1 Asin totoo sakuyang sinasabi sa saindo, sakuyang tatawan kamo nin tanda, tanganing saindong maaraman an panahon na kun nuarin an manga bagay na ini maabot—na sakuyang titiripunon ini, hali sa haloy na nindang pagkawaragas, an sakuyang manga tawo, O harong kan Israel, asin patitindugon giraray sa sainda an sakuyang Zion;

2 Asin totoo, iyo ini an bagay na sakuyang itatao sa saindo bilang tanda—huli ta totoo sakuyang sinasabi sa saindo na kun an manga bagay na sakuyang ipinahayag sa saindo, asin an sakuyang manga ipapahayag magpoon ngonian sa sakuyang sadiri, asin sa paagi kan kapangyarihan kan Espiritu Santo na itatao sa saindo kan Ama, ipapabatid sa manga Gentil tanganing sinda makaaram kan manunungod sa manga tawong ini na manga tada kan harong ni Jacob, asin manunungod kaining sakuyang manga tawo na iwawaragas ninda;

3 Totoo, totoo, sakuyang sinasabi sa saindo, na kun an manga bagay na ini ipaaram na sainda kan Ama, asin umabot hali sa Ama, hali sainda pasiring sa saindo;

4 Huli ta kadunungan sa Ama na sinda ibugtak sa dagang ini, asin itindog bilang sarong tiwasay na katawohan sa paagi kan kapangyarihan kan Ama, na an manga bagay na ini umabot hali sa sainda pasiring sa natada kan saimong bunga, tanganing an tipan kan Ama na saiyang ipinakipagtipan sa saiyang manga tawo tibaad mautob na, O harong kan Israel;

5 Kaya, kun an manga gibong ini asin an manga gibo na gigibohon sa saindong katiripunan magpoon ngonian maghahali sa manga Gentil, pasiring sa saindong bunga na diit-diit na magrarayo sa pagtubod huli sa kasumbikalan;

6 Huli sa siring minarahay kan Ama na idto maghali sa manga Gentil, tanganing saiyang maipahiling an saiyang kapangyarihan sa manga Gentil, huli ta sa dahilan na ini na an manga Gentil, kun dai ninda pagpapatagason an saindang manga puso, na sinda makapagsolsol asin magdulok sa sakuya asin magpaburunyag sa sakuyang pangaran asin makaaram kan tunay na manga punto kan sakuyang doktrina, tanganing sinda tibaad mabilang sa sakuyang manga tawo, O harong kan Israel;

7 Asin kun an manga bagay na ini umagi na na an saindong manga bunga magpoon nang makaaram kan manga bagay na ini—ini magiging sarong tanda sa sainda, na tanganing sinda makaaram na an gibo kan Ama nagpoon na sa pag-utob kan tipan na saiyang ginibo sa manga tawo kan harong kan Israel.

8 Asin sa pag-abot kan aldaw na iyan maagi an panahon na an manga hadi ititikom an saindang manga nguso; huli ta an manga bagay na dai pa isinabi sa sainda saindang mahihiling; asin idtong dai pa ninda nadadangog saindang paghohorop-horopon.

9 Huli ta sa aldaw na iyan, huli sa sakuya an Ama magibo nin gibo, sarong kadakula asin makangalas na gibo sa sainda; asin igwa sa sainda na dai maturubod kaini, maski ipapahayag na idto nin sarong tawo sa sainda.

10 Alagad totoo, an buhay kan sakuyang surogoon mapapasa sakuyang kamot; kaya dai siya ninda kukulogan, alagad siya mararaot huli sa sainda. Alagad sakuyang bubulongon siya, huli ta sakuyang ipapahiling sa sainda na an sakuyang kadunungan orog pa sa katusohan kan demonio.

11 Kaya maagi an panahon na an siisay man na dai magtubod sa sakuyang manga tataramon, na ako si Jesu-Cristo, na papangyarihon kan Ama na siya darahon sa manga Gentil, asin tatawan siya nin kapangyarihan na darahon sinda sa manga Gentil, (ini mangyayari siring sa sinabi ni Moises) sinda hahalion sa sakuyang manga tawo na kairiba sa tipan.

12 Asin an sakuyang manga tawo na natada ni Jacob makakaiba sa manga Gentil, iyo, sa saindang katahawan siring sa sarong ugbon na leon na nasa katiripunan nin manga hayop sa kadlagan, siring sa ugbon na leon sa manga grupo nin manga karnero, na siya kun magpaduman giginikan asin rurutangon na maging pino, asin dai nin makakapagligtas.

13 An saindang kamot ibibikyaw sa saindang manga kaiwal, asin an gabos nindang manga kaiwal magkakagaradan.

14 Iyo, herak man kan manga Gentil sagkod na sinda magsorolsol; huli ta maagi an panahon na sa aldaw na iyan, sabi kan Ama, sakuyang hahalion an saindong manga kabayo sa saindong katahawan asin sakuyang ipapagaba an saindong manga lulunadan;

15 Sakuyang raraoton an manga banwaan kan saindong daga, asin sakuyang gagabaon an gabos nindong pakusog.

16 Asin sakuyang raraoton an manga parakaraw sa saindong daga, asin mahahalian kamo nin manga parahula;

17 An saindong inukit na manga imahen, sakuyang raraoton man, asin an saindong nagtitirindog na manga imahen sa tahaw nindo, asin dai na kamo magsasamba kan manga ginibo kan saindong manga kamot;

18 Asin sakuyang gagaraboton an saindong manga kahoy sa tahaw nindo; siring kaini an sakuyang paggaba kan saindong manga banwaan.

19 Asin ta maagi an panahon na an gabos na manga pagputik, asin manga pagdaya, asin manga pag-uri, asin manga pag-iriwal, asin an manga bakong tunay na pagkapadi, asin manga karaksotan, hahalion.

20 Huli ta maagi an panahon, sabi kan Ama, na sa aldaw na iyan an siisay man na dai magsolsol asin magdulok sa sakuyang Padangat na Aki, sinda sakuyang isisiblag sa sakuyang manga tawo, O harong kan Israel.

21 Asin ako magibo nin pagbalos asin makangurungirhat na kaanggotan sa sainda na siring kan sa manga dai nagtutubod ki Cristo, siring sa dai pa ninda nadangog.

22 Alagad kun sinda magsorolsol asin magdarangog sa sakuyang manga tataramon, asin dai magpataragas kan saindang manga puso, sakuyang papatindogon an sakuyang simbahan sa sainda, asin sinda makakalaog sa tipan asin mabibilang sa manga natada ni Jacob, na kun kiisay sakuyang itinao ining daga para sa saindang panunod;

23 Asin saindang tatabangan an sakuyang manga tawo, na natada ni Jacob, asin man kun gurano kadakol kan manga nasa harong kan Israel an umabot tanganing sinda makapatindog nin sarong siudad, na aapodon na Bagong Jerusalem.

24 Asin dangan sinda matabang sa sakuyang manga tawo tanganing sinda magkatiripon, na nagkawaragas sa ibabaw kan gabos na daga, sa Bagong Jerusalem.

25 Asin dangan an kapangyarihan kan langit maabot sa sainda; asin ta ako man masatahaw.

26 Asin dangan an gibo kan Ama mapoon sa aldaw na iyan, sa panahon na an ebangheliong ini maibalangibog sa katiripunan kan natada kan manga tawong ini. Totoo sakuyang sinasabi sa saindo, sa aldaw na iyan an gibo kan Ama mapoon na sa gabos na nagkawaragas na sakuyang manga tawo, iyo, sagkod sa manga tribo na nawara, na irinayo kan Ama paluwas sa Jerusalem.

27 Iyo, an gibo mapoon sa gabos na nagkawaragas na sakuyang manga tawo, kaibahan an Ama na mahanda kan dalan na kun sain sinda makakadulok sa sakuya, tanganing sinda makaapod sa Ama sa sakuyang pangaran.

28 Iyo, asin dangan na an gibo mapoon, kaibahan an Ama sa katiripunan kan gabos na manga nasion sa paghanda kan dalan na kun sain an saiyang manga tawo makapagtiripon papuli sa daga na saindang panunod.

29 Asin sinda maluwas hali sa gabos na manga nasion; asin ta sinda dai maluwas na naghihiridali, ni maghali na nagdudurulag, huli ta ako an manginginotan sainda, sabi kan Ama, asin ta ako an saindang bantay sa likod.