Sehluko 3
Emadvodzana aLehi abuyela eJerusalema kuyolandza bongcwengcwe belitfusi—Labani wala kudzela bongcwengcwe—Nefi uyabayala uphindze uyabakhutsata bomnakabo—Labani weba imphahla yabo uphindze wetama kubabulala—Lamani naLamuweli bashaya Nefi naSemu futsi bakhutwa yingilosi. Cishe ngemnyaka wa 600 kuya kuwa 592 ngaphambi kwekuta kwaKhristu.
1 Futsi kwenteka kutsi mine, Nefi, ngabuya ekukhulumeni neNkhosi, ngaya ethendeni lababe.
2 Futsi kwenteka kutsi wakhuluma kimi, watsi: Buka ngiphuphe liphupho, lapho kulo iNkhosi ingiyalete kutsi wena kanye nabomnakenu niyawubuyela eJerusalema.
3 Ngoba buka, Labani unembhalo wemaJuda kanye nemlandvo wesitukulwane sabokhokho bami, futsi loko kucoshwe kubongcwengcwe belitfusi.
4 Ngaloko-ke, iNkhosi ingiyalete kutsi wena nabomnakenu kufanele niye endlini yaLabani, niyofuna lemibhalo, futsi nehle nayo niyiletse lapha ehlane.
5 Manje, buka bomnakenu bayavungama, batsi kuyintfo lelukhuni lena mine lengiyifuna kubo; kodvwa buka angiyifunanga mine kubo, kodvwa kungumyaleto weNkhosi.
6 Ngako-ke hamba, ndvodzana yami, futsi uyawutsandvwa yiNkhosi, ngoba wena awukate uvungame.
7 Futsi kwenteka kutsi mine, Nefi, ngatsi kubabe: Ngitawuhamba ngitente tintfo iNkhosi leyalete ngato, ngoba ngiyati kutsi iNkhosi ayiyiniki imiyaleto kubantfwana bebantfu, ngaphandle kwekutsi iyawubalungiselela indlela kute bakwati kufeza leyontfo leyibayalete ngayo.
8 Futsi kwenteka kutsi ngesikhatsi babe aseve lamavi wajabula kakhulu, ngoba wati kutsi ngase ngibusiswe yinkhosi.
9 Mine, Nefi, kanye nabomnaketfu satsatsa luhambo lwetfu lwasehlane, nemathende etfu, sakhuphukela eveni laseJerusalema.
10 Futsi kwenteka kutsi ngesikhatsi sesihambile sakhuphukela eveni laseJerusalema, mine kanye nabomnaketfu sabonisana lomunye nalomunye.
11 Senta inkatho—kutsi ngubani emkhatsini wetfu lobekayongena emtini waLabani. Futsi kwenteka kutsi inkatho yawela kuLamani; futsi Lamani wahamba wangena emtini waLabani wakhuluma naye ngesikhatsi ahleti endlini yakhe.
12 Wacela kuLabani imibhalo leyo lebeyicoshwe kubongcwengcwe belitfusi lebeyicuketse umlandvo wesitukulwane sababe.
13 Buka, kwenteka kutsi Labani watfukutsela, waphindze wamcosha phambi kwakhe; futsi akafunanga kumniketa imibhalo. Ngaloko-ke, watsi kuye: Buka usigebengu, futsi ngitawukubulala.
14 Kodvwa Lamani wabaleka phambi kwakhe, watositjela tintfo Labani labekatentile. Sacala kudzabuka kakhulu, futsi bomnaketfu bese batobuyela kubabe ehlane.
15 Kodvwa buka mine ngatsi kubo: Njengoba iNkhosi iphila, futsi natsi siphila, asitukuya entansi kubabe ehlane ngaphambi kwekutsi siyifeze leyontfo iNkhosi lesiyalete ngayo.
16 Ngaloko-ke, asetsembekeni ekugcineni imiyaleto yeNkhosi; ngako-ke asehleleni eveni lelifa lababe, ngoba buka washiya ligolide kanye nesiliva, kanye nayo yonkhe inhlobo yengcebo. Futsi konkhe loku ukwente ngenca yemiyaleto yeNkhosi.
17 Ngoba bekati kutsi iJerusalema kwakufanele ibhujiswe, ngenca yebubi bebantfu.
18 Ngoba buka, bawalahlile emavi ebaphrofethi. Ngaloko-ke, uma babe bekayohlala kulelive emvakwekutsi asayaletiwe kutsi abaleke aphume aphele kulo, buka, naye kanjalo bekayawubhubha. Ngaloko-ke, kufanele kutsi abaleke aphume aphele kulelive.
19 Buka, kukuhlakanipha kuNkulunkulu kutsi tsine siyotfola lemibhalo, kute sigcinele bantfwana betfu lulwimi lwabobabe betfu;
20 Futsi kanjalo kute sibagcinele emavi lakhulunywa ngemilomo yabo bonkhe baphrofethi labangcwele, latfunyelwa kubo ngaMoya kanye nangemandla aNkulunkulu, kusukela umhlaba wacala, kwehle kute kufike esikhatsini sanyalo.
21 Futsi kwenteka kutsi ngabavumisa bomnaketfu ngalendlela yekukhuluma, kute batsembeke ekugcineni imiyaleto yaNkulunkulu.
22 Futsi kwenteka kutsi sehlela entansi eveni lelilifa letfu, saphindze sagcogca ndzawonye ligolide letfu, kanye nesiliva yetfu, kanye netintfo tetfu letiligugu.
23 Emvakwekutsi sesigcogce ndzawonye leti tintfo, sahamba sakhuphukela emtini waLabani.
24 Futsi kwenteka kutsi sangena saya kuLabani, samcela kutsi asinikete imibhalo leyo lebeyicoshwe kubongcwengcwe belitfusi, ngayo tsine besiyawumnika ligolide letfu, kanye nesiliva yetfu, kanye nato tonkhe tintfo tetfu lebetiligugu.
25 Futsi kwenteka kutsi ngesikhatsi Labani abona imphahla yetfu, nekutsi yayiyiningi kakhulu, wayihawukela, kangangekutsi wasicosha, waphindze watfumela tinceku takhe kutsi tisibulale, kute atfole imphahla yetfu.
26 Futsi kwenteka kutsi sabaleka ngaphambi kwetinceku taLabani, saphoceleleka kutsi siyishiye ngemuva imphahla yetfu, futsi yawela etandleni taLabani.
27 Futsi kwenteka kutsi sabalekela ehlane, futsi tinceku taLabani atizange tisikhandza, sabhaca emgedzeni welidvwala.
28 Futsi kwenteka kutsi Lamani wangitfukutselela, waphindze watfukutselela nababe; kanjalo naLemuweli, ngoba yena bekalalela emavi aLamani, Ngaloko-ke Lamani naLemuweli bakhuluma emavi lamaningi lamatima kitsi, bomnakabo labancane, b phindze basishaya nangendvuku.
29 Futsi kwenteka kutsi basasishaya ngendvuku, buka, ingilosi yeNkhosi yeta yaphindze yema phambi kwabo, yakhuluma kubo itsi: Nimshayelani umnakenu lomncane ngendvuku na? Anati yini kutsi iNkhosi imkhetsile kutsi abe ngumbusi ngetulu kwenu, futsi loku kungenca yebubi benu na? Bukani niyawukhuphukela niye eJerusalema futsi, iNkhosi itawumnikela etandleni tenu Labani.
30 Emvakwekutsi ingilosi seyikhulumile kitsi, yahamba.
31 Emvakwekutsi ingilosi seyihambile, Lamani naLemuweli bacala futsi bavungama, batsi: Kungenteka kanjani kutsi iNkhosi itawunikela Labani etandleni tetfu na? Buka, uyindvodza lenemandla futsi angakhuta emashumi lasihlanu, yebo, angabulala nemashumi lasihlanu; pho angakwenti ngani loko kitsi na?