1 Asin ta uminagi an panahon na an siyam na pulo may sarong taon uminagi na asin anom na gatos na taon na magpoon kan panahon kan paghali ni Lehi sa Jerusalem; asin sa taon na idto si Lachoneus an namamayo na hukom asin an gobernador kan daga.

2 Asin si Nephi na aki ni Helaman, naghali paluwas sa daga kan Zarahemla, na itinao an pamamahala sa saiyang aki na si Nephi, na saiyang pinakamatuang aking lalaki, manunungod kan manga plakeng tanso, asin an gabos na manga kasuratan na isinurat, asin idtong gabos na manga bagay na iningatan na sagrado poon kan paghali ni Lehi paluwas sa Jerusalem.

3 Saka siya naghali sa daga, asin kun sain siya nagduman, daing tawong nakakaaram; asin an saiyang aki na si Nephi pinadagos an manga kasuratan na saiyang kasalihid, iyo, an kasuratan kan saiyang manga tawo.

4 Asin ta uminagi an panahon na sa pagpoon kan ika-siyam na pulo may duwang taon, totoo, an manga propesia kan manga propeta nagpoon na mautob gabos; huli ta nagpoon nang magkaigwa nin darakulang manga tanda asin darakulang manga milagro na naginibo sa manga tawo.

5 Alagad igwang nagkapira na nagsasabi na an panahon nakaagi na para sa manga tataramon na mautob, na pinagtaram ni Samuel, an Lamanite.

6 Asin nagpoon sinda na mag-orolok sa saindang manga katugangan, an sabi: Nahiling nindo an panahon nakaagi na, asin an manga tataramon ni Samuel dai man nautob; kaya, an saindong kaogmahan asin an saindong pagturubod manunungod sa bagay na ini daing kamugtakan.

7 Asin ta uminagi an panahon na sinda naggiribo nin dakulang kariribokan sa bilog na daga; asin an manga tawo na nagturubod nagpoon na magmundo nin labi-labi, na tibaad sa ano man na paagi idtong manga bagay na sinabi na dai umabot.

8 Alagad iyo pa, sinda nagbantay nin maigot kaidtong aldaw asin kaidtong banggi asin idtong aldaw na magiging siring sa sarong aldaw na siring sa daing banggi, tanganing saindang maaraman na an saindang pagtubod dai nabasang.

9 Ngonian uminagi an panahon na igwang aldaw na itinalaga an manga dai nagtuturubod, na an gabos na nagtuturubod sa manga kapanondan na idto gagaradanon kun dai umabot an tanda, na itinao ni Samuel na propeta.

10 Ngonian uminagi an panahon na kan si Nephi, an aki ni Nephi, nahiling an kasumbikalan kan saiyang manga tawo, an saiyang puso labi-labi an kamundoan.

11 Asin ta uminagi an panahon na siya nagluwas asin idinuko niya an saiyang sadiri sa daga, asin namibi nin maigot sa saiyang Dios para sa saiyang manga tawo, iyo, idtong madali nang garadanon huli sa saindang pagturubod sa kapanondan kan saindang manga magurang.

12 Asin ta uminagi an panahon na namibi siya nin maigot sa Kagurangnan, sa bilog na aldaw na idto; asin totoo, an tingog kan Kagurangnan uminabot sa saiya, an sabi:

13 Iitaas an saimong payo asin mag-ogma ka; huli totoo, an panahon uya na, asin sa bangging ini an tanda itatao na, asin sa kaagahan maabot na ako sa mundo, tanganing ipahiling sa mundo na sakuyang uutobon an gabos na sakuyang ipinagboot na sabihon kan manga nguso kan sakuyang manga banal na propeta.

14 Totoo, ako nagpadigdi sa sadiri kong manga tawo tanganing mautob an gabos na manga bagay na sakuyang ipinaaram sa manga aki nin tawo magpoon pa kan kapinonan kan mundo, asin tanganing gibohon an boot, kan Ama asin kan Aki—kan Ama huli sa sakuya, asin kan Aki huli sa sakuyang laman. Asin totoo, an panahon uya na, asin sa bangging ini an tanda itatao na.

15 Asin ta uminagi an panahon na an manga tataramon na uminabot ki Nephi nautob, siring sa pagkasabi kan manga idto; huli totoo, na sa paglubog kan aldaw dai nagkaigwa nin kadikloman; asin an manga tawo nagpoon na magngaralas huli ta dai nagdiklom kan pag-abot kan banggi.

16 Asin igwang kadakol, na dai nagturubod kan manga tataramon kan manga propeta, na nagkaturumba sa daga asin naging garo gadan, huli ta saindang aram na an dakulang plano nin panggadan na saindang hinaranda para sa nagturubod sa manga tataramon kan manga propeta nadaog; huli ta an tanda na itinao nag-abot na.

17 Asin sinda nagpoon nang makaaram na an Aki kan Dios dai mahahaloy maabot na; iyo, sa madaling tataramon an gabos na tawo sa ibabaw kan kinaban maghali sa sulnopan sagkod sa sirangan, magin sa daga kan norte asin sa daga kan sur, labi-labi an pagngalas sagkod na sinda nagkaturumba sa daga.

18 Huli ta saindang aram na an manga propeta nagpatorotoo kan manga bagay na ini sa laog nin kadakol na manga taon, asin ta an manga tanda na itinao uya na; asin sinda nagporoon na matakot huli sa saindang kasumbikalan asin sa saindang dai pagturubod.

19 Asin ta uminagi an panahon na dai nagkaigwa nin kadikloman sa bilog na bangging idto, alagad maliwanag na siring sa udto. Asin ta uminagi an panahon na an aldaw suminirang giraray pagkaaga, susog sa dating paagi; asin saindang naaraman na iyo na idto an aldaw na an Kagurangnan mamumundag; huli sa manga tanda na itinao na.

20 Asin idto uminagi, iyo, an gabos na manga bagay, lambang sadit na bagay, sunod sa manga tataramon kan manga propeta.

21 Asin ta uminagi man an panahon na sarong bagong bitoon an luminataw, sunod sa tataramon.

22 Asin ta uminagi an panahon na magpoon kaidto nagpoon na an manga kaputikan na ipinasabong ni Satanas sa manga tawo, tanganing patagason an saindang manga puso, sa katuyohan na tibaad dai na sinda magturubod sa manga tanda asin manga ngangalasan na saindang nagkahiriling; alagad maski na igwa kaining manga kaputikan asin manga pagdaya an orog na dakula na kabtang kan manga tawo nagturubod, asin nagkadarara sa Kagurangnan.

23 Asin ta uminagi an panahon na si Nephi nagpaduman sa manga katiripunan nin manga tawo, asin man dakol pang iba, nagbubunyag sa nagsosolsol, na kun sain nagkaigwa nin kadakol na pagpapatawad nin manga kasalan. Asin siring an manga tawo nagkaigwa giraray nin katuninongan sa lugar ninda.

24 Asin dai na nin manga pagpasuruhay-suhay, kundi duman sa diit na nagpoon na maghulit, naghihinguha na patunayan sa paagi kan banal na manga kasuratan na dai na kaipuhan na sunodon pa an katugonan ni Moises. Ngonian sa bagay na ini sinda nasala, huli ta dai nasabutan an manga kasuratan.

25 Alagad ta uminagi an panahon na sinda dai naghaloy nadara sa pagtubod, asin inarako an manga sala na saindang nalaogan, huli ta ipinaaram sa sainda na an katugonan dai pa man nauutob, asin ta idto kaipuhan mautob sa lambang sadit na bagay; iyo, an tataramon uminabot sa sainda na idto kaipuhan na mautob; iyo, na ni sarong jota o kurit dai nanggad makakaagi sagkod na idto dai gabos mautob; kaya sa taon na ini ipinahiling sainda na sinda nasala asin sinda nagkurumpisal kan saindang manga kasalan.

26 Asin sa siring an ika-siyam na pulo may duwang taon an nakaagi, nagdadara nin maogmang manga bareta sa manga tawo huli sa manga tanda na uminabot na, sunod sa manga tataramon kan propesia kan gabos na banal na manga propeta.

27 Asin ta uminagi an panahon na an ika-siyam na pulo may tulong taon uminagi na igwang katuninongan, alagad an manga mahahabon na pag-iriba ni Gadianton na nag-erok sa kabubuldan, na nakaralakop sa daga, huli ta makukusog an saindang manga pinagtatagoan asin an saindang manga tagong lugar kaya an manga tawo dai sinda nadadaog; kaya sinda nakakagiribo nin manga panggadan, asin naggibo nin kadakol na manga panggagadan sa manga tawo.

28 Asin ta uminagi an panahon na sa ika-siyam na pulo may apat na taon nagpoon sinda na magdarakol nin labi-labi, huli ta dakol an manga nagsuruhay sa manga Nephite na nagdurulag pasiring sa sainda, na nagtao nin dakulang kamundoan sa manga Nephite na natada sa daga.

29 Asin man nagkaigwa nin dahilan nin dakulang kamundoan an manga Lamanite; huli totoo, nagkaigwa sinda nin dakol na manga aki na nagtaralubo asin nagporoon na maging makukusog sa manga taon, asin sinda nagsarig sa saindang sadiri asin nadara sinda paharayo kan iba na manga Zoramite, sa paagi kan saindang kaputikan asin pag-omaw na manga tataramon, tanganing umiba sa manga mahabon na pag-iriba ni Gadianton.

30 Asin sa siring an manga Lamanite nasakitan man, asin nagpoon na magluya an saindang pagtubod asin pagkamatanos, huli sa kasumbikalan kan nagtatalubong kapagarakian.