1 Asin dangan idtong nakasurat mauutob na: Magkanta ka, O baog, ika na dai nag-aki; magkanta asin magkurahaw nin makusog, ika na dai nakamati nin pangaki; huli ta orog na dakol an manga aki kan manga baog ki kan manga aki kan manga babae na may agom sabi kan Kagurangnan.

2 Pahiwasa an laog kan saimong tolda, asin biklada an manga dingding kan saimong manga erokan; dai ka mag-imot, unata an saimong manga lubid asin pakusoga an saimong manga tukod;

3 Huli ta ika magdadakol sa toong kamot asin sa wala, asin an saimong ibubunga manununod kan manga Gentil asin gigibohon an pinabayaan na manga siudad na maeerokan.

4 Hari matakot, ta dai ka masusupog; ni mariribong, huli ta dai ka man susupogon; huli ta malilingawan mo an kasupogan kan saimong pagkaaki, asin dai marurumdoman an manga pagsudya kan saimong pagkaaki, asin ta dai na marurumdoman an pagsudya kan saimong pagkabalo sagkod pa man.

5 Huli ta an saimong kaggibo, an saimong agom, an Kagurangnan nin manga Hukbo an saiyang pangaran; asin an saimong Paratubos, an Banal kan Israel—an Dios kan gabos na kinaban siya aapodon.

6 Huli ta inapod ika kan Kagurangnan nin siring sa babaeng pinabayaan asin nagmumundo sa espiritu, asin sarong agom, na babae na hoben kan ika isikwal, sabi kan saimong Dios.

7 Sa kadikit na panahon ika sakuyang pinabayaan, alagad sa dakulang pagkaherak sakuyang titiripunon kamo.

8 Sa dikit na pagkaanggot sakuyang itinago an sakuyang lalawgon sa saimo sa dikit na panahon, alagad ta sa daing-kasagkuran na pagkabuot magkakaigwa ako nin pagkaherak saimo sabi kan Kagurangnan na saimong Paratubos.

9 Huli kaini, an manga tubig ni Noe sa sakuya, huli na siring sa sakuyang isinumpa na an manga tubig ni Noe dai na makakalantop sa daga, siring man sakuyang isinumpa na dai na ako maaanggot sa saimo.

10 Huli ta an manga bulod magkakaturupag asin an manga bunton magkakawarara, alagad an sakuyang pagkabuot dai masuhay saimo, ni an tipan kan sakuyang katuninongan hahalion, sabi kan Kagurangnan na igwang pagkaherak sa saimo.

11 O ika na nasasakitan, na pinapadpad nin bagyo, asin dai nararanga! Hilinga, sakuyang bubugtakan an saimong manga gapo nin magagayon na manga kolor, asin bubugtakan an saindong pasisikadan nin manga sapiro.

12 Asin sakuyang gigibohon an saimong manga bintana nin agata, asin an saindong manga trangkahan nin karbungko, asin an saimong manga pagdulonan nin magayon na manga gapo.

13 Asin an saimong gabos na manga aki tutukdoan kan Kagurangnan; asin dakula an magiging katuninongan kan saimong manga aki.

14 Sa katanusan ika papatindogon; magigi kang harayo sa manga pag-uusig huli ta dai ka matatakot, asin sa manga nakakasindak huli ta dai ini makakarani sa saimo.

15 Totoo, na sinda magtitiripon nanggad laban saimo, bako sa paagi ko; an siisay man na magtitiripon na laban saimo madadaog huli sa saimo.

16 Totoo, sakuyang linalang an panday na naghahayop kan manga baga sa kalayo, asin na nagdadara nin kasangkapan para sa saiyang ginigibo; asin sakuyang linalang an tagaratak para magraot.

17 Daing armas na ginibo laban saimo na magana; asin an lambang dila na magtutuya-tuya saimo sa paghukom saimong isusumpa. Iyo ini an panundon kan manga surogoon kan Kagurangnan, asin an saindang katanusan nasa sakuya, sabi kan Kagurangnan.