1 Ngoba kwenteka kutsi emvakwekutsi sengibe nesifiso sekwati ngetintfo babe labekatibonile, futsi ngikholwa kutsi iNkhosi yayikwati kutsi itembule kimi, ngesikhatsi ngisahleti ngizindla enhlitiyweni yami ngahlwitfwa nguMoya weNkhosi, yebo, wangiyisa kulephakeme kakhulu intsaba, lebengingakate ngiyibone ngaphambilini, futsi kulebengingakate nangaphambilini ngilubeke lunyawo lwami kuyo.

2 Futsi Moya watsi kimi: Buka, ngabe ufisani na?

3 Ngatsi: Ngifisa kubona tintfo babe latibona.

4 Futsi Moya watsi kimi: Uyakholwa yini kutsi uyihlo wabona sihlahla leso lakhulume ngaso?

5 Ngatsi: Yebo, uyati kutsi ngiyawakholelwa onkhe emavi ababe.

6 Ngesikhatsi sengiwakhulumile lamavi, Moya wamemeta ngelivi lelikhulu, utsi: Hosana eNkhosini, Nkulunkulu lophakeme kakhulu; ngoba nguNkulunkulu longetulu kwemhlaba wonkhe, yebo, nangetulu kwako konkhe. Futsi ubusisiwe wena, Nefi, ngoba ukholwa kuyo iNdvodzana yaNkulunkulu lophakeme kakhuku; ngaloko-ke, utotibona leto tintfo lotifisako.

7 Futsi buka lentfo iyawuniketwa kuwe njengesibonakaliso, kutsi emvakwekutsi sewusibonile sihlahla leso lesasinesitselo uyihlo lasinambitsa, utobona indvodza yehla iphuma ezulwini, uyawuyibona; emvakwekutsi sewuyibonile uyawuniketa bufakazi bekutsi iyiNdvodzana yaNkulunkulu.

8 Futsi kwenteka kutsi Moya watsi kimi: Buka! Ngabuka ngabona sihlahla; sasifana nesihlahla leso babe labekasibonile, buhle baso babendlulele kakhulu, yebo, babendlula bonkhe buhle, nebumhlophe baso babendlula bumhlophe belichwa lelikhitsikile.

9 Futsi kwenteka kutsi emvakwekutsi sengisibonile lesihlahla, ngatsi kuye Moya: Ngiyabona ungikhombisile sihlahla lesiligugu ngetulu kwato tonkhe.

10 Watsi kimi: Ngabe ufisani na?

11 Ngatsi kuwo: Kwati inchazelo ngaso—ngoba ngakhuluma nawo njengemuntfu akhuluma; ngoba ngabona kutsi bekasesimeni semuntfu; kodvwa noko, ngangati kutsi kwakunguMoya weNkhosi; futsi wakhuluma kimi njengemuntfu akhuluma nalomunye.

12 Futsi kwenteka kutsi watsi kimi: Buka! Ngabuka shengatsi ngibuka kuwo, futsi angimbonanga, ngoba besekahambile phambi kwami.

13 Futsi kwenteka kutsi ngabuka ngabona lidolobha lelikhulu laseJerusalema, kanye nalamanye emadolobha. Ngabona lidolobha laseNazaretha; edolobheni laseNazaretha ngabona intfombi, yayibukeka kahle kakhulu futsi imhlophe.

14 Futsi kwenteka kutsi ngabona emazulu avuleka, ingilosi yehla yema phambi kwami; yatsi kimi: ubonani na?

15 Ngatsi kuyo: Intfombi, lenhle kakhulu lebukekako ngetulu kwato tonkhe letinye tintfombi.

16 Yatsi kimi: Uyakwati yini kutehlisa kwaNkulunkulu na?

17 Ngatsi kuyo; Ngiyati kutsi uyabatsandza bantfwana bakhe; noko, angiyati inchazelo yato tonkhe tintfo.

18 Yatsi kimi: Intfombi leyo loyibonako ingunina weNdvodzana yaNkulunkulu, ngekwesimo sasenyameni.

19 Futsi kwenteka kutsi ngabona kutsi yahlwitfwa nguMoya; emvakwekutsi seyihlwitfwe nguMoya kwesikhashana ingilosi yakhuluma kimi, itsi: Buka!

20 Ngabuka ngayibona intfombi futsi, igone umntfwana etandleni tayo.

21 Ingilosi yatsi kimi: Buka iMvana yaNkulunkulu, yebo, iNdvodzana yaBabe longunaPhakadze! Uyayati yini inchazelo yesihlahla leso uyihlo lasibona na?

22 Ngayiphendvula, ngatsi: Yebo, lutsandvo lwaNkulunkulu, lolutisabalalisa ndzawo tonkhe etinhlitiyweni tebantfwana bebantfu; ngaloko-ke, lutsandzeka kakhulu ngetulu kwetintfo tonkhe.

23 Yakhuluma kimi, itsi: Yebo, luyintfokoto lenkhulu emphefumulweni.

24 Futsi emvakwekutsi seyisho lamavi, yatsi kimi: Buka! Ngabuka, ngabona iNdvodzana yaNkulunkulu ihamba emkhatsini webantfwana bebantfu; ngabona labaningi bawa phansi etinyaweni tayo bayikhonta.

25 Futsi kwenteka kutsi ngabona kutsi indvuku yensimbi leyo babe bekayibonile, bekulivi laNkulunkulu, lelaliholela emtfonjeni wemanti ekuphila, noma esihlahleni sekuphila; lawo manti angumfanekiso welutsandvo lwaNkulunkulu; ngaphindze ngabona kutsi sihlahla sekuphila sasingumfanekiso welutsandvo lwaNkulunkulu.

26 Ingilosi yaphindze yatsi kimi: Buka futsi ubone kutehlisa kwaNkululunkulu!

27 Ngabuka ngambona uMhlengi wemhlaba, loyo babe bekakhulume ngaye; ngaphindze ngabona umphrofethi lobekayolungisa indlela phambi kwakhe. IMvana yaNkulunkulu yaya phambili yabhajatiswa nguye; emvakwekutsi seyibhajatisiwe, ngabona emazulu avuleka, futsi Moya loNgcwele wehla uvela ezulwini wahla etikwayo unjengesimo selituba.

28 Futsi ngabona kutsi yahamba isebentela bantfu, ngemandla nangenkhatimulo lenkhulu; ticuku tabutsana ndzawonye kutoyiva; ngabona kutsi bayicosha emkhatsini wabo.

29 Ngaphindze ngabona labanye labalishumi nakubili bayilandzela. Futsi kwenteka kutsi bahlwitfwa nguMoya phambi kwebuso bami, angitange ngisababona.

30 Futsi kwenteka kutsi ingilosi yakhuluma kimi futsi, itsi: Buka! Ngabuka, ngabona emazula avuleka futsi, ngabona tingilosi tehlela kubantfwana bebantfu; tabasebentela.

31 Yaphindze yakhuluma kimi, itsi; Buka! Ngabuka, ngabona iMvana yaNkulunkulu ihamba emkhatsini webantfwana bebantfu. Ngabona ticuku tebantfu labebagula, kanye nalabebanato tonkhe tinhlobonhlobo tetifo, kanye nalabebanabodeveli kanye nemimoya lengcolile; ingilosi yakhuluma yangibonisa tonkhe leti tintfo. Futsi baphiliswa ngemandla eMvana yaNkulunkulu; bodeveli kanye nemimoya lengcolile kwakhishwa.

32 Futsi kwenteka kutsi ingilosi yakhuluma kimi futsi, itsi: Buka! Ngabuka ngabona iMvana yaNkulunkulu, kutsi yatsatfwa bantfu; yebo iNdvodzana yaNkulunkulu longunaphakadze yehlulelwa ngumhlaba; ngakubona loko ngakufakazela.

33 Mine, Nefi, ngabona kutsi yaphakanyiselwa esiphambanweni yaphindze yabulawa ngenca yetono temhlaba.

34 Emvakwekutsi seyibulewe ngabona ticuku temhlaba, kutsi tatibutsene ndzawonye kulwa nebaphostoli beMvana; ngoba bebabitwa kanjalo labalishumi nakubili yingilosi yeNkhosi.

35 Sicuku semhlaba sasibutsene ndzawonye; ngabona kutsi sasikuso sakhiwo lesikhulu nalesivulekile, njengaleso sakhiwo babe lasibona. Futsi ingilosi yeNkhosi yakhuluma kimi, itsi: Buka live kanye nekuhlakanipha kwalo; yebo, buka indlu yaka-Israyeli ibutsene ndzawonye kulwa nebaphostoli labalishumi nakubili beMvana.

36 Futsi kwenteka kutsi loko ngakubona ngakufakazela, kutsi sakhiwo lesikhulu nalesivulekile kwakukutigcabha kwelive; sawa, kuwa kwaso kwakukukhulu kakhulu. Ingilosi yeNkhosi yakhuluma kimi futsi, itsi: Kuyawuba njalo-ke nekubhujiswa kwato tonkhe tive, imindeni, tilimi, kanye nebantfu, labayawukulwa nebaphostoli labalishumi nakubili beMvana.