1 Asin ngonian ta uminagi an panahon na kan si Jesus makapagtaram na kan manga bagay na ini saiyang ipinaliwanag sa manga katiripunan; asin saiyang ipinaliwanag an gabos na manga bagay sa sainda, dakula man asin sadit.

2 Asin saiyang sinabi: Ining manga banal na kasuratan na dai pa sa saindo, an Ama nagboot na sakuyang itao sa saindo; huli ta idto kadunungan sa saiya na ini maitao sa maabot na manga kapagarakian.

3 Asin saiyang ipinaliwanag an gabos na manga bagay, magpoon sa kapinonan sagkod sa panahon na siya mag-abot sa saiyang kamurawayan iyo—sagkod an gabos na manga bagay na maarabot sa ibabaw kan daga, sagkod na an manga elemento magkakaturunaw sa makusog na init, asin an daga magkarulukot na siring sa rolyo, asin an kalangitan asin an kinaban matapos na;

4 Asin sagkod sa dakula asin huring aldaw, kun an gabos na manga tawo, asin an gabos na manga rasa, asin manga nasion asin an gabos na manga dila matirindog na sa atubangan kan Dios, tanganing hukoman kan saindang manga ginibo, kun an manga idto mararahay o kun an manga idto mararaot—

5 Kun an manga idto mararahay, sa pagkabuhay-liwat nin daing-kasagkuran na buhay, asin kun an manga idto mararaot, sa pagkabuhay-liwat nin makuring padusa; bilang magkatampad, an saro sa sarong kamot asin an saro man sa ibong na kamot, sunod sa pagkaherak, asin kapantayan, asin an kabanalan na nasa ki Cristo, na iyo siya bago an mundo nagpoon.

6 Asin ngonian dai maisusurat sa librong ini maski an sarong kabtang nin sarong gatos kan manga bagay na totoong itinukdo ni Jesus sa manga tawo;

7 Alagad totoo na sa plake ni Nephi napapalaman an orog na dakula na manga kabtang kan manga bagay na saiyang itinukdo sa manga tawo.

8 Asin ining manga bagay na sakuyang isinurat, na orog na sadit na kabtang kan manga bagay na saiyang itinukdo sa manga tawo; asin sakuyang isinurat an manga ini sa katuyohan na madara an manga ini giraray sa manga tawong ini, maghali sa manga Gentil sunod sa manga tataramon na sinabi ni Jesus.

9 Asin kun saindang maako na ini, na kaipuhan na magkaigwa nguna sinda, tanganing baloon an saindang pagtubod, asin kun idto mangyari na sinda maniwala sa manga bagay na ini dangan na an darakulang manga bagay maipapahiling sa sainda.

10 Asin kun mangyari na sinda dai maniwala kan manga bagay na ini, dangan na an manga darakulang manga bagay itatago sa sainda, sa saindang pagkasumpa.

11 Totoo, sakuya na kutanang isusurat an manga idto, an gabos na nakaukit sa manga plake ni Nephi, alagad an Kagurangnan dai ini itinugot na an sabi: Sakuyang babaloon an pagtubod kan sakuyang manga tawo.

12 Kaya ako, si Mormon, nagsusurat kan manga bagay na ipinagboot sakuya kan Kagurangnan. Asin ngonian ako, si Mormon, tinatapos ko na an sakuyang manga pagtaram, asin magpapadagos nang magsurat kan manga bagay na ipinagboot sakuya.

13 Kaya, sakuyang minamawot na saindong mahiling na an Kagurangnan totoo na tinukdoan an manga tawo, sa laog nin tulong aldaw, asin pagkatapos kaidto siya danay na nagpapahiling kan saiyang sadiri sa sainda, asin danay na nagbabaak nin tinapay, asin benibendisionan idto, asin itinatao idto sa sainda.

14 Asin ta uminagi an panahon na siya nagtukdo asin naglingkod sa manga aki kan katiripunan na nasambit, asin saiyang tinurosan an saindang manga dila, asin sinda nakapagtaram sa saindang kamagurangan nin darakula asin makangangalas na manga bagay, orog pa kadakula kan saiyang ipinahayag sa manga tawo; asin saiyang tinurosan an saindang manga dila tanganing sinda makapagtaram.

15 Asin ta uminagi an panahon na pagkatapos na siya magsakat sa langit—sa ika-duwang pagpahiling kan saiyang sadiri sa sainda, asin nagpaduman sa Ama, pagkatapos na bulongon an saindang naghihirilang, asin an saindang manga pilay, asin binuksan an manga mata kan saindang manga buta asin hinali an takop sa manga talinga kan manga bungog, asin sagkod na magibo an gabos na pagpaomay sa katiripunan ninda, asin pinabangon an sarong lalaki sa pagkagadan, asin ipinahiling an saiyang kapangyarihan sa sainda, asin suminakat sa Ama—

16 Totoo, uminagi an panahon sa pagkaaga na an katiripunan nagtiripon, asin saindang nahiling asin nadangog ining manga aki; iyo, sagkod an manga umboy binuksan an saindang manga nguso asin nakapagtaram nin makangangalas na manga bagay; asin an manga bagay na saindang itinaram ipinangalad na isurat nin siisay man na tawo.

17 Asin ta uminagi an panahon na an manga disipulos na pinili ni Jesus nagpoon na magbunyag asin magtukdo sa gabos na nagdulok sa sainda magpoon kaidto; asin an gabos na nagpabunyag sa pangaran ni Jesus napano kan Espiritu Santo.

18 Asin kadakol sa sainda an nakahiling asin nakadangog nin manga bagay na dai masasambit, na bako tama na isurat.

19 Asin sinda nagtukdo asin naglingkod sa lambang saro; asin an gabos na manga bagay sadiri kan gabos, lambang tawo nakikipagkapwa nin husay sa lambang saro.

20 Asin ta uminagi an panahon na saindang ginibo an gabos na manga bagay siring sa ipinagboot sainda ni Jesus.

21 Asin sinda na nabunyagan sa pangaran ni Jesus inapod na simbahan ni Cristo.