1 Asin ta uminagi an panahon na kan an manga disipulos ni Jesus nagraralakaw asin naghuhurulit kan manga bagay na saindang nadangog asin nahiling, asin nagbuburunyag sa pangaran ni Jesus, uminagi an panahon na an manga disipulos nagtiripon asin nagkasararo sa makusog na pagpamibi asin pag-ayuno.

2 Asin si Jesus nagpahiling giraray sa sainda, huli ta sinda nagpapamibi sa Ama sa saiyang pangaran; asin si Jesus uminabot asin tuminindog sa katahawan ninda, asin nagsabi sainda: Ano an boot nindo na sakuyang itao saindo?

3 Asin sinda nagsabi sa saiya: Kagurangnan, boot niamo na saimong sabihon samuya kun anong pangaran an samuyang iaapod sa simbahan na ini; huli ta igwang pagpasuruhay an manga tawo manunungod sa bagay na ini.

4 Asin an Kagurangnan nagsabi sa sainda: Totoo, totoo, sakuyang sinasabi sa saindo, ngata daw ta an manga tawo kaipuhan na magngurob-ngurob asin magpasuruhay huli sa bagay na ini?

5 Dai daw ninda nabasa an banal na kasuratan, na nagsasabi na kamo kaipuhan na darahon nindo an pangaran ni Cristo, na iyo an sakuyang pangaran? Huli ta sa pangaran na ini kamo aarapodon sa huring aldaw.

6 An siisay man na magdara kan sakuyang pangaran, asin magtagal sagkod sa katapusan, an siring iyo an makakaligtas sa huring aldaw.

7 Kaya, ano man an saindong giribohon, saindong giribohon sa sakuyang pangaran; kaya saindong aapodon an simbahan sa sakuyang pangaran; asin saindong aapodon an Ama sa sakuyang pangaran; tanganing saiyang bendisionan an simbahan huli sa sakuya.

8 Asin paano idto magiging sakuyang simbahan kun idto dai aapodon sa sakuyang pangaran? Huli ta kun an sarong simbahan aapodon sa pangaran ni Moises iyan simbahan ni Moises; o kun iyan aapodon sa pangaran nin sarong tawo iyan simbahan nin sarong tawo; alagad kun idto aapodon sa sakuyang pangaran idto sakuyang simbahan, kun mangyari na sinda nakapatindog sa sakuyang ebanghelio.

9 Totoo sakuyang sinasabi sa saindo, na kamo nakapatindog sa sakuyang ebanghelio; kaya saindong aapodon an ano man na manga bagay na inaapod nindo, sa sakuyang pangaran; kaya kun kamo nag-aapod sa Ama, para sa simbahan, kun idto sa sakuyang pangaran dadangogon kamo kan Ama;

10 Asin kun idto mangyari na an simbahan nakapatindog sa sakuyang ebanghelio saka ipapahiling kan Ama an saiyang manga sadiring gibo duman.

11 Alagad kun dai idto nakapatindog sa sakuyang ebanghelio, asin nakapatindog sa manga gibo nin tawo, o sa manga gibo kan demonio, totoo sakuyang sinasabi sa saindo sinda igwang kaogmahan sa saindang manga gibo sa diit na panahon, asin taod-taod an katapusan maabot, asin sinda papaludon asin isusugba sa kalayo, kun sain dai nang makakabalik.

12 Huli ta an saindang manga gibo magsusunod sa sainda, huli ta idto huli sa saindang manga gibo kaya sinda pinalod; kaya rumdomon an manga bagay na sakuyang sinabi sa saindo.

13 Totoo sakuyang itinao sa saindo an sakuyang ebanghelio, asin iyo ini an ebanghelio na sakuyang itinao sa saindo—na ako nagpadigdi sa mundo na gibohon an kapagbotan kan sakuyang Ama, huli ta an Ama sinugo ako.

14 Asin an sakuyang Ama sinugo ako tanganing ako maiitaas sa krus; asin pagkatapos na ako itinaas sa krus, tanganing sakuyang madara an gabos na manga tawo sa sakuya, na kun paano ako itinaas kan manga tawo siring man an manga tawo ibabangon kan Ama, tanganing tumindog sa sakuyang atubangan, tanganing hukoman kan saindang manga giniribo, maging an manga idto mararahay o maging an manga idto mararaot—

15 Asin sa dahilan na ini kaya ako itinaas; kaya, sunod sa kapangyarihan kan Ama sakuyang madadara an gabos na manga tawo sa sakuya, tanganing sinda hukoman sunod sa saindang manga giniribo.

16 Asin ta maagi an panahon, na an siisay man na magsolsol asin magpabunyag sa sakuyang pangaran mapapano; asin kun siya makatagal sagkod sa katapusan, totoo, siya mahahalian nin sala sa atubangan kan sakuyang Ama sa aldaw na ako matindog tanganing hukoman an mundo.

17 Asin siya na dai makatagal sagkod sa katapusan, siya iyo man an papaludon asin isusugba sa kalayo, na kun sain dai na sinda makakabalik, huli sa kapantayan kan Ama.

18 Asin iyo ini an tataramon na saiyang itinao sa manga aki nin tawo. Asin huli sa dahilan na ini saiyang inutob an manga tataramon na saiyang itinao, asin siya dai nagpuputik, alagad inuutob an gabos niyang manga tataramon.

19 Asin daing maating bagay na makakalaog sa saiyang kahadean; kaya daing makakalaog sa saiyang kapahingaloan kundi idtong naghugas kan saindang manga gubing sa sakuyang dugo, huli kan saindang pagtubod, asin an pagsolsol kan gabos nindang manga kasalan, asin kan saindang dayupot na pagtubod sagkod sa katapusan.

20 Ngonian iyo ini an katugonan: Magsolsol, kamo gabos na manga kasagkuran kan kinaban, asin padigdi sa sako asin magpaburunyag sa sakuyang pangaran, tanganing kamo mapabanal sa pag-ako kan Espiritu Santo, tanganing kamo makatirindog na daing digta sa sakuyang atubangan sa huring aldaw.

21 Totoo, totoo, sakuyang sinasabi sa saindo, iyo ini an sakuyang ebanghelio; asin saindong aram an manga bagay na saindong kaipuhan na gibohon sa sakuyang simbahan; huli ta an manga gibo na saindong nahiling na sakuyang ginibo iyan iyo man an saindong gibohon; huli idtong saindong nahiling na sakuyang ginibo siring man an saindong gibohon;

22 Kaya, kun saindong gigibohon an manga bagay na ini paladan kamo, huli ta kamo iiitaas sa huring aldaw.

23 Isurat an manga bagay na saindong nahiling asin nadangog, apuera kaidtong ipinangangalad.

24 Isurat an manga gibo kan manga tawong ini, na mangyayari, siring kan manga nakasurat na, kan kaidtong nangyari na.

25 Huli totoo, sa manga libro na naisurat na, asin sa manga isusurat pa, an manga tawong ini huhukoman, huli ta sa paagi kan manga idto an saindang manga gibo mahahayag sa manga tawo.

26 Asin totoo, an gabos na manga bagay isinusurat kan Ama; kaya duman sa manga libro na isusurat an mundo huhukoman.

27 Asin aramon nindo na kamo magiging manga hukom kan manga tawo na ini, susog sa paghukom na sakuyang itatao sa saindo, na magiging pantay. Kaya anong kamugtakan nin tawo kaipuhan na magi kamo? Totoo sinasabi ko sa saindo, siring sa sakuya.

28 Asin ngonian ako maduman na sa Ama. Asin totoo sakuyang sinasabi sa saindo, ano man na manga bagay na saindong hagadon sa Ama sa sakuyang pangaran itatao sa saindo.

29 Kaya, humagad, asin ta ika tatawan; tumuktok, asin ta idto bubuksan sa saimo; huli ta siya na naghahagad, tinatawan; asin ta sa saiya na nagtutuktok, idto binubuksan.

30 Asin ngonian, totoo, an sakuyang kaogmahan dakula, sagkod sa kabilogan, huli sa saindo, asin man sa kapagarakian na ini; iyo, asin sagkod an Ama naoogma, asin man an gabos na manga anghel, huli sa saindo asin sa kapagarakian na ini; huli ta dai sa sainda na mawawara.

31 Magdangog, sakuyang minamawot na kamo makasabot; huli ta an sakuyang boot sabihon idtong sa ngonian na nabubuhay sa kapagarakian na ini; asin ta dai sa sainda na mawawara; asin sa sainda bilog an sakuyang kaogmahan.

32 Alagad totoo, sakuyang ikinamumundo huli sa ika-apat na kapagarakian poon sa kapagarakian na ini, huli ta sinda dinara paharayo na bihag niya, siring na iyo an aki kan impiyerno; huli ta ako saindang ipapabakal sa pirak asin sa bulawan, asin sa kun ano an binubukbok asin idtong malalaog nin manga mahabon asin nahahabon. Asin sa aldaw na iyan sakuyang dadalawon sinda, sagkod sa pagbalik kan saindang manga gibo sa saindang sadiring manga payo.

33 Asin ta uminagi an panahon na kan si Jesus makatapos na kan manga tataramon na ini siya nagsabi sa saiyang manga disipulos: Lumaog kamo sa piot na pintoan; huli ta piot an pintoan, asin hayakpit an dalan pasiring sa buhay, asin ta diit an nakakakua kaidto; alagad mahiwas an pintoan, asin halakbang an dalan na pasiring sa kagadanan, asin dakol an nagraralakaw duman, sagkod uminabot an banggi, na kun sain dai na nin tawo na makakapaggibo.