1 Futsi kwenteka emvakwekutsi sesibuyele entansi ehlane kubabe, buka, wagcwala injabulo, kanjalo namake, Sariya, watfokota kakhulu, ngoba ngempela besekakhale kakhulu ngenca yetfu.

2 Ngoba bekacabange kutsi besesabhubha ehlane; ngetulu kwaloko bekakhononile kubabe, amtjela kutsi bekayindvodza yemibono; watsi: Buka usiholile usisusa eveni lelilifa letfu, futsi emadvodzana ami akasekho, natsi siyabhubha ehlane.

3 Futsi make bekamsole ngalendlela yekukhuluma babe.

4 Futsi kwakwentekile kutsi babe bekakhulume naye, watsi: Ngiyati kutsi ngiyindvodza yemibono; ngoba uma ngabe angitibonanga letintfo taNkulunkulu embonweni bengingayubati buhle baNkulunkulu, kodvwa bengitohlala eJerusalema, futsi ngibhubhe kanye nabomnaketfu.

5 Kodvwa buka, sengitfole live lesetsembiso, lokutintfo lengitfokotako ngato, yebo, futsi ngiyati kutsi iNkhosi itawukhulula emadvodzana ami etandleni taLabani, iphindze iwabuyise lapha entansi kitsi ehlane.

6 Futsi babe, Lehi, wamdvudvuta ngalendlela yekukhuluma make, Sariya, mayelana natsi, ngesikhatsi sisahamba ehlane sikhuphukela eveni laseJerusalema, kuyolandza umbhalo wemaJuda.

7 Ngesikhatsi sesibuyele ethendeni lababe, buka injabulo yabo yagcwala, futsi make wadvudvuteka.

8 Wakhuluma, watsi, manje sengiyati ngekweliciniso kutsi iNkhosi imyaletile umyeni wami kutsi abalekele ehlane; yebo, ngetulu kwaloko ngiyati ngekweliciniso kutsi iNkhosi iwavikele emadvodzana ami, futsi yawakhulula etandleni taLabani, waphindze yawanika emandla ekutsi akwati kufeza leyontfo iNkhosi lewayalete ngayo. Wakhuluma ngalendlela.

9 Futsi kwenteka kutsi batfokota kakhulu, banikela ngemihlatjelo nangeminikelo yekushiswa eNkhosini; baphindze babonga kuNkulunkulu wema-Israyeli.

10 Emvakwekutsi sebabongile kuNkulunkulu wema-Israyeli, babe, Lehi, watsatsa imibhalo lebeyicoshwe kubongcwengcwe belitfusi, wayicwaninga kusukela ekucaleni.

11 Wabona kutsi yayicuketse tincwadzi letisihlanu taMosi, letatikhuluma ngemlandvo wekudalwa kwemhlaba, kanjalo nanga-Adamu naEva, labebabatali betfu bekucala.

12 Futsi kanjalo nembhalo wemaJuda kusukela ekucaleni, kwehle njalo kute kufike ekucaleni kwekubusa kwaSedekiya, inkhosi yemaJuda;

13 Futsi kanjalo netiphrofetho tebaphrofethi labangcwele, kusukela ekucaleni, kwehle njalo kute kufike ekucaleni kwekubusa kwaSedekiya; kanjalo netiphrofetho letiningi letatikhulunywe ngemlomo waJeremiya.

14 Futsi kwenteka kutsi babe, Lehi, ngetulu kwaloko watfola kubongcwengcwe belitfusi umlandvo wesitukulwane saboyise; ngaloko-ke wabese sowuyati kutsi yena bekawesitukulwane saJosefa; yebo, loyo Josefa lobekayindvodzana yaJakobe, lowatsengiswa eGibhithe, futsi lowagcinwa ngesandla seNkhosi, kute akwati kugcina uyise, Jakobe, kanye nabo bonkhe bendlu yakhe ekubhujisweni yindlala.

15 Ngetulu kwaloko baholwa baphuma ebugcilini kanye naseveni laseGibhithe, nguye loyo Nkulunkulu lobekabagcinile.

16 Futsi kungalendlela babe, Lehi, atfola ngayo umlandvo wesitukulwane saboyise wakhe. Futsi Labani naye bekawesitukulwane saJosefa, ngaloko-ke yena kanye naboyise bebayigcinile imibhalo.

17 Manje ngesikhatsi babe abona tonkhe leti tintfo, wagcwaliswa ngaMoya, waphindze wacala kuphrofetha mayelana nentalelwane yakhe—

18 Kutsi laba bongcwengcwe belitfusi kufanele bayochubekela phambili kuto tonkhe tive, imindeni, tilimi, kanye nakubantfu labebabentalelwane yakhe.

19 Ngaloko-ke, watsi laba bongcwengcwe belitfusi abayushabalala; noma bafiphaliswe futsi ngesikhatsi. Waphindze waphrofetha tintfo letiningi letiphatselene nentalelwane yakhe.

20 Futsi kwenteka kutsi kute kube ngunyalo mine nababe sasiyigcinile imiyaleto leyo iNkhosi lebeyisiyalete ngayo.

21 Futsi sasiyitfolile imibhalo leyo iNkhosi lebeyisiyalete ngayo, sayicwaninga satfola kutsi yayinguletsandzekako kukhulu; yebo, beyiligugu kitsi, kangangekutsi sasingakwati kugcinela bantfwana betfu imiyaleto yeNkhosi.

22 Ngaloko-ke, kwakukuhlakanipha eNkhosini kutsi siyoyitfwala kanye natsi, ngesikhatsi sihamba ehlane siya eveni lesetsembiso.