1 Idahaemi okodu ke mbet Mosiah ete kpukpru owo emi ekedide ebiere ikpe mbet, mme mbon emi ekemekde ete edi mme ebiere ikpe, ke ana nte ebɔ utip nte asaŋade ye ini emi mmɔ enamde utom ndibiere ikpe nnɔ mbon emi edade edi ke iso mmɔ man ebiere ikpe enɔ.

2 Idahaemi edieke owo akamade owo efen isɔn, ndien enye esin ndikpe se enye akamade, etɔt enye enɔ ebiere ikpe; ndien ebiere ikpe anam unen, ndien ɔdɔŋ mme anam utom ete eda owo oro edi ke iso esie; ndien enye ebiere ikpe ɔnɔ owo oro nte asaŋade ye mbet ye mme ikɔ ntiense emi ekedade edi ebaŋa enye, ndien ke ntre eyenam owo oro ete ekpe se enye akakamade, midihe ebɔ enye, mme ebin enye esio ke otu mme owo nte inɔ ye owo ŋwo.

3 Ndien ebiere ikpe ɔbɔ nte utip esie nte asaŋade ye ini esie—senine gold kiet ke usen, mme senum sidibe kiet ke usen, emi edide ukem ukem ye senine gold kiet, ndien emi edi nte asaŋade ye ibet emi ekenɔde.

4 Idahaemi emi edi mme enyiŋ nsio nsio mbio gold mmɔ, ye eke sidibe mmɔ, nte asaŋade ye ekɔm urua mmɔ. Ndien edi mme Nephite enɔ mme enyiŋ, koro mmɔ ikibatke ke utɔ eke mme Jew emi ekedude ke Jerusalem; nko mmɔ iki domoke ke utɔ eke mme Jew; edi mmɔ ekpuhɔde ibat mmɔ ye udomo mmɔ, nte asaŋade ye ekikere ye idaha mme owo, ke ofuri emana, tutu ukara mme ebiere ikpe, ke edide edidem Mosiah akasiak mmɔ.

5 Idahaemi ibat emi edi ntem—senine gold kiet, seon gold kiet, shum gold kiet, ye limnah gold kiet.

6 Senum sidibe kiet, amnor silver kiet, ezrom sidibe kiet, ye onti sidibe kiet.

7 Senum sidibe kiet ekedi ukem ukem ye senine gold kiet, ndien kiet ekededi edi ɔnɔ udomo barley kiet, ndien ŋko edi udomo kpukpru utɔ mkpasip.

8 Idahaemi udomo seon gold kiet ekedi ekɔm urua senine iba.

9 Ndien shum gold kiet ekedi ekɔm urua seon iba.

10 Ndien limnah gold kiet ekedi ekɔm urua kpukpru mmɔ.

11 Ndien amnor sidibe kiet okokpon nte senum iba.

12 Ndien ezrom silver kiet okokpon nte senum inaŋ.

13 Ndien onti kiet okokpon nte kpukpru mmɔ.

14 Idahaemi emi edi ekɔm urua mkpri ibat mmɔ—

15 Shiblon kiet edi ibio senum kiet; ke ntak oro, shiblon kiet edi ɔnɔ ibio udomo barley kiet.

16 Ndien shiblum kiet edi ibio shiblon kiet.

17 Ndien leah kiet edi ibio shiblum kiet.

18 Idahaemi emi edi ibat mmɔ, nte asaŋade ye ibat mmɔ.

19 Idahaemi antion gold kiet edi ukem ukem ye shiblon ita.

20 Idahaemi, ekedi ke ŋkukure ntak ndinyene udori, koro mmɔ ekebɔ utip mmɔ nte asaŋade ye utom mmɔ, ke ntak oro, mmɔ ema ebumere mme owo enɔ mme eŋwan, ye kpukpru utɔ eŋwan ye ibak, man mmɔ enyene ediwak utom, man mmɔ enyene okuk nte asaŋade ye mme ikpe emi ekedade edi ke iso mmɔ; ke ntak oro mmɔ ema ebumere mme owo ebaŋa Alma ye Amulek.

21 Ndien Zeezrom emi ɔtɔŋɔ ndibup Amulek mbume, ete: Ndi afo ɔyɔbɔrɔ mi mme mbume ifaŋ emi ami ndibupde fi? Idahaemi Zeezrom ekedi owo emi ekenyenede ifiɔk eti eti ke abaŋa mme ŋkari satan, man enye abiat enye emi ɔfɔnde; ke ntak oro, enye ɔdɔhɔ Amulek ete: Ndi afo eye ɔbɔrɔ mme mbume emi ami ndibupde fi?

22 Ndien Amulek ɔdɔhɔ enye ete: Iŋ, edieke asaŋade ye Spirit Jehovah, emi odude ke ami; koro ami nditiŋke ŋkpɔ ndomo kiet emi misaŋake ye Spirit Jehovah. Ndien Zeezrom ɔdɔhɔ enye ete: Sese, se onti sidibe itiokiet mi, ndien kpukpru emi ke ami ndinɔ fi edieke afo edikaŋde ete ke Abasi Andikpon Nkan odu.

23 Idahaemi Amulek ɔdɔhɔ ete: O afo eyen hell, ntak emi afo odomode mi? Ndi afo ufiɔkke ete ke ndinen owo iduɔhɔ ke mme utɔ idomo ntre?

24 Ndi afo ɔbuɔtidem ete ke Abasi iduhe? Ami ndɔhɔ fi, Iŋ iŋ, afo ɔmɔfiɔk ke Abasi odu, edi afo ama udori oro akan enye.

25 Ndien idahaemi afo omosu nsu ke iso Abasi ɔnɔ mi. Afo ɔdɔhɔ mi ete—Sese emi edi onti itiokiet, emi enyenede akwa ufɔn, ami nyenɔ fi—ke ini afo ekenyenede ke esit fo ndinim mmɔ mkpɔŋ mi; ndien ekedi ata udɔŋ fo ete yak ami nkaŋ akpanikɔ ye odu uwem Abasi, man afo enyene ntak ndiwot mi. Ndien idahaemi sese, ke ntak akwa idiɔk emi afo eyenyene utip fo.

26 Ndien Zeezrom ɔdɔhɔ enye ete: Afo ɔdɔhɔ ke akpanikɔ ke odu uwem Abasi odu?

27 Ndien Amulek ɔdɔhɔ ete: Iŋ, akpanikɔ ye odu uwem Abasi odu.

28 Idahaemi Zeezrom ɔdɔhɔ ete: Ndi Abasi awak akan kiet?

29 Ndien enye ɔbɔrɔ ete, Iŋ iŋ.

30 Idahaemi Zeezrom afiak ɔdɔhɔ enye ete: Afo anam didie ɔfiɔk mme ŋkpɔ emi?

31 Ndien enye ɔdɔhɔ ete: Angel akanam mi mfiɔk mmɔ.

32 Ndien Zeezrom afiak ɔdɔhɔ ete: Anie owo edi enye emi edidide? Ndi edi Eyen Abasi?

33 Ndien enye ɔdɔhɔ enye ete, Iŋ.

34 Ndien Zeezrom afiak ɔdɔhɔ ete: Ndi enye ayanyaŋa ikɔt esie ke mme idiɔk ŋkpɔ mmɔ? Ndien Amulek ɔbɔrɔ onyuŋ ɔdɔhɔ enye ete: Ami ndɔhɔ fi ke enye idinyaŋake, koro enye idikemeke ndikaŋ ikɔ esie.

35 Idahaemi Zeezrom ɔdɔhɔ mme owo ete: Ekut ete ke mbufo emeti mme ŋkpɔ emi; koro enye ɔdɔhɔ ke edi Abasi kiet odu; edi enye ɔdɔhɔ ke Eyen Abasi eyedi, edi ke enye idinyaŋake ikɔt esie—nte enye enyene unen ndinɔ Abasi uyo.

36 Idahaemi Amulek afiak ɔdɔhɔ enye ete: Sese afo omosu nsu, koro afo ɔdɔhɔ ke ami ntiŋ ikɔ nte ami menyene unen ndinɔ Abasi uyo ke ntak emi ami ndɔhɔde ke enye idinyaŋake ikɔt esie ke mme idiɔk ŋkpɔ mmɔ.

37 Ndien ami mfiak ndɔhɔ fi nte ke enye ikemeke ndiyaŋa mmɔ ke mme idiɔk ŋkpɔ mmɔ; koro ami nkemeke ndikaŋ ikɔ esie, ndien enye ɔdɔhɔ ete ke ŋkpɔ emi misanake ikemeke ndida obio ubɔŋ heaven nnyene; ke ntak oro, didie ke edinyaŋa mbufo, ibɔhɔke mbufo eda obio ubɔŋ heaven enyene? Ke ntak oro, owo ikemeke ndiyaŋa mbufo ke mme idiɔk ŋkpɔ mbufo.

38 Idahaemi Zeezrom afiak ɔdɔhɔ enye ete: Ndi Eyen Abasi edi ata Nsinsi Ete?

39 Ndien Amulek ɔdɔhɔ enye ete: Iŋ, enye edi ata Nsinsi Ete enyɔŋ ye isɔŋ, ye kpukpru ŋkpɔ emi ke mmɔ edude; enye edi ntɔŋɔ ye utit, akpa ye akpatre.

40 Ndien enye eyedi ke ererimbot man afak ikɔt esie; ndien enye ayada odori ke idem esie mme ndudue mbon emi ebuɔtde idem ke enyiŋ esie; ndien emi edi mmɔ emi edinyenede nsinsi uwem, ndien erinyaŋa isimke owo efen.

41 Ke ntak oro mme idiɔk owo eka iso edu nte owo ikinamke erifak, ibɔhɔke edi ke nditat mme uruk ŋkpa; koro sese, usen ke edi emi kpukpru owo edisetde ke mkpa enyuŋ eda ke iso Abasi, enyuŋ edikpe ikpe enɔ mmɔ nte utom mmɔ edide.

42 Idahaemi, mkpa odu emi ekotde mkpa emi edibede ifep; ndien mkpa Christ ayatat mme uruk mkpa emi edibede ifep emi, man kpukpru owo eset ke mkpa emi edibede ifep emi.

43 Eyefiak edian spirit ye obuk idem ke idem esie emi ɔfɔnde ama; eyefiak enim ke itie esie nte obot edide, ubɔk ye ndido mbiba, kpa nte nnyin idide ke ini emi; ndien eyeda nnyin idida ke iso Abasi, ifiɔk kpa nte nnyin ifiɔkde idahaemi, inyuŋ itim iti kpukpru ndudue nnyin.

44 Idahaemi, ndifiak nnim ke itie emi eyedi ɔnɔ kpukpru owo, akamba ye ekpri mbiba, ifin ye eyen isɔŋ mbiba, eren ye ŋwan mbiba, idiɔk owo ye nnen nnen owo mbiba; ndien kpa idet ibuot mmɔ ndomo kiet idisopke; edi eyefiak enim kpukpru ŋkpɔ ke itie esie ke nte ɔfɔnde ama, nte edide idahaemi, mme ke obuk idem, eyenyuŋ eda edi enyuŋ edaha ke ebiet uda ikpe ke esop eke Christ Eyen, ye Abasi Ete, ye Edisana Spirit, emi edide Nsinsi Abasi kiet, man ebiere ikpe nte utom mmɔ edide, mme mmɔ edi eti mme mmɔ edi idiɔk.

45 Idahaemi, sese, ami metiŋ ikɔ nnɔ mbufo mbaŋa mkpa eke obuk idem, ŋko ye ke abaŋa eriset ke mkpa eke obuk idem eke mkpa. Ami ndɔhɔ mbufo nte ke obuk idem eke mkpa emi eyeset edi obuk idem emi mikemeke ndikpa, oro edi oto ke mkpa, kpa ke akpa mkpa oduk ke uwem, man mmɔ ekukpa aba; spirit mmɔ ediana kiet ye obuk idem mmɔ, idiaŋakere tutu amama; ke ntre ofuri akabare edi eke spirit ye eke mikemeke ndikpa, man mmɔ ekukan ukut mbiara aba.

46 Idahaemi, ke ini Amulek ama eke okure mme ikɔ emi idem ɔtɔŋɔ ndikpa mme owo, ndien nko Zeezrom ɔtɔŋɔ ndinyek idem. Ndien ke ntem ke mme ikɔ Amulek eketre, mme emi edi kpukpru se ami ŋwetde.