1 Totoo, ngonian uminagi an panahon na kan maitaram na ni Jesus an manga tataramon na ini siya naghiling giraray sa palibot sa katiripunan, asin siya nagsabi sa sainda: Magdarangog, an sakuyang panahon uya na.

2 Sakuyang naaninaw na kamo maluluya, ta dai nindo nasasabotan an gabos kong manga tataramon na ipinagboot sakuya kan Ama na itaram sa saindo sa panahon na ini.

3 Kaya, kamo magpuruli na sa saindong manga harong, asin paghororop-horopon an manga bagay na sakuyang sinabi, asin hapoton an Ama, sa sakuyang pangaran, tanganing kamo makasabot, asin ihanda an saindong manga isip para sa pagkaaga, asin ta ako mapadigdi giraray sa saindo.

4 Alagad ngonian ako maduman sa Ama, asin man tanganing ipahiling an sakuyang sadiri sa manga nawawarang tribo kan Israel, huli ta sinda dai nawawara sa Ama, huli ta saiyang aram kun sain niya sinda dinara.

5 Asin ta uminagi an panahon na kan makapagtaram nin siring si Jesus, siya naghiling giraray sa palibot kan katiripunan, asin nahiling na sinda nagruruluha, asin nakapuruntok an paghiling saiya na garo nakikihuron na siya magtagal pa nin kadikit na panahon sa sainda.

6 Asin siya nagsabi sa sainda: Totoo, an sakuyang daghan pano nin pagkaherak sa saindo.

7 Igwa baga saindo na manga naghihirilang? Darahon sinda digdi. Igwa baga saindo na manga pilay, o buta, o lulid, o kimay, o daoton, o biyadi, o na manga bungog, o na manga nasasakitan sa ano man na paagi? Darahon sinda digdi asin ta sinda sakuyang bubulongon, huli ta igwa akong pagkaherak sa saindo; an sakuyang daghan pano nin pagkaherak.

8 Huli ta sakuyang naaaninaw na kamo nagmamarawot na sakuyang ipahiling sa saindo an sakuyang ginibo sa saindong manga katugangan sa Jerusalem, huli ta sakuyang nahihiling na an saindong pagtubod naninigo na kamo sakuyang burulongon.

9 Asin ta uminagi an panahon na kan siya makapagtaram nin siring, an gabos na katiripunan, sarabay na nagdurulok kairibahan an saindang naghihirilang asin an saindang manga nasasakitan, asin saindang pilay, asin kaibahan an saindang buta, asin kaibahan an saindang pula, asin kaibahan sinda gabos na nasasakitan sa ano man na paagi; asin saiyang binurulong sinda lambang saro na dinadara saiya.

10 Asin sinda gabos, idtong manga nagkaburulong asin idtong manga daing hilang, nagduruko sa saiyang manga bitis, asin sinamba siya; asin kun gurano kadakol an nagdurulok sa katiripunan iyo man an naghadok sa saiyang manga bitis, sagkod na nahugasan ninda an saiyang manga bitis kan saindang manga luha.

11 Asin ta uminagi an panahon na siya nagboot na saindang darahon an saindang manga saradit na manga aki.

12 Kaya saindang dinarara an saindang saradit na manga aki asin pinaturukaw sa daga sa palibot niya, asin si Jesus tuminindog sa tahaw; asin an katiripunan nagtao nin agihan sagkod na an gabos nadara sa saiya.

13 Asin ta uminagi an panahon na kan an gabos nadara na, asin si Jesus tuminindog sa tahaw, nagboot siya sa katiripunan na sinda magruluhod sa daga.

14 Asin ta uminagi an panahon na kan sinda nagruluhod na sa daga, si Jesus nag-agrangay sa saiyang boot, asin nagsabi: Ama, ako nahahadit huli sa kasumbikalan kan manga tawo kan harong kan Israel.

15 Asin kan saiyang pakataram kan manga tataramon na ini, siya man nagluhod sa daga; asin hilinga siya nagpamibi sa Ama, asin an manga bagay na saiyang ipinamibi dai maisusurat, asin an katiripunan nagpatotoo na nadangog siya.

16 Asin sa siring na paagi sinda nagpatotoo: Dai pa lamang an mata nakahiling, ni an talinga nakadangog, kaidto, nin kadakula asin makangalas na manga bagay siring sa samuyang nahiling asin nadangog si Jesus na nakikihuron sa Ama;

17 Asin daing dila na makakataram, ni makakasurat an siisay man na tawo, ni maisip nin puso nin tawo an kadakula asin makangangalas na manga bagay siring sa samuyang nahiling asin nadangog na sinabi ni Jesus; asin daing siisay man na makaisip kan kaogmahan na nakapano kan samuyang manga kalag kan panahon na samuyang nadangog siyang nagpapamibi para sa samuya sa Ama.

18 Asin ta uminagi an panahon na kan matapos na ni Jesus an saiyang pagpamibi sa Ama, siya nagtindog; alagad kadakula an kaogmahan kan katiripunan kaya sinda nagkarulugmok.

19 Asin ta uminagi an panahon na si Jesus nagtaram sa sainda, asin nagsabi na magbarangon.

20 Asin sinda nagbarangon sa daga, asin siya nagtaram sa sainda: Paladan kamo huli sa saindong pagtubod. Asin ngonian totoo, lubos an kaogmahan ko.

21 Asin kan makapagtaram siya kan manga tataramon na ini, siya nagtangis, asin an katiripunan nagpatotoo kaini, asin kinua niya an saindang saradit na manga aki, saro-saro, asin benendisionan sinda, asin nagpamibi sa Ama para sa sainda.

22 Asin kan saiyang magibo na ini siya nagtangis giraray.

23 Asin siya nagtaram sa katiripunan, asin nagsabi sa sainda: Hilinga an saindong manga saradit.

24 Asin mantang sinda naghihiling tanganing magmasid itiningkalag ninda an saindang manga mata pasiring sa langit, asin nahiling ninda an kalangitan na nagbukas, asin nakahiling sinda nin manga anghel na nagbabaraba hali sa kalangitan na garo nasa tahaw nin kalayo; asin sinda nagbaraba asin ta pinalibotan an manga saradit, asin sinda naparilibotan nin kalayo; asin idtong manga anghel nagrilingkod sa sainda.

25 Asin an katiripunan nakahiling asin nakadangog asin nagpatotoo; asin ta aram ninda na an saindang patotoo tunay huli ta sinda gabos nakahiling asin nakadangog, lambang saro sa saiyang sadiri; asin ta an saindang bilang maabot sa duwang ribo may limang gatos na manga kalag; asin ta sinda manga lalaki, manga babae, asin manga aki.