1 Asin ta uminagi an panahon na kan si Jesus makapagtaram kan manga tataramon na ini, siya nagtaram sa saiyang manga disipulos, saro-saro, sinabi sa sainda: Ano idtong saindong minamawot sa sakuya, pagkatapos na ako magpaduman na sa sakuyang Ama?

2 Asin sinda gabos nagtaram, apuera sa tulo, na an sabi: Samuyang minamawot na pagkatapos na kami mabuhay sagkod sa tamang edad nin tawo, na an samuyang paglilingkod, na kun sain kami saimong inapod, magkaigwa nin katapusan, na kami makaduman sa saimo tulos sa saimong kahadean.

3 Asin siya nagsabi sa sainda: Paladan kamo huli ta saindong minawot an bagay na ini sa sakuya; kaya pagkatapos na kamo umabot sa pitong pulo may duwang taon an edad mapadigdi na kamo sa sakuya sa sakuyang kahadean; asin sa sakuya kamo makakakua nin kapahingaloan.

4 Asin kan siya makataram na sa sainda, saiyang hinampang an tulo, asin nagsabi sa sainda: Ano an saindong minamawot na sakuyang gibohon sa saindo, kun ako maghali na pasiring sa Ama?

5 Asin sinda nagkamurundo sa saindang manga puso, huli ta dai ninda masabi sa saiya an bagay na saindang minamawot.

6 Asin siya nagsabi sa sainda: Totoo nanggad, sakuyang aram an saindong manga nasaisip, asin saindong minawot an bagay na minawot sakuya ni Juan, an sakuyang padangat, na kaiba ko sa sakuyang paglingkod, bago ako initaas sa krus kan manga Judio.

7 Kaya, orog na paladan kamo, huli ta kamo dai makakanamit nin kagadanan; alagad kamo mabubuhay tanganing mahiling an gabos na manga gibo kan Ama sa manga aki nin tawo, sagkod na an gabos na manga bagay mautob susog sa kapagbotan kan Ama, kun ako maabot sa sakuyang kamurawayan kaibahan an manga kapangyarihan kan langit.

8 Asin ta kamo dai matios kan kulog nin kagadanan; alagad ta kun ako mag-abot sa sakuyang kamurawayan kamo mababago sa sarong pagpirok nin mata hali sa pagkamortal pasiring sa pagka-imortal; asin dangan kamo magiging paladan sa kahadean kan sakuyang Ama.

9 Asin sa giraray, dai kamo makakamati nin kulog mantang kamo nag-eerok sa laman, ni kamundoan kun bako ini huli sa kasalan kan mundo; asin an gabos na ini sakuyang gigibohon huli sa manga bagay na saindong minawot sa sakuya, huli ta saindong minawot na saindong madara an manga kalag nin manga tawo sa sakuya, mantang an mundo nagtitindog.

10 Asin sa dahilan na ini kamo magkakaigwa nin kabilogan nin kaogmahan; asin ta kamo matukaw sa kahadean kan sakuyang Ama; iyo, an saindong kaogmahan magiging bilog, siring na tinawan ako kan sakuyang Ama nin kabilogan nin kaogmahan; asin ta kamo magiging siring sa sakuya, asin ako siring sa sakuyang Ama; asin an Ama asin ako saro;

11 Asin an Espiritu Santo nagpapatotoo sa Ama asin sakuya; asin an Ama itinao an Espiritu Santo sa manga aki nin manga tawo, huli sa sakuya.

12 Asin ta uminagi an panahon na kan si Jesus makatapos magtaram kan manga tataramon na ini, saiyang dinutdot an lambang saro sa sainda kan saiyang muro apuera kan tulo na mawawalat, asin dangan siya huminali.

13 Asin bigla na an kalangitan nagbukas, asin sinda puminaitaas sa langit, asin nakahiling asin nakadangog nin manga bagay na dai maitataram.

14 Asin idto ipinangalad sa sainda na itaram; ni tinawan sinda nin kapangyarihan na sinda makataram kan manga bagay na saindang nahiling asin nadangog;

15 Asin kun sinda nasa hawak o sa luwas kan hawak, sinda dai makapagtaram; huli ta idto garo sainda sarong pagbabago sainda, na sinda nabago hali sa hawak na ini nin laman pasiring sa kamugtakan na imortal, na sinda nakahiling kan manga bagay kan Dios.

16 Alagad ta uminagi an panahon na sinda nagrilingkod giraray sa ibabaw nin kinaban; alagad dai sinda nagrilingkod kan manga bagay na saindang nadangog asin nahiling, huli sa katugonan na itinao sainda sa langit.

17 Asin ngonian, kun sinda man mortal o imortal, magpoon kan aldaw kan saindang pagbago, ako dai nakakaaram;

18 Alagad ini an sakuyang aram, sunod sa kasuratan na itinao na—sinda nagduman sa ibabaw kan daga, asin ta naglingkod sa manga tawo, pinagsasararo sa simbahan an gabos na nagtubod sa saindang paghurulit; binurunyagan sinda, asin kun gurano kadakol an nagpaburunyag iyo man an nag-arako kan Espiritu Santo.

19 Asin sinda linaog sa karsel kan manga dai kabali sa simbahan. Asin an manga karsel dai magkanigo sa sainda, huli ta nagkabaranga idto.

20 Asin sinda hinurulog sa daga; alagad saindang hinampas an daga kan tataramon kan Dios, sagkod na huli sa saiyang kapangyarihan sinda nakaligtas sa kairaroman kan daga; asin kaya dai sinda nakapagkalot nin kutkot na magkanigo na bubugtakan sa sainda.

21 Asin ta tulong ulit sindang inapon sa hurno asin dai sinda naano.

22 Asin ta duwang ulit sindang inapon sa lungib nin manga mababangis na hayop; asin totoo sinda nakipagkawat sa manga mababangis na hayop siring sa sadit na aki na nakipagkawat sa padudo na karnero, asin dai naano.

23 Asin ta uminagi an panahon na sa siring sinda nagduman sa gabos na manga tawo ni Nephi, asin naghurulit kan ebanghelio ni Cristo sa gabos na manga tawo sa ibabaw kan daga; asin sinda nadara sa pagtubod sa Kagurangnan, asin nagkasararo sa simbahan ni Cristo, asin kaya an manga tawo kan kapagarakian na idto manga paladan, susog sa tataramon ni Jesus.

24 Asin ngonian ako, si Mormon, titapos nguna an pagtaram manunungod kan manga bagay na ini.

25 Totoo, sakuyang isusurat kutana an manga pangaran kaidtong dai nanggad makakanamit nin kagadanan alagad ipinangalad kan Kagurangnan; kaya dai ko isinusurat an manga idto, huli ta sinda nakatago sa mundo.

26 Alagad totoo, sakuya ko sindang nahiling, asin pinaglingkodan ninda ako.

27 Asin totoo na sinda makakaiba kan manga Gentil, asin an manga Gentil dai mamimidbid sinda.

28 Sinda makakaiba man sa manga Judio, asin an manga Judio dai mamimidbid sinda.

29 Asin ta maabot an panahon, kun mahiling kan Kagurangnan na tama sa saiyang kadunungan na sinda maglingkod sa nawagas na manga tribo kan Israel, asin sa gabos na manga nasion, manga rasa, manga tataramon asin manga tawo, asin hali sa sainda dadarahon pasiring ki Jesus an kadakol na manga kalag, tanganing an saindang minamawot mautob, asin man huli sa nakakadara na kapangyarihan kan Dios na nasa sainda.

30 Asin sinda siring sa manga anghel kan Dios, asin kun sinda magpamiribi sa Ama sa pangaran ni Jesus sinda makakapahiling kan saindang sadiri sa ki siisay man na tawo na saindang pinaghuna na marahay.

31 Huli kaini, darakula asin makangalas na manga gibo an gigibohon ninda, bago kan dakula asin nagdadangadang na aldaw kun nuarin an gabos na tawo matindog na nanggad sa atubangan kan hukoman ni Cristo;

32 Iyo maging sa manga Gentil magkakaigwa nin dakula asin makangalas na gibo na gigibohon ninda, bago kaidtong aldaw nin paghukom.

33 Asin kun igwa kamo kan gabos na banal na kasuratan na nagtatao kan kasaysayan kan gabos na makangangalas na manga gibo ni Cristo, kamo, susog sa manga tataramon ni Cristo, nakakaaram na an manga bagay na ini maabot nanggad.

34 Asin herak man sa saiya na dai minadangog sa manga tataramon ni Jesus, asin man duman sa sainda na saiyang pinili asin pinadara sa sainda; huli ta an siisay man na dai mag-ako kan manga tataramon ni Jesus asin kan manga tataramon kan manga idto na saiyang pinaduman dai minaako saiya; asin huli kaini dai niya sinda aakoon sa huring aldaw;

35 Asin orog na marahay pa sa sainda kun dai na sinda namundag. Huli ta hinuna daw nindo na kamo makakatago sa kapantayan kan nasunggod na Dios, na tinurungtongan kan manga bitis kan tawo, na sa siring na paagi umabot an kaligtasan?

36 Asin ngonian totoo, mantang ako nagtataram manunungod sa sainda na pinili kan Kagurangnan, iyo, maging an tulo na puminaitaas sa langit, na dai ko maaraman kun sinda nalinigan hali sa pagkamortal pasiring sa pagkaimortal—

37 Alagad totoo, poon kan ako nagsurat, naghumapot ako sa Kagurangnan, asin ta saiyang ipinahiling sa sakuya na kaipuhan igwang pagbabago na gibohon sa saindang manga hawak, o kun dai kaipuhan sinda makanamit nin kagadanan;

38 Kaya, tanganing sinda dai makanamit nin kagadanan igwang pagbabago na ginibo sa saindang manga hawak, tanganing sinda dai makamati nin kulog ni kamundoan kun bako na idto huli sa kasalan kan kinaban.

39 Ngonian an pagbabago na ini bakong siring sa mangyayari sa huring aldaw; alagad igwang pagbabago na ginibo sa sainda, tanganing si Satanas dai magkaigwa nin kapangyarihan sa sainda, na dai niya sinda masusugotan; asin sinda pinabanal sa laman, na sinda naging banal, asin na an manga kapangyarihan kan kinaban dai makakapugol sa sainda.

40 Asin sa kamugtakan na ini sinda madanay sagkod sa aldaw kan paghukom ni Cristo; asin sa aldaw na iyan sinda maako nin orog pa kadakulang pagbabago, asin ta sinda aakoon sa kahadean kan Ama na dai na nanggad magluluwas, alagad maerok na kaibahan an Dios sa kalangitan sagkod pa man.