1 Ere chiney e yibi buch u napʼan ni be milekag Alma nib sor nga yimuch ko fare binaw nu Gideon, iyaen ko fare binaw nu Manti, musap gaed, i gin oewchen, nra madaʼ gaed fapi pagael ni fak Mosiah ni yaed be milekag iyaen ko fare binaw nu Zarahemla.

2 Chiney e ireray fapi pagael ni fak Mosiah ni yaed Alma ko fangiyalʼ ni sommʼon ni mʼug fare angel ngakʼ; ere Alma e ri falfalaenʼ nib gel ni ke guy pi walagen; nge nʼen niki gel nag e falfalaenʼ rokʼ, e ka rogon ni yaed walag u dakean Somoel; arragon, kari gel e llowaenʼ roraed nga fithikʼ e tin riyulʼ; ya kar manged bogi pumoʼon nib tamilang laniyaenʼraed ma kar filed u fithikʼ e lʼagaenʼ fapi chep nib thothup, ni nge yog ni ngar nanged fare thin ku Got.

3 Machane gathi kemus aray; ya kur mʼing gaed ko meybil, nge baley nag e abich; ere bay fare nangaenʼ ko prophecy, nge fare nangaenʼ ko yiʼiy roraed, ma napʼan ni yaedra machib nag iyaen, ma yaed be machib u gelingin nge matʼawon ni yib rokʼ Got.

4 Ma kar filed iyaen fare thin ku Got u lan ragag nge aningeg e duw u fithikʼ fapi Lamanites, ni ke yog nra thapeged boʼor i yaed ko tamilngaenʼ ko tin riyulʼ; arragon, u dakean gelingin e pi thin roraed me yog ni yoʼor i yaed e ni fekraed ko altar ku Got, ni ngar pininged fithingan mar pogofay niged e pi denen roraed u pʼoewchen.

5 Chiney e ireray e pinʼen ni unfek iyib ngoraed u napʼan e pi milekag roraed, ya rib gel e gafgow nra tayed; ra gafgow gaed nib ruw rogon, dagur nge tafnaey, ni woed e makʼiy, nge balel, nge magaer ni magaf, nge gafgow nga laniyaenʼraed.

6 Chiney e aray rogon e pi milekag ni ur tayed: U tomuren ni kar fingichiyed e chitamangraed, i Mosiah, u lan e bin sommʼon e duw ko fapi tapuf-oloboch; u tomuren ni kar siyeged fare lung niʼir e baʼadag e chitamangraed ni nge piiʼ ngoraed, ma ku aram rogon ni baʼadag e gidiiʼ;

7 Machane mar chuw gaed ko fare binaw nu Zarahemla, mar feked e sayden roraed, nge sarey roraed, nge gatʼing nge gane gatʼing roraed, nge gawul roraed; ni fan e biney e nge yog ngoraed e ggan u napʼan ni yaed bay u lan wuruʼ e binaw.

8 Ma aram mar chuw gaed nga ranoed nga lan wuruʼ e binaw ni ke un boech e gidiiʼ ni kar melʼeged ngoraed, ni nga ranoed ko fare binaw ku Nephi, ni ngar machib niged fare thin ku Got ngakʼ fapi Lamanites.

9 Me yibi buch nra milekag gaed nib yoʼor e rran u lan wuruʼ e binaw, ma yaed be baley nag e abich roraed ma yaed be meybil nib yoʼor yay ni nge piiʼ Somoel fare Kan ni Thothup rokʼ ni nge un boech ngoraed, ni nge paer roraed, ni nge yog nra manged talin e muruwel u paʼ Got ni ngar feked, ni faʼanra yog, pi walagraed, ni fapi Lamanites, ko fare tamilngaenʼ ko tin riyulʼ, nge fare tamilngaenʼ ko pinʼen nib kireb u yalen e pi chitamangraed, ni de yalʼuw.

10 Me yibi buch ni fare Somoel e piiʼ fare Kan ni Thothup rokʼ ngoraed, me gaʼar ngoraed: Nge gapas laniyaenʼmed. Me gapas laniyaenʼraed.

11 Ma fare Somoel e ki gaʼar ngoraed: Mmaroed nga fithikʼ fapi Lamanites, ni walagmed, ngam muguʼuliyed e thin rog; machane ngam gumʼaenʼ gaed u fithikʼ e athamgil nge kirbaenʼ, ni nge yog ni ngam daged e wok nib felʼ ngoraed ni bay rog, mug taymed ni talin e muruwel u lan paʼag ni nge yoʼor e gidiiʼ ni poloʼ ni nge thap riy.

12 Me yibi buch ni athamgil laniyaenʼ fapi pagael ni fak Mosiah, nge ku piʼin ni yaed bay roraed, e ki yib e athamgil nga laniyaenʼraed ni nga ranoed ngakʼ fapi Lamanites ni ngar weliyed fare thin ku Got.

13 Me yibi buch u napʼan nra taw gaed nga mathil ko fare binaw ko fapi Lamanites, mar kiiʼ gaed nga ranoed ni ra beeʼ ma ir rokʼ, ni be pagaenʼraed ngakʼ Somoel ni yaedra madaʼ bayay u tomuren ni kar thapeged boech e gidiiʼ; ya yaed be lemnag ni rib gaaʼ mab felʼ e re muruwel nem ni kar og niged yaed ngay.

14 Ma rib mudugil u wunʼraed ni rib felʼ, ya kar og niged yaed ni ngar machib niged fare thin ku Got ngakʼ bogi gidiiʼ ni malboch mab ʼelʼel gumʼirchaʼraed ma yaed ba tagalngach; bogi gidiiʼ ni yaed baʼadag ni yaed ma thang e pogofan rokʼ fapi Nephites, ma yaed be moroʼroʼ ngoraed ma yaed be fek e tiroraed u yargael; ma pi gumʼirchaʼ roraed e kar yiglʼiyed nga dakean e falaʼab nu fayleng, ara gol nge silber, nge malang ni gaʼfan; machane ra gayed rogon ni nge yog ngoraed bogi banʼen u dakean e mathang pogofan nge fek u matgael, ni nga dabra muruwel gaed nga paʼraed ni fan ngoraed.

15 Ma yaed bogi gidiiʼ nib malmal, nib yoʼor i yaed e ma liyoer ko liyos, ma fare gechig ku Got e ke aw nga dakeanraed ni bachan e pi yalen e pi chitamangraed; yug aram rogon machane fapi michmich rokʼ fare Somoel e rayog ngoraed ni faʼan yaedra kalngaenʼ.

16 Ere, ireray fan ni fapi pagael ni fak Mosiah e kar og niged yaed ko re muruwel nem, ni gomanga rayog nra feked raed iyaen ko kalngaenʼ; ni sana gomanga rayog nra ayuweged raed ngar nanged fare woʼen e bayul.

17 Ere ra kiiʼ gaed nge yaeni aw nra beeʼ ma yigoʼ ir rokʼ, ma ranoed iyaen nga fithikʼraed, nra beeʼ ma yigoʼ ir, nrogon e milwol nge gelingin Got ni piiʼ ngoraed.

18 Chiney e Ammon e ire pilung u fithikʼraed, me chuw roraed, u tomuren ni ke yibliy raed u rogon e muruwel ni kan dugliy ngoraed, ngo tomuren ni ke piiʼ fare thin ku Got ngoraed, ara piiʼ ngoraed e tin nib tʼuf roraed u mʼon ni nge yaen; ere aray rogon ni ra milekag gaed u gaʼangin yang fare binaw.

19 Me yaen Ammon ko fare binaw ku Ishmael, re binaw nem e ni tunguy fithingan ni fan ngakʼ e pi pagael ni fak Ishmael, ni kur manged Lamanites.

20 Ma napʼan ni yaen Ammon nga lan fare binaw ku Ishmael, ma fapi Lamanites e rafeked ngar mʼaged, ya ba yalen roraed ni ngar mʼaged gubin e pi Nephites ni yaed be thap nga lan paʼraed, mar feked iyaen nga pʼoewchen e chaʼ ni pilung; ma aram min pag nge milfanraed ko fare pilung ko nge liiʼraed ngar mʼaed fa nge tay raed ni sib, fa nge ninʼraed nga kalbus, fa nge chuwegraed u lan e binaw rokʼ, ni be yaen u rogon ni be lemnag ma baʼadag.

21 Ere aray rogon ni Ammon e ni fek iyaen nga pʼoewchen fare pilung niʼir e gaaʼ ko fare binaw nu Ishmael; ma fithingan e re pilung nem e Lamoni; ma ir beeʼ ko ganong rokʼ Ishmael.

22 Ere fare pilung e fith Ammon ni faʼanra baʼadag ni nge paer u lan e re binaw nem u fithikʼ fapi Lamanites, ara fithikʼ e pi gidiiʼ rokʼ.

23 Me gaʼar Ammon ngakʼ: Arragon, gu baʼadag ni gura paer boech u fithikʼ e pi gidiiʼ ney; arragon, ma sana gura paer nge madaʼ ko re rran ni kug gumʼ.

24 Me yibi buch ni pilung i Lamoni e adag dakean Ammon, me yoeg ni ngan pithig e mʼag rokʼ; ma baʼadag ni Ammon e nge fek rebe rugod ni fak nge leʼengiy.

25 Machane Ammon e gaʼar ngakʼ: Dangay, machane bay gumang tapigpig rom. Ere Ammon e mang ba tapigpig ku pilung i Lamoni. Me yibi buch ni arame ni uneg nga fithikʼ boech e tapigpig ni ngar matangiyed e gamanman ku Lamoni, nrogon ni kub yalen ko fapi Lamanites.

26 Ma tomuren ni ke pigpig ko fare pilung u lan dalip e rran, ma napʼan ni bay rokʼ fapi tapigpig ko Lamanites ni yaed be fek e gamanman roraed iyaen ko raen, ni kanoeg ni fare raen nu Sebus, ma gubin e Lamanites ni yaed ma fek e gamanman roraed e ngaram, ni ngar unumed e raen—

27 Ere, napʼan ni Ammon nge fapi tapigpig ko fare pilung e yaed be fek e gamanman roraed iyaen ko re ginnʼem ni bay e raen riy, ma musap gaed, bay ba ulung e Lamanites, ni kur feked e gamanman roraed iyib ko raen, marbaed ngar sakʼiy gaed ngar tulufed fapi gamanman ku Ammon nge fapi tapigpig ko fare pilung, mar tulufed raed ni rareb ma gin ni sor ngay.

28 Ma arame fapi tapigpig ko fare pilung e ra tabab niged e nonnon, ni yaed be gaʼar: Chiney e fare pilung e rra liiʼdaed ngad mʼaed, ni woed ni rinʼ ngakʼ pi walagdaed ni bachan e gamanman roraed ni ra miil gaed ni bachan e kireb ko pi gidiiʼ ney. Mar pired nga ur yoer gaed nib gel, ma yaed be gaʼar: Amusap gaed, fapi gamanman rodaed e kar miil gaed.

29 Ma arame yaed be yoer ni bachan e yaed be rus ni yira liiraed ngar mʼaed. Ma arame napʼan ni guy Ammon e biney ni ke buch me ʼoebʼoeb gumʼirchaʼen ko falfalaen; ya gaʼar, nggu dag gelingig ngakʼ e pi tapigpig ney ni fager rog, ara fare gelingin ni bay rog, u dakean e mukun ni nggu tay ko fapi gamanman ko fare pilung, ni nge yog ni pagaenʼ e pi tapigpig ney ngog, ni nge yog ni nggu wawliyraed iyaen nge michaenʼraed ko thin rog.

30 Ere chiney, e pinnʼey e aray rogon laniyaenʼ Ammon ni yaeni aw, u napʼan ni guy e kirbaenʼ ni ke tay e piʼin ni be tay ni walagen.

31 Me yibi buch ni piiʼ e athamgil nga laniyaenʼraed ko thin rokʼ, ni gaʼar: Pi walageg, mu pagedaenʼmed mi gimed yib nga daroed ngad gayed fapi gamanman, ma ngad kunuyed raed nga taʼabang ma gaed fekraed ko farengi nʼen ni bay e raen riy; ma aray rogon ni ngad ayuweged fapi gamanman ko fare pilung ma dabi liiʼdaed ngad mʼaed.

32 Me yibi buch ni ranoed ngar gayed fapi gamanman, mar laeked Ammon, mar gur gaed nga mʼon ko fapi gamanman ko fare pilung, ngar suruyed raed nga taʼabang ko farengi nʼen ni bay e raen riy.

33 Ma kiyib fapi pumoʼon bayay ngar sakʼiy gaed ni ngar tulufed e gamanman roraed; machane Ammon e gaʼar ngakʼ pi walagen: Munʼed fapi gamanman nga langob ni nga dabra miil gaed; ma nggu waen gucham gaed e pi pumoʼon ney ni yaed be tuluf e gamanman rodaed.

34 Ere, rrinʼed ni boed ni yoeg Ammon ngoraed, me yaen ni sakʼiy ni ngar cham gaed e piʼin ni kar sakʼiy gaed u taʼaben farengi raen nu Sebus; ni ri yaed bayoʼor.

35 Ere darur tamdag gaed ngakʼ Ammon, ya yaed be lemnag ni kemus ni taʼbagyaed me liiʼ ngemʼ ni boed rogon ni yaed baʼadag, ya dar nanged ni fare Somoel e ke michmich ngakʼ Mosiah ni fapi pagael ni fak e ra chuweg raed u paʼraed; ara yaed manang banʼen u morngaʼagen Somoel; ere rib falaenʼ raed ko gafgow ni yira tay ngakʼ pi walagraed, ere arayfan ni kar sakʼiy gaed kar pired ni ngar tulufed fapi gamanman ko fare pilung.

36 Machane Ammon e sakʼiy me tabab i pag e malang ngoraed ko gawul rokʼ; arragon, ni rib gel ni i gawul nag e malang nga fithikʼraed; ere aram rogon ni liiʼ boechi yaed ma arame gin oewchraed nga rogon gelingin; machane ra damomuw gaed ni bachan e kan liiʼ walagraed, mar tafnaey niged ni ngar liiʼed nge yimʼ; ere, bachan e kar guyed ni dabiyog ni nge kaen ko malang roraed, marbaed iyib ni kar feked e gul ni ngar liiʼed nge yimʼ.

37 Machane musap gaed, gubin e piʼin ni pug e laey rokʼ e gul ngalang ni nge toey ku Ammon, me thʼaeb paʼ ko sayden rokʼ nge mul; ya napʼan ni ra furuy bagyaed paʼ me thʼaeb nga taban e sayden rokʼ, ma arame mat banʼen u oewchraed ngay, mar miil gaed rokʼ; arragon, ma gathi yaed balich ni mathaʼeg; ere ra miil gaed ni bachan i gelingin paʼ.

38 Ere chiney e nelʼ i yaed e kaen ko gawul nge aw nga butʼ, machane dariy bagyaed ni liiʼ ngemʼ ko sayden rokʼ ma kemus ni chaʼ ni gaaʼ roraed; me thʼaeb paʼ gubin e piʼin ni furuy paʼ ngakʼ nge mul, ni gathi yaed balich.

39 Ma napʼan ni tuluf raed nga palog, me sul ngar piiʼed e raen ko fapi gamanman roraed mar sulweged raed ko gin mapaer e gamanman ko fare pilung riy, nge muʼ ma ranoed ngakʼ fare pilung, ngar daged ngakʼ e paʼayif ni yurbaʼ i paʼayif ni kan thʼaeb ko sayden rokʼ Ammon, ni paʼ e piʼin ni rabaed ni ngar liiʼed ngemʼ; ere ni fek iyaen ko fare pilung ni mich ko pinʼen ni kar rinʼed.