Wase 20

Lakovi na Salatu ni Loloma Cecere ni iVakabula

“Na vatutarai ni yalololoma e sa dua na ivakaraitaki ni noda bula vakatisaipeli; e sa ivakaraitaki ni noda lomana na Kalou kei ira tale eso.”

Mai na Bula nei Howard W. Hunter

A vakatavulica o Peresitedi Howard W. Hunter ni iVakabula “a solia kivei keda na Nona loloma, Nona veiqaravi, kei na Nona bula. … Sa dodonu meda guta ni solia me vaka a solia o Koya.”¹ Vakauasivi, a vakayaloqaqataki ira na lewe ni Lotu o Peresitedi Hunter mera muria na ivakaraitaki ni iVakabula me baleta na loloma cecere ena nodra bula ni veisiga.

Na ivakaraitaki eso ni loloma cecere e a ivakatakilakila dei tu ni veiqaravi nei Howard W. Hunter ena cakacaka vakalawa. A vakamacalataka e dua na itokani loya:

“A vakayagataka e levu na nona gauna okoya ni solia voli na veiqaravi vakalawa [tawasaumi] … baleta ni a sega ni tu vua na yalo me vakau bili kina. … E a raici tu okoya me dua na itokani, dauveituberi, daunivakasala, kei na dua e matai vakacakacaka ka a kauwai vakalevu ni raica mera rawata na tamata na veivuke era gadreva mai na ka taumada a saumi kina okoya.”²

Na loloma cecere a dua talega na usutu ni veiqaravi nei Peresitedi Hunter. E dua na marama ka kaya ni okoya (Hunter) a dua na nona qasenivuli dauveivakayarayarataki duadua a vakamacalataka eso na vuna:

“Au sa dau vakadikeva ni turaga oqo e taleitaki ira tale eso ena nona biuti ira ena ivakatabutubutu e cake, ni vakarorogo voli me kila vakamatata, kei na wasei ni nona kila vakacakacaka vata kei ira tale eso, ka sa dua na ka e dau rekitaka vakalevu. E sa vakatavulici au okoya me’u kila vakamatata na bibi ni ivalavala dodonu eso oqo ka vakila na reki ena kena vakatovotovotaki.”³

E dua tale na marama ena iteki nei Peresitedi Hunter a tukuna vakaoqo:

“O Peresitedi Hunter a neitou peresitedi ni iteki ena vica na yabaki sa oti ni a vakaitikotiko na neitou matavuvale ena iTeki o Pasadena. A sa mate na tamaqu, ka laiva tu mai na tinaqu me susugi au kei na ganequ qase. Dina ga ni a sega ni kilai soti na neitou matavuvale ena iteki, ka a kovuta e dua na iwase ni vanua levu, o Peresitedi Hunter e a kilai keitou tikoga.

“Na noqu ivakananumi kilai tani duadua me baleti koya sa dua ka a vukea na noqu vakasama ni bulayaga vakaiau. Ni cava na koniferedi ni iteki yadua, keimami na wawa tu ena laini me lululu vata kei koya. E dau taura tu ga okoya na ligai tinaqu ka kaya, ‘Sa vaevei o iko, Sisita Sessions, ka vaevei tiko o Betty kei Carolyn?’ E dau uqeti au ni’u rogoci koya me tukuna na yacai keirau. Au kila ni a kilai keitou okoya ka kauwaitaka na neitou tiko vinaka. Na ivakananumi e se vakalomavinakataki au voli.”.⁴

A tukuna ena dua na gauna o Peresitedi Hunter, “Au vakila ni sa noda ilesilesi meda veiqaravi ka veivakabulai, meda taracake ka veivakacerecerei.”⁵ Na vosa eso mai vei ira na Tacina ena Le Tinikarua e sa vakaraitaka na iwalewale a qarava vakavinaka kina okoya na ilesilesi oya. A ripotetaka e dua, “E tiko vua na iwalewale me vakacegui ira kina na tamata; e sega ni veirawai vei ira. O koya e dua na dauvakarorogo vinaka.” A kaya tale e dua, “Ni o toso vata kei koya, ena dau raica voli okoya me vakadeitaka ni ra sa qaravi vakavinaka taucoko ka sega ni dua e vakaogai tawamacala se biu laivi.” Ia a ripotetaka tale e dua, “E sa dau kauwai okoya ka ririkotaki ira tale eso. E sa tiko vua na loloma cecere kei na yalo veivosoti. O koya sa dua na gonevuli ni kosipeli, ni umatamata, ni bula vakayago.”⁶

O Karisito vata na marama lolou voli — O Jisu Karisito a “vakatavulica na lesoni eso ni loloma ka vakaraitaka veitaravi na veiqaravi tawakocokoco kivei ira tale eso. Eda sa ciqoma taucoko na nona loloma.”

Na iVakavuvuli nei Howard W. Hunter

Na rua na ivunau levu e sa vatutarai ni Turaga me baleta na noda bula vakatisaipeli.

Ena gauna makawa, e dua na vakatovotovo ni kena vakasavasavataki na koula oya me qaravi vata e dua na vatu mamare, yagoivinaka loaloa ka vakatokai na vatutarai. Ni yacaraki takosova na vatutarai, e vakaraitaka na koula e dua na laini se maka ena delana. Na daubulikoula ena veidutaitaka na maka oqo ki na dua na roka ena nona jati ni veiroka matataki. Na maka a damudamu sara ni tosocake na ivakarau ni kopa se aloi se dromodromo sara ni tosocake na pasede ni koula. Na ivalavala oqo a vakaraitaka vakadodonu sara na vakasavasavataki ni koula.

Na ivakarau ni vatutarai ena vakatovotovotaki ni vakasavasavataki koula e sa totolo ka daumaka ki na inaki levu eso vakacakacaka. Ia na daubulikoula ka se vakataroga ga na vakasavasavataki a vakacavara e dua na vakatovotovo dodonu cake ena vakayagataki ni dua na ivalavala ka okati kina na kama.

Au vakatura kivei iko ni sa vakarautaka na Turaga e dua na vatutarai me baleti iko kei au, e dua na ivakarau e tuba ni bula vakatisaipeli e loma ena makataka na noda yalododonu ka na ra-wa na kama eso ena lako mai.

Ena dua na gauna ni a vakatavulici ira tiko na tamata o Jisu, a torovi koya mai e dua na vunivunau ka taroga vakaoqo: “Vakavuvuli, a cava me’u kitaka me’u rawata kina na bula tawamudu?”

A sauma o Jisu, na ivakavuvuli levu, kivua na turaga oya, ka sa kila vakamatata sara na ivunau, ena dua na taro veisaqa, “A cava sa volai ena vunau? a cava ko sa wilika?”

A sauma na turaga oya ni navuca vakalekaleka na rua na ivunau levu duadua: “Mo lomani Jiova na nomu Kalou ena lomamu taucoko, kei na yalomu taucoko, kei na nomu kaukauwa taucoko, kei na nomu nanuma kecega; kei na kai nomu me vakataki iko.”

Ena veivakadonui a sauma lesu o Karisito, “Kitaka oqo, ko na bula kina” (Luke 10:25–28).

Na bula tawamudu, na bula ni Kalou, na bula eda sa vaqara voli, e sa vakadeitaki ena rua na ivunau. E tukuna na ivolanikalou ni “sa vu ni vunau taucoko kei ira na parofita na vunau e rua oqo (Maciu 22:40). Lomana na Kalou ka lomana na kai nomu. Erau cakacaka vata na rua oqo; erau sega ni veitawasei. Ena kena vakasama cecere e rau sa navuci me tautauvata. Ka rau sa ivunau e rawa ni da bulataka yadua.

Na isaunitaro i Jisu kivua na vunivunau e sa rawa ni navuci me vatutarai ni Turaga. A kaya o Koya ena dua tale na gauna, “Ni kemuni a cakava vua e dua sa lailai vei ira na wekaqu oqo, ni a cakava vei au” (Maciu 25:40). Ena vakarautaka o Koya na noda lomadina kivua ena iwalewale ni noda lomani ira ka qaravi ira na wekada Na mataqali maka vakacava eda sa biuta tiko ena vatutarai ni Turaga? Eda sa neiba vinaka vakaidina li? E sa vakaraitaka li na vakatovotovo ni da sa koula 24 na kareti, se sa rawa ni vakatakilai na irairai ni koula ni tamata sese?⁷

A vakatavulici keda na iVakabula meda lomana na tamata kecega, oka kina o ira ka na via dredre mera lomani.

Me vaka e lomabibitaka okoya na tarogi ni dua na taro rawarawa kivua na Vakavuvuli, a saga na vunivunau me vakadonui koya ena tomani ni vakatataro, “Ko cei na kai noqu?” (Luke 10:29).

Sa dodonu meda vakavinavinakataka vakayauyau na taro oya, ni mai na isaunitaro ni iVakabula a lako mai kina e dua na nona vosa vakatautauvata momona ka taleitaki sara, e dua eda sa wilika yadua ka rogoca vakavuqa.

“Sa dua na tamata sa lako sobu mai Jerusalemi ki Jeriko, a sa sikabotea na daubutako eso, a ra sa luvata tani na nona isulu, ka vakamavoataka, ka lako tani, a ra sa biuta ka sa voleka ni mate.

“A sa lako walega mai ena sala ko ya e dua na bete; ia ni sa raica, sa lako vakatikitiki tani.

“Sa vakatalega kina e dua na luvei Livai, ni sa yaco ki na yasana ko ya, sa lako mai ka raica, a sa qai lako vakatikitiki tani.

“A sa dua na kai Samaria, ni sa lako tu, sa yaco vua; ia ni sa raica, sa lomana sara.

“A sa lako mai ka vauca na tikina sa mavoa, ka livia kina na waiwai kei na waini, ka vakavodoka ki na nona manumanu, ka kauta ki na bure ni vulagi, ka sa maroroi koya.

“Ia ena mataka ni sa lako tani, sa taura e rua na pene, ka solia vua nai taukei ni bure, ka kaya vua, Mo vakaraici koya; ia na ka tale ko na kuria, au na sauma vei iko ni’u sa lako tale mai” (Luke 10:30–35).

Sa qai taroga na vunivunau o Jisu, “Mo lewa mai, se ko cei vei iratou na lewe tolu oqo, sa kai nona ka sikabotei ira na daubutako? (Luke 10:36). E kea sa taura cake kina na Vakavuvuli na vatutarai ni lotu va-Karisito. Sa kerea o Koya me sa vakarautaki kina na noda maka.

Sa dodonu me rau nanuma na bete kei na luvei Livai ena vosa vakatautauvata i Karisito na veika e gadrevi ena lawa. “Mo ni kakua ni raica na nona asa na wekamuni se nona pulumakau ni sa bale koto ena sala, ka weletaka: mo ni vukei koya dina mo drau vakaduria cake tale” (Vakarua 22:4). Kevaka e pulumakau, ena vakacava soti na levu ni nona lomasoli e dua me vukea na wekana e leqa tu. Ia me vaka a vola o Elder James E. Talmage, “Na ulubale eso [me kakua ni caka] e sa rawarawa ni kunei; era cadra cake totolo ka levu sara me vaka na co ena tolo ni sala” (Jesus the Christ, 3d ed., Salt Lake City: The Church of Jesus Christ of Latter-day Saints, 1916, t. 431).

A solia vei keda na kai Samaria e dua na ivakaraitaki ni loloma savasava ni lotu va-Karisito. A tu vua na loloma; a lako okoya kivua na turaga a vakamavoataki mai vei ira na daubutako ka vauca na nona mavoa. A kauti koya ki na dua na bure ni vulagi, maroroi koya, sauma na veika a vakayagataka, ka rawa ni solia eso tale ke gadrevi me baleta na nona qaravi. Oqo na italanoa me baleta na loloma ni dua na kai noqu me baleta na kai nona.

E dua na ivosavosataki makawa e tukuna ni dua na tamata “e ologi vakataucoko vakaikoya e rawata e dua na ivivi lailai.” Na loloma e tiko kina e dua na mataqali iwalewale me vakalevutaki kina na ivivi lailai. Na idola oya meda lomana na noda neiba, oka kina na neiba e dredre voli me lomani. E gadrevi meda nanuma ni dina ga eda rawata na noda veitokani, na Kalou e sa vakarautaka tu na noda veitokani—e veivanua kecega. E sega ni dodonu me vakaiyalayala na loloma; e sega ni dodonu me qiqo na noda veidokai. A kaya o Karisito, “Ia kevaka dou lomani ira sa lomani kemudou, a cava ena kemudou isau? era sega li ni cakava vakaoqo ko ira sa kumuna nai vakacavacava?” (Maciu 5:46).⁸

ra vakayagovinakataka tiko na simede na daucakacaka — Na Turaga “ena vakarautaka na noda lomadina kivua ena iwalewale ni noda lomani ira ka qaravi ira na wekada.”

Sa dodonu meda lomani ira ka qaravi ira tale eso ena nodra vakalolomataki.

A vola o Josefa Simici e dua na ivola kivei ira na Yalododonu, ka tabaki ena Messenger kei na Advocate, ena ulutaga ni noda veilomani me na vakadonui mai vua na Kalou. A vola vakaoqo:

“Kemuni na Veitacini:—e sa itavi me na tutaka vagalala na Yalododonu kece sara kivua na tacina—me dau lomani ira tikoga, ka dau vukei ira. Me da vakadonui mai vua na Kalou sa dodonu meda dau veilomani: sa dodonu meda ulabaleta na itovo ca; sa dodonu meda dauraici ira na luveniyali kei ira na yada ni ra sa rarawa, ka meda qarauni keda talega me kakua ni tauvi keda na duka ni ka vakavuravura: ni valavala dodonu vakaoqo era sa drodro mai na mataniwai levu ni lotu savasava. Na vaqaqacotaki ni noda vakabauta ena vakuri ni ivakarau vinaka kecega e ukucavutaki ira na luvei Jisu kalougata, sa rawa kina ni da masu ena draki ni masumasu; sa rawa ni da lomani ira na kai noda me vakataki keda, ka da yalodina ena gauna ni dredre, ni kilai na icocovi ni veika kece oqo e sa levu cake ena matanitu vakalomalagi. Sa dua dina na ka veivakacegui! Sa dua dina na reki! Me’u sa bulataka na bula ni yalododonu, ka me sa vakaoqo na noqu icocovi!” (History of the Church, 2:229).

Na ivalavala dodonu e rua oqo, loloma kei na veiqaravi, e sa gadrevi kivei keda kevaka meda sa neiba vinaka ka kune vakacegu ena noda bula. Era a tiko vakaidina ena lomai Elder Willard Richards. Ni tiko voli ena Valeniveivesu e Carthage ena yakavi ni nodrau vakamatei o Josefa kei Hyrum, a vakatura na ivakatawa ni valeniveivesu ni rau na taqomaki cake ena rumu ni kaivesu. A vuki o Josefa kivei Elder Richards ka taroga, “Kevaka keirau sa lako ki na rumu ni kaivesu o na lako vata li kei keirau?”

Na isaunitaro nei Elder Richards e sa dua na ivakaraitaki ni loloma: “Baraca Josefa, o sega ni kerei au me’u takosova na uciwai vata kei iko—o sega ni kerei au me’u lako mai ki Carthage—o sega ni kerei au me’u lako mai ki na valeniveivesu vata kei iko—ka o sa nanuma li oqo ni’u na vakanadakui iko? Ia au na tukuna vei iko na ka au na cakava; kevaka o sa beitaki mo kuna ena vuku ni ’lawaki,’ au na kuna ena vukumu ka o na lako ena galala.”

E rairai mai na yalobibi ni lomana kei na vakanananu a sauma kina o Josefa, “Ia o sega ni rawa.”

Ka a sauma kina vaqaqaco o Elder Richards, “Au rawata” (raica na B. H. Roberts, A Comprehensive History of the Church, 2:283).

Na vakatovolei nei Elder Richards sa rairai levu cake mai na kena eda na sotava: na vakatovolei ni kama ka sega ni vatutarai. Ia kevaka eda sa kerei meda cakava vakakina, ena rawa li ni da solia na noda bula ena vukudra na noda matavuvale? noda itokani? noda neiba?

Na vatutarai ni yalololoma e sa dua na ivakaraitaki ni noda bula vakatisaipeli; e sa ivakaraitaki ni noda lomana na Kalou kei ira tale eso. Eda na biuta li toka mai e dua na maka ni koula savasava se, vakataka na bete kei na luvei Livai, lako vakatikitiki tani?⁹

Sa gadrevi meda lakova vakamatau cake na salatu ni loloma cecere e sa vakaraitaka o Jisu.

Ena dua na itukutuku bibi kivei ira na Yalododonu e Nauvoo ni vo toka e dua na yabaki ki na nona mate vakaloloma, a kaya na Parofita o Josefa Simici:

“Kevaka meda na taura matua ka bucina na nodra lomani tale eso, sa dodonu meda lomani ira tale eso, vakakina na noda meca kei ira na itokani. … Sa dodonu mera tamusuka na lotu va-Karisito na nodra veisei kei na veivakacacani vakaiira yadua, ka bucina na ivakavuvuli eso ni duavata kei na veitokani ena kedra maliwa.” (History of the Church, 5:498–99.)

Oqori na ivakasala vakasakiti nikua, me vaka na kena ena gauna [oya]. Na vuravura eda bula tiko kina, se voleka i vale se yawa sara, e sa gadreva na kosipeli i Jisu Karisito. E vakarautaka na sala duadua ga ena kila rawa kina o vuravura na vakacegu. Sa gadrevi meda na yalovinaka vakaikeda, yalorawarawa cake ka dauveivosoti. Sa gadrevi meda na berabera ni cudru ka vakauqeti cake ni veivuke. Sa gadrevi meda dodoka yani na liga ni veitokani ka vorata na liga ni veivakaduiduitaki. Vakalekaleka, sa gadrevi meda veilomani ena loloma savasava i Karisito, vata kei na loloma cecere dina kei na yalololoma kei na, kevaka e ganita, wasei ni rarawa, ni oya na sala e sa lomani keda kina na Kalou.

Ena noda veiqaravi ni sokalou, eda dau lagata e dua na sere ni lotu totoka ka a vola na qaqana o Susan Evans McCloud. Me’u talelesuva mada la vei iko e vica na qaqa ni sere oya?

Kemuni noqu Turaga
Meu na muri tikoga
Meu dau kauwai ka veivuke,
Nomuni kaukauwa ga. …

Tabu niu vakalelewa
Ni tu noqu lecaika?
Na lomaqu sa tu kina
Veika e tawa kilai. …

Na wekaqu meu qarava,
Veivueti talega.
Na mavoa kei na oca
Meu yalo vinaka ga.
Na wekaqu meu qarava—
Ka, muri Kemuni.

(Serenilotu, 1985 na. 129.)

Sa gadrevi meda lakova vakamatau cake ka vakaveilomani cake na salatu e sa vakaraitaka o Jisu. Sa gadrevi “meu dau kauwai ka veivuke” ka da na kunea vakaidina na “kaukauwa ga.” Kevaka meda na vulica cake “na veivueti,” ena sega na gauna tukuni rawa ni kena vakayagataki, me tarai kina na “mavoa kei na oca” ka vakaraitaka kivei ira taucoko na “yalo vinaka.” Io, Turaga, ka muri kemuni.¹⁰

Na loloma cecere sa ikoya na loloma uasivi sara i Karisito ka na sega ni leqa.

“E dua na vunau vou ka’u sa solia vei kemudou,“ a kaya o [Jisu], “Mo dou veilomani, … A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:34–35.) Na loloma ka me na tiko vei keda me baleti ira na tacida kei na ganeda ena matavuvale vakayago, ka sa tiko vei Karisito me baleti keda yadua, e sa vakatokai na loloma cecere se “na loloma uasivi sara i Karisito.” (Moro. 7:47.) Sa ikoya na loloma a vakauqeta na vakararawataki kei na cabori ni veisorovaki i Karisito. Sa ikoya na usutu cecere duadua me na yacova na tamata vakayalo kei na ivakaraitaki titobu duadua ena loma ni tamata.

… Na loloma cecere e ologa taucoko na ivalavala dodonu vakalou tale eso. E veidutaitaka ruarua na ivakatekivu kei na icavacava ni yavu ni veivakabulai. Ni sa leqa na ka taucoko, na loloma cecere—na loloma i Karisito—ena sega ni leqa. Sa ikoya na ivakatakilakila levu duadua ni ka vakalou taucoko.

Mai na ivakaraitaki levu ni lomana, a vosa o Jisu kivei ira na vakaloloma, na butukisobu, na yada, na gone lalai; na dauteitei kei na dausiwa, kei ira na qaravi me kei na sipi; na vulagi kei na kaitani, na vutuniyau, na sa kaukauwa vakapolitiki, ka vakakina o ira na Farisi kei na dauvolavola tawaveitokani. A veiqaravi o Koya kivei ira na vakaloloma, na viakana, na tawakauwaitaki, na tauvimate. A vakalougatataki ira na lokiloki, na mataboko, na didivara, kei na tamata tale eso ka tuvaki vakaca tu na yagodra. A vakasava tani na tevoro kei na yalo velavela eso ka a vakavu baca ni vakasama se ituvaki ni yago. A vakasavasavataki ira na vakacolati tu ena ivalavala ca. A vakatavulica na lesoni eso ni loloma ka vakaraitaka veitaravi na veiqaravi tawakocokoco kivei ira tale eso. Eda sa ciqoma taucoko na nona loloma. “Ia sa soli vei ira na tamata kecega, ka sega e dua sa vakatabui vua.” (2 Nif. 26:28.) Oqo e sa ivakatakilakila ka ivakaraitaki taucoko ni nona loloma cecere tawayalani.

Ena rawaka sara vakalevu na vuravura eda bula tiko kina kevaka era na cakacakataka na turaga kei na marama ena veivanua kecega na loloma uasivi sara i Karisito, ka sa yalovinaka, yalomalua, ka yalomalumalumu. E sa sega ni cudru se viavialevu. E sa sega ni nanumi koya ga baleta ni sega ni qara na ka me nona. E sega ni dau vakaraitaka na cakaca se yalo vakatani, se rekitaka na ivalavala ca; sa sega kina na vanua ni vakaunona, veicacati, se vakatubuca. E cata me totaka na veivakaduiduitaki, veika tawayaga, veivakacacani, se veivakatalai tani. E vakayaloqaqataki ira na tamata duidui eso mera bula vata ena loloma ni lotu va-Karisito veitalia na vakabauta vakalotu, kawatamata, nomu vanua, itutu vakailavo, vuli, se itovo vakavanua.

E sa vakaroti keda na iVakabula meda veilomani vakaikeda me vaka e sa lomani keda o koya; meda vakaisulutaki keda “ena ivau ni loloma” (V&V 88:125.) me vaka e sa vakaisulutaki koya kina. Eda sa kacivi meda vakasavasavataka na noda nanuma eloma, meda veisautaka na lomada, meda cakava na noda ivalavala kei na irairai etuba me veidonui vata kei na ka eda kaya eda vakabauta ka vakila eloma. Me da sa na tisaipeli dina i Karisito.¹¹

Sa “dua na sala uasivi sara” na nodra lomani tale eso.

Ni se cauravou, a kaya o Baraca Vern Crowley ni a vulica e dua na ka ena lesoni bibi a vakatavulica na Parofita o Josefa kivei ira na Yalododonu eliu e Nauvoo ni a tukuna vei ira mera “lomani ira tale eso, vakakina na noda meca kei na itokani.” Oqo e dua na lesoni vinaka me baleti keda yadua.

Ni oti na nona mai tauvimate o tamana, a tutaka o Vern Crowley na cicivaki ni lomanibai ni yaya vakacacani eso ni matavuvale dina ga ni se qai yabaki tinikalima toka ga okoya. Eso na dauveivoli era dau mai vakayaco lomadra vakatawadodonu ena so na gauna kivua na cauravou, ka ra sa yali voli na gacagaca eso ena kedra ibiubiu ena bogi. A cudru sara o Vern ka yalataka me na toboka e dua na tamata ka cakava e dua na kena ivakaraitaki. Sa na nona na veisausaumi.

Ni oti toka ga na nona tekivu bula cake mai na tauvimate o tamana, e a wavokita voli ena dua na bogi o Vern na lomanibai ena gauna ni sogosogo. E sa voleka ni buto. Ena dua na ilesu tokatani ni vanua taukeni, a raica rawa okoya e dua na tamata ni colata voli e dua na tiki ni misini levu donuya na bai emuri. A cici okoya me vaka e dua na jabeni dauqito ka toboka na daubutako gone. Na imatai ni nona vakasama oya me na vakaseavutaka na nona rarawa ena ligana ka qai dretaka na gonetagane ki na mata ni valenivolavola ka qiritaka na ovisa. Sa sinai tu na lomana ena cudru kei na veisausaumi. E sa toboka rawa okoya na nona daubutako, ka sa navuca me rawata na nona inaki dodonu.

A basika mai o tamai Vern ena dua na vanua tawamacala, biuta na ligana malumalumu ka sautaninini ena tabai luvena tagane, ka kaya, “Au raica ni o lomabibi toka, Vern. Rawa beka ni’u qarava oqo?” Sa qai gole yani okoya kivua na gone me-na-butako ka biuta na ligana ena tabana, vakaraica na matana vakalailai, ka kaya, “Luvena, tukuna vei au, cava na vuna o cakava tiko kina na ka oqo? Cava na vuna o a saga tiko kina mo butakoca na taranisimisani oya?” A qai tekivu gole yani o Mr. Crowley ki na valenivolavola ni tauri koya tu na gonetagane, ka vakataroga toka me baleta na leqa ni nona motoka ni rau lako voli. Ena gauna rau sa yacova kina na valenivolavola, a tukuna o tama, “Io, au kila ni sa oti vua na nomu kalaji ka ni oya e vakavuna voli na nomu leqa.”

Ena gauna vata oqo, a cudru vakaukauwa voli kina o Vern. “O cei e via kila me baleta na nona kalaji?” a vakananuma okoya. “Me sa qiritaki na ovisa ka me vagalalataki yani na ka oqo.” Ia a vosavosa tikoga o tamana. “Vern, kauta mai vua e dua na kalaji. Kauta talega mai vua e dua na berigi viritani. Ka kauta mai vua e dua na peleti peresa. Oya sa dodonu me na vukea.“ A solia o tamana na veigacagaca taucoko kivua na cauravou ka a saga me butako ka kaya, “Kauta oqo. Oqo talega na taranisimisani. E sega ni dodonu mo butako, cauravou. Mo a kerea ga. E sa tiko na iwali kece ni leqa. Era sa lomasoli na tamata mera veivuke.”

A kaya o Baraca Vern Crowley ni a vulica e dua na lesoni tawamudu ni loloma ena siga oya. A lesu tale mai vakavuqa na cauravou ki na ibinibini. Mai na nona gagadre me cakava ena veivula, a sauma taucoko okoya na gacagaca a solia vua o Vic Crowley, oka kina na taranisimisani. Donuya na veisiko oya, a tarogi Vern okoya se cava na vuna sa vaka tu kina oya o tamana ka cava na vuna e cakava kina okoya na ka e cakava. A tukuna vua o Vern eso na ka me baleta na nodratou vakabauta ni Yalododonu Edaidai kei na levu ni nona lomana na Turaga kei ira na tamata o tamana. A qai kena itinitini me papitaiso okoya a via butako. A kaya emuri o Vern, “Sa ka dredre oqo me’u vakamacalataka na veika au a vakila kei na ka au a lako curuma ena gauna donumaki oya. O au talega, a gone voli. Au sa toboka rawa na noqu daubutako. Au sa vakarau vakayacora tu na veitotogitaki bibi sara. Ia a vakatavulica vei au o tamaqu e dua na sala duidui.“

E dua na sala duidui? E dua na sala vinaka cake? E dua na sala cecere cake? E dua na sala sa uasivi sara? Oi, sa wacava na veika ena rawaka kina o vuravura mai na dua na lesoni vakasakiti vakaoqo. Me vaka a cauraka o Moronai:

“Ia, ko ira yadua sa vakabauta na Kalou era sa vakanuinui dei ki na dua na vuravura sa vinaka cake. …

“Ia sa vakarautaka na Kalou e dua na sala uasivi sara ena isolisoli ni Luvena.” (Ica 12:4, 11.)¹²

Vakatutu ni Vuli kei na Veivakavulici

Taro

Na cava e vakaibalebaletaka o Peresitedi Hunter me baleta na rua na ivunau levu ni sa “vatutarai ni Turaga”? (Raica na iwasewase e 1.) Railesuva na iwalewale o na sauma kina na taro eso e taroga o Peresitedi Hunter ena icava ni iwasewase e 1.
Railesuva na itukutuku nei Peresitedi Hunter ena vosa vakatautauvata ni kai Samaria dauloloma (raica na iwasewase e 2). Na cava eda rawa ni vulica mai na ivakavuvuli oqo me baleta na nodra lomani na kai noda? Eda na rawa ni vakalevutaka vakacava na noda loloma kivei ira ena rairai “dredre me lomani”?
Ena iwasewase e 3 , e vakatavulica o Peresitedi Hunter ni sa dodonu meda lomani ira ka qaravi ira tale eso ena gauna era vakalolomataki kina. O sa vakalougatataki vakacava mai vua tale e dua ka a lomani iko ka qaravi iko ena dua na gauna gadrevi?
Vakasamataka na ivakavuvuli nei Peresitedi Hunter me baleta na muri ni ivakaraitaki ni loloma ni iVakabula (raica na iwasewase e 4). E rawa vakacava ni da taracake na loloma levu sara me baleti ira tale eso? Na cava eso na sala eda rawa ni vakaraitaka kina vakamatata sara na noda loloma?
Ena iwasewase e 5, e talevalesu o Peresitedi Hunter eso na sala a vakaraitaka kina o Karisito na Nona loloma. Na gauna cava o sa bau vakila kina na loloma ni iVakabula ena nomu bula? Na veivakalougatataki cava soti e sa basika mai ena nomu a “cakacakataka na loloma uasivi sara i Karisito”?
Na cava eda rawa ni vulica mai na italanoa a tukuna o Peresitedi Hunter me baleti Vern Crowley? (Raica na iwasewase e 6) E rawa vakacava ni da sosomitaka na vakilai ni “cudru kei na veisausaumi” ena vakilai ni loloma cecere? Na cava soti o sotakaya e sa vukei iko ni vulica ni sa “dua na sala uasivi sara” na loloma cecere?

iVolanikalou Veisemati

Maciu 25:31–46; 1 Korinica 13; Efeso 4:29–32; 1 Joni 4:20; Mosaia 4:13–27; Alama 34:28–29; Ica 12:33–34; Moronai 7:45–48; V&V 121:45–46

Veivuke ni Veivakavulici

Na cakacakataki ni veika ko sa vulica ena vakaikuritaka ka vakarabailevutaka na kilaka (raica na Joni 7:17)” (Vunautaka na Noqu Kosipeli [2004], 21). Navuca ni vakatarogi iko ena iwalewale o na tutaka kina na ivakavuvuli e vale, ena vanua ni cakacaka, kei na nomu itavi eso vaka-Lotu.