Sehluko 7
Emadvodzana aLehi abuyela eJerusalema futsi amema Ishmayeli kanye nendlu yakhe kutsi bahambe nabo eluhambeni lwabo—Lamani kanye nalabanye bayahlubuka—Nefi uncusa bomnakabo kutsi babe nelukholo eNkhosini—Bambopha ngetintsambo futsi benta lisu lekumbulala—Ukhululwa ngemandla elukholo—Bomnakabo bacela intsetselelo—Lehi kanye nalabo bekanabo banikela ngemhlatjelo kanye neminikelo yekushiswa. Cishe ngemnyaka wa 600 kuya kuwa 592 ngaphambi kwekutalwa kwaKhristu.
1 Manje ngifuna kutsi nati, emvakwekutsi babe, Lehi, asacedzile kuphrofetha mayelana nentalelwane yakhe, kwenteka kutsi iNkhosi yakhuluma naye futsi, itsi kwakungakafaneli yena, Lehi, atsatse umndeni wakhe wodvwa kuya ehlane, kodvwa kutsi emadvodzana akhe atsatse emadvodzakati abe bomkabo, kute akhulise intalelwane eNkhosini eveni lesetsembiso.
2 Futsi kwenteka kutsi iNkhosi yamyaleta kutsi mine, Nefi, kanye nabomnaketfu, kufanele sibuyele futsi eveni laseJerusalema, sehle na-Ishmayeli nemndeni wakhe sibuyele nabo ehlane.
3 Futsi kwenteka kutsi mine, Nefi, ngaphindze, kanye nabomnaketfu, ngaya ehlane kute sikhuphukele eJerusalema.
4 Futsi kwenteka kutsi sakhuphuka saya endlini ya-Ishmayeli, futsi sazuza umusa emehlweni a-Ishmayeli, kangangekutsi sate sakhuluma kuye emavi eNkhosi.
5 Futsi kwenteka kutsi iNkhosi yayitsambisa inhlitiyo ya-Ishmayeli, kanjalo nebendlu yakhe, kangangekutsi batsatsa luhambo lwabo kanye natsi sehlela entansi ehlane ethendeni lababe.
6 Futsi kwenteka kutsi ngesikhatsi sisahamba ehlane, buka Lamani naLemuweli, kanye nemadvodzakati lamabili a-Ishmayeli, kanye nemadvodzana lamabili a-Ishmayeli kanye nemindeni yawo, basivukela; yebo, mine, Nefi, naSemu, kanye neyise wabo Ishmayeli, nemkakhe, kanye nemadvodzakati akhe lamanye lamatsatfu.
7 Futsi kwenteka kutsi ekusivukeleni kwabo, bona bebafuna kutsi babuyele eveni laseJerusalema.
8 Manje mine, Nefi, ngikhatsatekile ngebulukhuni betinhlitiyo tabo, ngako-ke ngakhuluma nabo, ngitsi, yebo, nakuLamani kanye nakuLemuweli: Bukani nine nibomnaketfu labadzala, futsi kungani tinhlitiyo tenu tilukhuni kangaka, niphindze nitimphumphutse nasemicodvweni yenu kangaka, kutsi nite nidzinge mine, umnakenu lomncane, ngite ngikhulume nani, yebo, futsi ngibe sibonelo kini na?
9 Kungani ningalilaleli livi leNkhosi na?
10 Kungani senikhohliwe kutsi nayibona ingilosi yeNkhosi na?
11 Yebo, kungani senikhohliwe tintfo letinkhulu kangaka iNkhosi lesentele tona, ekusikhululeni etandleni taLabani, futsi kanjalo nekutfola umbhalo na?
12 Yebo, futsi kungani senikhohliwe kutsi iNkhosi iyakwati kwentela bantfwana bebantfu tonkhe tintfo ngekwentsandvo yayo, uma nje kungukutsi benta ngekukholwa kuyo na? Ngaloko-ke asetsembeke kuyo.
13 Futsi uma kungukutsi siyatsembeka kuyo, siyawulitfola live lesetsembiso; futsi niyawukwati esikhatsini lesitako kutsi livi leNkhosi liyawugcwaliseka mayelana nekubhujiswa kweJerusalema; ngoba tonkhe tintfo iNkhosi letikhulumile mayelana nekubhujiswa kweJerusalema kufanele tigcwaliseke.
14 Ngoba bukani, Moya weNkhosi utoyekela masinyane kutsi uhlale kubo; ngoba bukani, babalahlile baphrofethi, futsi naJeremiya bamphonse ejele. Futsi bafune nekutsatsa imphilo yababe, kangangekutsi babangele kutsi abaleke eveni.
15 Manje bukani, ngitsi kini uma nitawubuyela eJerusalema nani kanjalo niyawubhubha kanye nabo. Manje, uma nikhona kukhetsa, khuphukelani eveni, futsi niwakhumbule emavi lengiwakhuluma kini, kutsi uma nihamba nani kanjalo nitawubhubha; ngoba Moya weNkhosi ungiphocelele kutsi kufanele ngikhulume ngalendlela.
16 Futsi kwenteka kutsi ngesikhatsi mine, Nefi, sengikhulume lamavi kubomnaketfu, bangitfukutselela. Futsi kwenteka kutsi bangibamba, ngoba buka, bebatfukutsele kakhulu, bangibopha ngetintsambo, ngoba bebafuna kutsatsa imphilo yami, nekutsi bebafuna kutsi bangishiye ehlane ngidliwe tilwane tasendle.
17 Kodvwa kwenteka kutsi ngathandaza eNkhosini, ngitsi: Awu Nkhosi, ngelukholo lwami lolukuwe, ungangikhulula yini etandleni tabomnaketfu; yebo, unginike nemandla ekutsi ngitigcuphule leti tibopho lengiboshwe ngato.
18 Futsi kwenteka kutsi emvakwekutsi sengiwashito lamavi, buka, tibopho tacegiswa etandleni tami kanye nasetinyaweni, ngema ngaphambi kwabomnaketfu, ngaphindze ngakhuluma nabo.
19 Futsi kwenteka kutsi baphindze bangitfukutselela, bafuna nekungibamba; kodvwa buka, yinye yemadvodzakati a-Ishmayeli, yebo, kanjalo nenina, kanye nayinye yemadvodzana a-Ishimayeli, babancenga bomnaketfu, kangangekutsi batitsambisa tinhlitiyo tabo; futsi bayekela kutama kutsatsa imphilo yami.
20 Futsi kwenteka kutsi badzabuka, ngenca yebubi babo, kangangekutsi bakhotsama phambi kwami, bangincenga kutsi ngibatsetselele ngentfo lebebangente yona.
21 Futsi kwenteka kutsi ngabatsetselela ngekungabeki mbandzela ngako konkhe labebakwentile, ngabancusa kutsi bathandaze eNkhosini Nkulunkulu wabo kute batsetselelwe. Futsi kwenteka kutsi benta njalo. Emvakwekutsi sebacedzile kuthandaza eNkhosini saphindze sachubeka neluhambo lwetfu lwekuya ethendeni lababe wetfu.
22 Futsi kwenteka kutsi sehlela entansi ethendeni lababe wetfu. Emvakwekutsi mine nabomnaketfu kanye nendlu yonkhe ya-Ishmayeli sesehlele entansi ethendeni lababe, babonga eNkhosini Nkulunkulu wabo; futsi banikela ngemihlatjelo kanye neminikelo yekushiswa kuyo.