Wase 4

Veivuke Mai Cake

“E sega tale beka ni dua na yalayala ni bula me veivakadeitaki vakavinaka cake mai na yalayala oya ni veivuke vakalou kei na veidusimaki vakayalo ena gauna ni leqa.”

Na Bula nei Howard W. Hunter

O Howard W Hunter e a vulica me dau masu ni se gonetagane lailai “A vakavulici au na tinaqu meu dau masu ka vakavinavinakataka vei Tamada Vakalomalagi na veika kece au marautaka,” e kaya o koya. “Au dau vakavinavinaka vakalevu vua ena totoka ni vuravura kei na veigauna vakasakiti au a sotava ena vanua ni susu manumanu kei na yasa ni uciwai kei na Sikauti. Au vulica talega meu dau kerea Vua na veika au vinakata se gadreva. … Au a kila ni lomani au na Kalou ka dau rogoci au.”¹

Ena nona bula taucoko, sa dau goleva o Peresitedi Hunter na masu me ivurevure ni veivuke vakalou, ka vakavulici ira tale eso me ra vakayacora vakakina. Me kena ivakaraitaki, ni veiqaravi tiko vakabisopi, a vakaraitaka e dua na turaga ena nona tabanalevu na nona rarawataka tiko e dua tale na turaga. Na ivakasala nei Peresitedi Hunter e vakaraitaka na nona ivakadinadina me baleta na veivuke e dau yaco mai ena masu:

“Au kaya vua, ‘Taciqu, kevaka mo lako i vale ka dau masulaki koya ena veimataka kei na veiyakavi, daru na mai sota ni oti e rua na macawa ena gauna vata oqo daru qai lewa vata na ka me caka.’”

Ni oti nona muria na ivakasala, a lesu mai na turaga oqo ka kaya ena yalomalua me baleta na ikarua ni turaga, “E gadreva o koya me vukei.”

“O sa tuvakarau mo vukei koya?” e taroga o Peresitedi Hunter.

“Io,” e kaya na turaga oya.

“Sa yali kece na weligaga ka yali kece na cudru,” e qai nanuma lesu e muri o Peresitedi Hunter. “Oqori na ka e dau yaco ni da veimasulaki vakataki keda.”²

marama e masu tiko — “Sa yalataka na Turaga ni kevaka eda yalomalumalumu ena …gauna ni leqa ka gole vua me da vukei, eda na vakaukauwataki, ka [vakalougatataki mai cake’” (V&V 1:28).

iVakavuvuli nei Howard W. Hunter

Sa yalataka na Tamada Vakalomalagi me vukei keda ka tuberi keda ena gauna ni leqa.

O keda kece eda dau sotava na gauna ena noda bula eda gadreva kina vakalevu ka vakatotolo na veivuke vakalomalagi. E dau yaco vei keda kece na gauna eda vakadrukai kina ena veika eso se veilecayaki ena ivakasala eda ciqoma mai vei ira eso, ka da gadreva kina vakalevu na veituberi vakayalo, na gagadre levu me da kunea na sala dodonu ka cakava na ka e donu. Ena ikau vakaivolanikalou ni itabagauna e muri oqo, sa yalataka na Turaga ni kevaka eda yalomalumalumu ena veigauna ni leqa vakaoqo ka gole vua me da vukei, eda na “vakaukauwataki ka vakalougatataki mai cake, ka vakavukui tikoga.” (V&V 1:28.) Na veivuke oqori ena noda kevaka walega eda vakasaqara, vakabauta, ka muria na veika e vakatoka ena iVola i Momani na Tui o Penijamini me, “domo ni Yalo Tabu.” (Mosaia 3:19)

E sega tale beka ni dua na yalayala ena bula me veivakadeitaki vakavinaka cake mai na yalayala oya ni veivuke vakalou kei na veidusimaki vakayalo ena gauna ni leqa. E dua na isolisoli ka soli wale mai lomalagi, e dua na isolisoli eda gadreva mai na noda veigauna taumada vakaitabagone ki na veigauna sara e muri ni noda bula. …

Ena kosipeli i Jisu Karisito, sa tu kina vei keda na veivuke mai cake. “Dou reki ga,” sa kaya na Turaga, “niu sa tuberi kemudou tiko.” (V&V 78:18) “Au sa solia vei iko na noqu Yalo Tabu io ena vakavukui iko ko Koya ka vakasinaiti iko ena marau.” (V&V 11:13.)

Au vakadinadinataka na bula vakalou nei Jisu Karisito. E bula dina tiko na Kalou ka dau solia vei keda na Yalona. Ni da sotava na leqaleqa ni bula ka qarava na kena itavi, me da taura me noda na isolisoli mai vua na Kalou, na Tamada, ka kunea na reki vakayalo.³

Me vakataki Josefa Simici, e rawa ni da goleva na ivolanikalou kei na masu me da vakavulici kina mai cake.

Na parofita gonetagane o Josefa Simici … a segata me kila na nanuma kei na loma ni Turaga ena dua na gauna ni veilecayaki kei na kauwai ena nona bula. … Na vanua volekati Palmyra, e Niu Ioka, sa yaco me vanua dau “veiletitaki [kina] na lotu” ena gauna ni bula vakagonetagane nei Josefa e kea. Ka dina sara, e kena irairai vua ni sa vaka me tara na yasayasa taucoko ko ya, “ni ra sa totovata na ilala ni veimatalotu,” a vola o koya, ka vakauqeti ira vakalevu na tamata me ra curu ki na nodra veimatalotu [Josefa Simici—Ai Tukutuku 1:5].

Vua e dua na gonetagane se bera ni yabaki 14, sa dredre sara vakalevu nona vakasaqara na dina ka veilecayaki baleta ni o iratou na matavuvale na Simici e duidui na matalotu eratou taleitaka ena gauna ko ya.

Io ena ituvaki oqori kei na gauna, au sureti kemuni mo ni vakasamataka mada na veivakanananu vakasakiti kei na yalo oqo mai vua e dua na gonetagane gone sara vakaoqo. A vola vakaoqo:

“Ni sa yaco tiko na veiqati levu oqo au sa dau vakasama sara vakatitobu ka veilecayaki vakalevu; ia e dina niu dau vakanananu vakatitobu ka vakabibi vakawasoma, au a vagalalataki au tikoga mai na [veimatalotu] kece oqo … ; ia sa rui levu na veilecayaki kei na veilecalecavi vei ira na veimatavakabauta, sa dredre kina vua e dua na tamata gone me vakataki au, kau se vulagi vakalevu vei ira na tamata kei na veika kecega, meu vakadeitaka se ko cei e dina kei cei e lasu.

“Sa vusolo vakalevu na noqu vakasama ena so na gauna sa rogolevu ka sega ni mudu rawa na ue kei na kosakosa. …

“Ena loma ni ivaluvosa oqo kei na vakasosa ni vakasama eso au sa dau kaya vakavuqa e lomaqu: A cava beka me caka? Na matalotu cava vei ira kece oqo e dina; se era lasu taucoko li? Kevaka e dua vei ira e dina ia ko cei, kau na kila beka vakacava?

“Niu sotava tiko na gauna dredre sara oqo ka vu mai na nodra veisisivi na veimatavakabauta, au a wilika tiko ena dua na siga na iVola i Jemesa ena imatai ni kena wase ena tikina e lima ka kaya vakaoqo: Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini, ka na soli ga vua.

“E sa sega mada ni dua na tiki ni ivolanikalou me tara vakaukauwa na yalo ni tamata me vaka na kena tara na yaloqu na kena oqo ena gauna oqo. E laubasikata vakalevu sara na veitiki ni yaloqu. Au vakasamataka lesu vakavica na kena laulau, niu kila ni sa sega vei au na vuku, ka na rawa ni vukei au kina na Kalou. Ia au sega ga ni kila na sala meu muria” [Josefa Simici—Ai Tukutuku 1:8–12].

E dina sara, na ka e qai yaco tarava e veisautaka sara ga na itukutuku ni bula vakatamata. Ni sa lewa me “taroga na Kalou,” a lako yani na gonetagane ko Josefa ki na dua na veikau voleka ki na nodratou itikotiko. E kea, me isau ni nona vakamamasu, erau a rairai mai kina na Kalou, na Tamada Tawamudu, kei na Luvena, o Jisu Karisito vei Josefa ka vakasalataki koya. Na veivakatakilai levu oqori, kau vakadinadinataka ena yalomalumalumu, a saumi kina e vuqa tale na taro me baleta na noda itabagauna mai na kena tukuni ga na lotu me lewena na gonetagane o Josefa.

Ia na noqu inaki … e sega niu mai tuvana ga na imatai ni vica na gauna ni Veivakalesuimai, e dina ni dua vei ira na italanoa bibi duadua ena ivolanikalou. Ia au gadreva, meu vakabibitaka ga na ivakatagedegede cecere ni kidakida vakayalo e vakaraitaka na gonetagane tawavuli oqo.

E vica beka vei keda, ni yabaki tinikava se dua tale na yabaki, e rawa ni dei toka nona vakasama ka malua na yalona ni ra dreti keda ka kukuvi keda e vuqa na idre kaukauwa, vakauasivi ena dua na ulutaga bibi me vaka na noda vakabulai tawamudu? E vica vei keda e rawa ni sotava na veisaqasaqa ni vakasama e rawa ni yaco mai ni duidui na nodra ile vakalotu na itubutubu? E vica vei keda, ni yabaki tinikava se limasagavulu, ena vaqaqara i yaloda ka vakasaqaqara ena ivolanikalou me kunea na isau ni ka e vakatoka na iApositolo o Paula me “veika titobu ni Kalou”? (1 Korinica 2:10.)

Sa dua na ka vakasakiti … ni goleva na ivolanikalou na gone oqo oti qai gole ki na masu vuni, e rairai na rua na ivurevure cecere duadua ni vuku vakayalo kei na veivakauqeti vakayalo ka tu vakararaba ki na kawatamata. E dina sara ni a tu ena loma ni duidui ni vakasama, ia sa vakadeitaka me cakava na ka dodonu ka nakita me kunea na kena sala dodonu. E vakabauta o koya, me vaka e dodonu me daru vakabauta, ni rawa me na vakavulici ka vakalougatataki mai cake, ena ituvaki e tu kina.

Ia, eda na kaya beka, o Josefa Simici e dua na yalo digitaki, ka duatani na nona kisi o koya. Vakacava o keda na kena vo eda sa qase cake beka ena gauna oqo—eda sa qase cake mai na tinikava—ka da sega ni lesi me da dolava e dua na itabagauna vakosipeli? O keda talega me da vakatulewa ka vakadodonutaka na veilecayaki ka lakocuruma na ivaluvosa ena veiulutaga e tara na noda bula. E sinai tu na vuravura ena veimataqali vakatulewa dredre vakaoqo, ka so na gauna ni da sotava, eda na vakananuma na noda yabaki ni bula se na noda malumalumu.

Ena so na gauna eda nanuma ni sa mucu mai na noda kidakida vakayalo. Ena so na siga dredre sara, eda na nanuma sara beka ni sa guilecavi keda beka na Kalou, sa biuti keda duadua tu ena loma ni noda veilecayaki kei na kauwai. Ia na vakanananu oqori sa sega tale ni qai baleti ira walega na qase cake vei keda mai vei ira na gone sobu ka lailai nodra kila. Na Kalou e kilai keda ka lomani keda kece. O keda, o keda kece sara, na luvena yalewa kei na luvena tagane, se cava ga e kauta mai vei keda na lesoni ni bula, na yalayala e dei tikoga: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.” (Jemesa 1:5.)⁴

Josefa Simici ena veikau — E rawa ni da muria na ivakaraitaki nei Josefa Simici ena noda vakasaqara na vuku mai vua na Kalou.

Na masu e dua na sala me da rawata kina na kilaka vakayalo kei na veituberi.

Na vuli kei na vuku ni vuravura kei na veika kece e vakayago e yaco mai vei keda mai na noda wakilakila vakayago ena veisala vakayago ka vakavuravura. Eda tara, eda raica, eda rogoca ka tovolea ka boica ka vulica. Ia, na kilaka vakayalo, me vaka sa tukuna ko Paula, e yaco mai vei keda ena dua na sala vakayalo mai na kena ivurevure vakayalo. A tomana kina o Paula:

“Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua a sa sega ni kila rawa ko koya ni ra sa kilai vakayalo ga.” (1 Kori. 2:14.)

Eda sa kunea, ka kila, ni sala duadua ga eda na rawata kina na kilaka vakayalo sai koya me da goleva na Tamada Vakalomalagi ena Yalo Tabu ena yaca i Jisu Karisito. Ni da vakayacora oqo, ka kevaka eda vakarau tu vakayalo, eda na raica na veika e se bera mada ni raica na matada, ka da rogoca na veika eda a se bera mada ni rogoca—“na veika sa vakarautaka na Kalou,” ni vakayagataki na vosa nei Paula. (1 Kori. 2:9.) Na veika oqo eda sa ciqoma mai na Yalotabu.

Eda vakabauta ka vakadinadinataka ki vuravura, ni sa tu edaidai na veitaratara kei na Tamada Vakalomalagi kei na veidusimaki mai vua na Turaga. Eda vakadinadinataka ni vosa vua na tamata na Kalou me vaka a dau vakayacora ena gauna ni Veiyalayalati Makawa.⁵

E rawa ni da dau masu tikoga, sega ni gauna walega ni gagadre levu.

Na noda gauna oqo e vaka me tukuna tiko ni sega ni vakaibalebale se sega ni gadrevi, se o rau ruarua na masumasu ena yalodina kei na vakarokorokotaki ni veika tabu. Ia, na tamata vakatitiqa ni “gauna oqo” era gadreva na masu. Na veigauna ca, na itavi lelevu, na sosa ni vakasama, na rarawa levu—na veibolebole oqo ka dau kurelaki keda tani mai na vanua eda logavinaka voli kina kei na noda ivakarau tudei ka uqeti keda yani ki na ivakarau e dodonu me da toka kina. Kevaka eda laivi ira, era na vakayalomalumalumutaki keda, vakamalumutaki keda, ka vagolei keda ki na masu ena vakarokoroko.

Kevaka e ka ni gauna ga ni leqa na masu, sa ivakarau kocokoco dina, ka na yaco me da nanuma ni dua ga na dau ripea na Kalou se dua na tabana ni veiqaravi me vukei keda ga ena gauna ni leqa vakasauri. E dodonu me da nanumi Koya sa Cecere Sara ena bogi kei na siga—e veigauna—ka sega ni gauna ga sa sega kina ni rawa na tabana ni veivuke kece eda vaqara ka da sa gadreva vakalevu sara na veivuke. Kevaka e dua na tiki ni bula vakatamata ka tu na kena itukutuku ni cakamana ka sega ni yalani na kena yaga ki na yalo ni tamata, sai koya na veitaratara ena masu ni vakarokoroko yalodina vei Tamada Vakalomalagi.

“Kemuni Jiova, mo ni vakalakala daligamuni ki na noqu vosa, ni kila na noqu nanuma,” e lagata na Daunisame.

“Ni vakarogoca na noqu tagi, noqu Tui kei na noqu Kalou: niu sa masu ga vei kemuni.

“I Jiova ko ni na rogoca na domoqu ena mataka; Ena mataka kau na vakarautaka na noqu masu vei kemuni, ka rai cake.” (Same 5:1–3.)

Na ka e rairai gadreva vakalevu duadua na vuravura oqo na “rai cake” me vaka e kaya na Daunisame—me da rai cake ena noda gauna ni reki vakakina ena noda gauna ni rarawa, ena noda gauna ni rawaka kei na gauna ni leqa. Sa dodonu me da dau rai cake tikoga ka vakadinadinataka na Kalou ni sai koya e solia na veika vinaka kecega ka ivurevure ni noda vakabulai. …

E levu sara na veiyasa ni noda bula sa yali mai kina na yalo ni masumasu kei na vakarokoroko kei na sokalou. Era sa vuku, taleitaki, se vakasakiti na tagane kei na yalewa ena veivanua eso, ia e yali tiko vei ira e dua na tiki bibi sara ni bula me taucoko kina. Era sega ni dau rai cake. Era sega ni cakadodonu tikoga me vaka era sa yalataka [raica na V&V 59:11]. E taleitaki na nodra veivosaki, ia e sega ni bibi. Era veivosaki vakavuku, ia e sega ni yalomatua. Se ena vanua ni cakacaka, ena qito, ena vanua ni vakadidike, sa tiko sara e ra na ivakarau ni nodra buladokai o ira era sakitaka na nodra kaukauwa lalai ka vakasewasewana na kaukauwa tawayalani mai cake.

E ka ni rarawa ni so na gauna eda kunea na sega ni vakarokoroko ena loma sara ga ni Lotu. Ena veigauna eso eda sa rui dau veitalanoa ena domolevu, sega ni vakarokoroko ena noda curuyani ka curulesu ena veisoqoni ka dodonu me gauna ni masumasu kei na sokalou veivakasavasavataki. Na vakarokoroko e draki vakalomalagi. Na masu sai koya na kena sovaraki na yalo vua na Kalou na Tamada. Ena vinaka vei keda me da vakataka vakalevu cake na Tamada ena noda rai cake vua, ena noda dau nanumi koya tikoga, kei na noda maroroya vakavinaka na nona vuravura kei na nona cakacaka.⁶

Eda tara cake na noda rawata me da ciqoma na kilaka vakayalo ni da taura na gauna me da raitayaloyalo, vakanananu vakatitobu, ka masu.

Na veivakatorocaketaki vakayalo kei na noda laveti keda cake ki na veivakauqeti cecere duadua ni bula vakalou e sega ni ka rawarawa. E taura na gauna ka dau yaco na kena veiqalisominiwai. Ena sega ni yaco vakacalaka, ia ena rawati mai na sasaga vakasamataki vakavinaka kei na noda masuta na Kalou ka rokova na nona ivunau. …

Sa solia vei keda na Parofita o Josefa Simici … e rairai na itukutuku matata duadua beka vei ira kece ni gadrevi me da sa vakayalo ka vakakina na gauna kei na vosota vakadede e dodonu me vakadinadinataki ni ra tiki ni kena iwalewale. E kaya kina [o koya]: “Eda sa kila tu ni Kalou sa bulia na tamata ena dua na vakasama me na rawa ni vakasalataki, kei na dua na vuku ena rawa me vakarabailevutaki ki na vakarorogo kei na veivakavukui ena rarama e veivakarautaki ki na rarama mai lomalagi ki na vakasama ni tamata; kei na gauna sa vakavukui cake tiko kina na tamata, sa makare mai na nona rai, ka toso cake na nona marau, ka yaco sara me na vorata rawa na veika butobuto ni vuravura ka sega tale ni vinakata na caka cala; me vakataki ira ga ena gauna makawa, e sa yacova e dua na ivakatagedegede ni vakabauta ena nona sa solegi ena kaukauwa kei na lagilagi nei koya na nona Dauveibuli, ka sa kau cake me laki bula vata kei Koya. Ia me da sa qai kila tiko ni sai koya oqo e dua na vanua a sega ni vakasauri ga na yaco mai kina” [Nodra iVakavuvuli na Peresitedi ni Lotu: Josefa Simici (2007), 239].⁷

Sa dodonu me da taura na gauna me da vakarautaka na noda vakasama ki na veika vakayalo. Na tarai cake ni kaukauwa vakayalo e sega ni sala vata mai kei na soli ni veivakadonui. Sa dodonu me tiko na gagadre, sasaga, kei na vakavakarau yadua. Oqo e gadrevi dina kina na, … lolo, masumasu, vakasaqaqara ena ivolanikalou, na veika eda sa sotava mai, raitayaloyalotaka, kei na viakania ka viagunuva na bula dodonu.

Au raica ni veivuke me da railesuva na ivakasala oqo mai vua na Kalou Kaukauwa:

“Ia kevaka ko na kerea ko na ciqoma na ivakatakila ena ivakatakila, na kilaka ena kilaka, me rawa ni dou kila na veika vuni ka veivakacegui—na kena ena kauta mai na reki, na kena ena kauta mai na bula tawamudu” (V&V 42:61).

“Dou masuti Tamaqu ena vakabauta ka kerea vua ena yacaqu, me soli vei kemudou na Yalo Tabu, io ena vakatakila vei kemudou ko koya na veika sa ganiti ira na luve ni tamata” (V&V18:18).

“Ia mo dou nanuma tikoga e lomamudou na veika lagilagi ni bula tawamudu” (V&V 43:34).

“Dou kakua ni lomaocaocataka na ka mo dou kaya ia mo dou vulica ka nanuma matua tiko na noqu ivakavuvuli raica ena qai vakavotui mai ena kena gauna na ka me tukuni me ganiti ira na tamata yadua” (V&V 84:85).

“Dou vakasaqaqara vagumatua, ka dau masu tikoga ena vakabauta, ia kevaka dou sa caka dodonu ka muria na veiyalayalati dou sa veiyalayalati kina vakai kemudou” (V&V 90:24).

“Raica ena solia vei kemudou na Kalou na nona Yalo Tabu mo dou vuku kina, io, ena isolisoli ni Yalo Tabu e sega ni vakamacalataki rawa” (V&V 121:26).

Oqo na yalayala eso ena vakataucokotaka vakaidina na Turaga kevaka eda vakarautaki keda.

Taura na gauna mo raivakatayaloyalo, vakanananu vakatitobu, ka masulaka na veika vakayalo.⁸

Ena vukei keda na Kalou me da tubu vakayalo dua na ikalawa ena dua na gauna.

E dua na tiki ni noda dredre ena noda segata na bula vakayalo sai koya na nanuma ni levu tu na ka me caka ka sega na rauta na ka eda sa cakava tiko. Na vinaka sara e dua na ka e se tu sara i liu vei keda kece; ia e rawa ni da cakacakataka na veika eda kaukauwa kina, tekivu ena vanua eda tu kina, ka segata na marau e rawa ni kune ni da vakasaqara na veika ni Kalou. Eda na nanuma talega na nona ivakaro na Turaga:

“Ia, dou kakua ni oca ena cakacaka vinaka, raica dou sa tura tiko na yavu ni dua na cakacaka levu. Ia ena tubu mai ena veika lalai na veika lelevu.

“Raica sa vinakata na Turaga na yalo sa malumalumu ka talairawarawa; ia ko ira sa yalomalumalumu ka talairawarawa, era na kania na veta ni vuata ena vanua ko Saioni ena siga mai muri.” (V&V 64:33–34.)

Sa dau veivakayaloqaqataki tu ga vei au ni a kaya na Turaga “ia ko ira na yalomalumalumu ka talairawarawa, era na kania na veta ni vuata ena vanua ko Saioni ena siga mai muri.” O keda kece e rawa ni da yalomalumalumu ka talairawarawa. Kevaka a kaya na Turaga ni ra na kania na veta ni vuata ena vanua ko Saioni ko ira era sa vinaka sara, au vakabauta ni so vei keda ena yalolailai ka soro koso. …

Na vanua me da tekivu kina oqo. Na gauna me da tekivu kina oqo. Na balavu ni noda ikalawa me dua ga ena dua na gauna. Na Kalou, o koya e “tuvakataka na noda marau,” ena tuberi keda yani me vaka na gonelalai, ka da na yacova yani na vinaka sara ena iwalewale oya.

E sega ni dua vei keda sa rawata me vinaka sara se na ituvuka ni tubu vakayalo ka na rawati ena bula oqo. Na tamata yadua e rawa ka dodonu me tubu vakayalo. Na kosipeli i Jisu Karisito sai koya na ituvatuva vakalou ni tubu vakayalo tawamudu oqori. E levu cake mai na dua ga na ituvatuva ni ivakarau. E levu cake mai na dua na ituvatuva uasivi ni veimaliwai. E levu cake mai na vakasama vinaka ni vakavinakataki keda vakataki keda kei na yalodina. Na kosipeli sai koya na kaukauwa ni veivakabulai ni Turaga o Jisu Karisito kei na nona matabete kei na kena veivakabulabulataki vakayalo vata kei na Yalo Tabu. Ena vakabauta na Turaga o Jisu Karisito kei na talairawarawa ki na nona kosipeli, dua na ikalawa ena dua na gauna vakavinakataki ni da toso voli, kerea tiko na kaukauwa, vakavinakataka cake noda ivakarau ni rai kei na noda gumatua, eda na kunei keda ena qaqa ena qelenisipi ni iVakatawa Vinaka. Oqori ena gadrevi kina na bula vakaivakarau kei na veituberi kei na cakacaka kei na kaukauwa. Ia me vaka e tukuna na iApositolo o Paula, “Au sa rawata na ka kecega ena vukui Karisito o koya sa vakaukauwataki au.” (Filipai 4:13.)

E dua na ivakatakila ni gauna oqo e yalataka oqo: “Mo vakarorogo vua na Yalo Tabu ni na tuberi iko ena sala dodonu—io ena vukei iko mo kitaka na veika vinaka, mo yalomalumalumu ka lewa vakadodonu; raica oqori ga na noqu Yalo Tabu.

“E dina, e dina au sa kaya vei iko, au na solia vei iko na noqu Yalo Tabu, ia ena vakavukui iko ko Koya ka vakasinaiti iko ena marau;

“A ka oqo ko na kila kina, ni na soli vei iko na veika vinaka kecega ko sa kerea ena vakabauta.” (V&V 11:12–14.)⁹

Vakatutu ni Vuli kei na Veivakavulici

Taro

Ni o wilika oti na iwasewase e 1, vakananuma lesu na veigauna o a gadreva kina na veivuke vakalomalagi. Sa vakalougatataka beka vakacava na nomu bula ena gauna ni leqa na yalayala ni veivuke vakalou?
Ena iwasewase e 2, na cava e rawa ni da vulica mai na ivakaraitaki nei Josefa Simici ka rawa ni vukei keda ni da sotava na veilecayaki? E rawa vakacava ni da tara cake na kidakida vakayalo e levu cake me vaka na nei Josefa?
Vakananuma vakatitobu na ivakavuvuli nei Peresitedi Hunter me baleta na noda ciqoma na kilaka vakayalo (raica na iwasewase e 3). E rawa vakacava ni da vakalevutaka na noda gagadre kei na noda kaukauwa me da rawata na kilaka vakayalo? Na cava eso na sala sa vukei iko kina na kilaka vakayalo?
Na cava e rerevaki kina na noda raica na Kalou “me dau ripea se dua na tabana ni veiqaravi me vukei keda ga ena gauna ni leqa tubukoso”? (Raica na iwasewase e 4.) Sa veivakalougatataki beka vakacava vei iko na masu?
Ena iwasewase e 5, e vakavuvulitaka kina vei keda o Peresitedi Hunter na ivakarau me da tara cake kina na bula vakayalo. Na cava e gadrevi kina na sasaga me tarai cake na igu vakayalo? Na cava e rawa ni da vulica mai na ivolanikalou a wilika o Peresitedi Hunter ena iwasewase oqo?
Railesuva na ivakavuvuli nei Peresitedi Hunter ena wasewase 6 me baleta na tubu vakayalo. Na ivakarau cava beka sa iwalewale dua na ikalawa ena dua na gauna kina vei iko na tubu vakayalo. Ena veivuke beka vakacava na ivakavuvuli nei Peresitedi Hunter ena iwasewase oqo kevaka o vakila ni o yacokoso tiko ena nomu tubu vakayalo?

iVolanikalou Veisemati

Same 25:5; Vakaibalebale 3:6; 2 Nifai 32:8–9; Alama 5:46; 34:17–27; 37:36–37; V&V 8:2–3; 88:63; 112:10; Josefa Simici–Ai Tukutuku 1:13–17

Veivuke ni Veivakavulici

Sureti ira na lewe ni kalasi me ra vakasaqaqara ena wase, ka vaqara na iyatuvosa se parakaravu e bibi vei ira. Kerei ira me ra veiwaseitaka na iyatuvosa se parakaravu era sa kunea ka vakamacalataka na vuna era vakaibalebale kina.