1 Chiney e immoy u lan fare motochiyel rokʼ Mosiah ni gubin e pumoʼon nib tapuf-oloboch ko motochiyel, ara piʼin ni kan dugliy raed ni ngar manged tapuf-oloboch, e thingar ni piiʼ puluwraed u rogon nʼumngin i napʼan ni yaed be muruwel ni ngar pithiged e oloboch u puluwon e piʼin ni kan fek iyib ngoraed ni ngan pufthin nagraed.

2 Chiney e faʼanra bay beeʼ ni bay e malfith rorow beeʼ, ma faʼanra dabi piiʼ e malfith rokʼ, min egnag ko chaʼ ni tapuf-oloboch; ma fare tapuf-oloboch e ra muruwel nga matʼawon, me malʼog ni ngan fek fare moʼon iyib ngakʼ; me pufthin nag fare moʼon u rogon e motochiyel nge pi pow ni mich ni kan togopluw nag ngakʼ, ma arame fare moʼon e ni meʼeryeg ngakʼ ni nge piiʼ e malfith rokʼ, ara dangay ma ngan fek e urngin rokʼ, ara ni chuweg u fithikʼ fapi gidiiʼ ya ke aw nib talingeg banʼen mab moroʼroʼ.

3 Ma fare tapuf-oloboch e rafek puluwon u rogon nʼumngin i napʼan ni ke muruwel—ba senine ko gol rebo rran, ara ba senum ko silber, ni taʼareb rogon nga rebo sesine ko gol; ma aray rogon fare motochiyel nni piiʼ.

4 Chiney e baʼaray rogon i fithingan e gol roraed nge silber roraed nib thilthil, ni be yanu rogon toelngin puluwon. Ma pi fithingan nem e Nephites e dugliy, ya darur fanyed e tin baʼaram ni i fanay fapi Jews ni ur moyed u Jerusalem; ara ku darur theʼeged ni boed ni ma thiʼeg fapi Jews; machane yaed ma malngeg, ma yaed ma thiʼeg, u rogon e gonop nge dodow ko gidiiʼ, u gubin e mfen, nge yaeni madaʼ ko fare lung ko fapi tapuf-oloboch, ni yarmiy fare pilung i Mosiah nge tay.

5 Ere baʼaray rogon—ba senine ko gol, ba seon ko gol, ba shum ko gol, nge ba limnah ko gol.

6 Ba senum ko silber, ba amnor ko silber, ba ezrom ko silber, nge ba onti ko silber.

7 Ba senum ko silber e taʼab toelngin nga ba senine ko gol, ma dariy reb nib taʼab dodow ko barley, nge ku taʼab dodow e fol riy ko grain.

8 Chiney e rogon urngin i puluwon ba soen ko gol e lʼagruw yay i puluwon ba senine.

9 Ma ba shum ko gol e lʼagruw yay i puluwon ba seon.

10 Ma ba limnah ko gol e aram rogon u puluwraed ni gubin.

11 Ma ba amnor ko silber e taʼab puluwon nga lʼagruw e senums.

12 Ma ba ezrom ko silber e taʼab puluwon nga aningeg e senums.

13 Ma ba onti e thʼabi tolang ngoraed ni yaed gubin.

14 Chiney e baʼaray rogon i puluwon e tin nib achichig e mathaʼeg ni kan dugliy—

15 Ba shiblon e baley u reb e senum; ere, ba shiblon e baley e fol ko barley.

16 Ma ba shiblum e baley e fol ko rebo shiblon.

17 Ma ba leah e baley u ba shiblum.

18 Chiney e ireray rogon e mathaʼeg roraed, nrogon ni kan dugliy.

19 Ere ba anton ko gol e taʼab puluwon nga dalip e shiblons.

20 Ere, fan e pinnʼey e nge yog ni felʼ rograed riy, ni bachan e yaed be fek puluwraed u rogon urngin e muruwel ni yaed be rinʼ, ere, ra kʼarnged fapi gidiiʼ ngar wagaey gaed, ngar rinʼed gubin mite gatheay gapas nge denen ni ubchiyaʼ, ni nge yog ni yoʼor e muruwel roraed, ni nge yog nra feked e salpiy u rogon e pi oloboch ni unfek iyaen ngoraed; ere ra kʼarnged fapi gidiiʼ ngar togopluw gaed ngakʼ Alma nge Amulek.

21 Ere chaʼaney i Zeezrom e tabab i duwriy Amulek, ni be gaʼar: Gara piiʼ e fulweg u boech e duwer ni gura fith ngom? Ma chiney e chaʼaney i Zeezrom e beeʼ nib moʼon nib salap i tʼaer liyiben e kireb, ni gomanga yog ni gatheay e tin nib mangil banʼen; ere, gaʼar ngakʼ Amulek: Gara piiʼ e fulweg ko pi duwer nug ra fith ngom?

22 Me gaʼar Amulek ngakʼ: Arragon, ni faʼanra mʼagaenʼ fare Kan ni Thothup ku Somoel ngay, ni bay rog; ya dab gog banʼen nib togopluw ko fare Kan ni Thothup rokʼ Somoel. Ere Zeezrom e gaʼar ngakʼ: Musap, baʼaray nelʼ i onties ko silber, ma gubin ni gura piiʼ ngom ni faʼan gara yoeg ni dariy e Got.

23 Ere Amulek e gaʼar: O gur e bitir nu infierno, mang ni ngam sikeng nigeg? Damnang ni piʼin nib matʼaw e dabra paged yaed nga paʼ e lumel?

24 Mich u wunʼum ni dariy e Got? Gube yoeg ngom, Dangay, gur ma gamnang ni bay ba Got, machane ba tʼuf e salpiy u wunʼum ngakʼ.

25 Ere chiney e kam baen nigeg u mit Got. Gur e kam gaʼar ngog—Muguy e re nelʼ i onties ni baʼaray, ni rib tolang puluwon, gura piiʼ ngom—ni kam muʼ i tʼuroeg u laninʼum ni ngam tel rog; ma kemus ni gabaʼadag ni nggog ni dariy fare Got nib riyulʼ mab fos, ni nge yog ni yibe towaey riy ni ngam gatheayeg. Ere chiney e musap, biney e ngongol nib kireb ni kam rinʼ e bay mu fek puluwon.

26 Me gaʼar Zeezrom ngakʼ: Ga be yoeg ni bay ba Got nib riyulʼ mab fos?

27 Me gaʼar Amulek: Arragon, bay ba Got nib riyulʼ mab fos.

28 Ere gaʼar Zeezrom: Bay e Got nib yoʼor ko taʼareb?

29 Me fulweg ngakʼ ni gaʼar, Dariy.

30 Ere ki gaʼar Zeezrom ngakʼ bayay: Uw rogon ma kamnang e pinnʼey?

31 Me gaʼar ngakʼ: Ba angel e ke yoeg ngog.

32 Ma ki gaʼar Zeezrom bayay: Miniiʼ e chaʼ ni bay yib? Ir fachaʼ ni Fak Got?

33 Me gaʼar ngakʼ, Arragon.

34 Me gaʼar Zeezrom bayay: Ra thapeg e gidiiʼ rokʼ ni yaed bay u fithikʼ e pi denen roraed? Me fulweg Amulek ni gaʼar ngakʼ: Gube yoeg ngom ni dabi rinʼ, ya dariy liyiben me fek yathin e thin rokʼ.

35 Ere chiney e gaʼar Zeezrom ngakʼ fapi gidiiʼ: Muguyed ni ngam tayed u wunʼmed e pinnʼey; ya ke yoeg ni kemus ni taʼareb e Got ni bay; machane ki yoeg ni fachaʼ ni Fak Got e bay yib, machane dabi thapeg e gidiiʼ rokʼ—ni gowa bay matʼawon ni nge gagyeg nag Got.

36 Ere chiney e gaʼar Amulek ngakʼ bayay: Musap gur e kam baen, ya kamoeg ni kug non ni gowa bay matʼawog ni ngug gagyeg nag Got ni bachan e kugog ni dabi thapeg e gidiiʼ rokʼ ni yaed bay u fithikʼ e pi denen roraed.

37 Ere gube yoeg ngom bayay ni dabi thapegraed ni yaed bay u fithikʼ e pi denen roraed; ya dabiyog ni nggu fek yathin e thin rokʼ, ma ke yoeg ni dariy banʼen nib alit nra yog ni nge yognag fare gilʼelung nu tharmiy; ere, uw rogon ma ra yog ni ngam thap gaed, ni faʼanra dab mu yog niged fare gilʼelung nu tharmiy? Ere, dabiyog ni ngam thap gaed u fithikʼ e pi denen romed.

38 Ere chiney e gaʼar Zeezrom ngakʼ bayay: Fachaʼ ni Fak Got e ire Chitamangiy ni Manechubog?

39 Me gaʼar Amulek ngakʼ: Arragon, ri ire fare Manechubog ni Chitamangin e tharmiy nge fayleng, nge gubin banʼen ni bay riy; ire tabolngin nge tungun, nge sommʼon nge tomur;

40 Ma bay yib nga fayleng ni nge bayuliy e gidiiʼ rokʼ; ma bayi fek nga dakean e pi denen rokʼ e piʼin nra michaenʼraed nga fithingan; ma ireray e piʼin nra yog ngoraed e yafos ni manechubog, ere dakuriy rogon e gidii nga bang me yog woʼen e yafas ngoraed.

41 Ere piʼin denen e ra paer ni gowa dariy e bayul ntay ni fan ngoraed, ma kemus ni ra puf roraed e wolbow ko yamʼ; ya musap, fare rran e be yib ni gubin e gidiiʼ ma ra fos riy ko yamʼ mar sakʼiy gaed nga pʼoewchen Got, ngan pufthin nagraed u rogon e pi muruwel roraed.

42 Chiney, e bay ba yamʼ ni kanoeg ni ba yamʼ ko dagur; ere yamʼ ni tay Kristus e ra pithig gufan e biney e yamʼ ko dagur, ni nge yog ni gubin e gidiiʼ me fos ko biney e yamʼ ko dagur.

43 Fare yaʼel nge fare dagur e rasul nga taʼabang bayay ni ke machalbog; ni paʼay nge ʼulʼul u doewey e rasul nga rogon, ni boed rogdaed e chiney ko ngiyalʼ ney; ma bay ni fek daed ngad sakʼiy gaed nga pʼoewchen Got, ma gaed nang ni woed ni gaed manang e chiney, mab tamilang laniyaenʼdaed u rogon gubin i thibngidaed.

44 Ere chiney, e biney e sulyarmen e rayog ngakʼ gubin e gidiiʼ, ni pilibthir nge bitir, ni kalbus nge gathi kalbus, ni pumoʼon nge ppin, ni piʼin ni kireb nge piʼin matʼaw; ma mus nga bagaf i piyen loelugraed ma dabi yaen ngabang; machane gubin banʼen ma yira sulweg nga rogon, ni boed ni bay e chiney, ara bay ko dagur, ma bay ni oge kireb roraed ngoraed u tagilʼ e pufthin ku Kristus ni fare Fak, nge Got ni fare Chitamangiy, nge fare Kan ni Thothup, niʼir e taʼre Got ni Manechubog, ni ngan pufthin nagraed u rogon e pi muruwel roraed, ko ba mangil fa ba kireb.

45 Ere chiney, e musap, kug non ngom ni morngaʼagen e yamʼ nra tay e dowef, nge ku morngaʼagen fare foskoyamʼ nra tay e dowef. Gube yoeg ngom ni biney e dowef e ra fos nga lan rebo dowef ni dab ki yimʼ bayay, ni ngan faseg ko yamʼ, ni arame bin sommʼon e yamʼ ni nge yibi yafos, ni dab kur mʼaed bayay; ni ke sul e yaʼel roraed ko dagur roraed, ni dab kur kiiʼ gow bayay; ma arame faʼanem ni poloʼ e ke bangey e yaʼel ma dab ki yimʼ, ni dab kur guyew e yamʼ ni ma tay e dagur.

46 Ere chiney, e napʼan ni ke muʼ Amulek i yoeg e pi thin ney ma fapi gidiiʼ e ki balyangaenʼraed bayay, nge ku arragon ngakʼ Zeezrom ni rur ni murus. Ere me mus e pi thin rokʼ Amulek, ara kemus oren e tin nug yoloey.