1 Chiney e napʼan ni guy Alma ni fapi thin ku Amulek e ke tileg Zeezrom ko numon, ya ke guy Amulek ni ke koel ni be baen nag ma be sabaenbaen nag ni nge kireb nag, ere napʼan ni guy ni ke tabab ko tʼon ni murus ni bachan e nangaenʼ rokʼ u rogon e kireb rokʼ, me tabab ko numon ngakʼ, ni nge micheg fapi thin ku Amulek, ni nge tamilngeg bogi banʼen, ara nge weliy fan e pi thin nib thothup nge tamilang nag boch nga rogon ni ke rinʼ Amulek.

2 Ngiyalʼ ney e fapi thin ni weliy Alma ngakʼ Zeezrom e rungʼag fapi gidiiʼ ni yaed ba liyeg raed; ya fare ulung i gidiiʼ e rib yoʼor, me non ni aray rogon:

3 Chiney o Zeezrom, gur e kam guy ni kan koelem ko baen rom nge sasaliyeb rom, ya gur e gathi kam baen nag e gidiiʼ ya kam baen nag Got; ya musap, ire manang rogon e tafnaey rom, nge gur e kam guy ni pi tafnaey rom e kug nangew u dakean e Kan ni Thothup rokʼ;

4 Ere kam guy ni gamow manang ni tanam rom e ba sasalap, ni boed rogon fini sasalap fare moʼoniyanʼ, ya rogon mag baen nag, mag sasaliyeb ko pi gidiiʼ ney ni nge yog nra togopluw gaed ngomow, e ngam gathibthib nagmow mag chuwegmow—

5 Chiney e biney e ba tanam ko chaʼ ni toʼogor rom ni fare moʼoniyanʼ, ma ke gagyeg nag gelingin u fithikʼam. Ere chiney gubaʼadag ni ngam tay u wunʼum ni nʼen ni gube yoeg ngom e kug be yoeg ngakʼ gubin e gidiiʼ.

6 Ere musap gaed, gube yoeg ngomed ni gimed gubin ni rennʼey e ba wup rokʼ moʼoniyanʼ, ni ke tay ni nge koel e pi gidiiʼ ney, ni nge yog ni fekmed nga tanpaʼ, ni nge yog ni liyegmed ko chen rokʼ, ni nge yog ni chen nagmed nge taymed u butʼ ko gafgow ni dabimus biʼid, u rogon fare gelingin ni bay rokʼ ni nge kalbus nag e gidiiʼ ngay.

7 Ere napʼan ni ke weliy Alma e pi thin ney, me tabab Zeezrom ko tʼon ni ke almarin boech, ya fin be mich u waenʼ fare gelingin Got; ma ki mich u waenʼ ni Alma nge Amulek e bay e llowaenʼ rorow ni morngaʼagen, ya ke mich u waenʼ ni kar nangew e pi tafnaey rokʼ nge pi athap u gumʼirchaʼen; ya fare gelingin e kan piiʼ ngorow ni nge yog ni ngar nangew e pinnʼey u rogon fare nangaenʼ ko prophecy.

8 Ere Zeezrom e tabab i fithrow u fithikʼ e lʼagaenʼ ni nge yog ni nang boech morngaʼagen fare gilʼilungun Got. Me gaʼar ngakʼ Alma: Mangfan e bin baʼaray ni ke yoeg Amulek ni morngaʼagen fare foskoyamʼ ko pi yamʼ, ni gubin ma ra fos ko yamʼ, ni tin nib matʼaw nge tin dematʼaw, min fekraed ngar sakʼiy gaed nga pʼoewchen Got ni ngan pufthin nagraed u rogon e pi muruwel roraed?

9 Ere chiney e Alma e tabab i weliy fan e pinnʼey ngakʼ, ni gaʼar: Kan piiʼ ko gidiiʼ ni yoʼor ni ngar nanged e tin riyulʼ rokʼ Got nib miith; machane kan tay ba motochiyel nga dakeanraed ni dabra piiʼed ku beeʼ ma kemus nrogon e chuʼuw ni ke yoeg ko thin rokʼ ni ke piiʼ ngakʼ e gidiiʼ, u rogon e fol nge yulʼyulʼ ni yaed be tay ngakʼ.

10 Me ere, chaʼ nra ʼelʼel nag gumʼirchaʼen, e ireram e chaʼ nra yog ngakʼ e gin achig ko fare thin rokʼ; ma chaʼ ni dabi ʼelʼel nag gumʼirchaʼen, e ireram e chaʼ ni yira piiʼ ngakʼ e gin gaaʼ ko fare thin, nge madaʼ ko ngiyalʼ ni kan piiʼ ngakʼ ni nge nang e tin nib riyulʼ rokʼ nib miith nge madaʼ ko ngiyalʼ ni ke nang ni poloʼ.

11 Ma piʼin ni yaedra ʼelʼel nag gumʼirchaʼraed, e yira piiʼ e gin nib achig ko fare thin nge madaʼ ko ngiyalʼ ni dakuriy banʼen ni yaed manang u morngaʼagen e thin rokʼ nib riyulʼ nib miith; ma arame bayi koelraed fare moʼoniyanʼ nge fekraed ni kalbus, min wawliyraed nrogon ni baʼadag iyaen nga fithikʼ e gafgow. Ireray e nʼen ni be yipʼ fan ko fapi chen nu infierno.

12 Ma Amulek e weliy nib tamilang morngaʼagen e yamʼ, nge rogon ni ngan chuw ko biney e dodow ko dagur ngan yaen nga rebo dodow ko dagur ni dab ki yimʼ, min fek daed nga tagil e pufthin ku Got, ni ngan pufthin nagdaed u rogon e pi muruwel rodaed.

13 Ma arame faʼanra ud ʼelʼel niged gumʼirchaʼdaed, arragon, faʼanra kad ʼelʼel niged gumʼirchaʼdaed ni nge togopluw ko fare thin, nge yaeni madaʼ nga napʼan ni dakunir pirʼeg u fithikʼ daed, ma arame kad awgaed nga ba dodow ko murus, ya arame ngan gechig nagdaed.

14 Ya thin rodaed e yira gechig nagdaed riy, arragon, gubin e muruwel rodaed ma yira gechig nagdaed riy; ma dab ni pirʼeg daed ni dariy thibngidaed; nge pi tafnaey roraed e yira gechig nagdaed riy; ma biney e dodow ko kireb e dabi soraenʼdaed ni ngad puged oewchdaed riy ngalang ngad sap gaed ngakʼ e Got rodaed; ma kay gub felʼ ni faʼan gomanga rayog ni nga doeged ko pi yungi war nge pi burey nge muchbuʼ nga dakeandaed ni nge mithaeg daed u pʼoewchen.

15 Machane dabiyog ni aray rogon; thingar dabaed ngad sakʼiy gaed nga pʼoewchen ni bay u fithikʼ e rir rokʼ, nge gelingin, nge madangdang rokʼ, nge ir nib pilung, nge matʼawon ni bay, ma ngad nanged u fithikʼ e tamraʼ rodaed ni dabimus biʼid ni gubin e pufthin rokʼ mab matʼaw; ma ire ba matʼaw u fithikʼ gubin e muruwel rokʼ, mab murnguy e gidiiʼ, ma bay gubin i gelingin ni nge thapeg gubin e gidiiʼ nib michaenʼ nga fithingan ma yaed be rinʼ e ngongol ni be dag waʼamngin e kalngaenʼ.

16 Ere chiney e musap, gube yoeg ngom ni arame ra yib ba yamʼ, ni bin lʼagruw e yamʼ, ni yamʼ ni yaʼel; ma arame bayi taw nga napʼan ni enra yimʼ nga fithikʼ e pi denen rokʼ, ni yamʼ ko dagur, e ku ra yimʼ ni yamʼ ko yaʼel; arragon, ra yimʼ nge chuw ko pinʼen nib matʼaw.

17 Ma arame ngiyalʼ nem e napʼan gelingin e amith ko dowef roraed e ra boed ba lupath ko nifiy nge dramrom, ni be yaen e dramrom riy ngalang ni gubinfen ma dabi mʼay; ma arame ngiyalʼ nem e napʼan ni bay ni chen nagraed nga butʼ nga fithikʼ ba gafgow ni dabimus biʼid, u rogon fare gelingin nge kalbus ku Moʼoniyanʼ, ni bachan e ke mʼag raed ngakʼ ni boed rogon ni baʼadag.

18 Ma arame, gube yoeg ngom, bay ra pired ni gowa dariy e bayul ntay ni fan ngoraed; ya dabiyog ni ngan bayuliyraed u rogon e justice ku Got; ma dabra mʼaed, ya dakuriy e yamʼ.

19 Ere chiney e yibi buch u napʼan ni ke muʼ Alma i weliy e pi thin ney, ma ki gel boech e balyangaenʼ ko fapi gidiiʼ;

20 Machane bay beeʼ nib moʼon ni Antionah fithingan, niʼir e pilung ko mitethin u fithikʼraed, me yibi gaʼar ngakʼ: Mang e biney ni kamoeg, ni gidiiʼ e ra fos ko yamʼ me chuw ko biney e dodow ko dagur nge yaen nga rebo dodow ko dagur ni dabi yimʼ, ni kamoeg ni dabi yimʼ e yaʼel?

21 Manga be yipʼ fan fare thin nib thothup, ni be yoeg ni Got e ke tay e matanag nu tharmiy nge bangi sayden ni be dramrom nga baʼan ngek farengi mileayʼ nu Eden, ni nga dabi yaen fagal nib mʼon e gallabthir ngay ngar kayew waʼamngin fare ke gakʼiy ko yafos, mar pirew ni gubinfen? Ere kug guyed ni dariy liyiben me yog ni nggu pired ni gubinfen.

22 Ere Alma e gaʼar ngakʼ: Ireray e renʼen ni gube yaen ni nggu weliy fan. Chiney e kad guyed ni Adam e mul ni fan e kay fare waʼamngin ni mathngeluwol, ni boed rogon ni yoeg Got; ere kadguyed, ni bachan e mul ni tay, me gubin e gidiiʼ me malog mar mul gaed.

23 Ere chiney e musap, gube yoeg ngom ni faʼan manga boech ni gathi bachan Adam ni kay fare waʼamngin fare ke gakʼiy ko yafos ko ngiyalʼ nem, ma dariy e yamʼ, ma fare thin ni yoeg Got e ke mʼay fan, ma yaeni aw ni Got e ba tabaen, ya gaʼar: Faʼan gara kay ma gara yimʼ.

24 Ere kad guyed ni ke yibi aw e yamʼ nga dakean e gidiiʼ, arragon, fare yamʼ niʼir e ke weliy Amulek morngaʼagen, ni ireram fare yamʼ ko dagur; yug aram rogon machane bay ba ngiyalʼ i banʼen nni piiʼ ko gidiiʼ ni nge kalngaenʼ riy; ere biney e yafos e kemang ba ngiyalʼ i banʼen ni ngan sikeng nigey riy; ba ngiyalʼ i banʼen ni ngan falʼeg rogoy riy ni ngan madaʼ nag Got; ba ngiyalʼ i banʼen ni ngan falʼeg rogoy ko fare dodow ni dariy nʼumngin i napʼan ni kug weliyew morngaʼagen, ni bay nga tomuren fare foskoyamʼ ko pi yamʼ.

25 Ere chiney, e faʼan manga boech ni gathi bachan fare woʼen e bayul, niʼir e ni yarmiy u napʼan nni sunmiy e fayleng, ma ra yaeni aw ni dariy e foskoyamʼ ko pi yamʼ; machane bay ba woʼen e bayul nni yarmiy ngan tay, niʼir e ra yib nag fare foskoyamʼ ko pi yamʼ, niʼir e kan weliy morngaʼagen.

26 Ere chiney e musap, faʼan manga yog ni yaen e gal nib sommʼon e labthir roraed ngar kayew waʼamngin fare ke gakʼiy ko yafos ma kar pirew u fithikʼ e kirbaenʼ ni tinoewey, ni bachan e dariy fare ngiyalʼ i nʼen ni ngan sikeng nagrow riy; me yaeni aw ni fare woʼen e bayul e dariy rogon, nge fare thin ku Got e mʼay fan, ma dariy angin.

27 Machane musap, gathi aram rogon; ya kan dugliy nga dakean e gidiiʼ ni thingar ra mʼaed; nge tomuren e yamʼ, ma thingar rabaed ngan pufthin, ni ireram fare pufthin ni kug weliyed morngaʼagen, ni ireram e tomur.

28 Ma tomuren ni Got e ke turguy ni pinnʼey e thingari yib ko gidiiʼ, me guy ni rib tʼuf ni gidiiʼ e thingar nanged morngaʼagen e pinʼen ni ke turguy nga dakeanraed;

29 Ere me lʼoeg e pi angel rokʼ ni ngar nongaed ngoraed, ni yaed e kar guyed rogon ni ngar guyed boech e rir rokʼ.

30 Ere ra tabab gaed ko ngiyalʼ innʼem iyaen nga mʼon i pining fithingan; ere Got e non ko gidiiʼ, me yoeg ngoraed morngaʼagen fare woʼen e bayul, niʼir e ni yarmiy u napʼan nni sunmiy e fayleng; ma rennʼey e dag ngoraed u dakean e mich roraed nge kalngaenʼ nge pi muruwel roraed nib thothup.

31 Ere, piiʼ e pi motochiyel ngakʼ e gidiiʼ, ni bachan e kar sommʼon gaed i thʼaeb e tin mʼon e motochiyel nib lʼeag rogon ko pinʼen nu fayleng, ma kar woeded bogi got, ni kar nanged e tin nib felʼ ko tin nib kireb, ni ra tayed yaed nga ba dodow ni ngar rinʼed, ara kan tay raed nga ba dodow ni ngar rinʼed nrogon ni yaed baʼadag mab mʼagaenʼraed ngay, ko ngar rinʼed e tin nib kireb fa ngar rinʼed e tin nib felʼ—

32 Ere Got e piiʼ e motochiyel ngoraed, u tomuren ni ke dag ngoraed fare woʼen e bayul, ni nge dab rrinʼed e tin nib kireb banʼen, ya gechig ni bay riy e bin lʼagruw e yamʼ, nib yamʼ ni dabimus biʼid ni bay rogon ko tin nib matʼaw banʼen; ya fare woʼen e bayul e dariy gelingin nga dakean e mitnem e banʼen, ya pi muruwel ko justice e dabiyog i siyeg, ya aram rogon fare yulʼyulʼ ku Got.

33 Machane Got e pining e gidiiʼ, u dakean fithingan Fak, (ni ireray fare woʼen e bayul nni yarmiy) ni gaʼar: Faʼan gimed ra kalngaenʼ, ma dab mu ʼelʼel niged gumʼirchaʼmed, ma arame ra wureng anʼug ngomed, u dakean fachaʼ ni Maʼagirag ni Fakag;

34 Ere, enra kalngaenʼ, ma dabi ʼelʼel nag gumʼirchaʼen, e ire chaʼ ni wureng anʼug ngakʼ u dakean fachaʼ ni Maʼagirag ni Fakag, min nʼaegfan e pi denen rokʼ; ma ireray e pichaʼ ni yaedra thap nga tafnag u tharmiy.

35 Ma enra ʼelʼel nag gumʼirchaʼen me rinʼ e tin nib tagan, e musap, gube micheg u fithikʼ e damomuw rog ni dabiyog ni ra thap nga tafnag u tharmiy.

36 Ere chiney, pi walageg, musap gaed gube yoeg ngomed, ni faʼan gimed ra ʼelʼel nag gumʼirchaʼmed ma dabiyog ni gimed rathap nga tafen Somoel; ere denen romed e be kʼaring e damomuw ngakʼ me piiʼ e gechig nga dakeanmed ni boed rogon ko bin sommʼon e makʼar damomuw ntay ngakʼ, arragon, rogon e thin rokʼ u napʼan e yay ni tomur e damomuw e ku aram rogon ko yan sommʼon, ni fare gafgow romed ni dabimus biʼid; ere, rogon e thin rokʼ, ko bin tomur e yamʼ, e ku aram rogon ko bin sommʼon.

37 Ere chiney, pi walageg, arragon ni kadguyed ni kadnanged e pinnʼey, mab bogi banʼen nib riyulʼ, ere ngad kalgaed ngaenʼdaed, ma dab kud ʼelʼel niged gumʼirchaʼdaed, ni nge siy da kʼarnged e damomuw ngakʼ Somoel ni Got rodaed ni nge yib nag e damomuw rokʼ nga dakeandaed ko bin lʼagruw e motochiyel rokʼ ni ke piiʼ ngodaed; ere nga daroed nga tagilʼ e toffan ku Got, ni kan falʼeg rogon ni boed ni ke yoeg.