1 Ndien edikem ete ema enɔ Alma ye Amulek uyo ete ewɔrɔ ke obio oro; ndien mmɔ ema ewɔrɔ, enyuŋ edi kpa ke obio Sidom; ndien sese, do mmɔ ema ekut kpukpru mme owo emi ekewɔrɔde ke obio Ammonihah, emi ekebinde esio enyuŋ etɔde ke itiat, ke ntak emi mmɔ ekebuɔtde idem ke mme ikɔ Alma.

2 Ndien mmɔ etiŋ enɔ mmɔ kpukpru se ikitibede inɔ iban ye nditɔ mmɔ, ŋko ye kabaŋade idem mmɔ, ye odudu emi akanamde mmɔ ebɔhɔ.

3 Ndien ŋko Zeezrom ana ke udɔŋɔ ke Sidom, ye ntaikaŋ ufiopidem, emi okotode mme ɔkpɔsɔŋ ukut esit esie ke ntak ibak esie, koro enye ekekere ke Alma ye Amulek ikiduhe aba; ndien enye ekekere ke ema ewot mmɔ ke ntak ukwaŋ-ŋkpɔ esie. Ndien akamba idiɔk ŋkpɔ emi, ye mme ediwak idiɔk ŋkpɔ esie efen, ema etuhɔde esit esie tutu enye ɔyɔhɔ ye ɔkpɔsɔŋ ukut, inyeneke ubɔhɔ; ke ntak oro ntaikaŋ ufiop ɔtɔŋɔ ndita enye.

4 Idahaemi, kini enye okopde ke Alma ye Amulek ekedu ke isɔŋ Sidom, esit ɔtɔŋɔ ndisɔŋ enye; ndien enye ɔdɔŋ etop kusɔp ɔnɔ mmɔ, ebeŋe ete mmɔ edi etiene enye.

5 Ndien edikem ete ke mmɔ ema eka ke usɔp, eyere ikot emi enye ɔkɔdɔŋde ɔnɔ mmɔ; ndien mmɔ eka ekeduk ufɔk Zeezrom; ndien mmɔ ekut enye ke ŋkpɔ nna esie, ye udɔŋɔ, ye ata mmem-idem oto ke ntaikaŋ ufiopidem; ndien esit esie ɔyɔhɔ ye ukut ke ntak mme ukwaŋ-ŋkpɔ esie; ndien kini enye okutde mmɔ enye anyan ubɔk esie, onyuŋ ebeŋe ete yak mmɔ ekɔk enye.

6 Ndien edikem ete Alma ɔdɔhɔ enye, ke omumde enye ke ubɔk ete: Ndi afo ɔmɔbuɔtidem ke odudu Christ emi ɔwɔrɔde erinyaŋa?

7 Ndien enye ɔbɔrɔ onyuŋ ɔdɔhɔ ete: Iŋ, ami mɔbuɔtidem ke kpukpru mme ikɔ emi afo ekpepde.

8 Ndien Alma ɔdɔhɔ ete: Edieke afo ɔbuɔtde idem ke erifak Christ ekeme ndikɔk fi.

9 Ndien enye ɔdɔhɔ ete: Iŋ, ami mɔbuɔtidem nte mme ikɔ fo edide.

10 Ndien Alma eseme ɔnɔ Jehovah, ete: O Jehovah Abasi nnyin, tua owo emi mbɔm, nyuŋ kɔk enye nte mbuɔtidem esie edide emi odude ke Christ.

11 Ndien kini Alma amaketiŋ mme ikɔ emi, Zeezrom adaha ada ke ikpat esie, onyuŋ ɔtɔŋɔ ndisaŋa; ndien ekenam emi ke akwa mkpaidem kpukpru owo; ndien ifiɔk ŋkpɔ emi asuana akaiso ke kpukpru ofuri isɔŋ Sidom.

12 Ndien Alma ɔduɔk Zeezrom mmɔŋ ɔnɔ Jehovah; ndien enye ɔtɔŋɔ kini oro ka iso ndikwɔrɔ ikɔ nnɔ mme owo.

13 Ndien Alma asiak ufɔk Abasi ke isɔŋ Sidom, onyuŋ osio mme oku ye mme andikpep enim ke isɔŋ, ndiduɔk mmɔŋ nnɔ Jehovah owo ekededi emi ekenyenede udɔŋ ndiuduɔk mmɔŋ.

14 Ndien edikem ete ke mmɔ ema ewak; koro mmɔ ema eto ke kpukpru ŋkan-ŋkuk Sidom edi, ndien ema enim mmɔ eduɔk mmɔ mmɔŋ.

15 Edi kabaŋa mme owo emi ekedude ke isɔŋ Ammonihah, mmɔ esuk edi mbon isɔŋ esit ye mbon nsɔŋ ibuot; ndien mmɔ ikabakere esit ke mme idiɔk ŋkpɔ mmɔ, edɔhɔ ke kpukpru odudu Alma ye Amulek oto satan; koro mmɔ ekedi eke mbuɔtidem Nehor, ndien ibuɔtke idem ke edikabade esit mbaŋa mme idiɔk ŋkpɔ mmɔ.

16 Ndien edikem ete Alma ye Amulek, ke Amulek ama ɔkɔkpɔŋ kpukpru gold esie, ye sidibe, ye mme ŋkpɔ uto esie, emi ekedude ke isɔŋ Ammonihah, ke ntak ikɔ Abasi, enye ke mbon emi ekesidide mme ufan esie ekesinde ŋko ye ete esie ye iman esie;

17 Ke ntak oro, kini Alma amakasiak ufɔk Abasi ke Sidom, ke okutde akwa mfarakeidem, iŋ, ke okutde ete ke mme owo ema efara-idem ke ntaŋidem esit mmɔ, ndien etɔŋɔ ndisuhɔre idem mmɔ ke iso Abasi, enyuŋ etɔŋɔ ndisobo idem mmɔ kiet ke edisana ebiet mmɔ ndikpono Abasi ke itie uwa, ekpeme enyuŋ ebɔŋ akam kpukpru ini, man enam mmɔ ebɔhɔ Satan, ye mkpa, ye nsobo—

18 Idahaemi nte ami nketiŋde, Alma ke ama okokut kpukpru mme ŋkpɔ emi, ke ntak oro enye emen Amulek onyuŋ edi ke isɔŋ Zarahemla, onyuŋ emen enye ɔnyɔŋ ufɔk eke esie, onyuŋ anam ŋkpɔ ɔnɔ enye ke mme ukut esie, onyuŋ ɔsɔŋɔ enye idem ke Jehovah.

19 Ndien ke ntem ke ɔyɔhɔ isua ukara duop mme ebiere ikpe eketre ɔnɔ ikɔt Nephi.