Sehluko 8
Lehi ubona umbono wesihlahla sekuphila—Udla sitselo saso futsi ufisa kutsi umndeni wakhe nawo wente njalo—Ubona indvuku yensimbi, indlela lengumntjuntju nalencane kakhulu, kanye nenkhungu yebumnyama lembonya bantfu—Sariya, Nefi, kanye naSemu badla sitselo, kodvwa Lamani naLemuweli bayala. Cishe ngemnyaka wa 600 kuya kuwa 592 ngaphambi kwekutalwa kwaKhristu.
1 Futsi kwenteka kutsi sasesibutsise ndzawonye tonkhe tinhlobonhlobo tetinhlanyelo, tinhlavu tayoyonkhe inhlobo, kanye netetinhlanyelo tetitselo tayo yonkhe inhlobo.
2 Futsi kwenteka kutsi ngesikhatsi babe ahleti ehlane wakhuluma kitsi watsi: Bukani, ngiphuphe liphupho; noma, ngalamanye emavi, ngibone umbono.
3 Bukani, ngenca yentfo lengiyibonile, nginesizatfu sekutfokota eNkhosini ngenca yaNefi ngalokunjalo naSemu; ngoba nginesizatfu sekucabanga kutsi bona, ngalokunjalo nalabaningi bentalelwane yabo, batawusindziswa.
4 Kodvwa bukani, Lamani nawe Lemuweli, ngiyesaba kakhulu ngenca yenu; ngoba bukani, shengatsi ngibone ephusheni lami, lihlane lelimnyama nalelithulile.
5 Futsi kwenteka kutsi ngabona indvodza, yayembetse ingubo lemhlophe; yeta kimi yema phambi kwami.
6 Futsi kwenteka kutsi yakhuluma kimi, yangiyala kutsi ngiyilandzele.
7 Futsi kwenteka kutsi ngisayilandzela ngatibona kutsi ngisendzaweni lemnyama nalethulile lapho kungekho lutfo loluphilako.
8 Emvakwekutsi sengihambe sikhatsi lesidze ebumnyameni, ngacala kuthandaza eNkhosini kutsi ibe nemusa kimi, ngebukhulu besihawu sayo lesimnene.
9 Futsi kwenteka emvakwekutsi sengithandazile eNkhosini ngabona insimu lenkhulu nalevulekile.
10 Futsi kwenteka kutsi ngabona sihlahla, sitselo saso lesasitsandzeka kakhulu ekwenteni umuntfu ajabule.
11 Futsi kwenteka kutsi ngachubekela phambili ngasidla sitselo saso; ngabona kutsi sasimnandzi kakhulu, ngetulu kwato tonkhe lengake ngatinambitsa ngaphambilini. Yebo, futsi ngabona kutsi sitselo saso sasimhlophe, kwendlula bonkhe bumhlophe lengake ngabubona.
12 Ngesikhatsi ngisidla lesisitselo saso sawugcwalisa umphefumulo wami ngentfokoto lenkhulu kakhulu; ngaloko-ke, ngacala kufisa kutsi shengatsi umndeni wami ungasidla nawo futsi; ngoba bengati kutsi besitsandzeka ngetulu kwato tonkhe letinye titselo.
13 Ngesikhatsi ngiphonsa emehlo ami ngicalata ngala nangala, kute mhlawumbe ngibone umndeni wami futsi, ngabona umfula wemanti; ugobhota, usedvutane neleso sihlahla lengangidla sitselo kuso.
14 Ngabuka kute ngitfole kutsi uchamuka kuphi; ngayibona inhloko yawo bucadlwana; khona lapho enhloko yawo ngabona make wenu Sariya, naSemu, kanye naNefi; bebeme shengatsi abati kutsi kufanele baye ngakuphi.
15 Futsi kwenteka kutsi ngabachweba; ngaphindza ngasho kubo ngelivi lelikhulu kutsi bete kimi, batodla lesositselo, lesasitsandzeka ngetulu kwato tonkhe letinye titselo.
16 Futsi kwenteka kutsi beta kimi nabo basidla sitselo.
17 Futsi kwenteka kutsi ngaba nesifiso sekutsi Lamani naLemuweli bete nabo batodla sitselo leso; ngaloko-ke, ngaphosa emehlo ami ngasenhloko yemfula, ngicabanga kutsi mhlawumbe ngitobabona nabo.
18 Futsi kwenteka kutsi ngababona, kodvwa bona abavumanga kuta kimi batodla sitselo.
19 Ngabona indvuku yensimbi, yayichubeka ngalokulinganisene nelusentse lwemfula, iholela esihlahleni leso lengangime ngakuso.
20 Ngaphindze ngabona indlela lengumntjuntju nalencane kakhulu, leyayita ngekulinganisana nendvuku yensimbi nasesihlahleni leso lengangime ngakuso; futsi ngetulu kwaloko yaholela yate yafika ngasenhloko yemtfombo, nakuleyo nsimu lenkhulu levulekile, lekungatsi ngumhlaba.
21 Ngabona ticuku letingabaleki tebantfu, labaningi babo baphikelele phambili, kute batfole indlela leyo leholela kuleso esihlahleni lengangime ngakuso.
22 Futsi kwenteka kutsi bachubekela phambili, bacala bangena endleleni leyo leyayiholela esihlahleni.
23 Futsi kwenteka kutsi kwabese kuvuka inkhungu yebumnyama; yebo, lenkhulu kakhulu inkhungu yebumnyama, kangangekutsi labo lebesebayicalile indlela yabalahlekela indlela yabo, kangangekutsi badvwanguta futsi balahleka.
24 Futsi kwenteka kutsi ngabona labanye baphikelela phambili, beta ngembili bate basibamba siphetfo sendvuku yensimbi; baphikelela phambili kuyo inkhungu yebumnyama, babambelele kuyo indvuku yensimbi, bate beta ngembili batodla sitselo saleso sihlahla.
25 Emvakwekutsi sebasidlile sitselo saleso sihlahla bacalata ngala nangala kungatsi banemahloni.
26 Futsi nami ngaphindze ngacalata ngala nangala, ngabona, ngesheya kwemfula wemanti, sakhiwo lesikhulu lesivulekile, sime shengatsi sisemoyeni, siphakeme ngetulu kwemhlaba.
27 Sasigcwele bantfu, labadzala kanye nalabancane, labadvuna kanye nalabasikati, futsi indlela yabo yekugcoka yayisezingeni lelisetulu; bebasesimeni sekuhhalatisa bakhomba ngeminwe yabo kulabo labesebetile esihlahleni futsi sebasidla sitselo.
28 Emvakwekutsi sebasinambitsile lesitselo baba nemahloni, ngenca yalabo labebabahhalatisa, base bawela etindleleni letingavunyelwa futsi balahleka.
29 Manje mine, Nefi, angiwakhulumi onkhe emavi ababe.
30 Kodvwa, kuba mfisha ekubhaleni, buka, wabona letinye ticuku tiphikelela phambili; tafika tawubamba umphetfo wendvuku yensimbi; futsi taphikelela ngendlela yato yekuya phambili, njalo-njalo tibambe ticinisile endvukwini yensimbi, tate tefika tawa phansi tasidla sitselo sesihlahla.
31 Futsi waphindze wabona letinye ticuku tiphutsata indlela yato leya lapho kuleso sakhiwo lesikhulu futsi lesivulekile.
32 Futsi kwenteka kutsi labaningi bamita ekujuleni kwemfula wemanti; futsi labaningi balahleka emehlweni akhe, badvwanguta emigwacweni lengakajwayeleki.
33 Futsi sasisiningi sicuku lesangena kuleso sakhiwo lesingakajwayeleki. Emvakwekutsi sesingenile kuleso sakhiwo sangikhomba ngemunwe wekuhhalatisa kanye nalabo labebadla sitselo futsi; kodvwa tsine asibanakanga.
34 Lawa ngemavi ababe: Ngoba ngebuningi balabo lababanaka, bawa.
35 Futsi Lamani naLemuweli abasidlanga lesitselo, kwasho babe.
36 Futsi kwenteka kutsi emvakwekutsi babe sekawakhulumile onkhe lamavi eliphupho lakhe noma umbono, labekamaningi, watsi kitsi, ngenca yaleti tintfo latibona embonweni, bekesaba kakhulu ngenca yaLamani naLemuweli, yebo wesaba hleze bakhishwe ebukhoneni beNkhosi.
37 Wabancusa ngaleso sikhatsi ngemizwa yonkhe yemtali lomnene, kutsi baweve emavi akhe, nekutsi mhlawumbe iNkhosi yayiyawuba nemusa kubo, ingete yabakhipha; yebo, babe wabashumayela.
38 Emvakwekutsi sekabashumayele, ngetulu kwaloko sekaphrofethile kubo ngetintfo letiningi, wabayala kutsi bagcine imiyaleto yeNkhosi; wabese uyayekela kukhuluma nabo.