1 Manje kwenteka kutsi emvakwekutsi mine, Nefi, sengitifundzile leti tintfo lebeticoshwe kubongcwengcwe belitfusi, bomnaketfu beta kimi futsi batsi: Tisho kutsini leti tintfo lebewutifundza na? Buka, ngabe kufanele ticondvwe njengetintfo takamoya, letiyawukwenteka ngekwakamoya hhayi ngekwasenyameni na?

2 Futsi mine, Nefi, ngatsi kubo: Bukani tabonakaliswa kumphrofethi ngelivi laMoya; ngoba ngaMoya tonkhe tintfo tembulwa kubo baphrofethi, letiyawufika kubo bantfwana bebantfu ngekwasenyameni.

3 Ngaloko-ke, tintfo lengitifundzile tintfo letiphatselene netintfo tesikhashana kanye netakamoya; ngoba kubukeka shengatsi indlu yaka-Israyeli, kungekudzala, itawuhlakatwa ebusweni bemhlaba wonkhe, futsi ngalokunjalo nasemkhatsini wetive tonkhe.

4 Futsi bukani, kukhona labaningi lasebavele balahlekile elwatini lwalabo labaseJerusalema. Yebo, incenye lenkhulu yetivana tonkhe seyiholelwe kudze; futsi tisakatwe lena nalena etichingini telwandle; futsi kutsi tikuphi kute namunye wetfu lowatiko, ngaphandle kwekutsi siyati kutsi baholelwa kudze.

5 Futsi njengoba baholelwe kudze, leti tintfo tiphrofethiwe mayelana nabo, futsi ngalokunjalo mayelana nabo bonkhe labo labayawusakatwa futsi bahlaziswe, ngenca yaloNgcwele wa-Israyeli; ngoba batawuticinisa tinhlitiyo tabo ngalokumelene naye; ngaloko-ke, bayawusakatwa emkhatsini wetive tonkhe futsi bayawutondwa ngibo bonkhe bantfu.

6 Noko, emvakwekutsi sebondliwe beTive, futsi neNkhosi seyisiphakamisile sandla etikwebeTive futsi yabamisa njengesibonakaliso, nebantfwana babo sebabagonile emikhonweni yabo, kanye nemadvodzakati abo bawetfwala emahlombe abo, bukani leti tintfo lekukhulunywa ngato tesikhashana; ngoba tinjalo tivumelwano teNkhosi nabobabe betfu; futsi kushiwo kitsi etinsukwini letitako, futsi ngalokunjalo nakubo bonkhe bomnaketfu lababendlu yaka-Israyeli.

7 Futsi kusho kutsi sikhatsi siyeta lapho emvakwekube yonkhe indlu yaka-Israyeli seyihlakatiwe futsi yahlaziswa, iNkhosi Nkulunkulu itawuvusa tive letinemandla emkhatsini webeTive, yebo, nasetikwebuso balo lelive; futsi ngato intalelwane iyawusakatwa.

8 Futsi emvakwekutsi intalelwane yetfu seyihlakatiwe iNkhosi Nkulunkulu itawuchubeka nekwenta umsebenti lomangalisako emkhatsini webeTive, loyawukuba ligugu lelikhulu kuyo intalelwane yetfu; ngaloko-ke, kufaniswa nekondliwa kwabo beTive kanye nekugonwa emikhonweni yabo kanye nekwetfwalwa emahlombe abo.

9 Futsi ngetulu kwaloko kuyawuba ligugu kubeTive; futsi hhayi kuphela-nje kubeTive kodvwa kuyo yonkhe indlu yaka-Israyeli, ekwatiseni ngetivumelwano taBabe wasezulwini ku-Abrahama, atsi: Kuyo intalelwane yakho yonkhe imindeni yemhlaba iyawubusiswa.

10 Futsi ngifuna, bomnaketfu, kutsi nati kutsi yonkhe imindeni yemhlaba ayinakubusiswa ngaphandle kwekutsi yembule umkhono wakhe emehlweni etive.

11 Ngaloko-ke, iNkhosi Nkulunkulu itawuchubeka yembule umkhono wayo emehlweni ato tonkhe tive, ekuletseni tivumelwano tayo kanye nelivangeli layo kulabo lababendlu yaka-Israyeli.

12 Ngaloko-ke, itawuphindza ibakhiphe ebugcilini, futsi bayawugcogcana ndzawonye emaveni langemafa abo; futsi bayawukhishwa ekusitsekeni nasebumnyameni; futsi bayawukwati kutsi iNkhosi inguMsindzisi wabo kanye neMhlengi wabo, loneMandla wa-Israyeli.

13 Futsi ingati yalelo bandla lelikhulu nalelinengekile, leliyingwadla yemhlaba wonkhe, liyawuphendvukela tinhloko tabo; ngoba bayawukulwa bodvwa, futsi inkemba yetandla tabo lucobo iyawuwela etikwetinhloko tabo; futsi bayawudzakwa yingati yabo.

14 Futsi tive tonkhe letiyawukulwa nawe, Awu yindlu yaka-Israyeli, tiyawuphendvukelana todvwa, futsi tiyawuwela kuwo lowo mgodzi letawumbela kutsiya bantfu beNkhosi. Futsi bonkhe labo labalwa neSiyoni bayawubhujiswa, futsi naleyo ngwadla lenkhulu, legucule tindlela leticondzile teNkhosi, yebo, lelo bandla lelikhulu nalelinengekile, liyawuwela elutfulini futsi kuyawuba kukhulu kuwa kwalo.

15 Ngoba buka, kusho umphrofethi, sikhatsi siyeta masinyane lapho Sathane angasayukuba nemandla ngetulu kwetinhlitiyo tebantfwana bebantfu; ngoba lusuku luyeta masinyane lapho bonkhe labatichenyako kanye nalabo labenta bubi bayawuba njengetinhlanga; futsi lusuku luyeta lwekutsi bashiswe.

16 Ngoba sikhatsi siyeta masinyane lapho intfukutselo legcwele yaNkulunkulu iyawutfululwa etikwabo bonkhe bantfwana bebantfu; ngoba akatuvumela kutsi lababi babhubhise labalungile.

17 Ngaloko-ke, utawubalondvolota labalungile ngemandla akhe, noma ngabe kungukutsi intfukutselo yakhe legcwele kufanele ifike, futsi labalungile balondvolotwe, kangangoba kubhujiswa titsa tabo ngemlilo. Ngaloko-ke, labalungile akukameli besabe; ngoba usho kanje umphrofethi, bayawusindziswa, noma ngabe kungaba ngemlilo.

18 Bukani, bomnaketfu, ngitsi kini, leti tintfo kufanele tenteke masinyane; yebo, ingati, kanye nemlilo, kanye nesimoko sentfutfu kufanele kufike; futsi kufanele kube sebusweni balomhlaba; futsi kuta kubantfu ngekwasenyameni uma kungukutsi batawutenta lukhuni tinhlitiyo tabo kuye loNgcwele wa-Israyeli.

19 Ngoba bukani, labalungile abayukubhubha; ngoba sikhatsi ngempela kufanele sifike sekutsi bonkhe labo labalwa neSiyoni bahlukaniswa naNkulunkulu.

20 Futsi ngempela iNkhosi itawuyilungisa indlela yebantfu bayo, ekugcwaliseni emavi aMosi, lawakhuluma, atsi: Umphrofethi iNkhosi Nkulunkulu wenu iyawumvusa kini, lonjengami; niyawumlalela kuto tonkhe tintfo layawutisho kini. Futsi kuyawukwenteka kutsi bonkhe labo labangatumuva loyo mphrofethi bayawuhlukaniswa emkhatsini webantfu.

21 Manje mine, Nefi, ngiyamemetela kini, kutsi lomphrofethi Mosi lakhuluma ngaye kwakunguye loNgcwele wa-Israyeli; ngaloko-ke, uyawukwehlulela ngekulunga.

22 Futsi labalungile akukameli besabe, ngoba ngibo labo labangayukubhujiswa. Kodvwa ngumbuso wadeveli loyawukwakhiwa emkhatsini webantfwana bebantfu, loyo mbuso loyomiswa emkhatsini wabo labo labasenyameni—

23 Ngoba sikhatsi siyawusheshe sifike kutsi onkhe emabandla lakhelwe kutfola inzuzo, kanye nawo onkhe lawo lakhelwe kutfola emandla ngetulu kwenyama, kanye nalawo lakhelwe kutfola ludvumo emehlweni emhlaba, kanye nalabo labafuna inkhanuko yenyama kanye netintfo temhlaba, kanye nekwenta tonkhe tinhlobo tebubi; yebo, kwephetsa, bonkhe labo lababembuso wadeveli ngibo lekumele besabe, futsi bachachatele, futsi batfutfumele; ngibo labo lekufanele behliselwe phansi elutfulini; ngibo labo lekufanele bashiswe njengetinhlanga; futsi loku kungekwemavi emphrofethi.

24 Futsi sikhatsi siyawufika masinyane lapho labalungile kufanele baholwe njengemankhonyane esisingeni, futsi longcwele wa-Israyeli kufanele abuse ngekuphatsa, ngebukhulu nangemandla, kanye nangenkhatimulo lenkhulu.

25 Futsi ugcogca bantfwana bakhe kumagumbi lamane emhlaba; futsi uyatibala timvu takhe, futsi tiyamati; futsi kuyawuba nemhlambi lowodvwa nemelusi loyedvwa; futsi uyawutondla timvu takhe, futsi kuye tiyawutfola lidlelo.

26 Futsi ngenca yekulunga kwebantfu bakhe, Sathane akanamandla; ngaloko-ke, akanakukhululwa sikhatsi lesiyiminyaka leminingi; ngoba akanamandla etinhlitiyweni tebantfu, ngoba bahleti ngekulunga, futsi loNgcwele wa-Israyeli uyabusa.

27 Manje bukani, mine, Nefi, ngitsi kini tonkhe leti tintfo kufanele tenteke ngekwasenyameni.

28 Kodvwa, bukani, tonkhe tive, imindeni, tilimi, kanye nebantfu bayawuhlala ngekuphepha kuye loNgcwele wa-Israyeli uma kungukutsi batawuphendvuka.

29 Manje mine, Nefi, ngiyaphela lapha; ngoba anginawukulokotsa ngichubeke ngikhulume mayelana naleti tintfo.

30 Ngaloko-ke, bomnaketfu, ngifisa kutsi nizindle ngekutsi leti tintfo letibhalwe kubongcwengcwe belitfusi tiliciniso; futsi tifakaza ngekutsi umuntfu kufanele ahloniphe imiyaleto yaNkulunkulu.

31 Ngaloko-ke, akukameli nicabange kutsi mine nababe ngitsi kuphela lesifakazile, futsi ngetulu kwaloko lesifundzise ngato. Ngaloko-ke, uma niyawuyihlonipha imiyaleto, futsi nibeketele kute kube sekugcineni, niyawusindziswa ngelusuku lwekugcina. Futsi kunjalo nje. Amen.