Sehluko 19
Nefi wenta bongcwengcwe belitje lensimbi futsi ubhala umlandvo webantfu bakubo—Nkulunkulu wema-Israyeli utawufika eminyakeni lengemakhulu lasitfupha kusukela ngesikhatsi Lehi asuka eJerusalema—Nefi ukhuluma ngekuhlupheka kanye nekubetselwa Kwakhe—EmaJuda atawudzelelwa futsi ahlakatwe kute kube tinsuku tekugcina, ngesikhatsi asabuyela eNkhosini. Cishe ngemnyaka wa 588 kuya kuwa 570 ngaphambi kwekutalwa kwaKhristu.
1 Futsi kwenteka kutsi iNkhosi yangiyaleta, ngaloko-ke ngenta bongcwengcwe belitje lensimbi kute ngicophe kubo umbhalo webantfu bami. Futsi kulaba bongcwengcwe lengabenta ngacopha umbhalo wababe, futsi ngalokunjalo neluhambo lwetfu ehlane, kanye netiphrofetho tababe; futsi ngalokunjalo netiphrofetho tami letiningi ngiticophe kubo.
2 Angatanga ngesikhatsi ngibenta kutsi ngangitoyaletwa yiNkhosi kutsi ngibente laba bongcwengcwe; ngaloko-ke, umbhalo wababe, kanye nemlandvo wesitukulwane saboyise, kanye nencenye lenkhulu yetento tetfu ehlane ticoshwe kubo labo bongcwengcwe bekucala lengikhulume ngabo; ngaloko-ke, tintfo letenteka ngaphambi kwekutsi ngente laba bongcwengcwe, teliciniso, kuphawulwa kakhulu ngato kulabongcwengcwe bekucala.
3 Emvakwekutsi sengibentile labongcwengcwe ngendlela yekuyaletwa, mine, Nefi, ngatfola umyaleto wekutsi bufundisi kanye netiphrofetho, ikakhulukati leyo ncenye yato lesobala kanye naleligugu, kufanele ibhalwe kulaba bongcwengcwe; futsi nekutsi leto tintfo letatibhaliwe kufanele tigcinelwe kufundzisa bantfu bami, labayohlala kulelive, futsi ngetulu kwaloko nangaletinye tizatfu tekuhlakanipha, tizatfu letatiwa yiNkhosi.
4 Ngaloko-ke, mine, Nefi, ngenta umbhalo kulabanye bongcwengcwe, lositjela ngemlandvo, noma lositjela ngemininingwane yetimphi kanye nemibango nekubhujiswa kwebantfu bami. Futsi loku ngikwentile, futsi ngabayaleta bantfu bami kutsi kufanele benteni emvakwekutsi mine sengingasekho; nekutsi laba bongcwengcwe kufanele bandluliselwe njani kusuka kusinye situkulwane kuya kulesinye, noma kusuka kumunye umphrofethi kuya kulomunye, kute kufike leminye imiyaleto yeNkhosi.
5 Umlandvo wami wekwenta laba bongcwengcwe uyawuniketwa evakwaloku; futsi emvakwaloko, buka, ngiyachubeka njengoba bengikadze ngikhulumile; futsi loku ngikwentela kute tintfo letiningi letingcwele tigcinelwe kutsi bantfu bami batati.
6 Noko, angibhali lutfo kulaba bongcwengcwe ngaphandle kwekutsi ngicabanga kutsi kungcwele. Manje, uma ngiphambuka, nabo baphambuka basendvulo; hhayi kutsi ngiyawuticolela ngenca yalabanye bantfu, kepha ngenca yebutsakatsaka lobukimi, ngekwenyama, ngiyawuticolela.
7 Ngoba tintfo labanye bantfu labatatisa kakhulu, enyameni kanye nasemphefumulweni, labanye batenta lite futsi batinyatsele ngaphansi kwetinyawo tabo. Yebo, naNkulunkulu wema-Israyeli lucobo bantfu bamnyatsela ngaphansi kwetinyawo tabo. Ngitsi, bamnyatsela ngaphansi kwetinyawo tabo kodvwa ngitokhuluma ngalamanye emavi—bamenta lite, futsi bangalilaleli livi lakhe lekucondzisa.
8 Buka uyeta, ngekwemavi engilosi, eminyakeni lengemakhulu lasitfupha kusukela esikhatsini babe esuka eJerusalema.
9 Nemhlaba, ngenca yebubi bawo, uyawumehlulela njengentfo lelite; ngaloko-ke bayombhacabula, avume; baphindze bamshaye, avume. Yebo, bayomkhafulela ngematse, avume, ngenca yemusa wakhe lonelutsandvo lolukhulu kanye nekumela bulukhuni kwakhe kubantfwana bebantfu.
10 Futsi Nkulunkulu wabobabe betfu, labaholwa baphuma eGibhithe, baphuma ebugcilini, futsi ngetulu kwaloko bagcinwa nguye ehlane, yebo, Nkulunkulu wa-Abrahama, kanye na-Isaka, kanye naNkulunkulu waJakobe, watidzela, ngekwemavi engilosi, njengemuntfu, etandleni tebantfu lababi, kute aphakanyiswe, ngekwemavi aZenokhi, futsi kute abetselwe, ngekwemavi aNewumu, futsi kute angcwatjwe ethuneni, ngekwemavi aZenoshe, lawakhuluma mayelana netinsuku letintsatfu tebumnyama, lokwakufanele tibe sibonakaliso lesasitoniketwa ngekufa kwakhe kulabo labekufanele bahlale etichingini telwandle, ikakhulukati lesanikwa labo lokwakubendlu yaka-Israyeli.
11 Ngoba wakhuluma kanje umphrofethi: INkhosi Nkulunkulu ngempela iyawuyivakashela yonkhe indlu yaka-Israyeli ngalolosuku, labanye ngelivi lakhe, ngenca yekulunga kwabo, kube kujabula lokukhulu kanye nensindziso kubo, futsi labanye ngekudvuma kanye nangemibani yemandla akhe, ngesivunguvungu, ngemlilo, nangentfutfu, kanye nangenkhungu yebumnyama, kanye nangekuvuleka kwemhlaba, kanye nangetintsaba letiyawuphakanyiselwa etulu.
12 Futsi tonkhe leti tintfo kufanele ngempela tenteke, kusho umphrofethi Zenoshe. Futsi emadvwala emhlaba kufanele adzabuke; futsi ngenca yekububula kwemhlaba, emakhosi lamaningi etichingini telwandle lwaMoya waNkulunkulu uyawusebenta kuwo, kute amemete atsi: Nkulunkulu wemvelo uva buhlungu.
13 Futsi mayelana nalabo labaseJerusalema, kusho umphrofethi, bayawuhlushwa ngibo bonkhe bantfu, ngenca yekutsi bambetsela Nkulunkulu wema-Israyeli, futsi badukisa tinhlitiyo tabo, batilahla tibonakaliso kanye netimangaliso, kanye nemandla nenkhatimulo yaNkulunkulu wema-Israyeli.
14 Futsi ngenca yekudukisa tinhlitiyo tabo, kusho umphrofethi, futsi bamedzelela loNgcwele waka-Israyeli bayawuzulazula basenyameni, futsi babhubhe, babe yinhlekisa nesiga, baphindze batondvwe emkhatsini wetive tonkhe.
15 Noko, uma lolosuku lufika, kusho umphrofethi, kutsi bangabe basaphindze futsi badukise tinhlitiyo tabo ngalokumelene naloNgcwele waka-Israyeli, ngaleso sikhatsi utawutikhumbula tivumelwano latenta kuboyise.
16 Yebo, ngaleso sikhatsi utawutikhumbula tichingi telwandle; yebo, kanye nabo bonkhe bantfu lokubendlu yaka-Israyeli, ngitawubagcogca, kusho iNkhosi, ngekwemavi emphrofethi Zenoshe, kuwo emagumbi lamane emhlaba.
17 Yebo, futsi wonkhe umhlaba uyawuyibona insindziso yeNkhosi, kusho umphrofethi; tonkhe tive, imindeni, tilimi kanye nebantfu bayawubusiswa.
18 Mine, Nefi, ngibabhalele leti tintfo bantfu bami, kute mhlawumbe ngibente bakholwe kute bayikhumbule iNkhosi uMhlengi wabo.
19 Ngaloko-ke, ngikhuluma kuyo yonkhe indlu yaka-Israyeli, uma kungukutsi batotitfola leti tintfo.
20 Ngoba buka, nginemizwa lecinile emoyeni, lengenta ngibe nekukhatsateka kangangoba onkhe emalunga ami abutsakatsaka, ngalabo labaseJerusalema; ngoba kube iNkhosi ayikabi nesihawu, kungikhombisa mayelana nabo, njengoba yenta kubaphrofethi basendvulo, ngabe nami bengitobhubha futsi.
21 Futsi ngempela yababonisa baphrofethi basendvulo tonkhe tintfo mayelana nabo; futsi ngalokunjalo yababonisa labaningi mayelana natsi; ngaloko-ke, kufanele kutsi sati mayelana nabo ngoba tibhaliwe kubo bongcwengcwe belitfusi.
22 Manje kwenteka kutsi mine, Nefi, ngabafundzisa bomnaketfu leti tintfo; futsi kwenteka kutsi ngabafundzela tintfo letiningi, letaticoshwe kubo bongcwengcwe belitfusi, kute bati mayelana netento teNkhosi kulamanye emave, emkhatsini webantfu basendvulo.
23 Futsi ngabafundzela tintfo letiningi letatibhalwe etincwadzini taMosi; kodvwa kute ngibente bakholwe ngalokugcwele kutsi bakholwe kuyo iNkhosi uMhlengi wabo ngabafundzela naloko lokwakubhalwe ngumphrofethi Isaya; ngoba ngayibhekisa kitsi yonkhe imibhalo lengcwele, kute ibe lusito kitsi futsi isifundzise.
24 Ngaloko-ke ngakhuluma nabo, ngatsi: Vanini emavi emphrofethi, nine leniyinsali yendlu yaka-Israyeli, leniligala lelihleshuliwe; vanini emavi emphrofethi, lawabhalela yonkhe indlu yaka-Israyeli, futsi niwabhekise kini, kute nibe nelitsemba njengabo bomnakenu lenihleshulwe kubo; ngoba umphrofethi ubhale ngalendlela.