Wase 3

Kalouca—Tiki ni Nona iTuvatuva na Kalou Baleta Noda iTosotoso Tawamudu

Na Bula nei Howard W. Hunter

Ena koniferedi raraba ni Epereli 1980, a tukuna kina o Elder Howard W. Hunter, ka lewena tiko ena gauna oya na Kuoramu ni iApositolo Le Tinikarua, na nona a maliwai ira e dua na ilala tamata levu me sarava na veitau boto babalavu mai Samoa. “Era masa na ilala tamata oqo,” e kaya o koya, “ka levu na mata era qara vaka ki wasawasa, me ra raica ena imatai ni gauna na [boto]. E tubu vakasauri na kaila vei ira na sarasara ni ra sa basika mai vakayawa na boto. Na boto yadua e limasagavulu na kena kaimua dauvoce momoqaqa era tayalotaka ka dreta vata ena dua na gauna na nodra ivoce ka biliga yani vakaukauwa na waqa me curuma na ua kei na vuso—dua na ka na kena totoka.

“Sega ni dede era sa laurai sara vakavinaka na boto kei na tamata ni ra veitau yani ki na icavacava. E dina ni ra voce ena nodra igu na tamata momoqaqa oqo, na bibi ni dua na boto kei na limasagavulu na tamata ka tosoi tiko me saqata e dua na kaukauwa veivorati—kei na ibili ni wai.

“E yacova na ivakatagedegede duadua e cake nodra kaila na sarasara ni sa kosova na laini icavacava na imatai ni boto balavu.”

Ni oti na veitau, a lako yani o Elder Hunter ki na vanua era kele tu kina na boto ka veitalanoa kei na dua na dauvoce, a vakamacalataka na dauvoce ni muailiu ni boto balavu e “caka me musuka ka wasea na wai me vukea na vakalailaitaki ni veisaqasaqa ka dau vakaleqa na totolo ni waqa. E vakamacalataka talega ni kena dreti na ivoce ena lomaniwai e vakavuna na igu ka dau tosoya ki liu na waqa. Na isaqa ni wai e vakavuna ruarua na veisaqasaqa kei na toso ki liu.”¹

E vakayagataka o Elder Hunter na veitau boto mai Samoa me vakamacalataka kina e dua na vosa me baleta na inaki ni kalouca. Ena gauna ni nona veiqaravi vaka-iApositolo, a tukuna ena vuqa na gauna me baleta na kalouca, ka solia kina na ivakasala, inuinui, kei na veivakayaloqaqataki. A vosa mai na veika sa sotava, ena nona curuma mai eso na tauvimate bibi kei na veivakatovolei tale eso. E vakadinadinataka ena yalodei ni ena gauna ni leqaleqa, “E tu vei Jisu Karisito na kaukauwa me vakarawarawataka na noda itavi ka vakamamadataka na noda icolacola.”²

Ena noda veivakatovolei, e solia vei keda yadua na iVakabula na veisureti a solia vua na tamata ena tobu mai Peciseita: “O sa via bula se segai?” (Joni 5:6).

iVakavuvuli nei Howard W. Hunter

Na kalouca e tiki ni nona ituvatuva na Kalou me baleta noda itosotoso tawamudu.

Au sa dikeva ni bula—na bula kece sara—e dui tu na kena ivotavota ni vinaka kei na ca. E dina sara, eda raica e vuqa na reki kei na rarawa e vuravura, e vuqa na ituvatuva veisautaki kei na idusidusi vou, e vuqa na veivakalougatataki e sega ni dau vaka na irairai se yalo ni veivakalougatataki, kei na vuqa e vakayalomalumalumutaki keda ka vakavinakataka cake noda dauvosota kei na vakabauta. Eda sa sotava kece na veika vakaoqori ena veigauna eso, kau vakabauta ni na dau vakatiko ga kina. …

… O Peresitedi Spencer W. Kimball, ka kila e levu na ka me baleta na kune rarawa, na mosiniyalo, kei na veika tale eso e sega ni cakava rawa kina e dua na ka, a vola vaqo:

“Ni da tamata, eda na vakasava tani beka mai noda bula na mosi vakayago kei na yaluma ni vakasama ka vakadeitaka vei keda na rawarawa kei na logavinaka, ia kevaka me da sogota na katuba ni rarawa kei na leqa, eda sa na vakuwai keda mai vei ira noda itokani kei na dauveitokoni. Na kune rarawa e rawa ni vakavuna na yalododonu ena tamata ni ra vulica na dauvosota, vosota vakadede, kei na lewai koya vinaka” [Faith Precedes the Miracle (1972), 98].

Ena itukutuku oya, a tukuna kina o Peresitedi Kimball na sogoti ni katuba ena veika eso ni bula. … E dau tasogo e veigauna na katuba eso ena noda bula, ka so vei ira na tasogo oqori ena vakavuna na mosi kei na mosiniyalo. Ia au vakabauta tudei ni vanua e tasogo kina e dua na katuba vaqori, ena tadola e dua tale (de na sivia beka na dua), kei na inuinui kei na veivakalougatataki ena veiyasa ni noda bula eso eda na sega beka ni raica kevaka a sega.

… Ena vica na yabakai sa oti, a kaya o [Peresitedi Marion G. Romney] ni tagane kei na yalewa e vuravura taucoko, okati kina o ira era yalodina ka dau talairawarawa duadua, era na sotava na kalouca kei na veivakararawataki ena nodra bula baleta, ena vosa nei Josefa Simici, “Sa dodonu me ra na sotava na rarawa na tamata me rawa kina ni ra cabeta yani na Ulunivanua o Saioni ka bula vakalou e cecere vakalomalagi” [Nodra iVakavuvuli na Peresitedi ni Lotu: Josefa Simici (2007), 262; raica na Conference Report, Oct. 1969, 57].

E qai kaya o Peresitedi Romney:

“E sega ni kena ibalebale oqo ni da vaqara na rarawa. Eda levea na kena levu ga e rawa. Ia, eda sa kila, ka da sa kila kece ena noda digia me da lako mai ki na bula oqo, ni da na mai vakatovolei ena veivakatovolei dredre ni kalouca kei na veivakararawataki. …

“[Me kena ikuri,] na ituvatuva ni Tamada me baleta na vakatovolei (kei na veivakasavasavataki] vei ira na luvena e sega ni vakuwai kina na Luvena. Na vakararawataki a mai sotava, ka vorata rawa, e tautauvata ni soqoni vata na vakararawataki ni tagane [kei na yalewa kecega. Sautaninini ka dra ka diva me kaulaivi mai vua na bilo, e kaya o koya,] ‘raica au a gunuva na bilo ko ya, ka vakacavara na noqu itavi ena vukudra na luve ni tamata’ (V&V 19:18–19)” (ena Conference Report, Okot. 1969, t. 57).

O keda kece e dodonu me da “vakacavara na no[da] itavi ena vukudra na luve ni tamata” [V&V 19:19]. Na vakavakarau i Karisito e duidui vakalailai mai na noda o keda, ia e dui tu kece na vakavakarau me da vakayacora, katuba me dolavi. Me caka na vakavakarau bibi vakaoqo ena gadrevi kina eso na mosi, eso na veisau sega ni namaki ena ilakolako ni bula, ka so na talairawarawa, “me vaka na gone sa talairawarawa vua na tamana” [Mosaia 3:19]. Na vakacavari ni vakavakarau vakalou kei na dolavi ni katuba vakasilesitieli ena tauri keda—e dina sara, sega ni lomalomaruataki ni na kauti keda—ki na iotioti ni auwa ni noda bula oqo.³

Eda lako mai ki na bula oqo meda sotava na veisaqasaqa. E tiki ni ituvatuva me baleta na noda itosotoso tawamudu. Kevaka e sega na veitemaki, na tauvimate, na mosi, kei na yaluma, ke a sega na vinaka, na ivalavala dodonu, marautaki ni tiko vinaka, se na reki. … E dodonu me da nanuma tiko ni kaukauwa vata ga ni veisaqasaqa ka tarova na noda toso ena vakarautaka talega vei keda na madigi eso me da qaqa kina.⁴

Na noda veivakatovolei ni bula oqo e baleta na noda tubu kei na kilaka.

“Ni vakayalomalumalumutaki keda ka vakasavasavataki keda ka vakalougatataki keda [na veika dredre ena bula oqo], sa rawa ni ra yaco me iyaya ni cakacaka qaqa ena ligana na Kalou me da tamata vinaka cake, me da dau vakavinavinaka vakalevu cake, dauloloma vakalevu cake, ka dau nanumi ira vakalevu cake na tamata tale eso ena nodra gauna ni dredre.

Io, e dau yaco kece vei keda na gauna dredre, vakatamata yadua kei na isoqosoqo tamata, se ena gauna dredre sara, gauna makawa se ena gauna oqo, na veileqaleqa oqori kei na parofisai e sega tale ni dua na kedra inaki ia me ra vakalougatataki kina na yalododonu ka vukei ira era sega soti ni yalododonu me ra veivutuni. E lomani keda na Kalou, ka tukuna vei keda na ivolanikalou ni a “solia na Luvena e duabau ga, me kakua ni rusa ko ira yadua sa vakabauti koya, me ra rawata ga na bula tawamudu” [Joni 3:16].⁵

Na peteriaki cecere ni iVola i Momani, o Liai, a vosa ni veivakayaloqaqataki vua na luvena o Jekope, na gone ka sucu ena loma ni lekutu ena gauna ni bula dredre kei na veisaqasaqa. Na bula nei Jekope e sega beka ni vaka e a namaka o koya ka sega ni vaka na veika eda na vakila mai na veika eda sa sotava. A sotava na veika rarawa ka sega ni namaki, ia a yalataka o Liai ni veika rarawa oqori e baleta vakatabakidua na vinaka nei luvena (raica na 2 Nifai 2:2).

A qai vakuria o Liai ena veimalanivosa oqo ka sa yaco me vakasakiti:

Ni sa dodonu kina me tu na veibasai ni ka kecega. Kevaka e sega ni “vakakina ena sega ni rawa na buladodonu se na cakaca e sega na bulasavasava se na rarawa sega na vinaka kei na ca.” (2 Nifai 2:11)

Au sa dau logavinaka ena veiyabaki ena ivakamacala oqo ni veika mosimosi ka rarawataki ni bula. Au dau logavinaka vakalevu cake ni o ira na tagane kei na yalewa cecere duadua, okati kina na Luve ni Kalou, era sa sotava na veisaqasaqa vakaoqo me ra kila vakavinaka cake kina na duidui ena ivalavala dodonu kei na cakaca, na yalosavasava kei na yalodukadukali, na vinaka kei na ca. Mai na butobuto kei na batabata ni loma ni Valeniveivesu mai Libati, a vulica kina na Parofita o Josefa Simici ni kevaka eda kacivi me da sotava na veivakatovolei, e baleta me da tubu ka kilaka ka na yaco e muri me da vinaka kina (raica na V&V 122:5–8).

Ena vanua e tasogo kina e dua na katuba, ena tadola e dua tale, vua sara mada ga na parofita e valeniveivesu. Eda sega ni dau yalomatua vakavinaka cake sega talega ni kilaka vakavinaka cake me vakatulewataka vakamatau na veicurucuruiloma kei na icurucuruituba. Na veivalevakatui e vakarautaka na Kalou me baleti ira yadua na luvena lomani e dui tu beka ga eso na icurucuru kei na itautauri, ibevavaku digitaki kei na ilatilati ena vinakata me da lakova ni da laki taukena. …

Ena veigauna eso ni noda bula, me vakalevu beka ena noda bula, sa dodonu me da dau vakadinadinataka ni kila na Kalou na veika eda sega ni kila ka raica na veika eda sega ni raica. “Ni sa duatani na noqu vakanananu ka duatani na nomudou vakanananu ka sa duatani na noqu ivalavala ka duatani na nomudou ivalavala sa kaya ko Jiova” (Aisea 55:8).

Ke tu beka na leqaleqa mai vale vei ira na gone dau vakau yalodra, ke o sotava na bula dredre vakailavo kei na lomaqa e dau vakatubura na leqa ena bula vakavuvale kei na tiko marau, kevaka mo na sotava na kautani ni bula se na tikobulabula, me kune vakacegu tikoga na yalomu. Eda na sega ni temaki ena veika e sega ni rawa ni da vorata [raica na 1 Korinica 10:13; Alama 13:28; 34:39]. Na noda vagolei tani kei na noda yalorarawa sai koya na sala dodonu ka rabailailai ki Vua.⁶

Ni tiko voli ena valeniveivesu mai Libati o Josefa Simici, a vakatakila vua na Turaga ni kalouca e rawa ni solia vei keda na kilaka ka da na vinaka kina .

E dodonu sara me da nanamaki ka yalodei tikoga ena veigauna sara mada ga ni bula dredre.

E dau tu ga na bula dredre ena bula oqo, ka na vaka tu ga kina e veigauna. Ia ni da kila na veika eda kila, ka bula me vaka na ivakarau e dodonu me da bula kina, sa sega kina ni dua na tikina, sega ni dua na iulubale, me da namaka na ca kei na yaluma.

Ena noqu gauna ni bula au sa raica e rua na ivalu levu, vata kei Korea, kei Vietnam kei na [vuqa tale]. Au a cakacakataka noqu bula curuma na Gauna Dredre Vakailavo ka rawa niu lako ki vuliloya ena gauna vata e tekivu tiko kina noqu matavuvale gone. Au raica na kena vakatoboicu na veimakete ni sea kei na bula vakailavo ni vuravura, kau sa raica talega na nodra curumi lialia na qaqa kei na vutuniyau, ka ra vakatubuleqa kina e vuravura raraba ena gauna oqori.

O koya au nuitaka kina ni o ni na sega ni vakabauta ni sa veiosooso ena nomuni itabagauna oqo na buladredre, se ni sega tale ni dua na gauna e tautauvata kei na nomuni gauna na kena dredre, se ni ra na sega ni vinaka cake. Au vakadeitaka vei kemuni ni ra a ca vakalevu cake na veika ka ra sa na vinaka cake tiko ga mai. Era vakakina—vakauasivi ni da bulataka ka lomana na kosipeli i Jisu Karisito ka solia kina na gauna me seraka mai na noda bula. …

Me veibasai kei na veika era kaya eso, e tu na iulubale kece ena vuravura oqo mo ni mamarau ka nanamaki ka yalodei. Na veitabatamata kece ena itekivu ni gauna e tu eso na ka me ra vakamalumalumutaka ka so na leqa me ra walia.⁷

Ni da lako mai vua na iVakabula, ena vakarawarawataka ko Koya na noda ivua ka vakamamadataka na noda icolacola.

“Dou lako mai vei au koi kemudou vakaaduaga sa oca ka colata na icolacola bibi ia kau na vakacegui kemudou.

Vakataqara vei kemudou na noqu ivua ka vuli vei au niu sa yalomalua ka yalo malumalumu dou na kunea kina na vakacegu ni yalomudou.

Ni sa rawarawa na noqu ivua ka sa mamada na noqu icolacola (Maci. 11:28–30.) …

… Na isolisoli vakasakiti ni veivuke oqo mai vua na Luve ni Kalou e sega ni yalani walega vei ira na kai Kaleli ni nona gauna. Na kaci oqo me da colata na nona ivua rawarawa ka ciqoma na nona icolacola mamada e sega ni yalani walega vei ira na itabatamata sa sivi yani. A veisureti raraba ena gauna oya ka vakakina ena gauna oqo vei ira na tamata kecega, ki na veikoro lelevu kei na veimatanitu, vei ira na tagane, yalewa, kei na gone e veivanua kecega.

Ena noda gauna ni leqa levu me da kakua ni sega ni vakadinadinataka na isaunitaro sega ni druka rawa oqo ni leqaleqa kei na nuiqawaqawa ni noda vuravura. Oqo na yalayala ni bula vakacegu kei na taqomaki ni tamata yadua. Oqo na kaukauwa me bokoca na ivalavala ca ena veitabagauna kecega. O keda talega, e dodonu me da vakabauta ni o Jisu Karisito e tu vua na kaukauwa me vakarawarawataka na noda ivua ka vakamamadataka na noda icolacola. O keda talega e dodonu me da lako mai ki vua ka ciqoma mai vua na vakacegu mai na noda ogaoga.

E dina sara, na icolacola e lako vata kei na yalayala vakaoqori. “Taura vei kemudou na noqu ivua,” e kerea o koya. Ena veigauna vakaivolatabu na ivua e dua na iyaya ni cakacaka yaga sara vei ira era dau teivaka na qele. E rawa kina me semati vata na nodrau igu e rua na manumanu, ka rau wasea vata na cakacaka bibi ni kena dreti na isiviyara se na qiqidreti. E dua na icolacola sa rui sivia se sega beka ni rawata e dua sa rawa kina me rau wasea vakatautauvata e rua ni rau vauci vata ena dua na ivua. Na Nona ivua e gadreva e dua na igu kaukauwa, ia vei ira era sa saumaki dina mai, sa rawarawa na ivua ka na yaco me mamada na icolacola.

Na cava me da sotava duadua kina na icolacola ni bula, e taroga na Karisito, se cava me da sotava kina ena veitokoni vakayago ka totolo na kena dau kasura? Vei ira era colata na icolacola bibi, na ivua i Karisito, sai koya na kaukauwa kei na vakacegu ni da tu veitikivi kei na Kalou ka na solia na veitokoni, na duavata, kei na kaukauwa me da sotava na noda bolebole ka vosota rawa na noda itavi eke ena vanua qelemamaca kaukauwa ni bula oqo.

E matata, ni icolacola ni tamata yadua e duidui mai vua e dua ki vua e dua tale, ia o keda yadua e tu vei keda. … E dina sara, eso na rarawa e yaco mai ena vuku ni ivalavala ca ni dua na vuravura e sega tiko ni muria na ivakasala ni Tamada mai Lomalagi. Se cava ga na vuna, e sega ni dua vei keda e vaka me sa galala sara mai na bolebole ni bula. Vei keda vakayadua kece sara, e kaya na Karisito: Me vaka ni da colata kece eso na icolacola ka vataqara e tabada eso na ivua, vakacava mo dou solia mai me noqu? Na noqu yalayala vei kemudou oya ni rawarawa na noqu ivua, ka mamada na noqu icolacola. (Raica na Maciu 11:28–30.)⁸

“Na tisaipeli i Karisito ena itabatamata kece sara era sa sureti, ka vakaroti vakaidina, me ra vakasinaiti ena inuinui e uasivi sara.”

O ira na yalododonu edaidai me ra kakua ni rerevaka na veivakatovolei ni veigauna e muri.

E tukuna na ivolanikalou … ni na yaco eso na gauna ni na tarai vuravura taucoko eso na dredre. Eda kila ni ena noda itabagauna, e kalouca ni na takalevu na bula sega ni dodonu, ka na kauta mai na kena dredre kei na mosi kei na itotogi e sega ni levei rawa. Ena musuka sobu na Kalou na bula tawadodonu oqori ena nona gauna ga, ia sa noda itavi me taucoko na noda bula ka yalodina ka kakua ni lomaleqataka vakabibi na ca ni vuravura se na gauna ena oti kina. Na noda itavi me tiko na kosipeli ena noda bula ka me da rarama serau, e dua na koro sa tara toka e delana, ka seraka mai na totoka ni kosipeli i Jisu Karisito kei na reki kei na marau ka na dau yaco mai ki na tamata kecega ena itabayabaki kecega era dau rokova na ivakaro.

Ena iotioti ni itabagauna ena yaco na veivakatovolei levu. (Raica na Maci. 24:21.) Eda kila ni yaco na ivalu kei na irogorogo ni ivalu (raica na V&V 45:26) ka na yavavala ko vuravura taucoko (raica na V&V 45:26). Na itabagauna kece sara sa tu na kedra veigauna ca, ia na noda gauna ena yaco mai na kena dredre. (Raica na 2 Timo. 3:1.) Era na se na tamata ca (raica na 2 Timo. 3:13), ia era sa dau seraka vakalevu na tamata ca. Ena yaco mai na buladredre ka na levu na duidui. Raica na V&V 45:27

Ena sega ni levei rawa ni na yaco me vua ni so na mataqali parofisai vakaoqo na nuiqawaqawa, oqori e sega ni nuiqawaqawa vei ira na itabatamata gone. Sai koya na nuiqawaqawa ka ra wasea na tamata ena itabatamata kecega ka ra sega ni kila na veika eda kila.

Ia au via vakabibitaka ni mataqali yalo vakaoqori e sega ni veiganiti kei ira na Yalododonu Edaidai yalodina, ka ra sega ni lako mai vua na Kalou. Kivei Isireli ena gauna makawa, a kaya ko Jiova cecere:

“Mo ni kaukauwa ka qaqa, kakua ni rere se sautaninini ena vukudra: ni sa lako vata kei kemuni ko Jiova na nomuni Kalou; ena sega ni weletaki kemuni, se biuti kemuni. …

“Ia ko Jiova ga sa liutaki iko, ena tiko vata kei iko ko koya, ena sega ni weletaki iko se biuti iko mo kakua ni rere se yalolailai.” (Nai Vakarua, 31:6, 8.)

Ia ki vei kemuni, na noda itabatamata vakasakiti na Isireli ena gauna oqo, sa kaya na Turaga:

Kakua ni rere na qele ni sipi lalai, dou caka dodonu tiko ga; raica “ena sega ni rawai kemudou ko vuravura kei eli, kevaka dou sa tara ena dela ni noqu uluvatu. …

Drau kakua ni rere se lomalomarua; ia mo drau vakaliuci au ena nomudrau nanuma kecega.” (V&V 6:34, 36.)

Na ivakasala vakaoqori e sinai tu kina na noda ivolanikalou ena gauna oqo. Rogoca mada na veivakadeitaki vakasakiti oqo: “Dou kakua ni rere koi kemudou na gone lalai; raica dou sa noqu; au sa vakamalumalumutaki vuravura; io sai kemudou sa solia vei au ko Tamaqu.” (V&V 50:41.) “Au sa kaya vakaidina vei kemudou na wekaqu, dou kakua ni rere, dou yalovakacegu ga, io, dou reki tikoga ka vakavinavinakataka na ka kecega.” (V&V 98:1.)

Ena rarama ni mataqali ivakasala vakasakiti vakaoqori, au vakabauta ni sa noda itavi me da reki vakalevu cake vakalailai ka rarawa vakalailai sobu, me da vakavinavinakataka na veika sa tu vei keda kei na levu ni nona veivakalougatataki na Kalou vei keda, ka veivosakitaka vakalailai sobu na veika beka e sega ni tu vei keda se na lomaleqa cava ga ena salavata mai kei na gauna dredre ena itabagauna oqo se itabagauna cava ga.

Na gauna ni inuinui cecere kei na yaloreki

Me baleti ira na Yalododonu Edaidai oqo e dua na gauna ni vakanuinui cecere kei na yaloreki—e dua na itabagauna cecere duadua ni Veivakalesui mai ka sa dua kina na itabagauna cecere duadua ena veitabagauna kecega, me vaka ni noda na itabagauna cecere duadua ena veitabagauna kecega. Eda gadreva me tu vei keda na vakabauta kei na inuinui, e rua na ivalavala dodonu ulumatua ka cecere duadua ena bula vakatisaipeli i Karisito. Sa dodonu me da tomana tiko na noda yalodei vua na Kalou, me vaka ni sai koya oqori na imatai ni ivakavuvuli ena noda yavu ni vakabauta. Sa dodonu me da vakabauta ni tu vua na Kalou na kaukauwa kecega, ni lomani keda, ka na sega ni tarovi se vakacacani na nona cakacaka ena noda dui bula se e vuravura raraba. …

Au yalataka vei kemuni ena yaca ni Turaga kau Nona italai koi au ni na taqomaki ira ka maroroi ira na nona tamata na Kalou. Ena tu na noda dredre ena ivakarau vata ga era sotava kina na dredre na itabatamata kei na tamata kecega. Ia ena kosipeli i Jisu Karisito, sa tu vei iko na inuinui kei na yalayala kei na veivakadeitaki kecega. E tu vua na Turaga na kaukauwa me baleti ira na nona Yalododonu ka na dau vakarautaka tikoga na veivanua ni vakacegu, veitaqomaki, na maroroi vinaka ena vukudra na nona tamata. Ni da vakabauta na Kalou eda rawa ni nuitaka e dua na vuravura vinaka cake—vei keda vakayadua, kei na kawatamata kecega. A vakavulica na parofita o Ica ena gauna makawa (ka ni kila o koya e dua na ka me baleta na leqaleqa): “Ia ko ira yadua sa vakabauta na Kalou, era sa vakanuinui dei ki na dua na vuravura sa vinaka cake, ka sa dua na nodra tikina ena ligai matau ni Kalou; oqo na inuinui sa rawa ena vakabauta; a sa nodra ikelekele na tamata ka vakadeitaki ira mera tudei sara ka uasivi ena cakacaka vinaka kecega, ka vakacaucautaka na Kalou.” (Ica 12:4.)

Na tisaipeli i Karisito ena veitabatamata kecega era sa sureti, era vakaroti vakaidina, me ra tudei ena vakanuinui taucoko sara. (Raica na 2 Nifai 31:20.)

Segata me seyavu na rere

… Kevaka sa ikelekele ni noda vakabauta kei na inuinui na Karisito, ena nona ivakavuvuli, ivakaro, kei na yalayala, sa na rawa vei keda me da vakararavi ki na dua na ka e vakasakiti, mana vakaidina, ka na rawa ni tawasea na Wasa Damudamu ka tuberi ira na Isireli ni gauna oqo ki na dua na vanua ka sega kina na “lomaocaoca kecega.” Raica na Sere ni Lotu 1985, naba 17. Na rere, ka rawa ni yaco mai vei ira na tamata ena veigauna dredre, e dua na iyaragi bibi ena valeniyaragi dau vakayagataka o Setani me vakararawataka kina na tamata. O koya e dau rere ena vakayalia na igu ena ivalu ni bula eda veivala kina kei na ca. O koya sa dau tovolea kina na kaukauwa ni ca me vakatubura na rere ena yalo ni tamata. Ena veitabayabaki kei na veitabagauna kece, sa dau sotava na kawatamata na rere.

Ni da luve ni Kalou ka kawa i Eparaama, Aisake, kei Jekope, sa dodonu me da segata me tababokoci na rere mai vei ira na tamata. Na tamata ririko ka dau rerere ena sega ni cakava rawa vakavinaka na nona cakacaka, ka sega ni rawa ni cakava na cakacaka ni Kalou. Na Yalododonu Edaidai e tiko na nona itavi lesi vakalou me vakayacora ka me kakua ni seyavu yani ena rere kei na lomaleqa.

E dua na iApositolo ni Turaga ena dua na gauna e liu a kaya vakaoqo: “Na idola ki na valuti ni rere sa solia na Parofita o Josefa Simici. ‘Ia kevaka dou sa vakarau vakavinaka tu, dou na sega sara ni rere.’ (V&V 38:30.) Na itukutuku vakalou oqori e gadrevi me dau tokaruataki nikua ena veiiteki kei na tabanalevu.” (Elder John A Widtsoe ena Conference Report Epe., 1942, t. 33.)

Eda sa vakarau tu beka me da soro ki na ivakaro ni Kalou? Eda sa vakarau tu beka me da rawata na qaqa mai na gagadre ni lomada? Eda sa vakarau tu beka me da talairawarawa ki na lawa dodonu? Kevaka e rawa ni da sauma vakadodonu sara ena io na taro eso oqori, sa rawa ni da vakatala na rere me lakotani mai na noda bula. E dina sara na ivakatagedegede ni rere e tu e yaloda e rawa ni vakarautaki mai na noda vakavakarau me da buladodonu—bula ena dua na ivakarau ka dodonu me ra bula kina na Yalododonu kece sara ena veitabayabaki kei na itabagauna.

Na galala, dokai, kei na itavi ni bula ena itabagauna e muri oqo

Meu sogota mada ena dua na malanivosa cecere duadua au sa bau wilika mai vua na Parofita o Josefa Simici, ka a sotava voli na dredre vakaiyanaqa ena nona bula ka a sotava talega na isau cecere ni nona bula qaqa. Ia a tamata qaqa o koya, ka dua na tamata mamarau, bulicaki kaukauwa, ka dau nanamaki ki liu. O ira era kilai koya era a vakila na nona igu kei na yaloqaqa, ena veigauna butobuto sara mada ga. A sega ni malumalumu na nona bula vakayalo, se balavu nona dau yalolailai tu.

A tukuna o koya me baleta noda gauna—nomu kei na noqu—ni noda gauna “ena marau dua tani o ira na parofita, bete kei na tui; [ena veitabagauna sa oti] era a sa vakanamata tu ena reki ni vakaitavi ena siga eda bulataka; kei na veiuqeti vata kei na kena vakalomalagi ka rekitaki ni vakaitavi era lagasere ka volavola ka parofisaitaka na veika oqo ena noda gauna oqo; … oi keda eda tamata [sa digitaka] na Kalou me kauta mai na lagilagi Edaidai” [Nodra iVakavuvuli na Peresitedi ni Lotu: Josefa Simici, 211].

Sa dua na galala cecere! Sa dua na ka dokai! Sa dua na itavi cecere! Ka rekitaki! Sa noda na inaki kece sara ena gauna oqo ka tawamudu me da reki ka vakavinavinaka ena vinaka ni noda bula kei na yalayala sa soli tu vei keda.⁹

Vakatutu ni Vuli kei na Veivakavulici

Taro

E rawa vakacava ni vukei keda me da kila ni kalouca e tiki ni nona ituvatuva na Kalou me baleta noda itosotoso tawamudu? (Raica na iwasewase e 1.) Na cava o nanuma kina ni kalouca e tiki yaga ni bula oqo?
Railesuva na ivakavuvuli nei Peresitedi Hunter ena iwasewase e 2 me baleta eso na inaki ni kalouca. O sa raica rawa vakacava ni kalouca e rawa ni yaga vei keda? E rawa vakacava me da raica na kalouca mai na nona ivakarau ni rai na Turaga?
Na cava na vuna, me vaka e vakavuvulitaka o Peresitedi Hunter, e dodonu kina me da marau ka nanamaki ena veigauna sara mada ga ni buladredre? (Raica na iwasewase e 3.) E rawa vakacava me da tara cake na yalonanamaki ena veigauna vakaoqori? Na cava eso na veivakalougatataki eda dau kunea tikoga ena gauna ni kalouca dredre sara?
Me da ciqoma vakacava na nona veisureti na iVakabula me da laiva Vua me colata noda ivua ka vakamamadataka noda icolacola? (Raica na iwasewase e 4.) Na cava na kena ibalebale me da vakataqara vei keda na Nona ivua? Sa vukei iko beka vakacava na iVakabula ena veigauna ni dredre?
E vakavuvulitaka o Peresitedi Hunter ni yalorere me baleta na veivakatovolei ni veisiga e muri e sega ni lako mai vua na Kalou (raica na iwasewase e 5). Na cava e rawa ni veivakamavoataki kina na bula rere? E rawa vakacava ni da bula ena inuinui kei na vakabauta ka sega ena rere?

iVolanikalou Veisemati

Joni 14:27; 16:33; Iperiu 4:14–16; 5:8–9; 1 Nifai 1:20; Alama 36:3; V&V 58:2–4; 101:4–5; 121:7–8; 122:7–9

Veivuke ni Veivakavulici

“E lewe levu era sa kunea ni gauna vinaka duadua ni vuli ena mataka lailai ni ra sa yadra mai na moce. … E so tale era tukuna ni gauna vinaka ni sa vagagalu na loma ni vale ni sa mai cava na qaravi itavi ni dua na siga. … “Na ka e bibi cake ena auwa ni siga oya na kena vakatikitikitaki e dua na gauna tudei me baleta na vuli” (Howard W. Hunter, “Reading the Scriptures,” Ensign, Nove. 1979, 64).