1 Ere ku bayay, o pi walageg, nggu sulweg e tafnaey romed ko fare ngiyalʼ innʼem u napʼan fare Somoel ni Got e piiʼ e pi motochiyel ney ngakʼ e gidiiʼ rokʼ; ma gubaʼadag ni ngam tayed u wunʼmed ni fare Somoel ni Got e yibliy e pi priest, u rogon e yaram rokʼ nib thothup, niʼir e boed fare gamʼing rokʼ fak, ni ngan fil e pi motochiyel ney ko gidiiʼ.

2 Ere pi priest nem e ni yibliy raed nrogon fare gamʼing rokʼ Fak, u ba yalen ni rayog ni nge nang fapi gidiiʼ riy rogon ni ngar athapeged Fak ni fan ko bayul.

3 Ere baʼaray rogon nni yibliy raed—ni piningraed min yarmiy raed u napʼan nni sunmiy e fayleng u rogon fare nangaenʼ ku Got ni bay nga mʼon, ya bachan e mich roraed nib gel nge pi muruwel roraed nib mangil; ni aram ko sommʼon nni pagraed ni ngar melʼeged e felʼ fa kireb; ere bachan e kar melʼeged e felʼ ma bachan e mich roraed nib gel, ere kan piningraed nga ba liw nib thothup, arragon, nga ba liw nib thothup nni falʼeg, u rogon, nni falʼeg ni fan ko bayul roraed.

4 Ere aray rogon nni piningraed ko biney e liw nib thothup ni bachan e mich roraed, ma boech e gidiiʼ e yaedra fek yathin fare Kan ni Thothup ku Got ni bachan e ʼelʼel ko gumʼirchaʼ roraed nge maʼew ko tafnaey roraed, ma, faʼan manga boech ni gathi aray rogon ma ke yog ni yib matʼawngiraed ni boed pi walagraed.

5 Ara ngan ngoch nag i weliy, ni aram ko sommʼon ma ur moyed ni taʼab toelingraed ngakʼ pi walagraed; ere aray rogon ni re liw ney nib thothup e ni yarmiy u napʼan nni sunmiy e fayleng ni fan ngakʼ e piʼin ni dabra ʼelʼel niged gumʼirchaʼraed, u langgin ngo fithikʼ fare bayul rokʼ fachaʼ ni Maʼagirag ni Fak, niʼir e ni dugliy ngay—

6 Ere aray rogon nni piningraed ko fare liw nib thothup, min yibliy raed nga tan fabin tolang e priesthood ko fare yaram nib thothup rokʼ Got, ni ngar filed fapi motochiyel rokʼ ngakʼ e gidiiʼ, ni ngki yog nra uned nga tagilʼ e toffan rokʼ—

7 Biney nib tolang e priesthood e yib u rogon fare gamʼing rokʼ Fak, nib gamʼing ni yib u napʼan nni sunmiy e fayleng; ara nga noeg, ni dariy tabolngin e pi rran riy fa dariy tungun e pi duw riy, nni yarmiy ni gubinechuboeg ko pi chuboeg, u rogon e nangaenʼ rokʼ nga mʼon ko gubin banʼen—

8 Chiney e baʼaray rogon nni yibliy raed—ni piningraed nga ba liw nib thothup, min yibliy raed nga ba gamʼing nib thothup, mar feked nga dakeanraed fabin tolang e priesthood ko fare yaram nib thothup, nib liw nge gamʼing, nge bin tolang e priesthood, ni dariy tabolngin ara tungun—

9 Aray rogon nra manged priest nib tolang ni gubinfen, u rogon e gamʼing rokʼ Fak, ni fachaʼ ni Maʼagirag ko fachaʼ ni Chitamangiy, niʼir e dariy tabolngin ko pi rran ara dariy tungun ko pi duw, niʼir e ba sug ko murnguy, nge matʼaw, nge riyulʼ. Ma aray rogon ni kan rinʼ. Amen.

10 Chiney, ni woed ni kugog faram morngaʼagen fare yaram nib thothup, ara fabin nib tolang e priesthood, ma boʼor e piʼin nni yibliy raed ngar manged bogi priest ku Got nib tolang; ere bachan e mich roraed nib gel nge kalngaenʼ, nge ngongol roraed nib matʼaw u mit Got, ya bachan e kar melʼeged ni ngar kalgaed ngaenʼraed mar rinʼed e muruwel nib matʼaw ko bin ni ngar gafgow gaed;

11 Ere ni piningraed ko fare yaram nib thothup, min machalbog nagraed, nge mad roraed e ni lukuy nge wechwech nga rachaʼen fare Saaf.

12 Ere yaed e, tomuren ni kan machalbog nagraed u dakean fare Kan ni Thothup, ni bachan e ke wechwech e mad roraed, ya kar machalbog gaed ma dakuriy thibngiraed u mit Got, ma dabiyog ni ngar lemniged e denen ya kar dubuyed; ma bayoʼor, ni rib yoʼor, e piʼin ni kar machalbog gaed ma ranoed nga gilʼ e toffan rokʼ fare Somoel ni Got roraed.

13 Ere chiney, pi walageg, gu baʼadag ni ngam mʼing niged gimed u pʼoewchen Got, ma gimed be rinʼ e muruwel nib lʼeag fan ko kalngaenʼ, ni nge yog ni kum uned ngaram nga tagilʼ e re toffan nem.

14 Arragon, mu gumud niged gimed ni boed fapi gidiiʼ u lan fapi rran ku Melchizedek, niʼir ma kub priest nib tolang u rogon fare gamʼing ni kugog, ni ku ire fek nga dakean fare priesthood nib tolang ni gubinfen.

15 Ma ku ireray e re Melchizedek niʼir e piiʼ Abraham ngakʼ taʼab guruy u ragag guruy ko pinʼen ni i thognag; arragon, ni mus ngakʼ e chitamangdaed i Abraham ma i piiʼ taʼab guruy u ragag guruy ko gubin banʼen rokʼ.

16 Chiney e pi gamʼing ney e aray rogon nni piiʼ, ni ireray e gin rayog ni nge sap e gidiiʼ riy ko wub nra tay fachaʼ ni Fak Got, niʼir bamit e gamʼing rokʼ, ara ire gamʼing rokʼ, ni biney e nrinʼ ni nge yog ni ngar sap gaed nga mʼon ko wub ni bayi tay ni ngan nʼaegfan e pi denen roraed, ni nge yog nra uned nga tafen Somoel;

17 Chiney e chaʼaney i Melchizedek e immoy nib pilung ko nam nu Salem; ma pi gidiiʼ rokʼ e kar almarin gaed ko denen nge ngongol ni kireb; arragon, yaed gubin ni kar malog gaed ko paʼarokʼ Got; ma kar suggaed ko gubin mite denen ni ubchiyaʼ;

18 Machane Melchizedek e ke muruwel ko mich nib gel, ma ke yog ngakʼ e liw ko fare priesthood nib tolang u rogon fare yaram nib thothup rokʼ Got, ere machib nag ko gidiiʼ rokʼ ni ngar kalgaed ngaenʼraed. Ere musap, ra kalgaed ngaenʼraed; ere Melchizedek e yognag e gapas nga lan fare nam u lan e pi rran rokʼ; ere aramfan nni pining niʼir e fak e pilung ko gapas, ya ire pilung nu Salem; ni paer ko lung u tanpaʼ e chitamangin.

19 Ma, immoy boech e gidiiʼ nib yoʼor nib mʼon rokʼ, ma kiyib boech nib yoʼor nga tomuren, machane dariy bagyaed nib soerokʼ ngakʼ; ere, aramfan niʼir e kan weliy morngaʼagen.

20 Chiney e de tʼuf ni ngar gu tamilngeg i weliy morngaʼagen; pinʼen ni kugog e susun e ba gaman. Musap, fapi chep nib thothup e bay romed; ma faʼanra ngam thilyeg fan ma bay mu feked wengan.

21 Ere chiney e yibi buch u napʼan ni ke muʼ Alma i yoeg e pi thin ney ngoraed, me kʼiyeg paʼ nga dakeanraed me yoeg ni rib gaaʼ laman, ni be gaʼar: Chiney e ireray e ngiyalʼ ni ngan kalngaenʼ, ya fare rran ni ngan thap riy e be chugur iyib;

22 Arragon, nge fare thin ku Somoel, u lʼugun e pi angel, e yibi weliy riy ngakʼ gubin e pi nam; arragon, be weliy, ni nge yog ngoraed fare morngaʼag nib mangil ni ma piiʼ e falfalaenʼ; arragon, ma be weliy e pi morngaʼag nib mangil u fithikʼ gubin e gidiiʼ rokʼ, arragon, ma ku aram rogon ngakʼ e piʼin ni kar garar gaed u dakean e fayleng; ere kar taw gaed ngodaed.

23 Ma pi thin nem e ni weliy ngomaed u bogi yalen, ni nge yog ni ngug nanged fan, me siy gu oloboch gaed; ni bachan e gamaed bogi milekag u dakean ba nam ni dagnanged fan; ere, gamaed ba tawaʼath, ya bay e pi morngaʼag ney nib mangil romaed ni kan weliy ngomaed u lan gubin yang e pi binaw romaed.

24 Ya musap, pi angel e yaed be weliy iyaen ngakʼ boʼor e gidiiʼ e ngiyalʼ ney u lan e binaw romaed; ma fan e biney e ngan munguy nag gumʼirchaʼen e gidiiʼ ni ngar thapeged e thin rokʼ ko fare ngiyalʼ nra yib u fithikʼ e rir rokʼ.

25 Ere chiney e kemus ni gamaed be soen ni nggu rungʼaged e pi morngaʼag ni falfalaenʼ ni ngan weliy ngomaed u lʼugun e pi angel, ni morngaʼagen e wub nra tay; ya re ngiyalʼ innʼem nra yib, e dagnanged ko uw fini chugur. Gube athapeg ni nge runguyeg Got ni gomanga yib u lan e rran rog; machane gomanga yog ni kaney ara dab ki nʼuw napʼan, ma rug ra falfalaen riy.

26 Ma bay ni weliy nge nang e gidiiʼ nib matʼaw mab thothup, u lʼugun e pi angel, ko ngiyalʼ nra yib, ni nge yog ni fapi thin rokʼ e pi chitamangdaed e muguʼul, u rogon e pinʼen ni kar weliyed ni morngaʼagen, u rogon fare nangaenʼ ko prophecy ni bay roraed.

27 Ere chiney, pi walageg, gube athapeg u poloʼ i gumʼirchaʼeg, arragon, ni rib almarin ni gube amith riy, ni gomanga mmotoyil gaed ko thin rog, mi gimed pag e pi denen romed, ma dab ku munʼed yaran e kalngaenʼ romed.

28 Machane gube athapeg ni gomanga mu mʼing niged gimed u mit Somoel, mi gimed pining fithingan nib thothup, ma ngam uthumed oewchmed ma nga um meybil gaed nib pethpeth, ni nga dabiyog ni yibe lumel ngomed nge pag rogon nra yog romed, ma nge yog ni powiʼiymed fare Kan ni Thothup, ma ngam gumud gaed, mi gimed muding, mi gimed pag laniyaenʼmed, ma ngam gumʼaenʼ gaed, ma nge sug laniyaenʼmed ko murnguy, nge athamgil;

29 Me mich u wunʼmed fare Somoel; me yib ba athap ngomed nra yog ni ngam thapeged e yafos ni manechubog; me paer fare tʼufeg rokʼ Got ni gubin e ngiyalʼ u lan gumʼirchaʼmed, ni gomanga yog nni fekmed ngalang ko bin tomur e rran mi gimed yaen nga tafen.

30 Ma gube athapeg ni nge piiʼ Somoel ngomed ni ngam kalgaed ngaenʼmed, ni nge siy mu miliyed e damomuw rokʼ nga dakeanmed, ni nge siy ni mʼagmed ko fare chen nu infierno, ni nge siy mu gafgow gaed ko bin lʼagruw e yamʼ.

31 Ere Alma e ki weliy boech e thin nib yoʼor ngakʼ fapi gidiiʼ, ni dan yoloey nga langgin e kaney e babyor.