Sehluko 10
Lehi uphrofetha kutsi emaJuda atawutfunjwa baseBhabhulona—Watisa ngekufika kwaMesiya emkhatsini wemaJuda, uMsindzisi, uMhlengi—Lehi ngalokunjalo watisa ngekuta kwaloyo lotawubhabhatisa iMvana yaNkulunkulu—Lehi watisa ngekufa kanye nekuvuka kwaMesiya—Ucatsanisa kuhlakateka kanye nekugcogcwa kwa-Israyeli nesihlahla semncumo—Nefi ukhuluma ngeNdvodzana yaNkulunkulu, ngesipho saMoya loNgcwele, kanye nangesidzingo sekulunga. Cishe ngemnyaka wa 600 kuya kuwa 592 ngaphambi kwekutalwa kwaKhristu.
1 Manje mine, Nefi, ngiyachubeka nekuniketa umlandvo kulaba bongcwengcwe ngetento tami, kanye nekubusa nebufundisi bami; ngaloko-ke, kuchubeka nemlandvo wami, kufanele ngikhulume lokutsite ngetintfo tababe, ngalokunjalo nangetabomnaketfu.
2 Ngoba buka, kwenteka kutsi emvakwekutsi babe sekacedzile kukhuluma emavi eliphupho lakhe, ngalokunjalo nekubancusa kutsi bakhutsale kakhulu, wakhuluma nabo ngalokuphatselene nemaJuda—
3 Kutsi emvakwekutsi asabhujisiwe, nalelo dolobha lelikhulu iJerusalema, futsi lamaningi atsetfwe atfunjelwa eBhabhulona, ngekwesikhatsi seNkhosi lesifanele, ayophindze abuye futsi, yebo, abuyiselwe emuva aphume ekutfunjweni; emvakwekutsi sekabuyiselwe emuva aphuma ekutfunjweni ayophindze futsi atfole live lelilifa lawo.
4 Yebo, naseminyakeni lengemakhulu lasitfupha kusukela ngesikhatsi babe ashiya eJerusalema, iNkhosi Nkulunkulu iyawuvusa umphrofethi emkhatsini wemaJuda—Mesiya, noma, ngalamanye emavi, uMsindzisi wemhlaba.
5 Futsi waphindze wakhuluma ngalokuphatselene nebaphrofethi, nekutsi bebabaningi kangakanani labebafakaza ngato leti tintfo, ngalokuphatselene naloMesiya, labekhuluma ngaye noma loMhlengi wemhlaba.
6 Ngaloko-ke, bonkhe bantfu bebasesimeni sekulahleka kanye nesekuwa, futsi bayawukuba kuso njalo ngaphandle kwekutsi batsembele kuye loMhlengi.
7 Futsi waphindze wakhuluma ngalokuphatselene nemphrofethi lobekatofika ngaphambi kwaMesiya, kutolungisa indlela yeNkhosi—
8 Yebo, nekutsi utohamba aphindze amemete ehlane atsi: Lungisani indlela yeNkhosi, futsi nente tindlela tayo ticondze; ngoba kukhona lomile emkhatsini wenu leningamati; yena unemandla kunami, umchilo wesicatfulo sakhe lengingakafaneli kuwutfukulula. Futsi kuningi lokwakhulunywa ngubabe ngalokuphatselene nalentfo.
9 Futsi babe watsi yena uyobhabhatisa eBhetani, ngesheya kweJordane; waphindze watsi uyobhabhatisa ngemanti; nekutsi uyobhabhatisa Mesiya ngemanti.
10 Futsi emvakwekutsi sekambhabhatisile Mesiya ngemanti, uyobona aphindze afakaze kutsi ubhabhatise iMvana yaNkulunkulu, letosusa tono temhlaba.
11 Futsi kwenteka emvakwekutsi babe sekawashito lamavi wakhuluma kubomnaketfu ngalokuphatselene nelivangeli leliyoshunyayelwa emkhatsini wemaJuda, ngalokunjalo nalokuphatselene nekuncishelwa kukholwa kwemaJuda. Emvakwekutsi sekambulele Mesiya, loyo loyokuta, futsi emvakwekutsi sekabulewe uyovuka kulabafile, uyotibonakalisa, ngaMoya loNgcwele, kubeTive.
12 Yebo, nababe wakhuluma kakhulu mayelana nebeTive, futsi ngalokunjalo nangendlu yaka-Israyeli, kutsi kufanele icatsaniswe nesihlahla semncumo, emagala aso lekufanele ancunywe bese ahlakatwa ebusweni bemhlaba wonkhe.
13 Ngaloko-ke, watsi kufanele kutsi tsine siholwe ngenhlitiyo yinye kuya eveni lesetsembiso, kugcwalisa livi leNkhosi, lekutsi kufanele sihlakateke ebusweni bemhlaba wonkhe.
14 Emvakwekutsi indlu yaka-Israyeli seyihlakatiwe iyophindza ibutselwe ndzawonye futsi; noma-ke, kwephetsa, Emvakwekutsi beTive sebalitfolile liVangeli leliphelele, emagala emvelo aleso sihlahla semncumo, noma insali yendlu yaka-Israyeli, iyochunyelelwa, noma yati ngaMesiya weliciniso, iNkhosi yabo kanye neMhlengi wabo.
15 Futsi babe waphrofetha waphindze wakhuluma kubomnaketfu ngalendlela yekukhuluma, ngalokunjalo nangaletinye letiningi tintfo lengingatibhali kulencwadzi; ngoba ngitibhalile letiningi tato njengoba kwakudzingeka kimi kulenye incwadzi yami.
16 Futsi tonkhe leti tintfo, lese ngikhulume ngato, tenteka ngesikhatsi babe ahleti ethendeni, esigodzini saLemuweli.
17 Futsi kwenteka kutsi emvakwekutsi mine, Nefi, sengiwevile onkhe emavi ababe, mayelana netintfo latibona embonweni, ngalokunjalo netintfo latikhuluma ngemandla aMoya loNgcwele, emandla lawo lawatfola ngelukholo kuyo iNdvodzana yaNkulunkulu—futsi iNdvodzana yaNkulunkulu kwakunguMesiya loyo lobekayofika—Mine, Nefi, nganginesifiso nami sekutsi ngibone, ngive, ngiphindze ngati, ngaleti tintfo, ngemandla aMoya loNgcwele, losipho saNkulunkulu kubo bonkhe labo labamfuna ngekukhutsala, etikhatsini tasemandvulo njengasetikhatsini lapho ayotiveta ngaso kubantfwana bebantfu.
18 Ngoba uyafana itolo, namuhla, naphakadze; futsi indlela ilungiselelwe bonkhe bantfu seloku kwasekelwa umhlaba, uma nje kungukutsi bayaphendvuka futsi beta kuye.
19 Ngoba loyo lofuna ngekukhutsala uyawutfola; futsi timfihlakalo taNkulunkulu tiyawukwembulwa kubo, ngemandla aMoya loNgcwele, etikhatsini tamanje njengasetikhatsini tasemandvulo, etikhatsini tasemandvulo njengasetikhatsini letitako; ngaloko-ke, indlela yeNkhosi yinye naphakadze.
20 Ngako-ke khumbula, Awu muntfu, ngoba ngato tonkhe tento takho uyawuletfwa ekwahlulelweni.
21 Ngaloko-ke, uma ufune kwenta bubi etinsukwini tekuvivinywa kwakho, nakunjalo utfolakala ungakahlanteki phambi kwesihlalo sekwehlulela saNkulunkulu; futsi kute intfo lengcolile lengahlala naNkulunkulu; ngaloko-ke, kufanele ulahlwe ingunaphakadze.
22 Futsi Moya loNgcwele unginika ligunya lekutsi ngikhulume leti tintfo futsi ngingatigodli.