Wase 6

Na Veisorovaki kei na Tucaketale nei Jisu Karisito

“Eda na tucaketale mai na mate vakayago ki na bula tawamudu, ena vuku ni nona isoro ni veivakaduavatataki kei na tucaketale na iVakabula.”

Na Bula nei Howard W. Hunter

Ena ika 20 ni Maji, 1934, a sucu kina na imatai ni luvedrau o Howard kei Claire Hunter, e dua na gonetagane ka rau vakatoka me yacana o Howard William Hunter Lailai, ka dau kacivi ena Billy. Ena vulaikatakata erau raica ni vaka e malumalumu voli o Billy. Era kunea vua na vuniwai na anemia, ka soli dra kina vakarua o Howard me soli vua na dra, ia a sega ni veisau na ituvaki kei Billy. Ena so tale na vakatovotovo a kilai kina ni dua na leqa bibi ni wawa e vakavuna tiko na kena yali na dra mai vei Billy. Era veisele na vuniwai ka davo toka e yasai luvena o Howard me soli dra, ia e sega ni veivakayaloqaqataki na kena macala. Ena tolu na siga i muri, ena ika 11 ni Okotova, 1934, a mate galugalu o Billy lailai ni rau dabe toka ena yasa ni nona imocemoce na nona itubutubu. “E lutuki keirau na yaluma kei na nunu ni keirau biuta na valenibula ki na loma ni bogi,” a vola o Howard.¹

Ena veika a sotava ena mate nei Billy kei na nodra mate eso tale na nona daulomani, a tokoni Peresitedi Hunter na nona ivakadinadina ni nona Veisorovaki na iVakabula kei na Tucaketale. “Sa noda vakabauta tudei ni [Veisorovaki] e ka dina,” a vakadinadinataka o koya, “ka sega ni dua na ka e bibi cake ena ituvatuva taucoko ni veivakabulai vakalou mai na isoro ni veivakaduavatataki i Jisu Karisito. Eda vakabauta ni yaco mai na veivakabulai ena vuku ni veisorovaki. Kevaka e yali ena sega na betena na ituvatuva taucoko ni veibuli. … Kevaka e sega na isoro ni veivakaduavatataki, sa na kena itinitini ga na mate vakayago, ka na sega na tucaketale ka sega ni vakainaki noda bula vakayalo. Ena sega na inuinui ni bula tawamudu.”²

Ena koniferedi raraba ni Epereli, ka dau vakayacori ni voleka se ena gauna ni Siganimate, e vakavuqa ni dau vosa o Peresitedi Hunter me baleta na tucaketale nei Jisu Karisito. Ena koniferedi raraba ni Epereli 1983 a kaya kina:

“Ena gauna ni Siganimate oqo, au vakila vakaukauwa na bibi ni noqu ilesilesi meu vakadinadinataka na nona tucaketale na iVakabula. Kemuni na taciqu kei na ganequ, e tiko e dua na Kalou mai lomalagi ka dau lomani iko vata kei au ka kauwaitaki kedaru. E tiko e dua na Tamadaru mai Lomalagi, ka a tala mai na ulumatua vei ira na luvena vakayalo, na nona Le Duabau ga ena yago, me mai ivakaraitaki e vuravura vei keda, me colata na ivalavala ca ni vuravura, ka na yaco me vakamatei ena kauveilatai me baleta na ivalavala ca ni vuravura ka vakaturicake tale. …

“Sa dua dina na itukutuku totoka—ni na yaco na bula ni oti na mate; e rawa ni da lesu ka laki bula vata tale kei Tamada mai Lomalagi, ena vuku ni isoro sa mai cakava na iVakabula ena vukuda, ka vakakina ena vuku ni noda veivutuni kei na italairawarawa ki na ivunau.

“Ni kida na mataka lagilagi ni Siganimate, ni vagolei tu na vakanananu ni vakabauta Vakarisito ki na tucaketale i Jisu me vica na gauna lekaleka, me da vakaraitaka na noda vakavinavinaka vua na Tamada Vakalomalagi ena vuku ni ituvatuva cecere ni veivakabulai sa vakarautaki tu me baleti keda.”³

ibulubulu ena were — Na ibulubulu lala ni iVakabula sa “kacivaka ki vuravura raraba, ‘Sa sega eke ko koya, sa tucake tale’” (Luke 24:6).

iVakavuvuli nei Howard W. Hunter

Na Veisorovaki e dua na ivalavala cecere ni loloma mai vei Tamada Vakalomalagi kei na Luvena Daulomani, o Jisu Karisito.

Na Veisorovaki nei Jisu Karisito e dua na ilesilesi sa lesia taumada na Tamada Vakalomalagi me sereki ira na luvena ni oti na nodra a lutu tani tu. E dua na ivalavala ni loloma mai vei Tamada Vakalomalagi me vakatara na Luvena e Duabau Ga me vakacabora e dua na isoro ni veivakaduavatataki. E dua na ivalavala cecere ni loloma mai vua na Luvena daulomani me vakayacora na Veisorovaki.

Au sa dau tu ena were mai Kecisemani ena vuqa na gauna. Au sa dau vakananuma ena noqu vakasama na veivakararawataki, na nona mosi na iVakabula—na mosi a sotava ena gauna sa vakatara kina vua na Tamada Vakalomalagi, ena dua na ivakarau ena sega ni rawa ni vakasamataka na noda vakasama, me taura vua na mosi kei na ivalavala ca ni kawatamata. A vakasinaiti na yaloqu ena yaluma niu vakasamataka na nona isoro cecere ena vuku ni kawatamata.

Au sa tu oti ena rukui Kolikoca, na vanua ni qavokavoka, ka vakasamataka na veivakararawataki ni veivakamatei ena kauveilatai ka yaco kina na nona mate vakayago na noda iVakabula, ia sa rawa kina vua kei na kawatamata me tawamate rawa. Ka baci vakadrukai tale na yaloqu.

Kau sa tucake oti talega ena ibulubulu mai na were ka rai vakatayaloyalotaka na siga lagilagi oya ni tucaketale ni basika na iVakabula mai na ibulubulu, sa bula tu, sa vakaturi cake, sa tawamate rawa. Ena vakanananu oya sa vakasinaiti na yaloqu ena reki.

Mai na veika oqori au sa nanuma kina meu sovaraka na yaloqu ena vakavinavinaka kei na marau vua na Tamada Vakalomalagi ena vuku ni loloma erau sa solia vei keda kei na Luvena mai na isoro lagilagi ni veivakaduavatataki. Ena veimalanivosa nei Charles Gabriel, “Loloma i Jisu au tu ka qoroya ga, au qai kurabui nona dau karoni au. Au rere niu kila, a mate meu bula ga, vukuqu mai rube, rarawa ka mate no. Sa taleitaki nona lomani au ka mai mate kina Sa taleitaki tu, talei tu vei au.” …

Au wasea vei kemuni na noqu ivakadinadina, kemuni na taciqu kei na ganequ, ni Tamada Vakalomalagi a tala mai ki vuravura na Luvena daulomani o Jisu Karisito me vakataucokotaka na ivakarau me na cicivaki kina na ituvatuva ni veivakabulai. Na Veisorovaki e matataka na nona loloma cecere ena vukuda.⁴

A taura taucoko na iVakabula na noda ivalavala ca, malumalumu, yaluma, kei na mosi.

Ni ratou sota me ratou vakananuma na Lakosivia, eratou a vakayagataka o Jisu kei ira nona iApositolo na ivakatakarakara ni sakaramede ka a tekivutaka ena iotioti ni nodratou vakayakavi vata, oti sa qai taubale yani ki na Ulunivanua ni Veiolive.

Ni dau veivakavulici tikoga ki na ivakataotioti, a tomana na nona ivakavuvuli ena ulutaga ni lami ni isoro. E tukuna vei iratou ni na vakamatei, ka ratou na veiseyaki me vaka na sipi sega na kena ivakatawa (raica na Maciu 26:31). “Ia ni kau sa tucake tale mai kau na qai liutaki kemudou ki Kaleli“ (Maciu 26:32).

Ena veiauwa ka tarava, a bunotaka mai na tikitiki ni dra, a vakanakuitataki mai vei ira na iliuliu sara ga era kaya tiko ni ra ivakatawa ni nona lawa, ka vakamatei ena kauveilatai ena kedra maliwa na daubutako. Me vaka a parofisaitaka na Tui o Penijamini ena iVola i Momani: “Ia sa uasiviti ira na tamata ko Koya ena nona vosota na veivakatovolei ena rarawa ni yago, na viakana, na viagunu kei na oca me yaco sara ki na mate, o koya sa sega ni vosota rawa na tamata; ia sa rarawa vakalevu sara ena vuku ni nodra ivalavala ca kei na nodra itovo vakasisila na nona tamata, ka sa bunotaka kina na dra …

“Raica ena lako mai ko koya kivei ira na kainona me ra bula kina na luve ni tamata era sa vakabauta na yacana; ia ni sa cakava na ka kecega oqo ko Koya, era na okati Koya ga me tamata wale ka ra kaya ni sa tiko vua na tevoro; era na vakanakuitataki Koya ka vakoti Koya ki na kauveilatai” (Mosaia 3:7, 9).

Eda sa vakavinavinaka tu kina vua na parofita o Alama ena noda kilaka me baleta na ivakarau taucoko ni nona vakararawataki: “Ia ena mai vunau voli ko Koya; ena vosota na ka rarawa, na veivakararawataki kei na veivakatovolei kecega; a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra ivalavala ca na nona tamata.

“Ena soli Koya me mate me sereka kina na ivesu ni mate sa vesuki ira tu na nona tamata; ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma” (Alma 7:11–12).

Vakasamataka mada! Ni sa kau na yagona mai na kauveilatai ka laki biu vakatotolo yani ena dua na ibulubulu kerei, o koya, na Luve ni Kalou sega nona ivalavala ca, sa taura oti vua sega walega na ivalavala ca kei na nodra vakatovolei na tamata kecega era na veivutuni, ia na noda tauvimate kei na yaluma kei na mosi ena kena veimataqali kecega. A sotava o koya na veika rarawa oqo me vaka na noda sotava, ena yagoda. A sotava kece sara o koya. A kitaka oqo me vinaka sara kina na nona loloma cecere kei na nona rawata me laveti keda sivia na veivakatovolei kecega ni vuravura.⁵

Eda na cakava beka eso na digidigi cala, digidigi ca, digidigi mosimosi. Ka so na gauna eda vakayacora kina na veika sara ga oqori, ia oqori na vanua ena basika mai kina ena kena kaukauwa taucoko kei na lagilagi na itavi kei na loloma cecere i Jisu Karisito. … Sa vakarautaka o koya e dua na veisorovaki ni veivosoti ena vuku ni digidigi cala eda vakayacora. Sai Koya na noda dautataro vei Tamana ka sa sauma oti tu, na cala kei na yalowai eda dau raica vakawasoma ena kena vakayagataki na noda galala. Sa dodonu me da ciqoma na nona isolisoli, veivutunitaka noda cala, ka muria na nona ivakaro me rawa ni yaga kina vakavinaka vei keda na veisereki oqo. Sa dau tu ga na isolisoli; sa dau tadola tu ga na sala. E rawa vei keda ena veigauna, ena noda auwa butobuto duadua sara mada ga kei na cala levu duadua, me da rai vua na Luve ni Kalou ka vakabulai.⁶

A tucake mai na ibulubulu ko Jisu Karisito ka yaco me imatai ni Tucaketale.

Lesu vata kei au ena veitabagauna ki na veiyaloyalo oya ena Vanua Tabu. Sa voleka me tini na nona bula vakayago na Turaga. Sa vakabulai ira na tauvimate, vakaturi ira cake na mate, ka vakavuvulitaka na ivolanikalou, okati kina na parofisai eso ni nona mate kei na tucaketale. A kaya kina vei iratou na nona tisaipeli:

“Raica eda sa lako cake ki Jerusalemi ka na soli yani na Luve ni tamata vei ira na bete levu kei ira na vunivola ka ra na lewai koya me mate,

“A ra na soli koya vei ira na kai Matanitutani me ra vakalialia ka vakanakuitataka ka vakota ki na kauveilatai ena qai tucake tale mai ko koya ena ikatolu ni siga” (Maciu 20: 18–19 …

Ni sa tekivu me malawa mai na mataka ni ikatolu ni siga ko ya, erau sa lako ki na ibulubulu o Meri Makitalena kei “Meri tale kadua” ena vanua sa vakotori kina na yagona mate [Maciu 28:1; raica talega Marika 16:1; Luke 24:10]. Ni se bera oya, era a lako na bete liu kei ira na Farisi vei Pailato ka vakauqeti koya me biuta e dua na yadra ena katuba ni ibulubulu qaravatu, “de ra lako mai na nona tisaipeli ka butakoca, ka qai kaya vei ira na tamata, sa tucake tale mai na mate ko Koya” (Maciu 27:64). E rua na agilosi kaukauwa erau sa vaqiqica tani na vatu mai na ibulubulu, ka rau dro na yadra ena levu ni nodrau domobulataka na ka erau a raica.

Ni ratou lako mai na marama oqo ki na ibulubulu, eratou raica ni sa tadola ka sa lala tu. Erau a wawa toka na agilosi me rau tukuna vei iratou na itukutuku matanidavui duadua me qai bau rogoca na daliga ni tamata: “Sa sega eke ko Koya: sa tucake tale, me vaka na nona vosa” (Maciu 28:6).⁷

E sega na ivunau ena ivolatabu Vakarisito e bibi cake ki na kawatamata taucoko mai na ivunau ni tucaketale ni Luve ni Kalou. Sa rawa mai vua na nodra tucaketale mai na mate na tagane, yalewa, kei na gone kecega era sa sucu oti mai—se era na qai mai sucu—e vuravura.

E dina ni da sa vakabibitaka sara vakalevu na tucaketale ena noda ivunau, de so beka vei keda eda se bera ni raica sara vakavinaka na kena bibi vakayalo kei na kena cecere. Kevaka eda sa raica oti, eda na qoroqoro ena kena totoka kei na vakasakiti me vakataki Jekope, na taci Nifai, ka da na kurelaki ena veika eda na sotava kevaka eda sega ni ciqoma na isolisoli vakalou oqo. E vola vaka oqo o Jekope:“

A ka levu vakaidina na nona vuku na Kalou, na nona yalololoma kei na nona loloma! Raica kevaka sa sega ni tucake tale na yago, ena yaco me lewa na yaloda na agilosi ka a lutu tani mai na mata ni Kalou Tawamudu ka yaco me tevoro ka sega ni tucake tale” (2 Nifai 9:8).

E dina sara na tucaketale na itakele ni vakabauta kece sara Vakarisito; sai koya e cecere duadua ena cakacaka mana kece sara e vakayacora na iVakabula ni vuravura. Kevaka e sega, sa da na biu tu ka sega noda inuinui. Meu kerea mada na vosa nei Paula: “Ia kevaka sa sega ni tucake tale ko ira na mate, … sa qai ka walega na neitou ivunau, … ia keitou sa kune kina me daulasulasu ni keitou sa tukuna na Kalou; ni keitou sa tukuni koya na Kalou ni sa vakaturi Karisito cake mai. … Kevaka sa sega ni vakaturi cake tale na Karisito, sa sega ni yaga na nomudou vakabauta; sa tu vei kemudou edaidai na nomudou ivalavala ca” (1 Korinica 15:13–15, 17).⁸

Kevaka e sega na Tucaketale mai na mate, sa yaco na kosipeli i Jisu Karisito me so walega na ivosavosa matua kei na cakamana sega ni vakamacalataki rawa dau caka ena soqoni vakalotu—ia na ivosavosa kei na cakamana sega ni dua na kena qaqa. E sega, na ulu ni qaqa e koto ena ulu ni cakamana: ena imatai ni gauna ena itukutuku ni kawatamata, me vakaturi koya cake mai na mate e dua sa mate tu ka me bula tu ka tawamate rawa. Sai koya na Luve ni Kalou, na Luvena na Tamada mai Lomalagi tawamate rawa, kei na nona qaqa mai na mate vakayago kei na mate vakayalo sai koya na itukutuku vinaka e dodonu me vakatusa na yame kecega ni vakabauta Vakarisito.

Na dina tawamudu sai koya ni a tucake mai na ibulubulu o Jisu Karisito ka imatai ni Tucaketale mai na mate. (Raica na 1 Kori. 15:23.) Na ivakadinadina ni veika vakasakitii a yaco oqo ena sega ni rawa ni vakalewai.

Era okati talega ena ivakadinadina digitaki na nona iApositolo na Turaga. Ka dina sara, na veikacivi vakaiapositolo tabu e dua ka ivakadinadina ki vuravura ena vakalou ni Turaga o Jisu Karisito. A kaya kina o Josefa Simici, “Na yavu ni ivakavuvuli ni noda Lotu oya na nodra ivakadinadina na iApositolo kei na Parofita me baleti Jisu Karisito ni a mate bulu ka tucake tale ena ikatolu ni siga ka lako cake ki lomalagi kei na veika kece tale eso e salavata kei na noda Lotu era sa tokona talega.” (Ai Tukutuku ni Lotu, 3:30.) …

Ena nona vakavulici ira na nona iApositolo, a vakatakila kina vei ira na Karisito “ni sa kilikili kaya na luve ni Tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vunivola, ka me vakamatei, ka qai tucake tale ena ikatolu ni siga.” (Marika 8:31.) A yaco me vakakina. A vakamatei ena kauveilatai ka laki vakotori ena dua na ibulubulu. A tucake ena ikatolu ni siga ka bula tale—na iVakabula ni kawatamata ka isevu ni Tucaketale. Mai na isoro cabori oqo, era na vakabulai mai na ibulubulu na tamata kecega ka na bula tale. Oqo na nodra ivakadinadina na iApositolo, kau vakuria kina na noqu ivakadinadina bula.⁹

O Karisito kei Meri Makitalena — A rairai vei Meri Makitalena o Jisu Karisito ni oti vakalailai na Nona tucaketale mai na mate (raica na Joni 20:1–18).

A rairai vei ira na lewevuqa o Jisu ni oti na Nona Tucaketale.

Ena veisiga ni oti nona tucaketale, a rairai na Turaga vei ira e lewevuqa. A vakaraitaka vei ira na lima na we ni nona mavoa bibi. A taubale ka veitalanoa ka kana vata kei ira, me vaka ni via vakadinadinataka me kua ni vakatitiqataki ni yago vakaturi cake e yago vakayago vakalewe kei na sui ka rawa ni da tara. E muri a vunau vei ira na Nifai, ka vakaroti ira “Dou tu cake ka lako mai vei au; dou daramaka na ligamudou ki na sarisariqu ka tara talega na we ni vako ena ligaqu kei na yavaqu mo dou kila kina ni sai au na Kalou ni Isireli kei na Kalou ni vuravura kecega, ka’u sa mate ena vuku ni nodra ivalavala ca na kai vuravura.

“A ra sa lako yani na lewe vuqa ka daramaka na ligadra ki na sarisarina, ka tara na we ni vako ena ligana kei na yavana; a ra sa lako yadua yani ka kitaka vakakina ko ira kecega; era sa raica e matadra ka tara ena ligadra, ka ra vakadinata ni sai Koya dina oqo era a tukuna tu na parofita ni na lako mai” (3 Nifai 11:14–15).

Sa nodra itavi ka nodra reki na tagane kei na yalewa taucoko e veivanua kecega me ra “vakasaqarai Jisu o koya era sa [vakadinadinataka] na parofita kei na iapositolo” (Ica 12:41) ka me tu vei ira na ivakadinadina vakayalo ni nona bula vakalou. Sa nodra dodonu kei na veivakalougatataki o ira kece era vakasaqara ena yalomalumalumu, me ra rogoca na domo ni Yalo Tabu, ni vakadinadinataka na Tamana kei na Luvena sa vakaturi cake mai na mate.¹⁰

Na nodra ivakadinadina o ira era a raici [Jisu] ni sa bula voli ni oti nona mate se bera vakadua ni bau veisaqasaqa. A rairai vakatini beka se tinikadua: vei Meri Makitalena kei rau tale na marama ena were, vei rau na tisaipeli ena sala ki Emeo, vei Pita mai Jerusalemi, vei iratou na iApositolo ni yali tiko o Tomasi vakakina ena gauna sa tiko kina, vei ira na iApositolo ena Wasawasa e Kaleli, kei na dela ni ulunivanua ena dua ga na gauna vei ira e 500 na turaga, vei Jemesa na tacina na Turaga, kei iratou na iApositolo ena nona sa vakarau cabe cake.¹¹

Me vaka niu dua e kacivi ka tabaki meu ivakadinadina bula ni yaca i Jisu Karisito ki vuravura taucoko, au vakadinadinataka ena gauna ni Siganimate oqo ni bula tiko o koya. E taukena o Koya na yago vakalagilagi, tawamate rawa vakalewe kei na sui. O Koya na Le Duabau Ga nei Tamana ena yago. O Koya na iVakabula, na Rarama kei na Vunibula kei vuravura. Ni oti nona vakamatei ena kauveilatai, a rairai me vaka e dua sa vakaturicake mai na mate vei Meri, vei Pita, vei Paula, kei ira e vuqa tale. E vakaraitaki koya vei ira na Nifai. Sa vakaraitaki koya talega vei Josefa Simici, na parofita gonetagane, kei ira e vuqa tale ena noda itabagauna.¹²

Eda na tucake tale mai na mate ka rawata na bula tawamudu.

Na siganimate sai koya na kena marautaki na isolisoli wale ni tawamate rawa e soli ki na tamata kecega, vakalesui mai na bula ka vakamamacataki na mavoa kecega. E dina ni da na mate kecega me vaka ni tiki ni ituvatuva tawamudu ni tubu kei na vakatorocaketaki, ia eda rawa ni kunea kece na vakacegu ena nona vosa na Daunisame, “Sa ia na tagi ena bogi, ia sa yaco ena mataka na marau.” (Same 30:5.)

O Jope a taroga na taro e rawa ni vakatokai me taro ni veitabayabaki: “Kevaka sa ciba na tamata, ena bula tale ko koya?” (Jope14:14.) Na kena isau mai vei Karisito e curuma mai na veigauna ki na tiki ni auwa oqo: “Niu sa bula, dou na bula talega.” (Joni 14:19.)¹³

Sa yaco na veitawasei ni yalo kei na yago ena gauna ni mate. Na tucaketale ena vakaduavatataka tale na yalo kei na yago, ka sa yaco kina na yago me yago vakayalo, e vakalewe kei na sui ia sa yavalati ena yalo ka sega ena dra. O koya oqo, na yagoda ni sa oti na tucake tale, sa yavalati ena yalo, sa na sega ni mate rawa. Oqo na ibalebale ni iyatuvosa nei Paula ni sa “dua na yago sa vaka na bula vakatamata, sa dua talega na yago sa vaka na bula vakayalo” ia “sa dredre ni rawata na matanitu ni Kalou na yago sa vakalewe ka vakadra” [raica na 1 Korinica 15:44, 50]. Na yago oqo e vakalewe kei na dra, ia ni yavalati ena yalo ka sega ena dra, e rawa ka na curuma na matanitu. …

Au vakadinadinataka ni bula na Kalou ka Karisito o Jisu. Me vaka nona wasea na nona ivakadinadina vei ira na kai Koronica o Paula ena nona ivola ena gauna ni Siganimate oya ena vuqa na yabaki sa oti, au vakuria kina na noqu ivakadinadina ni da na tucake mai na mate vakayago ki na bula tawamudu, ena vuku ni isoro ni veivakaduavatataki kei na tucaketale mai na mate ni noda iVakabula. Au rai vakatayaloyalotaki koya ena noqu vakasama ni dodoka tu na ligana vei ira kece era na rogoca:

“… Oi au na vu ni tucake tale kei na vu ni bula: ko koya sa vakabauti au, kevaka sa mate, ena bula ga:

“Ia ko koya yadua sa bula ka vakabauti au ena sega sara ni mate.” (Joni 11:25–26.)¹⁴

Na tucaketale nei Karisito sa kauta mai na veivakalougatataki ni tawamate rawa kei na rawati ni bula tawamudu. Na ibulubulu lala ni iVakabula sa “kacivaka ki vuravura raraba, ‘Sa sega eke ko koya, sa tucake tale’” (Luke 24:6.) E tu ena malanivosa oqo na inuinui kece, na ivakadei, kei na vakabauta e gadrevi me tokoni keda ena noda bula ka dau sinai ena yaluma ena so na gauna.¹⁵

Vakatutu ni Vuli kei na Veivakavulici

Taro

E vakaraitaka vakacava vei keda na nodrau loloma na Tamada Vakalomalagi kei Jisu Karisito na Veisorovaki? (Raica na iwasewase e 1.) Eda rawa ni vakaraitaka vakacava na noda vakavinavinaka ena vuku ni isolisoli ni loloma oqo? (Raica na V&V 42:29.)
Ni o railesuva na iwasewase e 2, vaqara e vuqa na sala sa vakalougatataki keda kina na Veisorovaki. E vakavinakataka vakacava na nomu kila na Veisorovaki na ivakavuvuli nei Peresitedi Hunter kei na nona vakayagataka na ivolanikalou? Na veika sotavi cava soti sa vaqaqacotaka na nomu ivakadinadina ni Veisorovaki? E rawa ni vaqaqacotaki iko vakacava ena nomu gauna ni vakatovolei na mana ni Veisorovaki?
Na cava na nomu nanuma ni o vulica na ivakavuvuli nei Peresitedi Hunter me baleta na Tucaketale mai na mate? (Raica na iwasewase e 3.) Eda na marautaka vakavinaka cake beka vakacava na bibi ni Tucaketale mai na mate?
Railesuva na iwasewase e 4 ka vakamatailalaitaka kina o Peresitedi Hunter na ivakadinadina bula e vuqa ni Tucaketale nei Jisu Karisito. Na cava e rui bibi kina na nodra ivakadinadina na vakadinadina bula oqo?
Vakasamataka na ivakavuvuli nei Peresitedi Hunter ni Tucaketale mai na mate sa vakarautaka na “inuinui kece, na ivakadei, kei na vakabauta e gadrevi me tokoni keda ena noda bula ka dau sinai ena yaluma ena so na gauna” (iwasewase e 5). E ivurevure vakacava ni inuinui kei na vakacegu vei iko na Tucaketale mai na mate? Sa vakauqeta beka vakacava na nomu bula e dua na ivakadinadina ni Tucaketale mai na mate?

iVolanikalou Veisemati

Joni 10:17–18; 2 Nifai 2:6–9, 22–27; 9:19–25; 3 Nifai 27:13–16; V&V 18:10–16; 19:15–20; Mosese 6:59–60

Veivuke ni Veivakavulici

“Dau navuca na veitaviqaravi ni vuli ka na tara cake na nomu vakabauta na iVakabula” (Vunautaka na Noqu Kosipeli [2004], 24). Taura mada vaqo, ni o vuli tiko o na tarogi iko beka ena so na taro me vakaoqo: “Na sala cava beka e rawa ni vukei au kina na ivakavuvuli oqo meu vakalevutaka cake na noqu kila na Veisorovaki nei Jisu Karisito? Ena vukei au vakacava na veivakavuvuli oqo meu yaco me vakataka vakalevu cake na iVakabula?”