard W. Hunter

Sa qisia na Kalou me vakawati na tagane kei na yalewa ka sa navuci me ka tawamudu.

Sa vakamatatataka na Turaga kivei keda na vakamau. A kaya okoya, “Ena vuku ni ka oqo ena biuti tamana kei na tinana na tagane, ka kabita na watina: a rau na lewe dua” (Maciu 19:5).⁷

Na veitokani levu duadua ni bula e tiko ena vakamau—na veiwekani oya ka tiko na kena inaki tawacava ka tawamudu.⁸

Ena kilai ni ituvatuva ni veivakabulai me kena yavu, na tagane e taura tu na matabete ena raica na vakamau me dua na madigi tabu kei na ilesilesi. Sa sega ni vinaka vua e dua na tagane se yalewa me tiko duadua. Sa sega ni taucoko na tagane ni sega na yalewa. Rau na sega ni rawa ni vakatawana na ivakarau ni nodrau buli ke sega e dua (raica na 1 Kori. 11:11; Mosese 3:18). Sa qisia na Kalou me vakawati na tagane kei na yalewa. (raica na V&V 49:15–17). Mai na veiyalayalati vou ka tawacava duadua ga ni vakamau rau na kila kina na taucoko ni veivakalougatataki tawamudu (raica na V&V 131:1–4; 132:15–19).⁹

Sa vakatokai tu vakavuqa na vakamau me dua na veitokani vata kei na Kalou. Oqo e sega walega ni dua na mataqali ivosavosa. Kevaka mena kaukauwa ka bulabula tiko na veitokani oqo, rau na veilomani vakai rau o tagane kei yalewa me vaka rau sa lomana na Kalou, ka na yaco mai ki na nodrau itikotiko e dua na bula kamica kei na veivinakati ena kauta mai na rawa-ka tawamudu.¹⁰

Na imatai ni vakamau a vakayacora na Turaga. E a vakamau tawamudu baleta ni a sega tu kina na gauna ena kena vakayacori na soqo o ya. A vakayacori na soqo me baleta e dua na veiwatini ka sega taumada ni rawa ni mate; sa yaco kina, me na sega ni tamusuki rawa na veitokani ena ituvaki oya. Ni oti na lutu, rau a vakasavi mai na Were na noda itubutubu taumada. Rau sa qai rawa ni mate kina, ia sa yalataki vei rau na tucake tale. E a sega ni tukuni ena dua na gauna ni na laki yaco koso na nodrau vakamau tawamudu.¹¹

Ena valetabu eda ciqoma kina na cakacaka vakalotu cecere duadua e vakarautaki tu kivei ira na tagane kei na yalewa, na nodrau vauci vata tawamudu e dua na veiwatini. Eda vakanuinui ni na sega tale na ka era na guta na noda itabagone mai na vakamau ena valetabu.¹²

Me vaka ga ni sa ivakaro ni Turaga na papitaiso, sa vakakina na vakamau ena valetabu. Me vaka ni sa yaga bibi na papitaiso me leweni kina na Lotu, sa yaga bibi vakakina na vakamau ena valetabu ki na noda laki bula vakacerecerei ena mata ni Kalou. Oqo sa tiki ni noda icavacava. Eda na sega ni rawa ni vakacavara vakaoti na noda lalawaka ke sega oqo. Kakua ni yalovakacegu ena dua na ka lailai sobu.

O iko na sega ni vakadonuya e dua na ivakarau ni veipapitaisotaki vakavuravura, se vaevei? Sa tiko ga na ivakarau ni nona veipapitaisotaki na Kalou–ena tabadromuci mai vua e dua e taura tu na dodonu ni lewa. O sa na qai vakadonuya li e dua na ivakarau ni vakamau vakavuravura? Sa tiko talega na ivakarau ni nona vakamau: O ya na vakamau ena valetabu.¹³

Sa noqu masu ni na vakalougatataki keda na Turaga me rawa ni da vakila na inaki ni noda bula tiko oqo kei na ka meda cakava meda kunea kina na noda sala ki na bula vakacerecerei kei na bula tawamudu. Sa tiki ni ituvatuva tawamudu na vakamau eda vakatatabutaka. Kevaka sa lomada meda vakamuria, sa yaco na cakacaka vakalotu me ka tudei tawamudu. Sa qai dua na ka lagilagi me kilai tiko vakamatata na ka oqo ka yaco me vakatakilai kivei keda na veika dina oqo.¹⁴

Ni vakananumi voli se o cei me vakamautaki, dau yalomalua, vakabauta tiko, ka tiko kilikili voli mo ciqoma na veivuke vakalou.

Au vakabauta ni vakatulewa levu duadua mo na cakava … o ya na vakatulewa ena mai bulia na nomu bula ni veigauna tawamudu, ka sai koya o ya na nomu vakamau. Au vakadeitaka ni ko na duavata kei au ni oqo ena ka bibi cake sara mai na veika tale eso o cakava ena nomu bula, baleta na nomu cakacaka kei na nomu itutu se cava ga o na laki cakava e sega sara ni bibi cake me vakataka na yavunibula tawamudu. … [Na vakatulewa me baleta na vakamau ena] mai rawai iko ki na veigauna tawamudu; ena mai rawai iko talega ni o bula voli ena vuravura oqo.¹⁵

Kakua … ni vakusakusataka e dua na veisemati e sega ni vakasamataki taumada ka vakauqeti kina vakamaqosa. Vakasaqara ena masumasu na veidusimaki ni Turaga me baleta na ka oqo. Tiko bula kilikili ni ciqoma voli na veivuke vakalou o ya.¹⁶

E vuqa vei kemuni …. o ni lomaleqataka tiko na veimusumusuki, vakamau, kei na tekivutaki ni dua na matavuvale. Ko na rairai sega beka ni kunea na yacai koya ko na laki vakamautaka ena raivotu nei Nifai se ena ivola ni iVakatakila; ena rairai sega beka ni tukuna vei iko e dua na agilosi se o nomu bisopi sara mada ga. Eso na ka mo na cakacakataka sara ga o iko. Mo vakabauta tiko ka talairawarawa, ka na yaco mai na veivakalougatataki. Tovolea mo yalomalua. Tovolea me kakua ni vakamatabokotaki iko na ka e sega ni tiko vei iko ki na ka e sa tiko vei iko. Kevaka o lomaleqataka vakalevu na vakamau, ena rawa ni vakavevekataka na nomu rawata. Bula vakataucoko ka yalodina tiko vakaiiko ni bera ni yaco na nuiqawaqawa tawalokuci me baleta na tiko ruarua vata.¹⁷

Ni waraki tiko na veivakalougatataki sa yalataki tu, me kakua ni dua e tu ga vakadua, ni guce e dua me toso ki liu sa na yaco kina na luluqa. Mo maqusa voli ena cakacaka vinaka eso, oka kina na nomu vakatorocaketaki.¹⁸

era taubale na itabagone qase cake — “Ni waraki tiko na veivakalougatataki sa yalataki tu, … mo maqusa voli ena cakacaka vinaka eso, oka kina na nomu vakatorocaketaki.”

Ena sega ni cakitaki na veivakalougatataki ki na tamata bula kilikili yadua e sega ni vakamau.

Oqo na lotu i Jisu Karisito, sega ni nodra lotu na vakawati se tawavakawati se dua tale na ilawalawa se tamata yadua. Na kosipeli eda vunautaka sai koya na kosipeli i Jisu Karisito, ka sa umani kece tu kina na cakacaka vakalotu ni veivakabulai kei na veiyalayalati veiganiti me vakabula ka vakacerecerea kece na tamata ka sa lomana dina me ciqomi Karisito ka muria na ivakaro sa solia mai o Koya kei na Tamada mai Lomalagi.¹⁹

Ena sega ni cakitaki na veivakalougatataki ki na dua ga na tamata bula kilikilii, oka kina na vakamau tawamudu kei na matavuvale tawamudu. Me vaka ni na rairai taura toka vakabalavu—ka rawa ni yaco yani ki na taudaku ni bula oqo—kivei ira eso me rawata na veivakalougatataki oqo, ena sega ni cakitaki. …

Ia oqo, ke rawa niu solia mada eso na vosa ni veivakasalataki kei na loloma.

Kivei kemuni ko ni tagane tawavakawati: Kakua ni biuta tani na vakawati baleta ni sega ni vinaka sara tu na nomu itavi vakacakacaka kei na bula vakailavo. … Nanuma me vaka e dua ka taura tu na matabete sa nomu na ilesilesi mo liutaka na vakasaqarai ni veitokani tawamudu.

Kivei kemuni na yalewa tawavakawati: Na nodra yalayala na parofita ni Kalou e sa dau tukuna tiko ni sa kauwaitaki kemuni na Turaga; kevaka o ni sa yalodina tiko, ena nomuni taucoko na veivakalougatataki. Me sega ni rawati na vakawati kei na matavuvale ena bula oqo e sa dua na ituvaki vagauna ga, ka sa gauna balavu sara na veigauna tawamudu. E sa vakananumi keda o Peresitedi Benson ni “gauna sa wiliki duadua ga ki na tamata. Sa kila tiko na Kalou na nomu tatadra tawamudu.” (Ensign Nov. 1988, t.97.) Vakasinaita na nomu bula, ena itaviqaravi e yaga ka vakaibalebale cake.

Kivei kemuni na sa sotakaya na veisere: Kakua ni vakatara na rarawa se dua na yalo ni luluqa me rokataka na nomu raitayaloyalo me baleta na vakawati se na bula. Kakua ni vakayali vakabauta ena vakawati se vakatara na yaloca me vakavevekataka na yalomu ka vakarusai iko se o ira ko daulomana se a lomana.²⁰

Na vakawati rawa-ka vinaka sa gadreva na noda sasaga vinaka duadua meda bulataka na ivakavuvuli ni kosipeli.

Na [vakawati] … sa dua na itovo vulici. Na sasaga ni lomada e loma, sega ni vakasama, e vakadeitaka na rawa-ka. Na kaukauwa ni veivakauqeti e dewa mai na yalovinaka, veivinakati dina, kei na veikauwaitaki me baleta na bulamarau kei na tiko vinaka ni tamata yadua.

Ni bera na vakawati eda raica na bula mai na noda rai ga vakaikeda, ia ni oti na noda kalawaca yani na iyalayala o ya, eda sa tekivu navuca mai na dua tale na yasana. Sa mai gadrevi kina na solibula kei na veisau eso me ivakaraitaki ni veivakadeitaki kei na loloma.

E dau kainaki vakavuqa ni tiko vakawati marautaki ka rawa-ka vinaka sara e sega soti ni ka ni vakawatitaka na tamata donu me vakataka ni sa tamata donu ga. Na iwiliwili ka vakaraitaka tiko na ituvaki vakaiyanaqa ni veisere sa na rairai vakatakila na digidigi tawayalomatua ni itokani. Kevaka mera a vakawatitaka eso tale na tamata, sa na rawa ni a bokoci na leqa o ya, ia e rawa vakaidina ni a sosomitaka e dua tale na leqa. Na digitaki vakayalomatua ni dua na itokani sa dua na cau vakaitamera ki na dua na vakawati rawaka vinaka, ia na sasaga ni nona lewa e loma e dua me cakava taucoko na nona itavi sai koya na usutu levu duadua ki na rawaka.²¹

E dina ga ni ra na rawata na bula veivakacerecerei o ira na veiwatini bula kilikili ena matanitu vakasilesitieli, sa dodonu me na bula kilikilitaka taumada na veivakalougatataki oya na tagane kei na yalewa yadua era vauci ki na dua na veiwekani tawamudu.

Na vakamau tawamudu ena umani kina e dua na tagane bula kilikili kei na dua na yalewa bula kilikili, ka rau sa dui papitaisotaki ena wai kei na Yalotabu; ka rau sa dui gole yadua ki na valetabu me rau laki ciqoma na nodrau dui edaumeni; ka rau sa dui yalataka me rau na yalodina tiko vua na Kalou kei na nodrau itokani ena veiyalayalati ni vakamau; ka rau sa dui maroroya tiko na nodrau veiyalayalati, ka cakava voli na veika kece sa namaka vei rau na Kalou.²²

Na bulataki ni ivakavuvuli ni kosipeli e vakavurea na vakawati bula marau. … Ni bulataka rawa e rua na tamata na ivakavuvuli ni kosipeli, sa na rawa ni kamikamica na vakawati ka marautaki talega.²³

Sa dodonu me rau cakacaka vata na veiwatini ena vaqaqacotaki ni ivau ni vakamau.

Na loloma kei na vosota tiko ena malumalumu eso.

E levu na veitokani e tu na nodra malumalumu. … A kaya ena dua na gauna o Richard L. Evans, “Sa na rawa ni veimaliwai vinaka vata kei ira na tamata vinaka sara e dua ga vei keda, ia sa noda itavi meda veimaliwai vinaka vata kei ira na tamata tawavinaka sara” [Richard Evan’s Quote Book (1971), 165]. Eda kila vakamatata ena vakamau ni da sa sega ni veitaratara tiko vata kei ira na tamata vinaka sara; eda sa vakasaqara tiko na bula vinaka sara ka da sa lakova tiko na salatu eda nuitaka meda kunea kina na bula vinaka sara, ia meda sa na kila vakamatata, solia na noda vinaka taucoko, ka cakava na bula me totoka. …

… E tukuna vei keda na iVola Tabu: “Sa dauvosota vakadede na loloma, sa yalovinaka” (raica na 1 Korinica 13:4). Na mataqali loloma o ya, na mataqali e sega ni tauri vakamamada, sega ni bokoci vakaveitalia ka kolotaki laivi me vaka e dua na palasitika vakayagataki oti, ia ka na tadrava yani na veika dredre lalai kece ni bula ena veitauri liga e semata voli na yalo, e sa icavacava ni vakaraitaki ni bula marau ni tamata.²⁴

Duabau ni lomada

Sa dina sara na vakawati bula marau duadua sai koya na nomu mavoa sa noqu mavoa, na noqu mosi sa nomu mosi, noqu qaqa, nomu qaqa, noqu kauwai, nomu kauwai. Na duabau ni lomada, ni yaloda, ni yagoda e sa vaka me dua tiko na bolebole levu e vuravura mai na veigauna sa oti ka vaka me vakataroga voli: “Na cava e tiko ena ka oqo me yaga vei au?” E vuqa sara na itokani ni vakamau sa vaka me dua tu ga na ka taukeni me raqataki ka sega ni tiki ni yaloda.²⁵

veiwatini gone kei na luvedrau — Ni rau sa “veilomani na veiwatini me vaka rau sa lomana na Kalou, … ena basika mai ki na nodrau itikotiko e dua na bula kamica kei na veivinakati ena kauta mai na rawa-ka tawamudu.”

Yalodina ena vakasama, vosa, kei na cakacaka

Ena vakaraitaka na itovo yalodina vinaka sara kivua na watina na tagane e tiko vua na matabete ka na sega ni vakavuna vua me vakatitiqataka na nona yalododonu. Na tagane me lomana na watina ena yalona taucoko ka kabiti koya duadua ga ka sega tale ni dua (raica na V&V 42:22–26). A vakamacalataka o Peresitedi Spencer W. Kimball:

“Na vosa ka sega tale na ka e tagutuva na tamata kecega kei na veika kecega. Sa na qai yaco na tamata vakawati me cecere ena bula ni tagane se yalewa vakawati ka sega na bula ni solesolevaki se bula vakapolitiki se dua tale na gagadre se tamata se ka me vakaliuci cake mai na watina itokani (The Miracle of Forgiveness, Salt Lake City: Bookcraft, 1969, t.250).

Sa vakatabuya na Turaga ka sa vakalewa na nona lotu na veimaliwai veivolekati kecega ena taudaku ni vakamau. Na nona cakacala e dua na tagane e voroka na uto ni watina ka vakayalia na nona veivakabauti kei na nodra veivakabauti na luvena (raica na Jekope 2:35).

Mo yalodina tiko ki na nomu veiyalayalati ni vakamau ena vakasama, vosa, kei na cakacaka. Na iyaloyalo vakasisila, wedewede, kei na vakanananu tawakilikili eso ena vakalolovirataka na itovo ni dua na tamata ka na bolarua na yavu ni dua na vakawati bula marau. Sa na vakarusai vakakina na duavata kei na veivakabauti ena loma ni vakawati. O koya ena sega ni qarauna na nona vakasama ka yaco sara me dodomo e yalona, ke sega ni veivutuni, ena sega ni tiko vua na Yalotabu, ia ena yaco me cakitaka na vakabauta ka kune rere kina (raica na V&V 42:23; 63:16).²⁶

Na lomavinaka kei na veidokai ena veivinakati

Maroroi iko mai na itovo e veivakasaurarataki se tawakilikili eso ena sala malumu, veimaliwai veivolekati vakaveiwatini. Baleta ni sa qisia na Kalou na vakawati, na nodrau veimaliwai veivolekati na veiwatini e sa vinaka ka dokai ena mata ni Kalou. Sa vakarota o Koya me rau sa lewedua ga ka me rau vakatubu kawa ka vakatawai vuravura (raica na Mosese 2:28; 3:24). Mo sa lomana na marama watimu me vaka sa lomana na Lotu o Karisito ka soli Koya kina (raica na Efeso 5:25–31).

Na lomavinaka kei na veidokai—sega ni kocokoco—me sa ivakavuvuli veidusimaki ena nodrau veimaliwai veivolekati na veiwatini. Me na dau veinanumi ka yalorawarawa na itokani yadua ki na veika e vinakata ka gadreva e dua vei rau. Na itovo veivakasaurarataki, vakasisila, se vakalialia cavaga ena nodrau veimaliwai veivolekati na veiwatini e sa vakalewa na Turaga.

Na tagane cavaga e vakacacana se vakamaduataka vakayago se vakayalo na watina e sa vakacalai ena ivalavala ca mosimosi ka sa gadrevi vua na veivutuni vakaidina ka bibi sara. Na duidui eso sa dodonu me cakacakataki ena loloma kei na yalovinaka kei na yalo ni veivakaduavatataki. Sa dodonu vei tagane me dau vosa vei watina ena yalololoma kei na lomavinaka, ka dau dokai koya sara vakalevu. Na vakawati sa vaka e dua na senikau malumu … ka sa dodonu me vakabulabulataki vakawasoma ena ivakaraitaki ni loloma kei na veivinakati.²⁷

Vakarorogo vagumatua

E vuqa sara na leqa e rawa ni saumi vakatotolo, ka wali e vuqa na ituvaki dredre eso, kevaka eda rawa ni kila vakamatata ga ni sa tiko na gauna eso e dodonu meda vakarorogo kina. E koronivuli eda vulica na lesoni ni da vakarorogo, ia eda guce ni da besetaka meda vakarorogo kina. Sa tiko ena vakawati na lailai vakaoti ni kila matata vakavo ke sa lomada meda vakarorogo. … E dina sara, sa gadrevi meda vosa, ia sa dodonu meda vakarorogo ki na rai tale eso me rawa ni da toroya cake vakamatau na noda kila matata ena caka ni dua na vakatulewa maqosa. Na daliga sa vakarorogo sa rawa ni cakava na veisau vakawasoma.²⁸

Dauveinanumi

Ena sega ni rawa me qaqa na veitokani kevaka era yavutaki tu ena nuku ni kocokoco. Ena sega ni rawa me qaqa na vakamau ke sega na kena yavu vakavo ga ena rairai totoka vakayago, ka sega na kena yavu ni loloma e titobu kei na dina.²⁹

Eda sa nuitaka vei kemuni ko ni sa vakamau tiko ni na nanumi na yalo ni loloma ka a muataki kemuni ki na icabocabo ni soro ena vale ni Turaga. E rarawa na yaloda ni da rogoca e vuqa sa batabata mai na nodra loloma se mai na nodra vu ni kocokoco se caka cala era sa guilecava se taura vakamamada na veiyalayalati ni vakamau era a cakava ena valetabu. Keimami sa vakamasuti kemuni na veiwatini mo ni veilomani ka veidokai tiko vakai kemuni. E dina, sa na noda inuinui taleitaki me na vakalougatataki na matavuvale yadua ena dua na tina kei na tama e rau vakaraitaka na nodrau veilomani vakai rau, e rau sa veidokai vakai rau, ka rau cakacaka vata ena vaqaqacotaki ni ivau ni vakamau.³⁰

Vakatutu ni Vuli kei na Veivakavulici

Taro

Ena iwasewase e 1, e vakamatatataka kina o Peresitedi Hunter ni sa lewa na Kalou me rau vakawati na tagane kei na yalewa ka sa nakiti me ka tawamudu. Ena vakayaco-ka vakacava ki na nomu veimaliwai vata kei na watimu na kilai ni veika oqo? Na cava na kena ibalebale vei iko ni vakamau “sa dua na veitokani kei na Kalou”? E rawa vakacava ni da vukei ira na gonelalai kei ira na itabagone mera vakavakarau ki na vakamau ena valetabu?
Na cava na nomu nanuma kei na vakasama ni o vulica na ivakasala nei Peresitedi Hunter me baleta na kena vakatulewataki o cei me vakamautaki? (Raica na iwasewase e 2.)
E rawa ni vukei ira vakacava na tamata era sega ni vakawati na yalayala kei na ivakasala eso nei Peresitedi Hunter ena iwasewase e 3? E rawa vakacava ni da tutaka na itukutuku nei Peresitedi Hunter ni “oqo na lotu i Jisu Karisito, e sega ni nodra lotu na vakawati se tawavakawati”?
Na cava o nanuma e vakaibalebaletaka o Peresitedi Hunter ena nona kaya ni vakamau “e dua na itovo e vulici”? (Raica na iwasewase e 4.) Na gauna cava o sa bau raica kina na kena rawati na bula marau ena dua na vakawati mai na bulataki ni ivakavuvuli ni kosipeli? Kevaka o sa vakawati, navuca na ka o na cakava mo vakaraitaki vakataucoko kina na nomu loloma kivua na watimu.
Vakasamataka vagumatua na ivakasala nei Peresitedi Hunter ena iwasewase e 5. E rawa vakacava ni ra taracake vakalevu na veiwatini na yalovosota ena nodra malumalumu vakaiira? E rawa vakacava ni ra taracake vakalevu na veiwatini na “duabau ni lomada”? E rawa vakacava ni ra vakaraitaka na veiwatini na vakawati yalodina ena vakasama, vosa, kei na ivalavala?

iVolanikalou Veisemati

Vakatekivu 2:18, 21–24; Jekope 2:27, 31–33; 4 Nifai 1:11; V&V 42:22; Mosese 3:19–24; raica talega “na Matavuvale: Ai Vakaro ki Vuravura Raraba,” Ensign, Nove. 2010, 129

Veivuke ni Veivakavulici

“Ena gumatua sara na nomu vuli ni ko vakavulici mai vua na Yalo Tabu. Dau tekivuna nomu vulica na kosipeli ena nomu masuta na veivuke ni Yalo Tabu” (Vunautaka na Noqu Kosipeli[2004], 20).