1 Asin ngonian ta uminagi an panahon na igwa nin kadakol-dakol na manga tawo na nagkatiripon, kan manga tawo ni Nephi, sa palibot kan templo na nasa daga kan Bountiful; asin sinda nagngangaralas asin natitirikbahan sa lambang saro, asin ipinapahiling sa lambang saro an dakula asin makangalas na pagbago na nangyari.

2 Asin sinda naghuhuroron-huron manunungod kaining Jesu-Cristo, na kun kiisay an tanda itinao manunungod kan saiyang pagkagadan.

3 Asin ta uminagi an panahon na mantang sinda nasa siring na paghuroron sa lambang saro, nakadangog sinda nin sarong tingog na paghunaon hali sa langit; asin nangaralagkalag sinda sa palibot, huli ta dai ninda nasabutan an tingog na saindang nadangog; asin ta bako man malagong na tingog, ni makusog na tingog; alagad maski idto sadit na tingog tuminaros idto sa puso kan lambang nakadangog, sagkod na daing kabtang kan saindang hawak na dai nagtakig; iyo, idto tuminaros nanggad sa sainda, sa saindang pinakakalag, asin pinainit kaidto an saindang manga puso.

4 Asin ta uminagi an panahon na sa giraray saindang nadangog an tingog, asin ta dai ninda nasabutan.

5 Asin sa giraray sa ika-tulong ulit nadangog ninda an tingog; asin binuksan an saindang manga talinga tanganing madangog idto; asin an saindang manga mata nakatingkalag sa pinaghalian kan tanog na idto; asin ta nakatuon sa kalangitan an paghiling ninda, na kun sain hali an tanog.

6 Asin nanggad, sa ika-tulong ulit nasabutan na ninda an tingog na saindang nadangog; asin ta idto nagsabi sa sainda:

7 Hilinga, an Padangat kong Aki, na kun kiisay ako naoogma, na kun kiisay pinamuraway ko an sakuyang pangaran—dangogon nindo siya.

8 Asin ta uminagi an panahon, na kan saindang masabotan itiningkalag ninda an saindang manga mata giraray pasiring sa langit; asin totoo, saindang nahiling an sarong Tawo na nagbababa hali sa langit; asin ta siya nakagubing nin puting bata; asin siya nagbaba asin nagtindog sa tahaw ninda; asin an manga mata kan bilog na katiripunan nakatuon saiya, asin dai ninda binalo na buksan an saindang manga nguso, maski na sa lambang saro, dai maisip an boot sabihon kaidto, huli ta an huna ninda idto sarong anghel na nagpahiling sa sainda.

9 Asin ta uminagi an panahon na inunat niya an saiyang kamot asin nagtaram sa manga tawo, an sabi:

10 Hilinga, ako si Jesu-Cristo, na pinatotoohan kan manga propeta na maabot sa mundo.

11 Asin totoo, ako an ilaw asin an buhay kan mundo; asin ako nag-inom sa mapait na kupa na itinao kan Ama sakuya, asin pinamuraway an Ama sa pagpasan ko kan manga kasalan kan mundo, na sakuyang tinios an kapagbotan kan Ama sa gabos na manga bagay sa kapinonan pa.

12 Asin ta uminagi an panahon na kan makapagtaram si Jesus kan manga tataramon na ini an bilog na katiripunan nagdarapa sa daga; huli ta narumdoman ninda na ipinagpropesia sa sainda na an Cristo mapahiling sa sainda pagkatapos kan saiyang pagsakat sa langit.

13 Asin ta uminagi an panahon na an Kagurangnan nagtaram sa sainda na an sabi:

14 Magbarangon asin magdirigdi sa sakuya, tanganing iburugtak nindo an saindong manga kamot sa kagiriran ko, asin man tanganing mamati nindo an inagihan kan manga pako sa sakuyang manga kamot asin sa sakuyang manga bitis, tanganing maaraman nindo na ako an Dios kan Israel, asin an Dios kan bilog na kinaban, asin ginadan huli sa kasalan kan mundo.

15 Asin ta uminagi an panahon na an katiripunan nagdurulok, asin ibinurugtak an saindang manga kamot sa saiyang kagiriran, asin namati an manga inagihan kan manga pako sa saiyang manga kamot asin sa saiyang manga bitis; asin ini saindang giniribo, nagdurulok saro-saro sagkod sa gabos sinda nakadulok, asin nahiling kan saindang manga mata asin namati kan saindang manga kamot, asin naaraman nanggad ninda asin nagpatotoo, na siya iyo man nanggad an isinurat kan manga propeta, na maabot.

16 Asin kan sinda gabos nakadurulok na asin saindang napatotoohan sa saindang sadiri, nagkururahaw sindang sarabay, na an sabi:

17 Hosanna! Paladan an pangaran kan Pinakahalangkaw na Dios! Asin sinda nagdarapa sa manga bitis ni Jesus, asin siya sinamba.

18 Asin ta uminagi an panahon na nagsabi siya ki Nephi (huli ta si Nephi saro sa katiripunan na idto) asin pinagbotan siya na magdulok.

19 Asin si Nephi tuminindog asin nagdulok, asin dinuko an sadiri niya sa atubangan kan Kagurangnan asin naghadok sa saiyang manga bitis.

20 Asin an Kagurangnan pinagbotan siya na bumangon. Asin siya nagbangon asin tuminindog sa saiyang atubangan.

21 Asin an Kagurangnan nagsabi sa saiya: Itatao ko saimo an kapangyarihan tanganing bunyagan an manga tawong ini kun ako sa giraray sumakat na sa langit.

22 Asin sa giraray an Kagurangnan nag-apod nin manga iba pa, asin siring man an sinabi sa sainda; asin tinawan sinda nin kapangyarihan na magbunyag. Asin siya nagsabi sa sainda: Sa siring na paagi kamo magbunyag; asin tanganing dai kamo magkaigwa nin pagpasuruhay.

23 Totoo sakuyang sinasabi sa saindo, na an siisay man na magsolsol kan saiyang manga kasalan sa paagi kan saindong manga tataramon, asin magmawot na magpabunyag sa pangaran ko, sa siring na paagi sinda bubunyagan nindo—Magdangog, mababa kamo asin matindog sa tubig asin sa pangaran ko bubunyagan nindo sinda.

24 Asin ngonian magdangog, iyo ini an manga tataramon na isasabi nindo, apodon sinda sa saindang pangaran, sabihon:

25 Sa pagkaigwa nin kapangyarihan na itinao sakuya ni Jesu-Cristo, binubunyagan ko ika sa pangaran kan Ama, asin kan Aki, asin kan Espiritu Santo. Amen.

26 Asin saka nindo ilubog sinda sa tubig, asin hawason giraray sa tubig.

27 Asin sa siring na paagi kamo magbubunyag sa sakuyang pangaran; huli nanggad, totoo sinasabi ko sa saindo, na an Ama, asin an Aki, asin an Espiritu Santo saro; asin Ako nasa Ama asin an Ama nasa sakuya, asin an Ama asin ako saro.

28 Asin sunod sa sakuyang pinagboot sa saindo sa siring kamo magbubunyag. Asin kamo dai magkakaigwa nin pagpasuruhay, siring sa manga nakaagi; ni kamo magkakaigwa nin pagpasuruhay manunungod sa ano man sa sakuyang doktrina, siring kan nakaagi.

29 Huli totoo, totoo sakuyang sinasabi sa saindo, siya na igwa kan espiritu nin pagpasuruhay bako sakuya, kundi sa demonio, na iyo an ama kan pagpasuruhay, asin saiyang binubukag an manga puso nin manga tawo tanganing magpasuruhay-suhay na igwang kaanggotan, saro laban sa saro.

30 Totoo, bako ini an sakuyang doktrina na bukagon nin kaanggotan an manga puso nin manga tawo, saro laban sa saro; alagad iyo ini an sakuyang doktrina, na an manga bagay na ini mahali.

31 Magdangog, totoo, totoo, sakuyang sinasabi sa saindo, sakuyang ipapahayag sa saindo an sakuyang doktrina.

32 Asin iyo ini an sakuyang doktrina, asin iyo ini an doktrina na itinao kan Ama sa sakuya; asin ako nagpapatotoo kan Ama, asin an Ama nagpapatotoo sakuya, asin an Espiritu Santo nagpapatotoo kan Ama asin sa sakuya; asin ako nagpapatotoo na an Ama pinagbotan an gabos na tawo, sain man, na magsorolsol asin magturubod sa sakuya.

33 Asin an siisay man na magtubod sakuya, asin nagpabunyag, iyo man an makakaligtas; asin sinda iyo idto an mapanurunod kan kahadean kan Dios.

34 Asin an siisay man an dai magtubod sakuya asin dai mabunyagan, mapapadusahan.

35 Totoo, totoo, sakuyang sinasabi sa saindo, iyo ini an sakuyang doktrina, asin ako nagpapatotoo kaini hali sa Ama; asin an siisay man na nagtutubod sakuya nagtutubod man sa Ama; asin sa saiya magpapatotoo an Ama sakuya, huli ta siya madalaw saiya na igwang kalayo asin kaibahan an Espiritu Santo.

36 Asin sa siring an Ama magpapatotoo sakuya, asin an Espiritu Santo magpapatotoo sa saiya kan Ama asin sakuya; huli ta an Ama, asin Ako, asin an Espiritu Santo saro.

37 Asin giraray sakuyang sinasabi sa saindo, kaipuhan kamo na magsorolsol, asin maging siring sa sadit na aki, asin magpaburunyag sa sakuyang pangaran, o sa ano man dai nanggad nindo makukua an manga bagay na ini.

38 Asin sa giraray sakuyang sinasabi sa saindo, kaipuhan na kamo magsorolsol, asin magpaburunyag sa sakuyang pangaran, asin maging siring sa sadit na aki o sa ano man dai nanggad nindo mapapanunod an kahadean kan Dios.

39 Totoo, totoo, sakuyang sinasabi sa saindo, na iyo ini an sakuyang doktrina, asin an siisay man na magpatindog sa ibabaw kaini nagpapatindog sa ibabaw kan sakuyang gapo, asin an pintoan kan impiyerno dai magdadanay laban sa sainda.

40 Asin an siisay man na magpahayag nin labi o kulang kaini, asin ibugtak idto bilang sakuyang doktrina, an siring hali sa karaotan, asin dai nakatindog sa sakuyang gapo; alagad siya nagpapatindog sa baybay na pasikadan; asin an pintoan kan impiyerno nakabukas tanganing palaogon an siring kun umabot an manga baha asin an manga duros paghampakon sinda.

41 Kaya, paduruman sa manga tawong ini, asin ibalangibog an manga tataramon na sakuyang sinabi, sagkod sa manga kasagkuran kan kinaban.