1 Idahaemi Alma, ke okutde ete ke mme ikɔ Amulek ekibi Zeezrom inua, koro enye okut ete ke Amulek ama omum enye ke nsu ye abiaŋa esie ndiwot enye, ndien ke okutde ete ke enye ɔtɔŋɔ ndiyek idem mbaŋa ifiɔk ndudue esie, enye ɔkubɔre inua esie onyuŋ ɔtɔŋɔ nditiŋ ikɔ nnɔ enye, ye ndisɔŋɔ mme ikɔ Amulek, ye ndinam mme ŋkpɔ aŋwaŋa akan, mme ndiyarade ŋwed Abasi nkan se Amulek akanamde.

2 Idahaemi mme owo ema ekop ekanare mme ikɔ emi Alma eketiŋde ɔnɔ Zeezrom; koro otu owo ema ewak, ndien enye eketiŋ ntem:

3 Idahaemi Zeezrom, ke okutde ete ke eyarade fi ke nsu ye ŋkari fo, koro afo usuhu nsu unɔ mme owo ikpɔŋ edi afo omosu nsu ɔnɔ Abasi; koro sese, enye ɔfiɔk kpukpru ekikere fo, ndien afo omokut ete ke Spirit anam nnyin ifiɔk mme ekikere fo.

4 Ndien afo omokut ete ke nnyin imifiɔk ete ke uduak fo ekedi ata uduak ŋkari, nte ŋkari satan, man osu nsu ɔnɔ onyuŋ abiaŋa mme owo emi man afo anam mmɔ etɔhɔ ye nnyin, esuŋi nnyin enyuŋ ebin nnyin esio—

5 Idahaemi emi ekedi uduak asua fo, ndien enye enyene odudu esie ke idem fo. Idahaemi ami nyom yak afo eti ete ke se ami ntiŋde nnɔ fi ami ntiŋ nnɔ kpukpru owo.

6 Ndien idahaemi ami ndɔhɔ kpukpru mbufo nte ke ekedi afia asua, emi enye ekenimde ndimum mbon emi, man enye ada mbufo esin ke idak esie, man enye akanare mbufo okuk ye ŋkpɔkɔbi esie, man enye ɔkɔbi mbufo ke nsinsi nsobo, nte asaŋade ye odudu ŋkpɔkɔbi esie.

7 Idahaemi ke ini Alma ama eketiŋ mme ikɔ emi, Zeezrom ɔtɔŋɔ ndiyek idem ata eti eti, koro enye ama editim ɔfiɔk abaŋa odudu Abasi; ndien enye ŋko ama ɔfiɔk abaŋa ete ke Alma ye Amulek ema enyene ifiɔk ebaŋa enye, koro enye ama ɔfiɔk ete ke mmɔ ema enyene ifiɔk ebaŋa mme uduak ye mme ekikere esit esie; koro ema enɔ mmɔ odudu man mmɔ efiɔk mme ŋkpɔ emi nte asaŋade ye spirit prophecy.

8 Ndien Zeezrom ɔtɔŋɔ nditim mbup mmɔ, man enye ɔfiɔk mme ŋkpɔ efen abaŋa obio ubɔŋ Abasi. Ndien enye ɔdɔhɔ Alma ete: Nso ke emi ɔwɔrɔ emi Amulek etiŋde abaŋa eriset ke mkpa eke mkpa, ete ke kpukpru owo eyeset ke mkpa, edinen ye mbon emi minenke mbiba, ndien eda mmɔ edida ke iso Abasi man ebiere ikpe enɔ mmɔ nte utom mmɔ edide?

9 Ndien idahaemi Alma ɔtɔŋɔ ndinam mme ŋkpɔ emi aŋwaŋa enye, ete: Eyak ete ediwak owo efiɔk mme ndibe ŋkpɔ Abasi; edi enɔ mmɔ ɔkpɔsɔŋ uyo ete yak mmɔ ekutiŋ ikɔ ubaŋa ubak ikɔ esie ikpɔŋ emi enye ɔnɔde nditɔ owo, nte asaŋade ye ntiŋ-enyin ye ifik emi mmɔ enɔde enye.

10 Ndien ke ntak oro, enye emi edisɔŋde esit esie, ukem oro edibɔ ekpri ubak ikɔ; ndien enye emi midisɔŋke esit esie, enye ke edinɔ akamba ubak ikɔ, tutu enɔ enye ndifiɔk mme ndibe ŋkpɔ Abasi tutu enye ɔfiɔk mmɔ ɔyɔhɔ ɔyɔhɔ.

11 Ndien mmɔ emi edisɔŋde esit mmɔ, mmɔ ke edinɔ ekpri ubak ikɔ tutu mmɔ ifiɔkke ŋkpɔ ndomo kiet ibaŋa ndedibe ŋkpɔ esie; ndien satan omum mmɔ nte mbon ŋkpɔkɔbi, ndien uduak esie ada mmɔ oduk ke nsobo. Idahaemi emi edi se ŋkpɔkɔbi hell ɔwɔrɔde.

12 Ndien Amulek ama etiŋ iŋwaŋ-iŋwaŋ abaŋa mkpa, ye ndiset ke se inyenede ndikpa emi nsin ke idaha uwem emi mkpa miduhe, ye ndida ndi ke iso ebiet uda ikpe ke iso esop Abasi, man edikpe ikpe nte utom nnyin edide.

13 Ndien edieke esit nnyin ɔsɔŋde, iŋ, edieke nnyin isɔŋde esit nnyin ye ikɔ, tutu ete ke owo ikwe enye ke nnyin, ke ini oro ke idaha nnyin edidiɔk, koro ke ini oro ke edibiom nnyin ikpe.

14 Koro mme ikɔ nnyin eye obiom nnyin ikpe, iŋ, kpukpru utom nnyin eyebiom nnyin ikpe; nnyin idinanake ntɔi; ndien mme ekikere nnyin ŋko eye obiom nnyin ikpe; ndien ke idiɔk idaha emi nnyin idikemeke ndise Abasi; ndien nnyin iyedaresit edieke nnyin idikemede ndinɔ mme itiat ye mme obot uyo ete eduɔ efuk nnyin man edip nnyin ke iso esie.

15 Edi emi ikemeke ndidi ntre; ana nte nnyin idi inyuŋ ida ke iso esie ke ubɔŋ esie, ye ke odudu esie, ye ke ukeme esie, uteŋe, ye ukara, ye ifiɔk nsinsi but nnyin ete ke kpukpru ubiere ikpe esie edi edinen; ete ke enye edi edinen ke kpukpru utom esie, ndien ke enye enyene mbɔm abaŋa nditɔ owo, ndien ete ke enye enyene kpukpru odudu ndinyaŋa kpukpru owo emi ebuɔtde idem ke enyiŋ esie ye emi eŋwumde mfri emi ekemde ye erikabare esit.

16 Ndien idahaemi sese, ami ndɔhɔ mbufo ke ini oro ke mkpa edi, kpa ɔyɔhɔ mkpa iba, emi edide mkpa eke spirit; ini oro edi ini emi owo ekededi emi akpade ke mme idiɔk ŋkpɔ esie, ke mkpa emi edibede ifep, ŋko ayakpa mkpa eke spirit; iŋ, enye eye akpa ke mme ŋkpɔ emi abaŋade nnen nnen ido.

17 Ini oro edi ini emi mme ndutuhɔ mmɔ edibietde mkpɔdiɔhɔ ikaŋ ye brimstone, emi edeme esie ɔdɔkde enyɔŋ ke nsinsi ye nsisni; ndien ini oro edi ini emi edikɔbide mmɔ inim ke nsinsi nsobo, nte asaŋade ye odudu ye ŋkpɔkɔbi Satan, ke enye ama ekesin mmɔ ke idak uduak esie.

18 Ndien, ami ndɔhɔ mbufo, ke mmɔ eyetie nte erifak ikiduhe emi ekenamde; koro owo ikemeke ndifak mmɔ nte asaŋade ye nnen nnen ido Abasi; ndien mmɔ ikememke ndikpa, ke ekutde ke mbiara iduhe aba.

19 Idahaemi edikem ete ke ini Alma ama eketre nditiŋ mme ikɔ emi, idem ɔtɔŋɔ nditim mkpa mme owo;

20 Edi Antionah kiet ama odu, emi ekedide akpan ada ibuot ke otu mmɔ, ama edi onyuŋ ɔdɔhɔ enye ete: Nso idi emi emi afo etiŋde, ete ke owo ana eset ke mkpa onyuŋ ɔkpuhɔ ɔwɔrɔ ke eke mkpa emi oduk ke idaha emi mikemeke ndikpa, ete ke ukpɔŋ ikemeke ndikpa?

21 Ŋso ke ŋwed Abasi ɔwɔrɔ, emi ɔdɔhɔde ete ke Abasi ama enim cherubim ye asak ikan akaŋkaŋ ke edem usiaha utin iŋwaŋ Eden, mbak mme akpa ete ye eka nnyin ididuk inyuŋ idia mfri eto uwem, ndien edu uwem ke nsinsi? Ke emi nnyin imikut ete ke ufaŋ ikiduhe ete mmɔ edu uwem ke nsinsi.

22 Idahaemi Alma ɔdɔhɔ enye ete: Emi edi ŋkpɔ emi ami nkoyomde ndinam aŋwaŋa. Idahaemi nnyin imikut ete ke Adam ɔkɔduɔ ke ndidia mfri emi ekekpande ete ekudia, nte asaŋade ye ikɔ Abasi; ke emi nnyin imikut, ite ke oto ke iduɔ esie, kpukpru owo ekabare edi mbon ekesopde ye mbon ekeduɔde.

23 Ndien idahaemi sese, ami ndɔhɔ mbufo nte ke ekpedi ke ama emem ɔnɔ Adam ndidia mfri eto uwem ke ini oro, ke mkpa ikpiduhe, ndien ikɔ ekpedi ukpɔk, anam Abasi edi osu nsu, koro enye ɔkɔdɔhɔ ete: Edieke afo adiade ke akpanikɔ afo ayakpa.

24 Ndien nnyin ikut ite ke mkpa edi ɔnɔ owo, iŋ, mkpa emi Amulek eketiŋde abaŋa, emi edide mkpa emi edibede ifep; edi ini ama odu emi ekenɔde owo ete enye akabare esit; ke ntak oro uwem emi akabare edi ini idomo; ini ndibeŋe idem ndisobo ye Abasi; ini ndibeŋe idem nnɔ idaha anana utit emi nnyin ikitiŋde ibaŋa, emi edidide ke ini erieset ke mkpa eke mkpa ama ebe.

25 Idahaemi, edieke mikpidihe ke ntak uduak erifak, emi ekenimde tɔŋɔ ke eritɔŋɔ ererimbot, eriset ke mkpa eke mkpa ikpiduhe; edi ema enim uduak erifak, emi edidade eriset ke mkpa eke mkpa idi, emi etiŋde ebaŋa.

26 Ndien idahaemi sese, edieke ekpeke ememde ete mme akpa ete ye eka nnyin eka enyuŋ edia eto eto uwem mmɔ ekpe edu ke unana inemesit ke nsinsi, ke ini mbeŋ idem miduhe; ndien ke ntre ekpebiat uduak erifak, ndien ikɔ Abasi ekpedi ukpɔk, inyeneke ufɔn.

27 Edi sese, ikidihe ntre; edi ema enim enɔ mme owo ete ke ana nte mmɔ ekpa; ndien ke mkpa ama ebe, ana nte mmɔ edi ubiere ikpe, kpa ukem ubiere ikpe oro emi nnyin itiŋde ibaŋa, emi edide akpatre.

28 Ndien ke ini Abasi ama ekenim ete mme ŋkpɔ emi edi etiene owo, sese, ke ini oro enye okut ete ke ɔfɔn ete owo ɔfiɔk abaŋa mme ŋkpɔ emi enye ekenimde ɔnɔ mmɔ.

29 Ke ntak oro enye ɔdɔŋ mme angel ete eneme nneme ye mmɔ, emi akanamde mmɔ ekut ubɔŋ esie.

30 Ndien mmɔ etɔŋɔ ke ini oro ka iso ndikot enyiŋ esie; ke ntak oro Abasi eneme nneme ye mme owo, onyuŋ anam mmɔ efiɔk uduak erifak, emi ekenimde tɔŋɔ ke eritɔŋɔ ererimbot; ndien emi enye akanam mmɔ efiɔk nte mbuɔtidem mmɔ edide ye erikabare esit ye ndisana utom mmɔ.

31 Ke ntre, enye ɔnɔ mme owo ibet, ke mmɔ ekebemde iso edue mme akpa mbet ke abaŋa mme ŋkpɔ emi ekedide emi edibede ifep, enyuŋ ekabare etie nte mme abasi, efiɔk eti ye idiɔk, enim idem mmɔ ke idaha ndinam, mme ndinim ke idaha ndinam nte asaŋade ye mme uduak ye se mmɔ eyomde, mme ndinam idiɔk mme ndinam eti—

32 Ke ntak oro Abasi ɔnɔ mmɔ ibet, ke ini ama akaanam mmɔ efiɔk uduak erifak, ete mmɔ ekunam idiɔk ŋkpɔ, utip esie edi ɔyɔhɔ mkpa iba, emi ekedide nsinsi mkpa ke abaŋa mme ŋkpɔ abaŋade nnen nnen ido; koro uduak erifak inyeneke odudu inɔ utɔ oro, koro owo ikemeke ndibiat mme utom nnen nnen ido, nte asaŋade ye ima Abasi emi okponde akan.

33 Edi Abasi ama okot mme owo, ke enyiŋ Eyen esie, (ke emi edide uduak erifak emi ekenimde) ete: Edieke mbufo edikabarede esit, inyuŋ isɔŋke esit mbufo, ke ini oro ke ami ndinyene mbɔm mbaŋa mbufo, nto ke Ikpɔŋ-ikpɔŋ Eyen mi emi ami Mbonde;

34 Ke ntak oro, owo ekededi emi akabarede esit, inyuŋ isɔŋke esit esie, enye eyenyene unen ndibɔ mbɔm nto Ikpɔŋ-ikpɔŋ Eyen mi emi ami Mbonde, nnɔ erifen mme idiɔk ŋkpɔ esie; ndien mmɔ emi eyeduk ke nduɔk odudu esie.

35 Ndien owo ekededi emi edisɔŋde esit esie onyuŋ anam ukwaŋ-ŋkpɔ, sese, ami motomo ke iyaresit mi nte ke enye ididukke ke nduɔk odudu mi.

36 Ndien idahaemi, nditɔ eka mi, sese ami ndɔhɔ mbufo, nte ke edieke mbufo edisɔŋde esit mbufo ke mbufo ididukke ke nduɔk odudu Jehovah; ke ntak oro ukwaŋ-ŋkpɔ mbufo anam enye ete enye ɔdɔŋ iyaresit esie ɔnɔ mbufo kpa nte ke akpa iyaresit, iŋ, nte asaŋade ye ikɔ esie ke akpatre iyaresit ukem ukem nte ke akpa, ɔnɔ nsinsi nsobo ukpɔŋ mbufo; ke ntak oro, nte asaŋade ye ikɔ esie, ɔnɔ akpatre mkpa, ukem ukem ye akpa.

37 Ndien idahaemi, nditɔ eka mi, ke ikutde ite ke nnyin imɔfiɔk mme ŋkpɔ emi, ndien ke mmɔ edi akpanikɔ, yak nnyin ikabare esit, ikiunyuŋ usɔŋ esit nnyin, man nnyin ikunam Jehovah Abasi nnyin ada iyaresit esie ɔsuhɔre odori nnyin ke idem ke mme ɔyɔhɔ ibet esie iba emi emi enye ɔnɔde nnyin; edi yak nnyin iduk ke nduɔk odudu Abasi, emi enimde nte asaŋade ye ikɔ esie.