1 Futsi kuyawukwenteka, kutsi uma beTive bayawuyilalela iMvana yaNkulunkulu ngalolosuku leyiyawutiveta ngalo kubo ngelivi, futsi ngalokunjalo nangemandla, nangetento lucobo, kute kususwe tikhubekiso tabo.

2 Futsi bangatenti lukhuni tinhlitiyo tabo ngalokumelene neMvana yaNkulunkulu, bayawubalwa kanye nentalelwane yeyihlo; yebo bayawubalwa kanye nendlu yaka-Israyeli; futsi bayawuba bantfu lababusisekile eveni lesetsembiso ingunaphakadze; abasayuphindze nanini babuyiselwe phansi ekutfunjweni; futsi indlu yaka-Israyeli ayisayuphindze nanini ihlazeke.

3 Futsi lowo mgodzi lomkhulu, lobewumbelwe bona ngulelo bandla lelikhulu nalelinengekile, lelasungulwa ngudeveli kanye nebantfwana bakhe, kute aholele imiphefumulo yebantfu phansi esihogweni—yebo, lowo mgodzi lomkhulu lombelwe kubhubhisa bantfu uyawugcwaliswa ngulabo labawumbako, kute babhujiswe baphele nya, kusho iMvana yaNkulunkulu; hhayi kubhujiswa kwemphefumulo, ngaphandle kwekutsi kube kuphonswa kwawo esihogweni lesingenasiphetfo.

4 Ngoba buka, loku kuyindlela develi latfumba ngayo, futsi ngalokunjalo nendlela yekulunga kwaNkulunkulu, kubo bonkhe labo labatawukwenta imisebenti yebubi kanye netinengiso phambikwakhe.

5 Futsi kwenteka kutsi ingilosi yakhuluma kimi, Nefi, itsi: Ubonile kutsi uma beTive baphendvuka kuyawuba kuhle kubo; futsi ngetulu kwaloko uyati mayelana netivumelwano teNkhosi kuyo indlu yaka-Israyeli; futsi ngetulu kwaloko uvile kutsi loyo longaphendvuki kufanele abhubhe.

6 Ngako-ke, maye kubo beTive uma kungukutsi batenta lukhuni tinhlitiyo tabo ngalokumelene neMvana yaNkulunkulu.

7 Ngoba sikhatsi siyeta, kusho iMvana yaNkulunkulu, lapho ngitawukwenta umsebenti lomkhulu kanye nalomangalisako emkhatsini webantfwana bebantfu; umsebenti loyawuba waphakadze, kube simo lesitsite kulolunye luhlangotsi noma lesinye ngakulolunye—bakholiswe kutsi babe nekuthula kanye nekuphila lokuphakadze, noma bayekelwe ebulukhunini betinhlitiyo tabo kanye nasekumphumphutsekeni kwetingcondvo tabo bate badvonseleke ekutfunjweni, futsi ngalokunjalo nasekubhujisweni, kwesikhashana kanye nekwakamoya, ngekwendlela develi latfumba ngayo, lesengikhulume ngako.

8 Futsi kwenteka kutsi ngesikhatsi ingilosi seyiwakhulumile lamavi, yatsi kimi: Uyatikhumbula yini tivumelwano taBabe kuyo indlu yaka-Israyeli na? Ngatsi kuyo, Yebo.

9 Futsi kwenteka kutsi yatsi kimi: Buka, futsi ubone lelo bandla lelikhulu nalelinengekile, lelingunina wetinengiso, umcambi walo lokungudeveli.

10 Futsi yatsi kimi: Buka mabili kuphela emabandla; linye libandla leMvana yaNkulunkulu, kantsi lelinye libandla ladeveli; ngaloko-ke, loyo longasuye welibandla leMvana yaNkulunkulu walelo bandla lelikhulu, lelingunina wetinengiso; futsi uyingwadla yemhlaba wonkhe.

11 Futsi kwenteka kutsi ngabuka futsi ngayibona ingwadla yemhlaba wonkhe, futsi yayihleti etikwemanti lamaningi; futsi beyibusa ngetulu kwemhlaba wonkhe, emkhatsini wetive tonkhe, imindeni, tilimi, kanye nakubantfu.

12 Futsi kwenteka kutsi ngalibona libandla leMvana yaNkulunkulu, futsi linani lalo lalimbalwa, ngenca yebubi kanye netinengiso tengwadla leyo leyayihleti etikwemanti lamaningi; noko, ngabona kutsi libandla leMvana, lokwakungulabangcwele baNkulunkulu, bebakhona nabo ngalokunjalo etikwebuso bemhlaba wonkhe; futsi tindzawo letingaphansi kwabo ebusweni bemhlaba tatitincane, ngenca yebubi bengwadla lenkhulu lengayibona.

13 Futsi kwenteka ngabona kutsi unina lomkhulu wetinengiso watibutsisa ndzawonye ticuku etikwebuso bemhlaba wonkhe, emkhatsini wato tonkhe tive tebeTive, kutsi tilwe neMvana yaNkulunkulu.

14 Futsi kwenteka kutsi mine, Nefi, ngabona emandla eMvana yaNkulunkulu, kutsi ehlela ngetulu kwalabangcwele belibandla leMvana, kanye nasetikwebantfu besivumelwano beNkhosi, labo labebahlakateke etikwebuso bemhlaba wonkhe; futsi bebahlonyiswe ngekulunga kanye nangemandla aNkulunkulu enkhatimulweni lenkhulu.

15 Futsi kwenteka kutsi ngabona kutsi intfukutselo yaNkulunkulu yatfululelwa etikwalelo bandla lelikhulu nalelinengekile, kangangekutsi kwabakhona timphi kanye nemahemuhemu etimphi emkhatsini wato tonkhe tive kanye nemindeni yemhlaba.

16 Futsi ngesikhatsi kucala kuba khona timphi kanye nemahemuhemu etimphi emkhatsini wato tonkhe tive lokwakukwenina wetinengiso, ingilosi yakhuluma kimi, itsi: Buka, intfukutselo yaNkulunkulu isetikwenina wetingwadla; futsi buka, uyatibona tonkhe leti tintfo—

17 Futsi uma lusuku selufika kutsi intfukutselo yaNkulunkulu itfululelwe etikwenina wetingwadla, lekulibandla lelikhulu nalelinengekile lemhlaba wonkhe, umcambi walo lokungudeveli, ngalolosuku, umsebenti waBabe uyawucala, wekulungisa indlela yekugcwalisa tivumelwano takhe, latenta kubantfu bakhe lababendlu yaka-Israyeli.

18 Futsi kwenteka kutsi ingilosi yakhuluma kimi, itsi: Buka!

19 Ngabuka futsi ngabona indvodza, leyayigcoke ingubo lemhlophe.

20 Futsi ingilosi yatsi kimi: Buka lomunye webaphostoli labalishumi nakubili beMvana.

21 Buka, uyawubona futsi abhale ngalokusele kwaleti tintfo; yebo, futsi ngalokunjalo netintfo letiningi letike taba khona.

22 Futsi ngetulu kwaloko uyawubhala mayelana nekuphela kwemhlaba.

23 Ngaloko-ke, leto tintfo layawutibhala tilungile futsi tiliciniso; futsi buka tibhaliwe encwadzini leyo loyibone iphuma emlonyeni weliJuda; futsi ngesikhatsi tiphuma emlonyeni weliJuda, noma, ngesikhatsi incwadzi iphuma emlonyeni weliJuda, leto tintfo letatibhaliwe tatisobala futsi timsulwa, futsi tiligugu lelikhulu futsi tilula kucondvwa bantfu bonkhe.

24 Futsi buka, letintfo lomphostoli weMvana layawutibhala titintfo letiningi wena lose utibonile; futsi buka, lokusele utokubona.

25 Kodvwa leto tintfo utotibona emvakwaloku awunotibhala; ngoba iNkhosi Nkulunkulu igcobe umphostoli weMvana yaNkulunkulu kutsi atibhale.

26 Futsi ngalokunjalo nalabanye labebakhona, kubo utikhombisile tonkhe tintfo; futsi batibhalile; futsi tivalelwe tabekwa kute tiphume timsulwa; ngekweliciniso lelo lelikuyo iMvana, ngesikhatsi lesifanele seNkhosi, tiye kuyo indlu yaka-Israyeli.

27 Futsi mine, Nefi, ngeva futsi ngiyafakaza, kutsi libito lalomphostoli weMvana bekunguJohane, ngekwelivi lengilosi.

28 Futsi buka, mine, Nefi, angikavunyelwa kutsi ngibhale lokusele kwetintfo lengatibona futsi ngativa; ngaloko-ke tintfo lengitibhalile tiyangenelisa; futsi ngibhale kuphela incenye lencane yetintfo lengatibona.

29 Futsi ngiyafakaza kutsi ngatibona leto tintfo babe latibona; futsi ingilosi yeNkhosi yatembula kimi.

30 Futsi manje sengenta siphetfo senkhulumo yami mayelana naleto tintfo lengatibona ngesikhatsi ngihlwitfwe nguMoya; futsi uma ngabe tonkhe tintfo lengatibona tingakabhalwa, tintfo lengitibhalile tiliciniso. Futsi kunjalo nje. Amen.