Wase 13

Na Valetabu—Na iVakatakilakila Cecere ni Noda Lewenilotu

“Na gagadre titobu duadua ni yaloqu sai koya mera bula kilikili na lewenilotu yadua mera curu ki na valetabu.”

Na Bula nei Howard W. Hunter

Na marama tinai Howard W. Hunter a lewe ni Lotu yalodina ena nona bula taucoko, ia o tamana a sega ni papitaiso me yacova ni sa yabaki 19 o Howard. Ena veiyabaki e muri, ni sa peresitedi ni iteki mai California o Howard, era gole na lewe ni iteki ki na Valetabu e Mesa Arizona mera laki cakava na cakacaka ni valetabu. Ni bera ni tekivu e dua na soqoni ni valetabu, a kerei koya o peresitedi ni valetabu me vosa vei ira era soqoni vata mai e valenilotu. O ya na ika 46 ni siganisucu nei Peresitedi Hunter. E muri a vola na ka a yaco:

“Niu sa vosa tiko vei ira na ivavakoso, … rau sa curu mai ki valenilotu o tamaqu kei tinaqu ka rau sulu vulavula tu. Au sega ni kila ni sa vakarautaki koya tu mai o tamaqu ki na nona veivakalougatataki ni valetabu, e dina ga ni sa maqusa voli tiko mai kina o tinaqu ena dua na gauna. Au sa luvuci dina sara ga kau sa sega ni rawa ni vosa tale. A lako mai ki yasaqu o Peresitedi Pierce [na peresitedi ni valetabu] ka kaya na vu ni vakatatao o ya. Ni rau sa gole mai ki na valetabu o tamaqu kei tinaqu ena mataka o ya rau a kerea vei peresitedi me kakua ni tukuni vei au ni rau sa tiko e kea baleta ni rau gadreva me iloloma ni siganisucu tawanamaki. Oqo e dua na siganisucu au na sega ni guilecava rawa baleta ni siga o ya rau a vakaedaumeni kina ka a noqu madigi meu ivakadinadina ni nodrau vauci, ka tarava sara noqu vauci vei rau.”¹

Ni oti toka vakalailai e 40 na yabaki, ena gauna a vosa raraba kina ena imatai ni gauna o Howard Hunter ni sa Peresitedi ni Lotu, e dua vei ira na imatai ni nona itukutuku o ya mera vakasaqara na lewenilotu na veivakalougatataki ni valetabu ena yalodina e cecere.² A tomana okoya me vakadreta tikoga na itukutuku o ya ni veiqaravi tiko vaka-Peresitedi. Ena nona vosa tiko ena tikina ni Valetabu e Nauvoo ena June 1994, a kaya kina:

“Ena itekivu ni vula oqo au a tekivuna na noqu cakacaka ni lotu ena noqu sa gadreva sara vakatitobu mera lewe levu tikoga mai na lewe ni Lotu mera bula kilikili ki na valetabu. Me vaka ena siga nei [Josefa Simici], na idola ni kena tarai cake na matanitu e vuravura taucoko sai koya na nodra tiko na lewenilotu bula kilikili ka vakaedaumeni. Na bula kilikili ni valetabu e vakadeitaka ni sa veidonui na noda bula kei na lewa ni Turaga, ka da sa tu vakarau meda ciqoma na Nona veidusimaki ki na noda bula.”³

Ni oti e vica na vula, ena Janueri 1995, e a iotioti ni nona itavi raraba o Peresitedi Hunter na kena vakatabui na Valetabu e Bountiful Utah. Ena masu ni veivakatabui, a kerea okoya na veivakalougatataki ni valetabu me vakabulabulataka na nodra bula o ira taucoko na curu kina:

“Sa neimami masu malumalumu mo ni sa ciqoma na valetabu oqo ka me tiko ga kina na nomuni veivakalougatataki. Me sa tiko na yalomuni ka dusimaki ira kece era cakacaka kina, ka me na vakilai na veirokorokovi ena veiloqi kece sara. Me sa qai savasava na ligadra ka makare sara na yalodra o ira kece era curu kina. Me ra sa qai taraicake ena nodra vakabauta ka vakasuka ena yalo vakacegu, ena vakacaucautaki ni yacamuni tabu. …

“Me sa vakarautaka na Vale oqo e dua na yalo vakacegu kivei ira kece era rokova na kena lagilagi, vakabibi vei ira era curuma ena vuku ni nodra cakacaka tabu vakalotu vakaiira ka vakayacora na cakacaka me baleti ira na nodra daulomani ena daku ni ilati. Me ra sa vakila na nomuni loloma kei na veivueti vakalou. Mera sa qai rawa ni kaya, me vakataka na Daunisame ena gauna makawa, ‘Ia keirau a dauveivosaki vakavinaka vata, ka daulako vata ki na vale ni Kalou.’

“Ni keimami sa mai vakatabuya na vale tabu oqo, keimami sa vakatabuya sara talega na neimami bula kivei kemuni kei na nomuni cakacaka.”⁴

Na Valetabu e Mesa Arizona, ka a vauci kina o Peresitedi Howard W. Hunter vei rau na nona itubutubu ena 1953.

iVakavuvuli nei Howard W. Hunter

Eda sa vakayaloqaqataki meda tauyavutaka na valetabu me ivakatakilakila cecere ni noda lewenilotu.

Ena gauna ni noqu a kacivi ki na ilesilesi tabu oqo [Peresitedi ni Lotu], era a sureti kina na lewe taucoko ni Lotu mera tauyavutaka na valetabu ni Turaga me sa ivakatakilakila cecere ni nodra lewenilotu ka ituvaki vakalomalagi ni nodra veiyalayalati tabu cecere duadua.

Niu dau vakasamataka na valetabu, au nanuma kina na malanivosa oqo:

“Na valetabu e vanua ni ivakasala ka dau cereki mai kina na veika dina bibi sa baleta tiko na Matanitu ni Kalou. Na vanua e tiko kina na vakacegu ka na vakatabakidua na vakasama ki na veika vakayalo ka na dau vakatikitikitaki kina na lomaocaoca ni vuravura oqo. Ena valetabu eda cakava kina na veiyalayalati ka talairawarawa ki na lawa ni Kalou, ka sa yalataki vei keda na veika eso, ka dau vakatau ena noda yalodina tikoga, ka sa yacova yani na veigauna tawamudu” (The Priesthood and You, Melchizedek Priesthood Lessons—1966, Salt Lake City: The Church of Jesus Christ of Latter-day Saints, 1966, p.293).

Na Turaga sara ga Vakai Koya, ena Nona ivakatakila kivei keda, sa vakayacora na valetabu me nodra ivakatakilakila cecere na lewe ni Lotu. Vakasamataka mada na ivakarau kei na ivalavala dodonu sa dusia vei keda na Turaga ena ivakasala a solia o Koya kivei ira na Yalododonu mai Kirtland mai vua na Parofita o Josefa Simici ni ra vakavakarau tiko mera tara e dua na valetabu. Sa vakadeitaki tikoga na ivakasala o ya:

“Dou cokonaki kemudou; dou vakarautaka na veika sa yaga vei kemudou; dou tara e dua na vale, io me vale ni masumasu, vale ni lolo, ka vale ni vakabauta, vale ni vuli, vale ni vakarokoroko, ka vale ni caka dodonu, io na vale ni Kalou”(V&V 88:119). Na itovo kei na ivakarau ni bula oqo era sa ivakaraitaki dina beka ni veika eda gadreva yadua ka vakasaqara meda vakataka? …

… Me tiko na valetabu me dua na ivakatakilakila vakaidina kivei keda, sa dodonu meda na gadreva vakakina. Sa dodonu meda bula kilikili ni curuma na valetabu. Sa dodonu meda muria na ivakaro ni noda Turaga. Kevaka eda rawa ni tuva na noda bula me vakataka na iVakavuvuli, ka taura na Nona ivakavuvuli kei na ivakaraitaki me sa ulu ni keda ituvaki, eda na sega ni kune dredre meda bula kilikili ena valetabu, meda gugumatua ka yalodina ena noda ikalawa kece ni bula, ni da sa cuqena e dua na ivakatagedegede tabu ni itovo kei na vakabauta. Se da tiko e vale se ena makete, e koronivuli se na gauna balavu sa vakanadakui keda kina na vuli, se da cakacaka duadua tikoga se tiko ena dua na veivakamarautaki kei ira na lewevuqa, ena matata tu ga na noda itosotoso ka kilai tani na noda ivakatagedegede.

Na nona tudei tu e dua ena nona ivakavuvuli, me bula tu ena dina kei na vakabauta me vaka na nona lotu—oqo ga na ka e vakabetena. Na yalodina tiko ki na ivakavuvuli dina—ki na noda bula yadua, ena noda itikotiko kei na matavuvale, kei na veivanua kecega eda veisotari ka vakayarayarataka tale eso na tamata—na yalodina oya e sa ka e kerei keda tiko kina vakaoti na Kalou. E gadrevi kina na veicuqeni—yaloda taucoko, tauri vakatitobu, na veicuqeni vakasakiti tawamudu ki na ivakavuvuli eda kila ni sa dina ena ivakaro sa solia mai na Kalou Kevaka meda na cakadodonu ka yalodina tiko ki na ivakavuvuli ni Turaga, sa da na qai bula kilikili tikoga ena valetabu, ka sa na ivakatakilakila cecere ni noda bula vakatisaipeli vata kei Koya na Turaga kei na Nona valetabu.⁵

Sa dodonu meda sasagataka yadua meda na bula kilikili ni ciqoma e dua na ivolatara ni valetabu.

E sa gagadre titobu sara ni lomaqu mera na bula kilikili kece na lewe ni Lotu ni curuma na valetabu. Ena marautaka na Turaga kevaka era na bula kilikili na lewenilotu qase kece ni ra taukena—ka kauta voli—e dua na ivolatara ni valetabu vakayagataki rawa. Na veika meda cakava ka kakua ni cakava meda bula kilikili kaya kina e dua na ivolatara ni valetabu sai koya saraga na veika ena vakadeitaka na noda bula marau vakayadua ka vakamatavuvale talega.⁶

Sa mai vakaraitaka vakamatata vei keda na Tamada Vakalomalagi ni sa dodonu mera savasava ka galala mai na ivalavala ca ni vuravura o ira na curuma na valetabu. A kaya o Koya, “Raica kevaka era sa tara e dua na noqu vale e na yaca ni Turaga ko ira na noqu tamata, ka ra sega ni vakatara me curu kina e dua na ka tawasavasava me vakadukadukalitaka, ena tiko ga kina na noqu iserau; … Ia kevaka sa vakadukadukalitaki na noqu vale, au na sega ni tiko kina ka sega talega ni tiko kina na noqu iserau; raica au na sega vakaidina ni tiko ena vale tawasavasava” (V&V 97:15, 17).

O na rairai kurabui beka ni kila ni ra dau sainitaka tu e liu na Peresitedi ni Lotu na ivolatara ni valetabu yadua. Oqori na iwalewale era a vakila taumada vakabibi na peresitedi e liu me baleta na bula kilikili ni curuma na valetabu. Ena 1891, a soli na ilesilesi oqo kivei ira na bisopi kei na peresitedi ni iteki, ka ra tarogi iko ena so na taro me baleta na nomu bula kilikili mo rawata kina e dua na ivolatara ni valetabu. Sa dodonu mo kila na veika e namaki vei iko mo rawata kina e dua na ivolatara ni valetabu.

Sa dodonu mo vakabauta na Kalou na Tamada Tawamudu, kei na Luvena ko Jisu Karisito, kei na YaloTabu. Sa dodonu mo vakabauta ni oqo na nodratou cakacaka tabu ka vakalou. Keimami vakayaloqaqataki kemuni mo ni cakacakataka ena veisiga na kena tarai cake na nomuni ivakadinadina me baleta na Tamada Vakalomalagi kei na Turaga o Jisu Karisito. Na Yalo o dau vakila sai koya na Yalo Tabu e vakadinadinataka tiko vei iko ni ratou sa bula dina tiko. Emuri, ena valetabu, ena levu cake na ka o vulica me baleta na Lewe Tolu Vakalou mai na ivakavuvuli kei na cakacaka vakalotu eso sa vakatakilai mai.

Sa dodonu mo tokoni ira na Vakaitutu Raraba kei ira na noda vakailesilesi raraba ni Lotu. Ni ko sa laveliga ki na sukuwea ni sa kacivaki mai na yacadra na iliuliu oqo, ko sa vakatakila ni ko na tokoni ira ena nodra ilesilesi kei na ivakasala era solia vei iko.

Oqo e sega ni cakacaka mera dokai kina e matanalevu o ira sa kaciva na Turaga mera veiliutaki. Ia, e sa dua na veivakadeitaki vakaidina ni Kalou sa kacivi ira na parofita, daurairai, kei na dauvakatakila, kei ira na Vakaitutu Raraba tale eso. E sa dua na veicuqeni mo na muria kina na ivakavuvuli e lako mai vei ira na vakailesilesi liu ni Lotu. Sa vakakina na nomu yalodina tiko vua na bisopi kei na peresitedi ni iteki kei ira tale eso na iliuliu ni Lotu. Na nodra sega ni tokoni rawa na veiliutaki sa sega ni veiganiti vata na veiqaravi ena valetabu.

Sa dodonu mo bula savasava ni curuma yani na valetabu. Na lawa ni tiko savasava sa gadrevi kina mo kakua ni veimoceri vata tale e dua vakavo ga na watimu. Keitou sa vakayaloqaqataki kemuni vakabibi mo ni sabaya na veibacani nei Setani me vakacacana na nomuni bula savasava.

Sa dodonu mo vakadeitaka ni sa sega ni tiko e dua na ka ena nomu veimaliwai vata kei ira na lewe ni matavuvale ka sa veibasai vata na ivakavuvuli ni Lotu. Keitou sa vakayaloqaqataki ira vakabibi na [itabagone] mera talairawarawa kivei ira na [nodra] itubutubu ena yalododonu. Sa dodonu mera qaqarauni na itubutubu mera vakadeitaka ni nodra veimaliwai vata kei ira na lewe ni matavuvale e sa veidonui vata na ivakavuvuli ni kosipeli ka sega ni okati kina na veivakacacani se veivakawaleni.

Mo curuma na valetabu sa dodonu mo na yalodina ena nomu veitaratara taucoko vata kei ira tale eso. Sa noda ilesilesi tabu na Yalododonu Edaidai meda kakua sara ni veilawakitaki se veilasutaki. Sa na rawa ni vakacacani na noda bula dodonu ni da voroka na veiyalayalati oqo.

Ni gadrevi mo rawata e dua na nomu ivolatara ni valetabu, sa dodonu mo sasaga ni vakayacora na nomu itavi ena Lotu, dau tiko ena soqoni ni sakaramede, matabete, kei na so tale. Sa dodonu talega mo saga mo talairawarawa ki na ivakaro, lawa, kei na ivunau ni kosipeli. Vulica … mo ciqoma na veikacivi kei na itavi tale eso e soli vei iko. Mo ni dau vakaitavitaki kemuni wasoma ena nomuni tabanalevu kei na tabana, ka mo dua era rawa ni nuitaka na nomuni iliuliu.

Mo curuma na valetabu sa dodonu mo na dau sauma vakataucoko na nomu ikatini ka bulataka na Vosa ni Vuku. Na ivakaro e rua oqo, ni rawarawa na kena vakasalataki ia ka rui bibi sara ki na noda tubu vakayalo, e sa yaga sara ena kena vakadeitaki na noda bula kilikili vakaikeda. Sa vakaraitaka na vakadidike ena vuqa na yabaki sivi yani ni o ira era sauma ena yalodina na nodra ikatini ka muria na Vosa ni Vuku era sa dau yalodina tu ga ena veika kece tale eso e semati ki na curumi ni valetabu.

Oqo na veika e sega ni dodonu me tauri vakamamada. Ni sa laurai ni da sa bula kilikili meda curuma na valetabu, eda sa vakayacora na cakacaka vakalotu eso ka sa ka tabu sara me qaravi ena vanua cava ga e vuravura. Na veicakacaka vakalotu oqo e sa kauwaitaka na veika ni gauna tawamudu.⁷

e dua na tagane ena loma ni valenivolavola ni iliuliu ni matabete — “O ira na bisopi kei na peresitedi ni iteki … era tarogi iko ena vica na taro me baleta na nomu bula kilikili mo rawata kina e dua na ivolatara ni valetabu.”

Na vakayacori ni cakacaka ena valetabu e kauta mai na veivakalougatataki levu ki na tamata yadua kei na matavuvale.

Sa qai dua na ka lagilagi meda rawata na madigi ni gole yani ki na valetabu me baleta na noda veivakalougatataki vakaikeda. Qai cava na gole yani ki na valetabu me baleta na noda veivakalougatataki, sa qai dua na madigi lagilagi meda vakayacora na cakacaka e baleti ira na sa liu yani vei keda. Na itovo ni cakacaka ena valetabu oya na cakacaka tawakocokoco. Ia na gauna eda cakava kina na cakacaka ni valetabu me baleti ira na tamata tale eso, sa tiko na veivakalougatataki ena lesu mai kivei keda. Sa sega ni dodonu meda kurabuitaka ni sa dau gadreva na Turaga mera tamata maleleti-valetabu o ira na nona tamata. …

… Sa dodonu meda lako sega walega me baleti ira na wekada sa ra mate ia me baleta talega na noda veivakalougatataki ni sokalou ena valetabu, me baleta na veidokai kei na veitaqomaki era sa tu ena loma ni lalaga rokovi ka vakatabui oya. Ni da curuma na valetabu, eda vulica vakaiyauyau ka vakatitobu cake na inaki ni bula kei na bibi ni nona veisorovaki na Turaga o Jisu Karisito. Meda sa cakava na valetabu, vata na sokalou ni valetabu kei na veiyalayalati ni valetabu kei na vakamau ni valetabu, me sa ilutua ni noda takete e vuravura kei na ka sotavi ni bula vakayago cecere sara.⁸

E vica na ka sa mai rawati ni da curuma na valetabu—eda sa muria na ivakavuvuli ni Turaga meda rawata na noda cakacaka vakalotu vakaikeda, eda vakalougatataka na noda matavuvale ena cakacaka vakalotu ni veivauci, ka da wasea na noda veivakalougatataki kivei ira tale eso ena noda vakayacora ena vukudra na veika era sega ni cakava rawa vakaiira. Me ikuri ni veika oqo, eda sa laveta cake na noda vakanananu, toro voleka sara vua na Turaga, doka [na] matabete, ka vaqaqacotaki keda vakayalo.⁹

Eda ciqoma na noda veivakalougatataki ni da curuma na valetabu. Ena nona vosa baleta na kena vakalougatataki na noda bula ni da curuma na valetabu a kaya o Elder John A. Widstoe:

“Na cakacaka ni valetabu … e solia e dua na madigi totoka me vakabulabulataki tiko kina na noda kilaka kei na kaukauwa vakayalo. … Na rai cecere ni veigauna tawamudu sa mai cereki e matada ena valetabu; eda raica kina na itekivu ni gauna tawamudu ki na kena icavacava tawayalani; kei na ituvaki bula ni bula tawamudu sa mai tavoci e matada. Sa qai makare na noqu raica na noqu tikina e na kena maliwa na veika ni lomalagi, na noqu itikotiko ena maliwa ni inaki ni Kalou; kau sa kaukauwa cake meu vakatikori au vakaitaukei, kau sa kaukauwa cake meu rokova ka vakarautaka, meu vakatikitikitaka ka tuvana na itavi ni veisiga, ka rawarawa ni noqu bula me kakua kina ni vakasaurarataki au na veika lalai se kauta laivi na noqu raivotutaka na veika lelevu sa solia vei keda na Kalou” (ena Conferenece Report, Epe. 1922, tt. 97–98).¹⁰

Navuca na ivakavuvuli cecere ena gauna ni masu ni veivakatabui levu ni Valetabu e Kirtland, na masu e kaya o Parofita Josefa Simici ni a soli mai vua me dua na ivakatakila. Oqo na masu sa tomani tikoga na kena saumi vei keda yadua, kivei keda vakamatavuvale, kivei keda na tamata ena vuku ni kaukauwa ni matabete sa solia mai vei keda na Turaga me vakayagataki ena Nona veivaletabu savasava.

“Oi kemuni, na Tamai keimami Yalosavasava, ” a vakamamasu na Parofita o Josefa Simici, “keimami sa kerea mo ni vukei keimami, na nomuni tamata, ka lomani keimami … ka vakadonui keimami, me keimami sa dodonu e matamuni, me keimami vakayacora rawa na vosa ni yalayala ko ni a tukuna vei keimami, na nomuni tamata;

“Ia me cila na nomuni serau vei ira na nomuni tamata. …

“Keimami sa kerei kemuni na Tamai keimami Yalosavasava; mo ni vakaiyaragitaki ira na nomuni tamata era sa curuma na nomuni vale ena nomuni kaukauwa, io me sa tiko ga kei ira na yacamuni, ka mera vakasinaiti ena nomuni serau, io mera vakatawai ira tikoga ko ira na nomuni agilosi” [V&V 109:10–12, 22].¹¹

Na curumi ni valetabu e bulia na bula vakayalo. E sa dua vei ira na parokaramu totoka e tiko vei keda ena Lotu me vakatorocaketaka na bula vakayalo. Oqo ena vagolea na lomadra na gone vei ira na nodra qase kei na lomadra na qase vei ira na gone (Malakai 4:6). Oqo ena vakavurea na kena qaqaco ka duabau na matavuvale.¹²

Meda sa vakusakusa ki na valetabu.

Meda sa wasea vei ira na luveda na vakanananu vakayalo e tiko vei keda ena valetabu. Ka meda sa vakavulici ira vagumatua cake ka veivakacegui cake ena veika eda rawa ni kaya vakamatau me baleta na inaki eso ni vale ni Turaga. Me tiko mai vale e dua na itaba ni valetabu mera dau raica tiko na gone. Vakavulica vei ira na inaki eso me baleta na vale ni Turaga. Mera qai nakinaki mai na nodra veiyabaki gone sara mera lako kina ka bula kilikili kaya voli na veivakalougatataki oya. Meda sa vakarautaki ira kece na daukaulotu mera bula kilikili ni gole ki na valetabu ka cakava na ka e sotavi kina me dua na ka vakasakiti vakalevu sara mai na ciqomi ni veikacivi ni kaulotu. Meda sa nakinaki kina ka vakavulici ka vakamasuti ira na luveda mera vakamau ena vale ni Turaga. Meda sa vakadeitaka vakaukauwa cake mai na gauna eda a cakava kina eliu ni sa ka bibi na vanua o vakamau kina vata kei na dodonu ni lewa cava o a cavuti kina mo tagane ka yalewa vakawati.¹³

Sa ka taleitaki vua na Turaga mera gole ki na valetabu na noda itabagone ni ra bula kilikili voli ka vakayaco papitaiso ena vukudra o ira a sega na nodra madigi mera papitaiso ena bula. Sa ka taleitaki vua na Turaga ni da gole ki na valetabu ena bula kilikili meda laki cakava vakaikeda na noda veiyalayalati vata kei Koya ka mai vauci yani vakaveiwatini ka vakamatavuvale. Ka sa ka taleitaki vua na Turaga ni da gole ki na valetabu ena bula kilikili meda vakayacora na cakacaka vakalotu ni veivakabulai vataga oqo me baleti ira na sa mate, ka vuqa vei ira sa wawa nanamaki tu ena vakacavari ni cakacaka vakalotu oqo ena vukudra.¹⁴

Kivei kemuni o ni se bera ni ciqoma na nomuni veivakalougatataki ni valetabu, se sega tiko ni dua na nomuni ivolatara bula ni valetabu, au sa vakayaloqaqataki kemuni ena yalomalumalumu kei na loloma mo ni cakacakataka yani na siga mo ni sa na curuma kina na vale ni Turaga. Sa yalataka o Koya kivei ira kece era sa yalodina ki na nodra veiyalayalati, “Ia kevaka era sa muria na noqu ivakaro ko ira na tamata, kei na nodra ivakaro na noqu tamata ka’u sa digitaka, era na sega sara ni vakasavi tani mai na nodra vanua” ((V&V 124:45). … Au yalataka vei kemuni ni na vakalougatataki ka vaqaqacotaki na nomuni bula vakayalo, nomuni veimaliwai vakaveiwatini, kei na veimaliwai vakamatavuvale ena nomuni curuma vakawasoma na valetabu.¹⁵

Meda sa tamata dau curuma na valetabu ka taleitaka na valetabu. Meda sa vakusakusa ki na valetabu ena kena levu ga e vakatara na gauna kei na iwalewale kei na keda ituvaki. Meda lako sega walega me baleti ira na wekada sa ra mate, ia meda lako talega me baleta na noda veivakalougatataki ni sokalou ena valetabu, me baleta na veidokai kei na veitaqomaki e sa vakarautaki tu ena loma ni lalaga rokovi ka vakatabui oya. Na valetabu e sa vanua ni veika totoka, e sa vanua ni ivakatakila, e sa vanua ni vakacegu. E sa vale ni Turaga. E sa vakatabui kivua na Turaga. E sa dodonu me vakatabui kivei keda.¹⁶

Vakatutu ni Vuli kei na Veivakavulici

Taro

Vakasamataka vagumatua na ivakavuvuli nei Peresitedi Hunter ena iwasewase e 1. E rawa vakacava meda “tauyavutaka na valetabu ni Turaga me ivakatakilakila cecere ni [noda] lewenilotu”?
Railesuva na veika e gadrevi me baleta na ivolatara ni valetabu me vaka e dusimaki toka ena iwasewase e 2. Sa vakalougatataki iko vakacava kei na nomu matavuvale na bulataki voli ni veika e gadrevi oqo? Cava na vuna e gadrevi kina meda saga meda “savasava ka galala mai na ivalavala ca kei vuravura“ ni da curuma na valetabu?
Railesuva na ivakavuvuli nei Peresitedi Hunter me baleta na veivakalougatataki ni vakayacora voli na cakacaka ni valetabu (raica na iwasewase e 3). Sa vakalougatataki iko vakacava kei na nomu matavuvale na vakaitavi voli ena cakacaka vakalotu ni valetabu? E rawa vakacava ni o rawaka vakataucoko cake mai na veivakalougatataki ni valetabu? E rawa li mo wasea e dua na gauna ko a vakila kina na kaukauwa vakayalo se veidusimaki ena loma ni valetabu? Kevaka o se bera vakadua ni gole ki na valetabu, vakasamataka vagumatua na sala o rawa ni vakavakarau kina mo ciqoma na veivakalougatataki o ya.
Na cava eso na sala eda rawa ni vukei ira kina na gonelalai kei na itabagone mera vulica na veika ni valetabu ka yavutaka mera dau taleitaka? (Raica na iwasewase e 4.) E rawa vakacava ni da vukei ira na gonelalai kei na itabagone mera gagadre ni vakamau ena vale ni Turaga? Cava na vuna e bibi meda lako kina ki na valetabu “ena kena levu ga e vakatara na gauna kei na iwalewale kei na keda ituvaki”?

iVolanikalou Veisemati

Same 55:14; Aisea 2:2–3; V&V 97:12–17; 110:6–10; 124:39–41; 138:53–54; Bible Dictionary, “Temple”

Veivuke ni Veivakavulici

“E levu na gauna e tiko ena lesoni e levu sara na iyaragi se ka ni veivakavulici ena rawa ni o vakavulica taucoko ena gauna sa lavaki vei iko ena veilesoni. Ena kena ituvaki vakaoqo, e dodonu ga mo digitaka na uto ni lesoni ena vukei ira vakalevu na lewe ni nomu kalasi” (Veituberi Me iLutua ni Noda Bula [1999], 121).