1 Asin ngonian uminagi an panahon na kan si Jesus makapaitaas na sa kalangitan, an katiripunan nagsurusiriblag, asin lambang lalaki kinua an saiyang agom na babae asin an saiyang manga aki asin nagpuruli na sa saindang sadiring harong.

2 Asin idto nakalakop tulos sa manga tawo, bago idto magdiklom, na an katiripunan nahiling si Jesus, asin na siya naglingkod sa sainda, asin ta siya magpapahiling pa sa katiripunan sa pagkaaga.

3 Iyo, asin sa bilog na banggi nakalakop an manunungod ki Jesus; asin ta sinda nagsurugo sa kadakol na manga tawo, iyo, ta labi-labi kadakol an bilang, an nagpagal nin labi-labi sa bilog na banggi, tanganing sa pagkaaga sinda duman na sa lugar na kun sain si Jesus magpapahiling kan saiyang sadiri sa katiripunan.

4 Asin ta uminagi an panahon na kan pagkaaga, kan an manga tawo nagkatiripon na, totoo, si Nephi asin an saiyang tugang na lalaki na saiyang binuhay sa pagkagadan, na an pangaran Timoteo, asin man an saiyang aki, na an pangaran Jonas, asin man si Mathoni, asin si Mathonihah, an saiyang tugang na lalaki, asin si Kumen, asin si Kumenonhi, asin si Jeremias, asin si Shemnon, asin si Jonas, asin si Sedecias, asin si Isaias—ngonian iyo ini an manga pangaran kan manga disipulos na pinili ni Jesus—asin ta uminagi an panahon na sinda nagpaduruman asin nagtirindog sa tahaw kan katiripunan.

5 Asin totoo, an katiripunan labi kadakol kaya saindang giniribo na pagsiriblagon sa doseng grupo.

6 Asin an dose tinukdoan an katiripunan; asin totoo; saindang pinaruluhod an katiripunan sa daga, asin nagpamiribi sa Ama sa pangaran ni Jesus.

7 Asin an manga disipulos nagpamiribi sa Ama sa pangaran man ni Jesus. Asin uminagi an panahon na sinda nagtirindog asin nagrilingkod sa manga tawo.

8 Asin kan sinda makapagtao kan siring na manga tataramon na sinabi ni Jesus—daing napalaen sa manga tataramon sa sinabi ni Jesus—totoo, sinda nagruluhod giraray asin nagpamiribi sa Ama sa pangaran ni Jesus.

9 Asin sinda nagpamiribi kan saindang tunay na minamarawot; asin sinda nagmarawot na an Espiritu Santo maitao sa sainda.

10 Asin kan sinda makapamiribi nin siring sinda nagbaba sa may pampang kan tubig, asin an katiripunan nagsurunod sainda.

11 Asin ta uminagi an panahon na si Nephi nagbaba sa tubig asin nagpabunyag.

12 Asin siya nagbangon hali sa tubig asin nagpoon na magbunyag. Asin saiyang binunyagan idto gabos na pinili ni Jesus.

13 Asin ta uminagi an panahon kan sinda gabos maburunyagan asin magharawas sa tubig, an Espiritu Santo uminabot sa sainda asin sinda nagkaparano kan Espiritu Santo asin nin kalayo.

14 Asin bigla sindang naparilibotan nin garo kalayo; asin ta hali idto sa langit, asin an katiripunan nahiling idto asin nagpatotoo kaidto; asin an manga anghel nagbaraba hali sa langit asin nagrilingkod sa sainda.

15 Asin ta uminagi an panahon na mantang an manga anghel nagririlingkod sa manga disipulos, totoo, si Jesus uminabot asin tuminindog sa tahaw asin naglingkod sa sainda.

16 Asin ta uminagi an panahon na siya nagtaram sa katiripunan, asin nagboot na sinda magruluhod giraray sa daga, asin man na an saiyang manga disipulos magruluhod man sa daga.

17 Asin ta uminagi an panahon na kan sinda gabos nakaruluhod na sa daga, saiyang pinagbotan an saiyang manga disipulos na sinda magpamiribi.

18 Asin hilinga, sinda nagpoon na magpamiribi; asin sinda nagpamiribi ki Jesus, inaapod siya na saindang Kagurangnan asin saindang Dios.

19 Asin ta uminagi an panahon na si Jesus naghali sa katahawan ninda, asin nagduman sa huruharayo sa sainda asin idinuko an saiyang sadiri sa daga, asin siya nagsabi:

20 Ama, ako nagpapasalamat sa saimo na saimong itinao an Espiritu Santo sa manga ini na sakuyang pinili; asin ta ini huli sa saindang pagtubod sa sakuya na sakuyang pinili sinda na mapalaen sa mundo.

21 Ama, sakuyang ipinapamibi saimo na saimong itao an Espiritu Santo sa gabos sainda na magtuturubod sa saindang manga tataramon.

22 Ama, saimong itinao sa sainda an Espiritu Santo huli ta sinda nagturubod sa sakuya; asin saimong nahihiling na sinda nagtuturubod sa sakuya huli ta saimong nadadangog sinda, asin sinda nagpapamiribi sa sakuya; asin sinda nagpamiribi sa sakuya huli ta kaibahan ako ninda.

23 Asin ngonian Ama, sakuyang ipinapamibi sa saimo sinda, asin man an gabos na magtuturubod sa saindang manga tataramon, tanganing sinda magturubod sa sakuya, tanganing ako mapasainda siring na ika, Ama, nasa sakuya, tanganing kita maging saro.

24 Asin ta uminagi an panahon na kan si Jesus makapamibi na nin siring sa Ama, siya nagpaduman sa saiyang manga disipulos, asin totoo, sinda nagpadagos pa, daing pag-ontok, sa pagpamibi sa saiya; asin dai sinda nagpaulit-ulit nin manga tataramon, huli ta sainda itinao kun ano an saindang ipapamiribi, asin ta napano sinda nin pagmawot.

25 Asin ta uminagi an panahon na si Jesus benendisionan sinda mantang sinda nagpapamiribi sa saiya; asin an saiyang lalawgon nag-oogma sa sainda, asin an liwanag kan saiyang lalawgon nagsinag sa sainda, asin totoo sinda naging maputi na siring sa kaputian kan lalawgon asin man kan manga gubing ni Jesus; asin totoo na an kaputian kaidto orog pa sa arin man na kaputian, iyo, ta daing ano man sa ibabaw kan daga na labi kaputi na siring kan kaputian kaidto.

26 Asin si Jesus nagsabi sa sainda: Magpadagos sa pagpamibi; asin ta sinda dai nag-ontok sa pagpamibi.

27 Asin ta siya tuminalikod sa sainda giraray, asin ta huminarayo nin kadikit asin idinuko an saiyang sadiri sa daga; asin siya nagpamibi giraray sa Ama, na an sabi:

28 Ama, ako nagpapasalamat sa saimo na saimong ginibong dalisay idtong sakuyang manga pinili, huli sa saindang pagtubod, asin sakuyang ipinapamibi sinda, asin man sinda na manga magtuturubod sa saindang manga tataramon, na sinda magi man na dalisay sa sakuya, sa paagi kan pagtubod sa saindang manga tataramon, siring sa sinda naging dalisay sa sakuya.

29 Ama, ako namimibi bako para sa mundo, kundi para kaidtong saimong manga itinao sakuya hali sa mundo, huli sa saindang pagtubod, tanganing magi sindang dalisay sa sakuya, tanganing ako mapasainda man siring na ika, Ama, uya sa sakuya, tanganing kita maging saro, tanganing ako mapamuraway sa sainda.

30 Asin kan si Jesus makapagtaram kaining manga tataramon na ini siya nagrani giraray sa saiyang manga disipulos; asin totoo na sinda padagos na nagpapamiribi, na maigot na dai nag-oontok sa saiya; asin siya naggidom sa sainda giraray; asin totoo sinda mapuputi, na siring ki Jesus.

31 Asin ta uminagi an panahon na siya nagharayo giraray nin kadikit asin nagpamibi sa Ama;

32 Asin an dila dai makataram kan manga tataramon na saiyang ipinamibi, ni maisurat nin manga tawo an manga tataramon na saiyang ipinamibi.

33 Asin an katiripunan nakadangog asin nagpapatotoo; asin an saindang manga puso bukas asin ta saindang nasabutan sa saindang manga puso an manga tataramon na saiyang ipinamibi.

34 Alagad, kadakula asin makangalas an manga tataramon na saiyang ipinamibi na dai an manga idto maisurat, ni idto maitaram nin siisay man na tawo.

35 Asin ta uminagi an panahon na kan si Jesus makatapos na kan pagpamibi siya nagrani giraray sa manga disipulos, asin nagsabi sa sainda: Siring na kadakula na pagtubod dai ko lamang nahiling sa gabos na manga Judio; kaya ako dai sainda makapahiling nin kadakulang manga milagro, huli sa saindang dai pagtubod.

36 Totoo sakuyang sinasabi sa saindo, dai sa sainda na nakahiling nin kadarakulang manga bagay siring sa saindong nahiling; ni sinda nakadangog nin kadarakulang manga bagay na siring sa saindong nadangog.