1 Asin ta uminagi an panahon na kan si Jesus nakapagsabi kan manga tataramon na ini ki Nephi, asin sa sainda na inarapod (ngonian an bilang ninda na manga inarapod, asin nag-arako nin kapangyarihan asin kabagsikan na magbunyag, dose) asin hilinga, inunat niya an saiyang kamot sa katiripunan, asin nagtaram sa sainda, an sabi: Paladan kamo kun kamo magsurunod sa manga tataramon kaining dose na sakuyang pinirili na magrilingkod sa saindo, asin magi nindong manga surogoon; asin sa sainda sakuyang itinao an kapangyarihan tanganing magburunyag saindo nin tubig, asin pagkatapos na kamo burunyagan nin tubig, totoo, ako mabunyag saindo nin kalayo asin kan Espiritu Santo; kaya paladan kamo kun kamo magturubod sa sakuya asin magpaburunyag, pagkatapos na ako saindong mahiling asin maaraman na ako iyo ako.

2 Asin sa giraray, orog na paladan sinda na magturubod kan saindong manga tataramon huli ta kamo mapatotoo na ako nahiling nindo, asin ta saindong aram na ako iyo ako. Iyo, paladan sinda na magturubod sa saindong manga tataramon, asin bumaba sa kahiraroman nin pagpakumbaba asin magpaburunyag, huli ta sinda dadalawon nin kalayo asin kan Espiritu Santo, asin makakakua nin kapatawaran kan saindang manga kasalan.

3 Iyo, paladan an manga dukha sa espiritu na minadurulok sa sakuya, huli ta sa sainda an kahadean nin langit.

4 Asin sa giraray, paladan sinda gabos na manga nagmumurundo, huli ta sinda rarangahon.

5 Asin paladan an manga mahoyo, huli ta sinda manunurunod kan daga.

6 Asin paladan sinda gabos na manga nagugutom asin napapaha sa katanusan huli ta sinda babarasogon kan Espiritu Santo.

7 Asin paladan an manga maheherakon: huli ta sinda magkakamit nin pagkaherak.

8 Asin paladan sinda gabos na manga malilinig an puso: huli ta mahihiling ninda an Dios.

9 Asin paladan an gabos na manga parapatuninong: huli ta sinda aarapodon na manga aki kan Dios.

10 Asin paladan sinda gabos na manga pinag-uusig nin huli sa sakuyang pangaran: huli ta sainda an kahadean nin langit.

11 Asin paladan kamo kun kamo pagpakaraoton nin manga tao, asin pag-usigon, asin magtaram nin manlaen-laen na karaotan laban saindo na putik, huli sa sakuya;

12 Huli ta kamo magkakaigwa nin dakulang kaogmahan asin mag-oogma nin labi-labi; huli ta dakula an balos sa saindo sa langit; huli ta labi-labi an pag-usig sa sainda na manga propeta na naenot saindo.

13 Totoo, totoo, sakuyang sasabihon sa saindo, sakuyang itinatao sa saindo na maging asin kan kinaban; alagad kun an asin mahali na an namit ano pa an pang-asin sa daga? An asin na iyan dai na nin kamugtakan, kundi itapok asin batoyan nin bitis nin manga tawo.

14 Totoo, totoo, sakuyang sinasabi sa saindo, sakuyang itinao sa saindo na maging ilaw kan manga tawong ini. An siudad na nasa bulod dai maitatago.

15 Magdangog, ano an manga tawo nag-iilaw daw nin kandila asin ibinubugtak sa irarom nin takadan? Dai, alagad sa sarong kandelero, asin iyan nagtatao nin liwanag sa gabos na nasa laog kan harong;

16 Kaya paliwanaga an saindong ilaw sa atubangan nin manga tawo; tanganing saindang mahiling an saindong manga marahay na manga gibo asin pamurawayon an saindong Ama na nasa langit.

17 Dai kamo mag-irisip na ako napadigdi tanganing maglaglag kan manga tugon o kan manga propeta. Dai ako nagdigdi na maglaglag alagad tanganing mag-utob.

18 Huli totoo sakuyang sinasabi sa saindo, daing ni saro na jota o ni sarong kurit an nahali sa katugonan, alagad sa sakuya an gabos nautob.

19 Asin magdangog, sakuyang itinao sa saindo an susundon asin an manga katugonan kan sakuyang Ama, tanganing kamo magturubod sa sakuya, asin tanganing kamo magsorolsol kan saindong manga kasalan, asin magdurulok sa sakuya na igwang nararagrag na puso asin nagmumundo na espiritu. Totoo, an manga katugonan nasa atubangan nindo, asin an susundon nautob na.

20 Kaya padigdi kamo sa sakuya tanganing kamo makaligtas; huli totoo sakuyang sinasabi sa saindo, na sagkod na kamo magsurunod kan sakuyang manga katugonan, na sakuyang pinagboot sa saindo sa panahon na ini, dai kamo sagkod pa man makakalaog sa kahadean nin langit.

21 Saindong nadangog na sinabi na ninda kan enot na panahon, asin idto nakasurat man sa saindo, na kamo dai manggadan, asin an siisay man na manggadan nasa pag-alaman kan kahatolan kan Dios.

22 Alagad sakuyang sinasabi sa saindo, na an siisay man na anggot sa saiyang tugang nasa pag-alaman kan saiyang kahatolan. Asin an siisay man na magsabi sa saiyang tugang, Raka, nasa pag-alaman kan kahatolan kan konseho; asin an siisay man na magsabi, Bua-bua ka, nasa pag-alaman kan kalayo kan impiyerno.

23 Kaya, kun ika madulok sa sakuya, o magmawot na magdulok sa sakuya, asin narumdoman mo na an saimong tugang igwang ano man na laban saimo—

24 Dumuman nguna sa saimong tugang, asin enot makipag-ulian ka sa saimong tugang asin dangan ika magdulok sa sakuya na bilog an katuyohan kan puso, asin aakoon ko ika.

25 Makipag-ulian ka tulos sa saimong kaiwal mantang pasiring pa sana kamo sa hukoman, ta tibaad sa ano man na oras kuahon ka na niya asin ilaog ka sa karsel.

26 Totoo, totoo, sakuyang sinasabi saimo, dai ka sa ano man na paagi maghali duman sagkod na dai mo nababayaran an pinakahuring senine. Asin mantang ika nasa karsel makabayad ka daw maski sarong senine? Totoo, totoo, sasabihon ko saimo, Dai.

27 Totoo, ini isinurat ninda kan enot na panahon, na dai kamo magsambay;

28 Alagad sakuyang sinasabi saindo, na an siisay man na maghiling sa sarong babae, huli sa pagkaara saiya, nagkasala na siya nin pagsambay sa saiyang puso.

29 Magdangog, sakuyang tinatawan kamo nin katugonan, na dai nindo pagpabayaan na ni saro kan manga bagay na ini lumaog sa saindong manga puso.

30 Huli ta marahay pang saindong indahan an sadiri nindo kan manga bagay na ini, na kun sain papasanon nindo an saindong krus, ki sa kamo iapon sa impiyerno.

31 Nakasurat man na an siisay man na magbulag sa saiyang agom na babae, siya kaipuhan magtao nin kasuratan sa pagbulag.

32 Totoo, totoo, sakuyang sinasabi sa saindo na an siisay man na magbulag sa saiyang agom na babae, na bako man nin huli sa karaksotan, ginigibo siyang parapasambay; asin an siisay man na mag-agom sa binulagan na babae, siya nagkakasala nin pagsambay.

33 Asin sa giraray nakasurat man, dai ka mangako nin dai mo magigibo, alagad utobon sa Kagurangnan an saindong manga pangako.

34 Alagad totoo, totoo, sakuyang sinasabi sa saindo, dai kamo nanggad magsumpa; ni sa langit, huli ta iyan an trono kan Dios;

35 Ni sa kinaban huli ta iyo ini an saiyang tungtongan;

36 Ni kamo magsumpa sa paagi kan saindong payo, huli ta dai kamo makakagibo nin ni sarong itom o puting buhok;

37 Alagad bayaan na nindo na an saindong pagtaram maging Iyo, iyo; Bako, bako; huli ta an ano man na lumabi pa kaini maraot.

38 Asin totoo, na nakasurat, mata sa mata, asin ngipon sa ngipon;

39 Alagad sakuyang sinasabi sa saindo, na dai kamo magtumang sa maraot, alagad kun siisay man an tumampa saimo sa too mong pisngi, itao mo pa saiya an sa ibong man;

40 Asin kun siisay man na tawo an magsumbong saimo sa susundon asin kuahon an saimong gubing itao mo pa an saimong alikboy;

41 Asin an siisay man an magpirit saimo na maglakaw nin sarong milya, ibahan mo siya nin makaduwa.

42 Tawan mo an naghahagad saimo, asin idtong nagsusubli saimo dai mo pagtalikodan.

43 Alagad totoo, nakasurat man, na saimong mamootan an saimong kapwa asin ikaungis an saimong kaiwal;

44 Alagad magdangog, sakuyang sinasabi sa saindo, mamootan nindo an saindong manga kaiwal, asin bendisionan idtong nagsusumpa saindo, gumibong marahay sa sainda na naanggot saindo, asin ipamibi idtong nag-uuri sa saindo asin idtong nag-uusig saindo;

45 Tanganing kamo maging manga aki kan saindong Ama na nasa langit; huli ta saiyang pinapasirang an saiyang aldaw sa manga maraot asin sa manga marahay.

46 Kaya idtong manga bagay na kan enot na panahon, na nasa irarom kan susundon, sa sakuya an gabos nautob.

47 An manga lumang bagay nahali na, asin an gabos na bagay naging bago.

48 Kaya, magi kamong daing-katuyawan na siring sa sakuya, o siring sa saindong Ama na nasa sa langit na daing-katuyawan.