1 Ndien nko, nditɔ eka mi, ami nyada esit mbufo nka iso iso mbaŋa ini emi Jehovah Abasi ɔkɔnɔde nditɔ esie mme ibet emi; ndien ami moyom nte mbufo eti ete ke Jehovah Abasi ama enim mme oku, ke edisana utɔ esie, emi ekedide nte utɔ Eyen esie, ndikpep mme owo ŋkpɔ emi.

2 Ndien ekenim mme oku oro nte utɔ Eyen esie, ke usuŋ emi edide man otodo mme owo efiɔk usuŋ emi mmɔ edisede Eyen esie ibaŋa erifak.

3 Ndien emi edi usuŋ emi ekenimde mmɔ—ke ekekotde enyuŋ enimde tɔŋɔ ke eritɔŋ ererimbot nte asaŋade ye se Abasi ama ɔkɔfɔfiɔk, ke mbuk akamba mbuɔtidem mmɔ ye nti utom; ke akpa ifet ke ekeyakde ete emek eti mme idiɔk; ke ntak oro mmɔ ekemekde eti, enyuŋ enyenede ata akwa mbuɔtidem, ekot mmɔ ye edisana ikot, iŋ, ye edisana ikot oro emi ekenimde, ndien nte asaŋade ye, utɔ erifak emi ekebeŋede idem enɔ.

4 Ndien ntem ke ekekot mmɔ esin ke edisana ikot emi ke ntak mbuɔtidem mmɔ, ke ini mbon efen esinde Spirit Abasi ke ntak isɔŋesit mmɔ ye mme nnan esit mmɔ, ke ini, ekpedi ikidihe ke ntak emi mmɔ ekpekenyene akwa ufaŋ nte nditɔ eka mmɔ.

5 Mme ke akpatre, ke akpa ifet mmɔ ekedu ke ukem idaha ye nditɔ eka mmɔ; ke ntem edisana ikot emi ke ekenim tɔŋɔ ke eritɔŋɔ ererimbot enɔ utɔ mmɔ emi midisɔŋke esit mmɔ, ke edide ye ke ebede ke usio-isop Ikpɔŋ-ikpɔŋ Eyen emi eke Ebonde, emi ekenimde—

6 Ndien ke ekotde ntem ke edisana ikot emi, enyuŋ enimke akwa oku eke edisana utɔ Abasi, man ekpep nditɔ owo mme ibet esie, man mmɔ ŋko eduk ke nduɔk odudu esie.

7 Akwa oku emi edide ke nte utɔ Eyen esie, utɔ emi ekedide tɔŋɔ ke eritɔŋɔ ererimbot; mme ke mme ikɔ efen, ke edide emi minyeneke ntɔŋɔ mme usen mme utit mme isua, ke ekenimde tɔŋɔ ke nsinsi tutu kpukpru nsinsi, nte asaŋade ye se enye ekebemde iso ɔfiɔk abaŋa kpukpru ŋkpɔ—

8 Idahaemi ekenim mmɔ ke utɔ usuŋ emi—ke ekekotde mmɔ ye edisana ikot, enyuŋ enim ye edisana edinam, enyuŋ eda enɔ idem mmɔ edisana utɔ akwa oku, ikot emi, ye edinam, ye akwa oku, inyeneke ntɔŋɔ mme utit—

9 Ke ntem mmɔ ekabare edi mme akwa oku ke nsinsi, nte utɔ Eyen, Ikpɔŋ Eyen Ete, emi minyeneke ntɔŋɔ mme usen mme utit mme isua, emi ɔyɔhɔde ye mfɔn, edinen, ye akpanikɔ. Ke emi ke edi. Amen.

10 Idahaemi, nte nketiŋde ke abaŋa edisana utɔ, mme akwa oku emi, ediwak ema edu emi ekenimde enyuŋ ekabare edi akwa oku Abasi; ndien ekedi ke ntak akamba mbuɔtidem ye erikabare esit mmɔ, ye nnen nnen ido mmɔ ke iso Abasi, sia mmɔ ekemekde ndikabare esit nyuŋ nnam nnen nnen ido idihe nditak;

11 Ke ntak oro ekekot mmɔ ete ebɔ edisana utɔ emi, enyuŋ enam esana, ndien eyet ɔfɔŋ mmɔ efia eto ke iyip Eyen erɔŋ.

12 Idahaemi mmɔ, ke ini ema ekenam esana oto Edisana Spirit, ke ema ekenam ɔfɔŋ mmɔ efia, esana enyuŋ enana ntɔi ke iso Abasi, ikemeke ndise idiɔk ŋkpɔ ibɔhɔke edi ndisua; ndien ediwak ema edu, ewak ata eti eti, emi ekenamde esana ye emi ekedukde ke nduɔk odudu Jehovah Abasi mmɔ.

13 Ndien idahaemi, nditɔ eka mi, ami moyom nte yak mbufo esuhɔre idem mbufo ke iso Abasi, enyuŋ eŋwum mfri emi ekemde ye erikabare esit, man mbufo ŋko eduk ke nduɔk odudu oro.

14 Iŋ, esuhɔre idem mbufo kpa nte mme owo ke eyo Melchizedek, emi ekedide akwa oku ŋko nte asaŋade ye utɔ emi emi ami ntiŋde, emi ɔkɔbɔde akwa oku ɔnɔ idem esie ŋko ke nsinsi.

15 Ndien ekedi kpa Melchizedek emi ke Abraham ekekpe mme ubak kiet ke mme itie duop ɔnɔ; iŋ, kpa ete nnyin Abraham ama ekpe mme ubak kiet ke mme itie duop nte ubak kiet ke itie duop ke kpukpru se enye ekenyenede.

16 Idahaemi ekenɔ mme edinam emi ke utɔ usuŋ emi, man otodo mme owo ebeŋe idem ebet Eyen Abasi, enye edide utɔ utɔ esie, mme enye edide utɔ esie, ndien emi man mmɔ ese enye ebaŋa erifen mme idiɔk ŋkpɔ mmɔ, man mmɔ eduk ke nduɔk odudu Jehovah.

17 Idahaemi Melchizedek emi ekedi edidem ke isɔŋ Salem; ndien ikɔt esie ema ekop odudu ke ukwaŋ-ŋkpɔ ye mbubiam ido; iŋ, kpukpru mmɔ ema eyo; mmɔ ekeyɔhɔ ye kpukpru utɔ ibak;

18 Edi Melchizedek ke ekenyenede akamba mbuɔtidem, onyuŋ ɔbɔde itie utom nte akwa oku nte asaŋade ye edisana utɔ Abasi, ama ɔkwɔrɔ erikabare esit ɔnɔ ikɔt esie. Ndien sese, mmɔ ema ekabare esit; ndien Melchizedek ama asiak emem ke isɔŋ ke eyo esie; ke ntak oro ekekot enye ɔbɔŋ emem, ke ntak emi enye ekedide edidem Salem; ndien enye ama akara ke idak ete esie.

19 Idahaemi, ediwak ema edu mbemiso enye, ndien ŋko ediwak ema edu ke ini oro ekebede, edi ndomo kiet ikikponke ikan, ke abaŋa enye mmɔ etiŋ saŋa saŋa ebaŋa.

20 Idahaemi ami nyomke nditiŋ mbaŋa ŋkpɔ emi; se ami ntiŋde akpana ekem. Sese, mme ŋwed Abasi ana mbufo ke iso; edieke mbufo eyurɔre mmɔ eyedi enɔ nsobo mbufo.

21 Ndien idahaemi edikem ete ke ini Alma ama eketiŋ mme ikɔ emi ɔnɔ mmɔ, enye anyan mmɔ ubɔk esie onyuŋ ofiori ke ɔkpɔsɔŋ uyo, ete: Idahaemi edi ini ndikabare esit, koro usen erinyaŋa ke ekpere;

22 Iŋ, ndien uyo Jehovah, oto ke inua mme angel, etiŋ enye ɔnɔ kpukpru idut; iŋ, etiŋ enye, man mmɔ enyene nti mbuk akwa idaresit; iŋ, ndien enye etiŋ nti mbuk emi ke ufɔt kpukpru ikɔt esie, iŋ, ɔnɔ kpa mmɔ emi esuande ke aŋwa ke iso isɔŋ; ke ntre mmɔ edi etiene nnyin.

23 Ndien enam nnyin ifiɔk mmɔ ke iŋwaŋ-iŋwaŋ usuŋ, man aŋwaŋa nnyin, man nnyin ikudue; ndien emi ke ntak emi nnyin idide mbio eyode ke esen idut; ke ntak oro, etim ediɔŋ nnyin, koro etiŋ nti mbuk emi enɔ nnyin ke ofuri ikpehe iŋwaŋ-vine nnyin.

24 Koro sese, mme angel ketiŋ enye enɔ ediwak idaha emi ke obio nnyin; ndien emi edi ke ntak ndibeŋe esit nditɔ owo man ebɔ ikɔ esie ke ini emi enye edidide ke ubɔŋ esie.

25 Ndien idahaemi nnyin ibet ndikop nte etiŋde etop idaresit emi enɔ nnyin oto ke inua mme angel, ebaŋa edidi esie; koro ini kedi, nnyin ifiɔkke nte edisɔpde. Mbeŋe nte edi ke eyo mi; edi yak okubihi ukaha mme ke ini iso, ke enye ke ami ndidaresit.

26 Ndien eyenam ndinen ye ndisana owo efiɔk, oto ke inua mme angel, ke ini edidi esie, man mme ikɔ mme ete nnyin osu, nte asaŋade ye se mmɔ etiŋde ebaŋa enye, emi ekedide nte asaŋade ye spirit prophecy emi okodude ke mmɔ.

27 Ndien idahaemi, nditɔ eka mi, ami maduak ke ntɔtuŋɔ esit mi, iŋ, ye akwa udɔŋ tutu esim ubiak, nte yak mbufo ekpaŋ utɔŋ enɔ mme ikɔ mi, enyuŋ ebin mme idiɔk ŋkpɔ mbufo eduɔk, ndien isikke usen erikabare esit mbufo inɔ iso;

28 Edi ete ke mbufo eyesuhɔre idem mbufo ke iso Jehovah, enyuŋ ekot edisana enyiŋ esie, enyuŋ ekpeme enyuŋ ebɔŋ akam kpukpru ini, man ekudomo mbufo ukan se ekemede ndiyɔ, ndien ke ntem Edisana Spirit ada usuŋ, ekabare esuhɔre idem, edi suŋ-suŋ, esuhɔre ibuot, enyene ime, eyɔhɔ ye ima ye kpukpru anyan ime.

29 Enyene mbuɔtidem ke Jehovah; enyene idorienyin ete ke eyenyene nsinsi uwem; enyene ima Abasi kpukpru ini ke esit mbufo, man emenere mbufo ke enyɔŋ ke akpatre usen enyuŋ eduk ke nduɔk odudu esie.

30 Ndien yak Jehovah ɔnɔ mbufo erikabare esit, man mbufo ekuda iyaresit esie udori mbufo ke idem, man mme nkpɔkɔbi hell ekubɔp mbufo unim, man mbufo ekukpa ɔyɔhɔ mkpa iba.

31 Ndien Alma ama etiŋ ediwak mme ikɔ efen ɔnɔ mme owo, emi owo miwetke ke ŋwed emi.