1 Asin ta uminagi an panahon na saiyang pinagbotan an katiripunan na sinda mag-ontok sa pagpamibi, asin man an saiyang manga disipulos. Asin saiyang pinagbotan sinda na dai mag-ontok kan pagpamibi sa saindang manga puso.

2 Asin saiyang pinagbotan sinda na sinda magbarangon asin tumirindog sa saindang manga bitis. Asin sinda nagbarangon asin tuminirindog sa saindang manga bitis.

3 Asin ta uminagi an panahon na siya nagbaak giraray nin tinapay asin benendisionan idto, asin itinao sa manga disipulos tanganing kakanon.

4 Asin kan sinda makakakan saiyang pinagbotan sinda na magbaak nin tinapay, asin itao sa katiripunan.

5 Asin kan saindang maitao na sa katiripunan saiyang tinawan man sinda nin arak na iinomon, asin pinagbotan sinda na saindang tawan an katiripunan.

6 Ngonian, dai nin tinapay, ni arak, na dinara an manga disipulos, ni an katiripunan;

7 Alagad totoo na saiyang tinawan sinda nin tinapay na makakakan, asin arak na maiinom.

8 Asin siya nagsabi sa sainda: Siya na kumakan kan tinapay na ini nagkakakan kan sakuyang hawak sa saiyang kalag; asin siya na uminom sa arak na ini nag-iinom kan sakuyang dugo sa saiyang kalag; asin an saiyang kalag dai na nanggad magugutom ni mapapaha, alagad mabubusog.

9 Ngonian, kan an katiripunan gabos na makakakan asin makainom, totoo, sinda napano kan Espiritu; asin sinda nagkurahaw sa sarong tingog asin nagtao nin pagpamuraway ki Jesus, na saindang nahiling asin nadangog.

10 Asin ta uminagi an panahon na kan sinda makapagtao nin pagpamuraway ki Jesus, siya nagsabi sa sainda: Magdangog, ngonian ako nakatapos na kan tugon na ipinagboot kan Ama sakuya manunungod sa manga tawong ini, na manga natada kan harong kan Israel.

11 Saindong narumdoman na ako nagtaram sa saindo, asin ta nagsabi na kun an manga tataramon ni Isaias mautob na—totoo an manga idto nakasurat, nasa saindong atubangan idto, kaya basahon an manga idto—

12 Asin totoo, totoo, sakuyang sinasabi sa saindo, na kun an manga ini mautob na, dangan na mauutob an tipan na ginibo kan Ama sa saiyang manga tawo, O harong kan Israel.

13 Asin dangan an manga natada, na iwinaragas sa ibabaw kan daga, titiripunon hali sa sirangan asin hali sa sulnopan, asin hali sa sur asin hali sa norte; asin sinda dadarahon sa pagkaaram sa Kagurangnan na saindang Dios, na nagtubos sa sainda.

14 Asin an Ama nagboot sakuya na sakuyang itao saindo an dagang ini, para sa saindong panunod.

15 Asin sakuyang sinasabi sa saindo, na kun an manga Gentil dai magsorolsol pagkatapos kan manga balaog na maabot sa sainda pagkatapos na saindang iwaragas an sakuyang manga tawo—

16 Saka na kamo, na manga natada kan harong ni Jacob, mapaduman sa sainda; asin ta kamo mapapasatahaw ninda na kadakol; asin kamo mapapasa pag-iriba ninda siring sa sarong ugbon na leon sa katiripunan nin manga hayop sa kadlagan, asin siring sa ugbon na leon sa manga grupo nin manga karnero, na kun magpaduman giginikan asin rurutangon na maging pino, asin dai nin makakapagligtas.

17 An saimong kamot ibibikyaw na sa saimong manga kaiwal, asin an saimong gabos na manga kaiwal magkakagaradan.

18 Asin sakuyang titiripunon an sakuyang manga tawo siring sa sarong tawo na nagtitipon sa salog kan saiyang manga ginuygoy.

19 Huli ta sakuyang gigibohon an sakuyang manga tawo na kinatipan kan Ama, iyo, sakuyang gigibohon na batbat an saindong sungay, asin sakuyang gigibohon an saindong manga panaka na tanso. Asin saindong dadaogon na magkabaranga-banga an kadakol na manga tawo; asin sakuyang itatalaga sa Kagurangnan an saindang karahayan, asin an saindang kayamanan sa Kagurangnan kan bilog na daga. Asin totoo, ako an naggibo kaidto.

20 Asin ta maagi an panahon, an sabi kan Ama, na an espada nin kapantayan magbibitay-bitay sa tangod ninda sa aldaw na iyan; asin sagkod na sinda magsorolsol idto mahuhulog sa sainda, sabi kan Ama, iyo, sagkod sa gabos na manga nasion kan manga Gentil.

21 Asin ta maagi an panahon na sakuyang patitindugon an sakuyang manga tawo, O harong kan Israel.

22 Asin totoo, ining manga tawong ini sakuyang patitindugon sa dagang ini, sa pag-utob kan tipan na sakuyang ginibo sa saindong ama na si Jacob; asin ini magiging sarong Bagong Jerusalem. Asin an kapangyarihan kan kalangitan masasakatahawan kan manga tawong ini; iyo, siring na ako masasakatahawan nindo.

23 Totoo, ako idtong sinambit ni Moises, na an sabi: Sarong propeta an patitindugon kan Kagurangnan nindong Dios sa saindo na hali sa saindong katugangan, siring sa sakuya; siya saindong dadangogon sa gabos na manga bagay na saiyang sasabihon sa saindo. Asin ta maagi an panahon na lambang kalag na dai magdangog kan propetang iyan hahalion sa katiripunan kan manga tawo.

24 Totoo sakuyang sinasabi sa saindo, iyo, asin an gabos na manga propeta magpoon ki Samuel asin idtong manga nagsurunod saiya, siring sa kun gurano an nagtaram, iyo an nagpapatotoo sa sakuya.

25 Asin magdangog, kamo an manga aki kan manga propeta; asin kamo nasa harong kan Israel; asin kamo nasa tipan na ginibo kan Ama sa saindong manga kamagurangan, na nagsabi ki Abraham: Asin sa saimong ibubunga an gabos na magkasiring-aki sa kinaban magiging paladan.

26 An Ama enot akong pinadigdi sa saindo, asin ako sinugo tanganing bendisionan kamo sa pagtalikod nin lambang saro sa saindo sa saiyang kasumbikalan; asin ini huli ta kamo manga aki kan tipan—

27 Asin pagkatapos kaidto kamo nabendisionan saka uutobon kan Ama an tipan na ginibo niya ki Abraham, na an sabi: Sa saimong ibubunga an gabos na magkasiring-aki kan kinaban magiging paladan—sa pagpabulos kan Espiritu Santo sa manga Gentil sa paagi ko, na an bendision na ini sa manga Gentil gigibohon sindang makusog na orog sa gabos, sa pagwagas kan sakuyang manga tawo, O harong kan Israel.

28 Asin sinda magiging pasakit sa manga tawo kan dagang ini. Alagad, kun sinda makakua na kan kabilogan kan sakuyang ebanghelio, dangan kun patatagason pa ninda an saindang manga puso tumang sa sakuya ibabalik ko an saindang manga kasumbikalan sa saindang manga payo, sabi kan Ama.

29 Asin sakuyang rurumdomon an tipan na sakuyang ginibo sa sakuyang manga tawo; asin ako nakipagtipan sa sainda na sakuyang titiripunon sinda sa sadiring kong panahon, tanganing sakuyang itao sa sainda giraray an daga kan saindang manga kamagurangan para sa saindang panunod, na iyo an daga kan Jerusalem, na iyo an dagang inpinangako sa sainda sagkod pa man, sabi kan Ama.

30 Asin ta maagi an panahon na maabot an panahon, na an kabilogan kan sakuyang ebanghelio ihuhulit sa sainda;

31 Asin sinda matubod sa sakuya na ako si Jesu-Cristo, an Aki kan Dios, asin magpapamibi sa Ama sa sakuyang pangaran.

32 Dangan an saindang manga bantay iiiritaas an saindang tingog, asin sa tingog na sarabay sinda magkakaranta; huli ta sinda magkakauruyon.

33 Dangan sinda titiripunon giraray kan Ama, asin itatao sa sainda an Jerusalem para sa daga na saindang panundon.

34 Dangan sinda mag-oorogma—Magkaranta nin sarabay, kamong naratakan na manga lugar kan Jerusalem; huli ta rinanga kan Ama an saiyang manga tawo, tinubos niya an Jerusalem.

35 Ipinahiling kan Ama an saiyang banal na takyag sa manga mata kan gabos na manga nasion; asin an gabos na manga kasagkuran kan kinaban makakahiling kan kaligtasan kan Ama; asin an Ama asin ako saro.

36 Asin dangan mauutob na an nakasurat: Pagmata, pagmata giraray, asin isulot an saimong kakusogan, O Zion; isulot an saimong magagayon na gubing, O Jerusalem, an banal na banwaan; huli ta poon ngonian dai saimo makakalaog an bakong kabali sa tipan kan Ama asin an bakong malinig.

37 Palpagan an saindong sadiri kan kabokabo; magbangon, magtukaw, O Jerusalem; hubada an saimong sadiri sa gapos kan saimong liog, O bihag na aking babae kan Zion.

38 Huli ta siring an sabi kan Kagurangnan: Saindong pinabakal an saindong manga sadiri sa dai, asin kamo tutuboson na dai nin kuwarta.

39 Totoo, totoo, sakuyang sinasabi sa saindo, na an sakuyang manga tawo maaaraman an sakuyang pangaran; iyo, sa aldaw na iyan saindang maaaraman na ako iyo an nagtataram.

40 Asin dangan sinda masabi: Anong gayon sa ibabaw kan kabukidan an manga bitis kan may darang maoogmang bareta sa sainda, kan nagbabalangibog nin katuninongan; kan nagdadarang manga marahay na bareta, kan nagbabalangibog nin kaligtasan; kan nagsasabi sa Zion: An saimong Dios naghahadi!

41 Asin dangan sarong kurahaw an mag-aalingawngaw: Humali kamo, humali kamo, lumuwas kamo diyan, dai kamo magdutdot kan bakong malinig; lumuwas kamo sa tahaw niya; magi kamong malinig na nagdadara kan namumugtakan kan Kagurangnan.

42 Huli ta dai kamo maluwas na naghihiridali ni mahali na nagdudurulag; huli ta an Kagurangnan manginginotan saindo, asin an Dios kan Israel an saindong bantay sa likod.

43 Totoo, an sakuyang surogoon madunong na makikitrato; siya pag-oomawon asin ipagrurukyaw asin papakahalangkawon.

44 Kun gurano kadakol an natikbahan saimo—an saiyang lalawgon rinaot, labi pa sa kiisay man na tawo, asin an saiyang itsura labi pa sa manga aki nin tawo—

45 Kaya siya magwiwirik sa dakol na manga nasion, an manga hadi matitikom an saindang manga nguso sa saiya, huli ta idtong dai pa itinaram saindang mahihiling; asin idtong dai pa ninda nadangog saindang paghohorop-horopon.

46 Totoo, totoo, sakuyang sinasabi sa saindo, an gabos na manga bagay na ini totoong maabot, siring sa ipinagboot sa sakuya kan Ama. Dangan na an tipan na ini na ipinakitipan kan Ama sa saiyang manga tawo mauutob; asin dangan na an Jerusalem eerokan giraray kan sakuyang manga tawo, asin idto an daga na saindang panunod.