1 Asin ta uminagi an panahon na pinagbotan ni Jesus an saiyang manga disipulos na sinda magdara nin magkapirang tinapay asin arak sa saiya.

2 Asin mantang sinda naghali tanganing magkua nin tinapay asin arak, pinagbotan niya an katiripunan na sinda magturukaw sa daga.

3 Asin kan an manga disipulos uminarabot na, na dara an tinapay asin an arak, kinua niya an tinapay asin binaak asin benendisionan idto; asin itinao niya sa manga disipulos asin nagboot na sinda magkarakan.

4 Asin kan sinda makakarakan na asin nagkabarasog, siya nagboot na tawan ninda an katiripunan.

5 Asin kan an katiripunan makakarakan na asin nagkabarasog, siya nagsabi sa manga disipulos: Magdarangog igwang saro sa saindo na oordenan, asin sa saiya sakuyang itatao an kapangyarihan na magbaak kan tinapay asin magbendision kaidto asin itao sa manga tawo kan sakuyang simbahan, duman sa gabos na magtuturubod asin magpapaburunyag sa sakuyang pangaran.

6 Asin ini saindong danay na gigibohon, siring sa sakuyang ginibo, siring sa sakuyang pagbaak kan tinapay asin pagbendision kaini asin pagtao kaini sa saindo.

7 Asin ini saindong gigibohon sa pagrumdom sa sakuyang hawak, na sakuyang ipinahiling sa saindo. Asin ini magiging sarong patotoo sa Ama na ako danay nindong marurumdoman. Asin kun ako danay nindong rurumdomon mapapasaindo an sakuyang Espiritu na maging kairiba nindo.

8 Asin ta uminagi an panahon na kan saiyang pakataram kan manga tataramon na ini, siya nagboot sa saiyang manga disipulos na uminom kan arak na nasa kupa, asin tawan man ninda idtong katiripunan tanganing mag-inom man sinda kaidto.

9 Asin ta uminagi an panahon na saindang ginibo idto, asin ta sinda nag-inom kaidto asin sinda nagkabarasog; asin tinarawan ninda an katiripunan, asin sinda nag-irinom, asin sinda nagkabarasog.

10 Asin kan an manga disipulos nagibo na idto, si Jesus nagsabi sa sainda: Paladan kamo sa bagay ini na saindong giniribo, huli ta ini pag-utob kan sakuyang manga katugonan, asin ini nagpatotoo sa Ama na boot nindong magsunod kan pinagboboot ko saindo.

11 Asin ini danay nindong gigiribohon duman sa manga nagsorolsol asin nagpaburunyag sa sakuyang pangaran; asin saindong gigibohon ini sa pagrumdom kan sakuyang dugo, na sakuyang pinabulos para sa saindo, tanganing makapagpatotoo kamo sa Ama na danay nindo akong rurumdomon. Asin kun danay nindo akong rurumdomon mapapasaindo an sakuyang Espiritu na maging kaiba nindo.

12 Asin sakuyang itinatao sa saindo an sarong katugonan na saindong gigibohon an manga bagay na ini. Asin kun saindong danay na gigiribohon ining manga bagay na ini paladan kamo, huli ta kamo nakatindog sa sakuyang gapo.

13 Alagad kun an siisay man sa saindo an gumibo nin labi o kulang sa manga ini, dai nakatindog sa sakuyang gapo, alagad nakatindog sa baybayon na pasikadan; asin kan paghugpa kan uran, asin pag-abot kan baha, asin paghampas kan duros, asin hinampas sinda, sinda matutumba, asin an manga pintoan kan impiyerno bukas, nakahanda na kuahon sinda.

14 Kaya paladan kamo kun kamo magsurunod kan sakuyang manga katugonan, na ipinagboot kan Ama sa sakuya na itao ko sa saindo.

15 Totoo, totoo, sakuyang sinasabi sa saindo, kamo kaipuhan na magbarantay asin danay na magpamiribi, ta tibaad kamo magkasurugotan kan demonio, asin magkadarara kamo na bihag niya.

16 Asin siring sa sakuyang pagpamibi sa saindong katiripunan siring man an saindong pagpamibi sa sakuyang simbahan, sa sakuyang manga tawo na nagsosorolsol asin nagpaburunyag sa sakuyang pangaran. Totoo ako an ilaw; itinao ko saindo an halimbawa.

17 Asin ta uminagi an panahon na kan makapagtaram na si Jesus kan manga tataramon na ini sa saiyang manga disipulos, siya naghiling giraray sa katiripunan asin nagsabi sa sainda:

18 Hilinga, totoo, totoo, sakuyang sinasabi sa saindo, kamo kaipuhan na magbarantay asin danay na magpamiribi ta tibaad kamo makalaog sa sugot; huli si Satanas nagmamawot na makua kamo, tanganing masaligsig kamo na siring sa trigo.

19 Kaya kamo kaipuhan na danay na magpamiribi sa Ama sa sakuyang pangaran;

20 Asin an ano man na saindong hagadon sa Ama sa sakuyang pangaran, na tama, nagtutubod na saindong makukua ini, totoo ini itatao sa saindo.

21 Magpamiribi sa saindong manga pamilia sa Ama, na danay sa sakuyang pangaran, tanganing an saindong manga agom na babae asin an saindong manga aki mabendisionan.

22 Asin magdangog, kamo danay na magtitiripon; asin dai nindo ipangalad sa kiisay man na tawo na magdiyan sa saindo kun kamo nagtitiripon, alagad pabayaan na sinda sumarabay sa saindo asin dai sinda ipangalad.

23 Alagad saindong ipapamiribi sinda, asin dai sinda pagpaharalion; asin kun mangyari na danay sindang nagsasarabay sa saindo ipapamiribi nindo sinda sa Ama, sa sakuyang pangaran.

24 Kaya, iiritaas nindo an saindong ilaw tanganing ini mag-aniag sa mundo. Totoo ako an ilaw na saindong iiiritaas—idto na saindong nahiling na ginibo ko. Totoo ako nahiling nindo na nagpapamibi sa Ama, asin saindong napatotoohan.

25 Asin saindong nahiling na ako nagboot na dai sa saindong maghali, alagad nagboot na kamo magpadirigdi sa sakuya, tanganing saindong mamatian asin mahiling; siring an saindong gigiribohon sa mundo; asin an siisay man na magsuhay sa katugonan na ini tinutugotan an saiyang sadiri na madara nin sugot.

26 Asin ngonian ta uminagi an panahon na kan si Jesus makapagtaram kan manga tataramon na ini, hiniling niya giraray an saiyang manga disipulos na saiyang pinili, asin nagsabi sa sainda:

27 Magdarangog totoo, totoo, sakuyang sinasabi sa saindo, sakuyang tatawan kamo nin ibang katugonan, asin dangan kaipuhan na akong magduman sa sakuyang Ama tanganing sakuyang utobon an iba pang manga katugonan na saiyang itinao sakuya.

28 Asin ngonian magdarangog, iyo ini an katugonan na sakuyang itatao sa saindo, na dai nindo pagtugotan an siisay man na aram nindo na dai naninigo na magkakan kan sakuyang laman asin dugo, kun ini idinudulot nindo.

29 Huli ta an siisay man na magkakan asin mag-inom kan sakuyang laman asin dugo na dai naninigo nagkakakan asin nag-iinom nin karaotan sa saiyang kalag; kaya kun saindong aram na an sarong tawo bakong naninigo na magkakan asin mag-inom kan sakuyang laman asin dugo saindong ipangalad saiya.

30 Alagad siya dai mo pagpahalion sa saindong katiripunan, alagad saimong paglingkodan asin saimo siyang ipapamibi sa Ama sa sakuyang pangaran; asin kun mangyari na siya magsolsol asin magpabunyag sa sakuyang pangaran, saka nindo aakoon siya asin idudulot saiya an sakuyang laman asin dugo.

31 Alagad kun siya dai magsolsol siya dai ibibilang sa sakuyang manga tawo, tanganing siya dai makaraot sa sakuyang manga tawo, huli totoo sakuyang aram an sakuyang manga karnero, asin sinda nabibilang.

32 Alagad siya dai nindo papahalion sa saindong manga sinagoga, o sa saindong manga lugar nin pagsamba, huli ta sa manga siring saindong ipapadagos an paglingkod; huli ta dai nindo aram alagad kun sinda magbalik asin magsosorolsol asin magpadirigdi sa sakuya na igwang bilog na katuyohan nin puso, asin sinda sakuyang bubulongon; asin kamo an magiging dalan sa pagdara sa sainda nin kaligtasan.

33 Kaya, utobon an manga osipon na ini na sakuyang ipinagboot sa saindo tanganing dai kamo mapasairarom nin sumpa; huli ta herak man sa saiya na isinusumpa kan Ama.

34 Asin sakuyang itinatao sa saindo an manga katugonan na ini huli sa manga pagpasuruhay-suhay na nasa sa saindo. Asin paladan kamo kun kamo dai nin pagpasuruhay-suhay sa saindo.

35 Asin ngonian ako maduman na sa sakuyang Ama, huli ta kaipuhan na ako magduman na sa sakuyang Ama para sa saindong karahayan.

36 Asin ta uminagi an panahon na kan si Jesus makatapos na kan manga osipon na ini, saiyang dinutan kan saiyang kamot saro-saro an manga disipulos na saiyang pinili, sagkod na saiyang dinutan sinda gabos, asin nagtaram sa sainda mantang saiyang nadudutan sinda.

37 Asin an katiripunan dai nadangog an manga tataramon na saiyang sinabi, kaya sinda dai nakapagpatotoo; alagad an manga disipulos nagpatotoo na saiyang tinawan sinda nin kapangyarihan na magtao kan Espiritu Santo. Asin ta sakuyang ipapahiling sa saindo pagkatapos kaini na an kasuratan na ini totoo.

38 Asin ta uminagi an panahon na kan si Jesus madutan sinda gabos, igwang uminabot na panganuron asin nalindongan an katiripunan na dai ninda nahiling si Jesus.

39 Asin mantang sinda nalilindongan siya naghali sa sainda, asin nagpaitaas sa langit. Asin nahiling kan manga disipulos asin nagpatotoo na siya nagpaitaas giraray sa langit.