1 Asin ngonian, totoo, sakuyang sinasabi sa saindo na kaipuhan na saindong adalan an manga bagay na ini. Iyo sarong tugon na sakuyang itinatao sa saindo na adalan nin maigot an manga bagay na ini; huli ta mahalaga an manga tataramon ni Isaias.

2 Huli ta totoo nanggad na siya nagtaram manunungod sa gabos na manga bagay manunungod sa sakuyang manga tawo na nasa harong kan Israel; kaya kinakaipuhan na siya magtaram man sa manga Gentil.

3 Asin an gabos na manga bagay na saiyang pinagtaram nangyari na asin mangyayari pa, na sunod sa manga tataramon na saiyang sinabi.

4 Kaya utobon an sakuyang manga tataramon; isurat an manga bagay na sakuyang sinabi sa saindo; asin sunod sa panahon asin sa kamawotan kan Ama, sinda maduman sa manga Gentil.

5 Asin an siisay man na magdangog kan sakuyang manga tataramon asin magsolsol asin magpabunyag, siya iyo an makakaligtas. Adalan an manga propeta, huli ta dakol an nagpapatotoo kan manga bagay na ini.

6 Asin ngonian ta uminagi an panahon na kan pakataram ni Jesus kan manga tataramon na ini siya nagtaram giraray sa sainda, pagkatapos na saiyang ipaliwanag an gabos na banal na kasuratan sa sainda na sainda nang inako, nagsabi siya sa sainda: Totoo, igwa pang ibang banal na kasuratan na sakuyang boot na saindong isurat, na kamo dai pa.

7 Asin ta uminagi an panahon na siya nagsabi ki Nephi: Daraha digdi an manga kasuratan na saimong natatago.

8 Asin kan darahon ni Nephi an manga kasuratan, asin ibinugtak sa saiyang atubang, asin ta saiyang itinuon an manga mata duman asin nagsabi:

9 Totoo sakuyang sinasabi sa saindo, na ako nagboot sa sakuyang surogoon na si Samuel, an Lamanite, na siya magpatotoo digdi sa manga tawong ini, na sa aldaw na an Ama pamurawayon an saiyang pangaran sa sakuya, na igwa nin dakol na manga santo na mabarangon hali sa pagkagadan, asin magpapahiling sa dakol, asin maglilingkod sa sainda. Asin siya nagsabi sa sainda: Bako siring baga ini?

10 Asin an saiyang manga disipulos nagsirimbag saiya asin nagsabi: Iyo, Kagurangnan, si Samuel nagpropesia man nanggad sunod sa saimong manga tataramon, asin ta an gabos na idto nautob.

11 Asin si Jesus nagsabi sa sainda: Ano ta dai nindo naisurat an bagay na ini, na dakol na manga santo an nagbarangon asin nagpahiriling sa kadakol asin nagrilingkod sa sainda?

12 Asin ta uminagi an panahon na si Nephi narumdoman na an manga bagay na ini dai pa naisurat.

13 Asin ta uminagi an panahon na si Jesus nagboot na idto isurat; kaya idto isinurat sunod sa saiyang ipinagboot.

14 Asin ngonian ta uminagi an panahon na kan si Jesus makapagpaliwanag kan gabos na manga banal na kasuratan siring sa saro, na saindang isinurat, saiyang ipinagboot sa sainda na saindang itukdo an manga bagay na saiyang ipinaliwanag sa sainda.