Sehluko 16
Lababi batsatsa liciniso njengentfo lematima—Emadvodzana aLehi ashada emadvodzakati a-Ishmayeli—ILiyahona iyabacondzisa endleleni yabo ehlane—Imilayeto levela eNkhosini ibhalwa kuyo iLiyahona tikhatsi-ngetikhatsi—Ishmayeli uyafa; umndeni wakhe uyavungama ngenca yetinhlupheko. Cishe ngemnyaka wa 600 kuya ku 592 ngaphambi kwekutalwa kwaKhristu.
1 Manje kwenteka kutsi emvakwekutsi mine, Nefi, sengicedzile kukhuluma nabomnaketfu, buka batsi kimi: Usitjele tintfo letimatima, ngetulu kwaloko lesingakwati kukubeketelela.
2 Futsi kwenteka kutsi ngatsi kubo ngangati kutsi ngangikhulume tintfo letimatima ngalokumelene nalababi, ngekweliciniso; futsi labalungile angibabekanga licala, futsi ngafakaza ngekutsi bayophakanyiswa ngelusuku lwekugcina; ngaloko-ke, labanelicala batsatsa liciniso ngekutsi limatima, ngoba lidzabula ekhatsi etibilinini tabo.
3 Manje bomnaketfu, kube benilungile futsi nitimisele kulalela liciniso, futsi nilinake, kute nihambe ngebucotfo phambi kwaNkulunkulu, uma kunjalo beningayuvungama ngenca yeliciniso, nitsi: Ukhuluma tintfo letilukhuni ngalokumelene natsi.
4 Futsi kwenteka kutsi mine, Nefi, ngabancusa bomnaketfu, ngako konkhe kukhutsala, kutsi bagcine imiyaleto yeNkhosi.
5 Futsi kwenteka kutsi batitfoba phambi kweNkhosi; kangangekutsi ngaba nekujabula kanye nelitsemba lelikhulu ngabo, kutsi batohamba etindleleni tekulunga.
6 Manje, tonkhe leti tintfo tashiwo futsi tenteka ngesikhatsi babe ahlala ethendeni esigodzini lasibita ngekutsi yiLemuweli.
7 Futsi kwenteka kutsi mine, Nefi, ngatsatsa lenye yemadvodzakati a-Ishmayeli ngayenta umkami; futsi ngalokunjalo, nabomnaketfu batsatsa emadvodzakati a-Ishmayeli bawenta bafati babo; ngalokunjalo naZoramu watsatsa indvodzakati lendzala ya-Ishmayeli wayenta umkakhe.
8 Futsi ngaleyondlela babe besekayigcwalisile yonkhe imiyaleto yeNkhosi lebekaniketwe yona. Futsi ngetulu kwaloko, mine, Nefi, bese ngibusisiwe kakhulu yiNkhosi.
9 Futsi kwenteka kutsi livi leNkhosi lakhuluma kubabe ebusuku, futsi lamyaleta kutsi ngakusasa kwakufanele achubeke neluhambo lwakhe loluya ehlane.
10 Futsi kwenteka kutsi ngesikhatsi babe avuka ekuseni, aya emnyango welithende, wamangala kakhulu kubona phansi ibhola leyindingilizi leyakhiwe ngebuciko; futsi leyakhiwe ngelitfusi lelicolekile. Ngekhatsi kuyo ibhola bekukhona tintsi letimbili; lolunye lwalukhomba indlela lapho kwakufanele tsine siye ngakhona ehlane.
11 Futsi kwenteka kutsi sagcogcela ndzawonye tonkhe tintfo lebekufanele sititfwale siye ehlane, kanye nayo yonkhe insalela yemphako wetfu iNkhosi leyayisinike wona; futsi satsatsa inhlanyelo letinhlobonhlobo kute siyitfwale siye ehlane.
12 Futsi kwenteka kutsi satsatsa emathende etfu futsi sesuka saya ehlane, ngesheya kwemfula iLamani.
13 Futsi kwenteka kutsi sahamba libanga letinsuku letine, sacondza ngaseningizimu lengasemphumalanga, saphindza samisa emathende etfu futsi; sayibita lendzawo ngeligama lelitsi kuseShazeri.
14 Futsi kwenteka kutsi satsatsa butjoki kanye nemicibisholo yetfu, sahamba sachubekela ehlane kuyotingelela imindeni yetfu kudla; futsi emvakwekutsi sesiyitingelele imindeni yetfu kudla saphindza sabuyela kuyo imindeni yetfu ehlane, endzaweni yaseShazeri. Saphindza sahamba sachubeka ehlane, silandzela yona leyo ndlela, sitigcina kuleto tincenye lebetivundzile kakhulu tasehlane, lebetisemnceleni dvutane neLwandle loluBovu.
15 Futsi kwenteka kutsi sahamba libanga letinsuku letiningi, sitingela kudla endleleni, ngebutjoki nangemicibisholo yetfu nangematje etfu kanye netilingi tetfu.
16 Salandzela indlela ngekuyalelwa yibhola, leyasiholela kuleyoncenye yasehlane lebeyivundze kakhulu.
17 Futsi emvakwekutsi sesihambe libanga letinsuku letiningi, samisa emathende etfu kwesikhashana, kute sitfole kuphumula futsi siphindze sitfole kudla kwemindeni yetfu.
18 Futsi kwenteka kutsi ngesikhatsi mine, Nefi, ngichubekela phambili ngiyotingela kudla, buka ngabephula butjoki bami, lebebakhiwe ngensimbi lecolekile; futsi emvakwekutsi sengibephulile butjoki bami, buka, bomnaketfu bangitfukutselela ngenca yekulahlekelwa butjoki bami, ngoba asitfolanga kudla.
19 Futsi kwenteka kutsi sabuyela emuva emindenini yetfu ngaphandle kwekudla, futsi bakhatsele kakhulu, ngenca yeluhambo lwabo, bahlupheka kakhulu ngekweswela kudla.
20 Futsi kwenteka kutsi Lamani naLemuweli kanye nemadvodzana a-Ishmayeli bacala kuvungama kakhulu, ngenca yebuhlungu babo kanye netinhlupheko ehlane; futsi ngalokunjalo nababe wacala kuyivungamela iNkhosi Nkulunkulu wakhe; yebo, futsi bonkhe bebadzabukile kakhulu, kangangekutsi bayivungamela iNkhosi.
21 Manje kwenteka kutsi mine, Nefi, sengihlushwe bomnaketfu ngenca yekulahlekelwa butjoki bami, lobu babo butjoki bulahlekelwe kunwebeka kwabo, kwacala kutsi kube matima kakhulu, yebo, kangangekutsi asikwatanga kutfola kudla.
22 Futsi kwenteka kutsi mine, Nefi, ngakhuluma kakhulu nabomnaketfu, ngoba bese batente lukhuni tinhlitiyo tabo futsi, bate bakhonona kuyo iNkhosi Nkulunkulu wabo.
23 Futsi kwenteka kutsi mine, Nefi, ngenta butjoki ngelugodvo, kanye nemcibisholo ngendvuku lecondzile; ngaloko-ke, ngahloma ngebutjoki kanye nangemcibisholo, ngesilingi kanye nangematje. Ngabese ngitsi kubabe: Ngingaya ngakuphi kute ngitfole kudla na?
24 Futsi kwenteka kutsi wabuta eNkhosini, ngoba bese batitfobile ngenca yemavi ami; ngoba ngakhuluma letiningi tintfo kubo ngemandla ami onkhe.
25 Futsi kwenteka kutsi livi leNkhosi lafika kubabe; futsi ngempela watfotjiswa ngenca yekuyivungamela iNkhosi, kangangekutsi wehliswa ekujuleni kwelusizi.
26 Futsi kwenteka kutsi livi leNkhosi latsi kuye: Buka kuyo ibhola, bese ubuka tintfo letibhaliwe.
27 Futsi kwenteka kutsi ngesikhatsi babe abona tintfo lebetibhalwe kuyo ibhola, waba nekwesaba kanye nekutfutfumela lokukhulu, ngalokunjalo nabomnaketfu kanye nemadvodzana a-Ishmayeli kanye nebafati betfu.
28 Futsi kwenteka kutsi mine, Nefi, ngabona tinkhomba leto lebetisebholeni, kutsi betisebenta ngelukholo nekukhutsala kanye nangekutinaka lebesikuniketa kuto.
29 Futsi ngetulu kwaloko kwakubhalwe kuto umbhalo lomusha, lebekulula kuwufundza, lebewusinika kucondza mayelana netindlela teNkhosi; futsi wawubhalwa uphindze ushintjwe tikhatsi ngetikhatsi, ngekwenkholo kanye nekukhutsala lebesiyiniketa kona. Futsi ngalendlela siyabona kutsi ngetintfo letincane iNkhosi ingaletsa tintfo letinkhulu.
30 Futsi kwenteka kutsi mine, Nefi, ngahamba ngaya etulu esicongweni sentsaba, njengekuyaletwa lebekuniketwe kuyo ibhola.
31 Futsi kwenteka kutsi ngabulala tilwane tasendle, kangangekutsi ngakutfola kudla kwemindeni yetfu.
32 Futsi kwenteka kutsi ngabuyela emathendeni etfu, ngitfwele tilwane leto lebengitibulele; manje ngesikhatsi babona kutsi besengikutfolile kudla, yaba yinkhulu kangakanani injabulo yabo! Futsi kwenteka kutsi batitfoba phambi kweNkhosi, futsi bayibonga.
33 Futsi kwenteka kutsi saphindza futsi satsatsa luhambo lwetfu, sihamba cishe ngayo leyondlela lefanako njengasekucaleni; futsi emvakwekutsi sesihambe libanga letinsuku letiningi samisa emathende etfu futsi, kute sitsi kuhlala sikhashana.
34 Futsi kwenteka kutsi Ishmayeli wafa, futsi wangcwatja endzaweni lebeyibitwa ngekutsi iNahomu.
35 Futsi kwenteka kutsi emadvodzakati a-Ishmayeli akhala kakhulu, ngenca yekulahlekelwa nguyise, nangenca yetinhlupheko tabo ehlane; bamvungamela babe, ngoba bekabakhiphe eveni laseJerusalema, batsi: Babe sewufile; yebo, futsi sesizulazule kakhulu ehlane, futsi sesihlushwe tinhlupheko letiningi, yindlala, koma, kanye nekukhatsala; futsi emvakwakokonkhe loku kuhlupheka kufanele sibhubhe lapha ehlane yindlala.
36 Futsi bavungama ngalendlela kubabe, ngalokunjalo nakimi; futsi bebafuna kuphindze babuyele eJerusalema.
37 Futsi Lamani watsi kuLemuweli ngalokunjalo nakuwo emadvodzana a-Ishmayeli: bukani asimbulale babe, futsi ngalokunjalo nemnaketfu Nefi, lesekatitsatsele kutsi abe ngumbusi kanye nemfundzisi wetfu, lesibomnakabo labadzala.
38 Manje, utsi iNkhosi ikhulume naye, futsi ngetulu kwaloko utsi tingilosi timfundzisile. Kodvwa bukani, siyati kutsi ucamba emanga kitsi; futsi usitjela leti tintfo, futsi wenta letiningi tintfo ngebucili bakhe lobunemacebo, kute akhohlise emehlo etfu, ucabanga, mhlawumbe, kutsi angasiholela kudze ehlane lelitsite lelingakajwayeleki; futsi emvakwekutsi asasiholele kudze, sewucabange kutsi atente inkhosi kanye nembusi ngetulu kwetfu, kute ente kitsi ngekwentsandvo nangekwesifiso sakhe. Futsi umnaketfu Lamani watiphehla ngalendlela tinhlitiyo tabo kute batfukutsele.
39 Futsi kwenteka kutsi iNkhosi yayinatsi, yebo, nelivi leNkhosi lefika futsi lakhuluma lamaningi emavi kubo, futsi labajezisa kakhulu; futsi emvakwekutfotjiswa ngelivi leNkhosi bakuyekela kutfukutsela kwabo, futsi baphendvuka etonweni tabo, kangangekutsi iNkhosi yasibusisa futsi ngekudla, kute singabhubhi.