INcwadzi yekuCala yaNefi
Kubusa kanye neBufundisi bakhe
Umlandvo waLehi nemkakhe Sariya, kanye nemadvodzana akhe lamane, labebitwa ngekutsi (kusukela kulendzala) Lamani, Lemuweli, Semu, kanye naNefi. INkhosi icwayisa Lehi kutsi esuke eveni laseJerusalema, ngoba bekaphrofethe kubantfu ngalokuphatselene nebubi babo futsi bafuna kuyibhubhisa imphilo yakhe. Utsatsa luhambo lwetinsuku letintsatfu uya ehlane nemndeni wakhe. Nefi utsatsa bomnakabo ubuyela eveni laseJerusalema kute ayolandza umbhalo wemaJuda. Umlandvo ngetinhlupheko tabo. Batsatsa emadvodzakati a-Ishmayeli aba bafati babo. Batsatsa imindeni yabo baphindze bayesuka baya ehlane. Buhlungu babo kanye netinhlupheko tabo ehlane. Indlela labahamba ngayo. Bafika emantini lamaningi. Bomnakabo Nefi bayamvukela. Uyabancoba, futsi wakha umkhumbi. Indzawo bayibita ngeligama kutsi yiNala. Bawela emanti lamaningi baya eveni lesetsembiso, njalonjalo. Lomlandvo ungekwekubhala kwaNefi; noma ngalamanye emagama, mine, Nefi, ngiwubhalile lombhalo.
Sehluko 1
Nefi ucala umbhalo webantfu bakubo—Lehi ubona embonweni insika yemlilo futsi ufundza encwadzini yetiphrofetho—Udvumisa Nkulunkulu, umemetela ngekuta kwaMesiya, futsi uphrofetha ngekubhujiswa kweJerusalema—Uhlukubetwa ngemaJuda. Cishe ngemnyaka wa 600 ngaphambi kwekutalwa kwaKhristu.
1 Mine, Nefi, ngoba ngitelwe batali labebalungile, ngako-ke ngafundziswa ngandlelatsite ngayo yonkhe imfundziso yababe; futsi sengibone tinhlupheko letiningi etinsukwini tekuphila kwami, noko, ngitsandziwe kakhulu yiNkhosi etinsukwini tami; yebo, ngitfole lwati lolukhulu lebuhle kanye netimfihlakalo taNkulunkulu, ngako-ke ngenta umbhalo wetento tami etinsukwini tekuphila kwami.
2 Yebo, ngenta umbhalo ngelulwimi lwababe, lolucuketse timfundziso temaJuda kanye nelulwimi lwemaGibhithe.
3 Futsi ngiyati kutsi umbhalo lengiwentako uliciniso; ngiphindze ngiwenta ngesami sandla lucobo; futsi ngiwenta ngekwelwati lwami.
4 Ngoba kwenteka ngekucala kwemnyaka wekucala wekubusa kwaSedekiya, inkhosi yakaJuda, (babe, Lehi, asahlale eJerusalema tinsuku tonkhe tekuphila kwakhe); futsi ngawo wona lowo mnyaka kwafika baphrofethi labaningi, baphrofetha kubantfu kutsi kufanele baphendvuke, noma lidolobha lelikhulu iJerusalema kufanele ibhujiswe.
5 Ngaloko-ke kwenteka kutsi babe, Lehi, asahamba wathandaza eNkhosini, yebo, nangenhlitiyo yakhe yonkhe, athandazela bantfu bakubo.
6 Futsi kwenteka asathandaza eNkhosini, kwachamuka insika yemlilo yahlala etikwelidvwala phambi kwakhe; wabona waphindze weva lokuningi; futsi ngenca yetintfo latibona nalativa wachachatela waphindze watfutfumela kakhulu.
7 Futsi kwenteka kutsi wabuyela endlini yakhe eJerusalema; waphindze watijika etulu embhedzeni wakhe, anganywe nguMoya kanye netintfo labetibonile.
8 Asanganywe nguMoya kanjalo, watsatfwa ngumbono, kangangekutsi wabona emazulu avuleka, waphindze wabona Nkulunkulu ahleti esihlalweni sakhe, atungeletwe ticuku tetingilosi letingabaleki tisesimeni sekuhlabela nekudvumisa Nkulunkulu wato.
9 Futsi kwenteka kutsi wabona loYedvwa ehla aphuma ekhatsi nekhatsi nelizulu, waphindze wabona kutsi kukhatimula kwakhe kwakungetulu kwelilanga ekhatsi nemini.
10 Waphindze, wabona labanye labalishumi nakubili bamlandzela, futsi kwabo kukhanya kwakwendlula kwetinkhanyeti esibhakabhakeni.
11 Behlela phansi bahamba etikwebuso bemhlaba; wekucala weta wema ngembili kwababe, wamnika incwadzi, futsi wamyala kutsi ayoyifundza.
12 Futsi kwenteka kutsi asafundza, wagcwaliswa nguMoya weNkhosi.
13 Wafundza, watsi: Maye, maye, kuwe Jerusalema, ngoba ngitibonile tinengiso takho! Yebo, futsi tiningi tintfo babe latifundza mayelana neJerusalema—kutsi kumele ibhujiswe kanye nalabahlala kuyo; labaningi kuyomele babhujiswe ngenkemba, futsi labaningi bayomukiswa batfunjelwe eBhabhulona.
14 Futsi kwenteka kutsi ngesikhatsi babe asatifundzile aphindze atibonile tintfo letinkhulu naletimangalisako, wababata tintfo letiningi eNkhosini; njengekutsi: Mikhulu iphindze iyamangalisa imisebenti yakho, Awu Nkhosi Nkulunkulu Somandla! Sihlalo sakho sisetulu emazulwini, futsi emandla, kanye nebuhle, kanye nemusa wakho kusetulu kwabo bonkhe labahlala emhlabeni; futsi, ngoba unemusa, ngeke uvumele labo labeta kuwe kutsi babhujiswe.
15 Futsi kwakungalendlela lakhuluma ngayo babe ngelulwimi lwakhe advumisa Nkulunkulu; ngoba umphefumulo wakhe wajabula, nenhlitiyo yakhe yonkhe yagcwaliswa, ngenca yetintfo labetibonile, yebo, leto iNkhosi leyayimtjengise tona.
16 Manje mine, Nefi, angenti umlandvo lophelele ngetintfo babe latibhalile, ngoba ubhale tintfo letiningi latibona ngemibono kanye nasemaphusheni; futsi ngetulu kwaloko ubhale tintfo letiningi latiphrofetha nalatikhuluma kubantfwana bakhe, lengingayukwenta umlandvo lophelele ngato.
17 Kodvwa ngiyawukwenta umlandvo ngetento tami etinsukwini tekuphila kwami. Buka, ngifinyeta umbhalo wababe kubongcwengcwe lengibentile ngetami tandla lucobo; ngaloko-ke, emvakwekutsi sengiwufinyetile umbhalo wababe, ngitawubese sengenta umlandvo ngemphilo yami.
18 Ngaloko-ke, ngifuna kutsi nati, kutsi emvakwekutsi iNkhosi seyimtjengise tintfo letiningi letimangalisako babe, Lehi, yebo, mayelana nekubhujiswa kweJerusalema, buka wahamba waya emkhatsini webantfu, futsi wacala kuphrofetha nekumemetela kubo tintfo labetibonile futsi nalebekativile.
19 Futsi kwenteka kutsi emaJuda ahlekisa ngaye ngenca yetintfo latifakaza ngawo; ngoba wafakaza ngebubi kanye netinengiso tawo; waphindze wafakaza ngekutsi tintfo labetibonile nalebekativile, kanjalo netintfo latifundza encwadzini tatibonakalisa ngalokusobala kuta kwaMesiya, kanjalo nangekuhlengwa kwemhlaba.
20 Futsi ngesikhatsi emaJuda ativa leti tintfo amtfukutselela; yebo, nanjengebaphrofethi basendvulo, lababacosha, nalababagcoba ngematje, nalabababulala; futsi ngetulu kwaloko afuna imphilo yakhe, kutsi ayitsatse. Kodvwa buka, mine, Nefi, ngitawunikhombisa kutsi bumnene besihawu seNkhosi bungetulu kwabo bonkhe labo leyibakhetsile, ngenca yelukholo lwabo, kubenta babe nemandla lamakhulu nangemandla ekukhululwa.