Sehluko 12
Nefi ubona embonweni live lesetsembiso; kulunga, bubi, kanye nekuwa kwalabahlala kulo; kufika kweMvana yaNkulunkulu emkhatsini wabo; nekutsi baFundzi labaLishumi nakubili batawumahlulela kanjani Israyeli; kanye nekunengeka kanye nekungcola kwesimo salabo labancishelwe kukholwa. Cishe ngemnyaka wa 600 kuya kuwa 592 ngaphambi kwekutalwa kwaKhristu.
1 Futsi kwenteka kutsi ingilosi yatsi kimi: Buka, ubone intalelwane yakho, ngalokunjalo nentalelwane yabomnakenu. Ngabuka ngalibona live lesetsembiso; ngabona ticuku tebantfu, yebo, kwakungatsi linani liningi ngangesihlabatsi saselwandle.
2 Futsi kwenteka kutsi ngabona ticuku tibutsene ndzawonye kute tilwe, lesinye sibhekene nalesinye; ngabona timphi, kanye nemahemuhemu etimphi, kanye nekubulalana lokukhulu ngenkemba emkhatsini webantfu bami.
3 Futsi kwenteka kutsi ngabona letiningi titukulwane tishona, ngendlela yetimphi, kanye nemibango kulelive; ngabona emadolobha lamaningi, yebo, kangangekutsi angikwatanga kuwabala.
4 Futsi kwenteka kutsi ngabona inkhungu yebumnyama ebusweni belive lesetsembiso; ngabona imibani, ngeva kudvuma, kanye nekutamatama kwemhlaba, kanye nato tonkhe tinhlobonhlobo temsindvo wekuphitsitela; ngabona umhlaba kanye nemadvwala, kutsi kwadzabuka; ngabona tintsaba tidzilika tiba tincetu; ngabona ematsafa emhlaba, kutsi bekaklayekile; ngabona lamaningi emadolobha kutsi bekacwilile; ngabona lamaningi kutsi ashiswa ngemlilo; ngaphindze ngabona lamaningi kutsi adzilikela phansi, ngenca yekutamatama kwemhlaba.
5 Futsi kwenteka kutsi emvakwekutsi sengitibonile leti tintfo, ngabona inkhungu yebumnyama, kutsi yandlula ebusweni bemhlaba; buka, ngabona ticuku letatingawanga ngenca yebukhulu kanye nekwesabeka kwetehlulelo teNkhosi.
6 Futsi ngabona emazulu avuleka, iMvana yaNkulunkulu yehla ezulwini; futsi yehla yatibonakalisa kuto.
7 Ngaphindza ngabona ngaphindze ngakufakazela kutsi Moya loNgcwele wehlela etukwalabanye labalishumi nakubili; bagcotjwa nguNkulunkulu futsi bakhetfwa.
8 Futsi ingilosi yakhuluma kimi, itsi: Buka bafundzi labalishumi nakubili beMvana, labakhetsiwe kutsi basebentele intalelwane yakho.
9 Yatsi kimi: Uyabakhumbula yini labaphostoli labalishumi nakubili beMvana na? Buka ngibo labo labayawukwehlulela tivana letilishumi nakubili taka-Israyeli; ngaloko-ke, bafundzisi labalishumi nakubili bentalelwane yakho bayawukwehlulelwa ngibo; ngoba nine nibendlu yaka-Israyeli.
10 Futsi laba bafundzisi labalishumi nakubili lobabonako bayawukwehlulela intalelwane yakho. Buka, balungile ingunaphakadze; ngoba ngenca yelukholo lwabo labanalo kuyo iMvana yaNkulunkulu tingubo tabo tentiwe taba mhlophe engatini yayo.
11 Ingilosi yatsi kimi: Buka! Ngabuka, ngabona titukulwane letintsatfu tindlula tisekulungeni; tingubo tato tatimhlophe njengeteMvana yaNkulunkulu. Futsi ingilosi yatsi kimi: Leti tentiwe taba mhlophe engatini yeMvana, ngenca yelukholo lwato kuyo.
12 Mine, Nefi, ngaphindze ngabona labaningi besitukulwane sesine labendlula nabo basekulungeni.
13 Futsi kwenteka kutsi ngabona ticuku temhlaba tibutsene ndzawonye.
14 Ingilosi yatsi kimi: Buka intalelwane yakho, ngalokunjalo nentalelwane yabomnakenu.
15 Futsi kwenteka kutsi ngabuka ngabona bantfu bentalelwane yami babutsene ndzawonye ngeticuku babhekene nebentalelwane yabomnaketfu; bebabutsene ndzawonye kute balwe.
16 Ingilosi yakhuluma kimi, itsi: Buka umtfombo wemanti langcolile lowo uyihlo lawubona; yebo, nemfula lowo lakhuluma ngawo; futsi kujula kwawo kukujula kwesihogo.
17 Inkhungu yebumnyama tilingo tadeveli, letiphumphutsekisa emehlo, tente lukhuni tinhlitiyo tebantfwana bebantfu, tibaholele kudze emigwacweni lebanti, kute bashabalale futsi balahleke.
18 Sakhiwo lesikhulu nalesivulekile, leso uyihlo lasibona, yimicabango nje lelite kanye nekutigcabha kwebantfwana bebantfu. Umhosha lomkhulu kanye nalowesabekako uyabehlukanisa, yebo, nelivi lekulunga laNkulunkulu loPhakadze, kanye naMesiya loyiMvana yaNkulunkulu, loyo Moya loNgcwele lofakaza ngaye, kusukela ekucaleni kwemhlaba kute kube ngulesikhatsi sanyalo, futsi kusukela kulesi sikhatsi kuchubeka futsi ingunaphakadze.
19 Futsi ngesikhatsi ingilosi ikhuluma lamavi, ngabuka ngabona kutsi intalelwane yabomnaketfu yalwa nentalelwane yami, njengelivi lengilosi; futsi ngenca yekutigcabha kwentalelwane yami, kanye netilingo tadeveli, ngabona kutsi intalelwane yabomnaketfu yabehlula bantfu bentalelwane yami.
20 Futsi kwenteka kutsi ngabuka, ngabona bantfu bentalelwane yabomnaketfu kutsi bese babancobile labentalelwane yami; bahamba ngeticuku etukwebuso balelive.
21 Futsi ngababona babutsene ndzawonye ngeticuku, ngabona timphi kanye nemahemuhemu etimphi emkhatsini wabo; kuto timphi kanye nemahemuhemu etimphi ngabona titukulwane letiningi tindlula.
22 Ingilosi yatsi kimi: Buka laba bayawuncishelwa kukholwa.
23 Futsi kwenteka kutsi ngabona, emvakwekube sebancishelwe kukholwa baba mnyama, baphindze benyanyeka, futsi baba bantfu labangcolile, labagcwele buvila kanye nayo yonkhe inhlobo yetinengiso.