1 Me yibi buch u tomuren ni ke muʼ ko numon ngakʼ fapi gidiiʼ mab yoʼor i yaed e ke michaenʼ ko thin rokʼ, mar tabab gaed ko kalngaenʼ, mar biʼeged fapi chep nib thothup.

2 Machane tin yoʼor i yaed e yaed baʼadag ni gomanga yog nra liiʼed Alma nge Amulek; ya kar damomuw gaed ngakʼ Alma, ni bachan e thin rokʼ nib matabgol ngakʼ Zeezrom; ma kuroeged ni Amulek e ke baen nagraed, ma ke togopluw ko motochiyel roraed nge pi lawyer nge pi tapuf-oloboch roraed.

3 Ma kur damomuw gaed ngakʼ Alma nge Amulek; ni bachan e kar yipʼew nga oewchraed e pi ngongol roraed nib kireb, mar gayed rogon ni ngar makath niged yow.

4 Machane yibi buch ni dar rinʼed; ere rafeked row ngan mʼagrow ko gaf nib el, min fekrow iyaen nga pʼoewchen fare pilung ko tapuf-oloboch ko fare binaw.

5 Ma fapi gidiiʼ e rabaed ngar nongaed nib togopluw ngorow—ni yaed be yoeg ni kar togopluw gow ko motochiyel, nge pi lawyer nge pi tapuf-oloboch roraed ko binaw, nge gubin e gidiiʼ ni ur moyed u lan e binaw; ma kur michegew ni kemus ni taʼareb e Got ni bay, ma bayi piiʼ Fak nge yib nga fithikʼ e gidiiʼ, machane dabi thapegraed; nge kub yoʼor boech banʼen ni yoeg fapi gidiiʼ nib togopluw ngakʼ Alma nge Amulek. Ere chiney e biney e nʼen e nrinʼ u pʼoewchen fare pilung ko tapuf-oloboch ko fare binaw.

6 Me yibi buch ni Zeezrom e gin oewchen ko pi thin ni kan weliy; ma kumnang morngaʼagen fare maʼew u laninʼuy, ni ke piiʼ nga fithikʼ fapi gidiiʼ u dakean e pi thin rokʼ ni baen; ma arame tabab nag e magafaenʼ ni ke tamilngaenʼ ko kireb rokʼ; arragon, me tabab i chalongbiy fare gechig ni amith nu infierno.

7 Me yibi buch ni arame tabab ko numon ngakʼ fapi gidiiʼ, ni be gaʼar: Musap gaed, gag e bbuch e rog, ma gali pumoʼon ney e dariy thibngirow u mit Got. Me tabab i wenig nagrow ko ngiyalʼ nem iyaen nga mʼon; machane mar togopluw gaed ngakʼ, ni yaed be gaʼar: Gur e ki gabliyem fare moʼoniyanʼ? Mar thuw gaed nga dakean, mar feked ngar chuweged u fithikʼraed, nge ku piʼin ni ke michaenʼraed ko fapi thin ni weliy Alma nge Amulek; e kur chuweged, mar lʼoeged e pumoʼon ni ngar paged e malang ngoraed.

8 Mar feked pi leʼengiraed nge bitir roraed nga taʼabang, nge piʼin ni ke michaenʼraed fa kan fil ngoraed ni nge michaenʼ raed ko thin rokʼ Got mar guyed rogon ni thingar ninʼ raed nga mite nifiy; ma kur feked e pi babyor roraed ni bay fapi chep nib thothup riy, ngar yinʼed nga mite nifiy, ni nge moʼruf me mogothgoth ko nifiy.

9 Me yibi buch nra koeled Alma nge Amulek, ngar feked row iyaen nga tagilʼ e gin ni yima liiʼ e gidiiʼ riy, ni ngar guyew e gafgow ni be tay e piʼin ni be moʼruf ko nifiy.

10 Ere napʼan ni guy Amulek e gafgow ko amith ni be tay fapi ppin nge bitir ni yaed be moʼruf u mite nifiy, maki thamiy e amith; me gaʼar ngakʼ Alma: Buʼuw rogon ni rayog ni ngad pirew nga ud yaliyew e biney e gafgow? Ere mman ngad kʼiyegew paʼadow nga mʼon, ngad muruwel gow ko fare gelingin ku Got ni bay rodow, ngad thapegew raed u fithikʼ e dramrom.

11 Machane me gaʼar Alma ngakʼ: Fare Kan ni Thothup e be dugliyeg ni thingar dabgu kʼiyeg paʼag nga mʼon; ya fare Somoel e ke fekraed ngakʼ, u fithikʼ e rir rokʼ; ma ke pag ni nge buch e biney roraed, ara nge rinʼ fapi gidiiʼ e biney ngoraed, ni bachan e ʼelʼel u gumʼirchaʼraed, ni re pufthin nra tay ngoraed u fithikʼ e damomuw rokʼ e nge yog ni paer nib matʼaw; ma rachaʼen e piʼin nib machalbog e ra paer ni mich riy nib togopluw ngoraed, arragon, ma yira weliy nib togopluw ngoraed ko bin tomur e rran.

12 Ere gaʼar Amulek ngakʼ Alma: Musap, sana ku yaedra urufiy dow boch.

13 Me gaʼar Alma: Mpag nge buch nrogon ni be lemnag fare Somoel. Machane, musap, muruwel rodow e dawori mʼay; ere dabra urufiyed gadow.

14 Ere chiney e yibi buch u napʼan ni ke moʼruf doewngin fa piʼin ni kan ninʼraed nga mite nifiy, nge fapi chep ninʼ ngoraed nga mite nifiy, ma arame yib fare pilung ko tapuf-oloboch ko fare binaw nge yibi sakʼiy nga pʼoewchen Alma nge Amulek, ni kan mʼagrow; me bat nag linglingirow nga paʼ, me gaʼar ngorow: Tomuren e pinʼen ni kam guyew, ma kagmew ra machib bayay ngakʼ e pi gidiiʼ ney, ni nge yog ni nga ninʼraed nga lan e lupath ko nifiy nge dramrom?

15 Musap gow, kam guyew ni dariy gelingmew ni ngam thapegew e piʼin ni ka ninʼraed nga mite nifiy; ara thapegraed Got ni bachan e kar uned ko mich romew. Ma fare tapuf-oloboch e ki bat nag linglingirow bayay, me fithrow ni gaʼar: Manga kubay ni gimew ra yoeg?

16 Chiney e re tapuf-oloboch ney e be fol u rogon fare gamʼing nge mich ku Nehor, niʼir faram e liiʼ Gideon.

17 Me yibi buch ni Alma nge Amulek e daroegew banʼen ngakʼ; me bat nagrow bayay, me piiʼ row nga paʼ e police ni nga ninʼrow nga kalbus.

18 Ma napʼan ni ka ninʼ row nga kalbus u lan dalip e rran, me yib e pi lawyer nib yoʼor, nge tapuf-oloboch, priest, nge sensey, ni yaed bay ko mich nge taliw ku Nehor; mar baed nga langgin e kalbus ni ngar guyed yow, mar fithed ngorow morngaʼagen e chep nib yoʼor; machane dar piiʼew e fulweg roraed.

19 Me yibi buch ni fare tapuf-oloboch e sakʼiy nga pʼoewchrow, me gaʼar: Mangfan ni damur fulweg e thin ko pi gidiiʼ ney? Damnangew ni bay gelingig ni gura yinʼmew nga fithikʼ e dramrom? Me chiyliy ngorow ni ngar nonow; machane dariy banʼen ni ra fulwegew ngay.

20 Me yibi buch nra chuw gaed nga ranoed ko tin ni yaed be lemnag, machane kur suloed bayay ko bin migid e rran; ma fare tapuf-oloboch e ki bat nag bayay linglingirow. Ma kub yoʼor i yaed e kur baed ngar bat niged yow, ni yaed be gaʼar: Ka gamew ra sakʼiy bayay nga moegew thibngin e pi gidiiʼ ney, mi gimew gathibthib nag e motochiyel romaed? Faʼanra bay gelingmew ma mangfan ni damur chuwegew gimew u paʼmaed?

21 Ma bayoʼor bogi banʼen ni roeged ngorow, ur waʼachriyed nguwelraed nga dakeanrow, ma yaed be thuw nga dakeanrow, ma yaed be gaʼar: Buʼuw rogon yaʼamaed ni ra yaeni paer ni kan gathibthib nagmaed?

22 Ma kub yoʼor boech banʼen, arragon, gubin mit banʼen ma roeged ngorow; ma aray rogon ni ur muning gaed ngorow nib yoʼor e rran. Mar teleged e ggan rorow ni ngar mʼow ko bilig, nge raen ni ngar mʼow ko balel; ma kur lufed e mad rorow ni ngar pirew ni dariy e mad u dakeanrow; ma aray rogon nni mʼagrow ko gaf nib el, mi ninʼ row nga kalbus.

23 Me yibi buch u tomuren ni aram rogon ni kar gafgow gow nib yoʼor e rran, (u lan e bin ragag nge lʼagruw e rran, u lan e bin ragag e pul, u lan e bin ragag e duw ko lung ko fapi tapuf-oloboch nga dakean e gidiiʼ ku Nephi) ni fare pilung ko tapuf-oloboch ko binaw ku Ammonihah nge boʼor e sensey roraed nge lawyer roraed ni ranoed nga langgin fare kalbus ni bay Alma nge Amulek riy ni kan mʼagrow ko gaf.

24 Ma fare pilung ko tapuf-oloboch e sakʼiy nga pʼoewchrow, me bat nagrow bayay, me gaʼar ngorow: Faʼanra bay gelingin Got romew meʼere mu pithigew e pi gaf ney romew, ma arame ra mich u wunʼmaed ni fare Somoel e ra gatheay e pi gidiiʼ ney ni boed rogon ni kamoegew.

25 Me yibi buch ni yaed gubin ni ranoed ngar bat niged yow, ni taʼab nʼen e yaed be yoeg, nge madaʼ ko ngiyalʼ ni ke yaen e chaʼ ni tomur; ma napʼan ni ke non e chaʼ ni tomur ngorow me yib fare gelingin Got nga dakean Alma nge Amulek, mar bagbag gow ngar sakʼiy gow ngalang.

26 Ma Alma e meybil ni be gaʼar: Uw nʼumngin i napʼan ni nggu gafgow gow u fithikʼ e tiney e kirbaenʼ, O Somoel? O Somoel, mpiiʼ gelingmow u dakean e mich romow ngakʼ Kristus, nge madaʼ ko ngiyalʼ ni kan pagmow. Ere ra thʼibew fapi gaf ni kan mʼag ngorow; ma napʼan ni guy fapi gidiiʼ e biney, mar miil gaed, ya ke yib e murus ngoraed ya richey min gothogthey raed.

27 Me yibi buch ni rib gel e murus ni yib ngoraed nra awgaed riy nga butʼ, ma deyog nra taw gaed ko bin wean e mab ko fare kalbus; me rur e fayleng nib almarin, nge rungrung ko fare kalbus e pil nge ruw yang, me thig nge aw nga butʼ; ma fare pilung ko tapuf-oloboch, nge fapi chon e motochiyel, nge fapi priest, nge sensey, nra bat niged Alma nge Amulek, e ra mʼaed ko galyang i rungrung nem ni thig nga dakeanraed.

28 Ma Alma nge Amulek e rabow nga wuruʼ fare kalbus, ma dar madʼad gow; ya fare Somoel e ke piiʼ ngorow e gelingin, u rogon e mich rorow ngakʼ Kristus. Ma ku chingiyalʼ nem mar bow nga wuruʼ fare kalbus; ma ke puf e mʼag rorow; ma fare kalbus e ke puth nga butʼ, nge gubin e gidiiʼ ni ur moyed u langgin e ra mʼaed; ma kemus ni Alma nge Amulek, ma ku chingiyalʼ nem mar bow nga lan binaw.

29 Ngiyalʼ ney e gidiiʼ ko fare binaw e rrungʼaged ba lingan ere ra miil gaed iyib u taʼabang ni yu ulung ni ngar nanged ko bamang; ma napʼan nra guyed Alma nge Amulek ni kar bow nga wuruʼ fare kalbus, nge rungrung riy ni ke puth nga butʼ, ma ku chingiyaʼlʼ nem mar rus gaed ni rib gel, mar miil gaed rokʼ Alma nge Amulek ni woed e kaming nge pifak ni yaed be miil rokʼ lʼagruw i layon; ere aray rogon ni ra miil gaed rokʼ Alma nge Amulek.