1 Ndien idahaemi edikem ete nte Alma akasaŋade ɔnɔ usuk usuk oto isɔŋ Gideon, ɔkpɔŋ isɔŋ Manti, sese, ke mkpaidem esie, enye osobo ye nditɔ iren Mosiah nte esaŋade eka isɔŋ Zarahemla.

2 Idahaemi nditɔ iren Mosiah emi ema edu ye Alma kini angel ekebemde iso owut enye idem; ke ntak oro Alma ama adaresit ata eti eti ndikut nditɔ eka esie; ndien sikifiakde idian ke idaresit esie, mmɔ ekesuk edi nditɔ eka esie ke Jehovah; iŋ, ndien mmɔ ema ekop odudu ke ifiɔk akpanikɔ; koro mmɔ ekedi mme owo emi eketimde efiɔk ŋkpɔ ndien mmɔ ema esin ifik eduŋɔre mme ŋwed Abasi, man mmɔ efiɔk ikɔ Abasi.

3 Edi emi idihe kpukpru; mmɔ ema eyak idem mmɔ enɔ ɔkpɔsɔŋ akam, ye utre udia; ke ntak oro mmɔ ema enyene spirit prophecy, ye spirit eriyarare, ndien kini mmɔ ekpepde ŋkpɔ, mmɔ ekekpep ŋkpɔ ye odudu ye unen Abasi.

4 Ndien mmɔ ema esikpep ikɔ Abasi ke ufaŋ isua duopenaŋ ke otu mme Lamanite, ke ema ekekan eti eti ke ndida ediwak ndi ifiɔk akpanikɔ; iŋ, oto ke odudu ikɔ mmɔ ema eda ediwak edi ke itie uwa Abasi, man ekot enyiŋ esie enyuŋ eyarade mme idiɔk ŋkpɔ mmɔ ke iso esie.

5 Idahaemi emi edi mme ŋkpɔ ntibe emi ekesimde mmɔ ke mme isaŋ mmɔ, koro mmɔ ema enyene ediwak ukut; mmɔ ema ebɔ uwak ndutuhɔ, ke idem ye ke esit mbiba, nte biɔŋ, nsat itɔŋ ye mmem idem, ŋko ye uwak idomo ke spirit.

6 Idahaemi emi ekedi mme isaŋ mmɔ: Ke ema ekekpɔŋ ete mmɔ, Mosiah, ke akpa isua mme ebiere ikpe; ke ema ekesin ukara emi ete mmɔ okoyomde ndinɔ mmɔ, ndien ŋko emi ekedi ekikere mme owo;

7 Edi mmɔ ewɔrɔ ke isɔŋ Zarahemla, enyuŋ etaŋ mme akaŋkaŋ mmɔ, ye mme eduat mmɔ, ye mme utigha mmɔ, ye mme idaŋ mmɔ, ye mme ikaŋ ɔkpɔ mmɔ; ndien emi mmɔ ekenam man mmɔ enɔ idem mmɔ udia kini mmɔ edude ke wilderness.

8 Ndien ke ntem ke mmɔ ekeka wilderness ye mme ibat owo efen emi mmɔ ekesatde, ndidɔk nka isɔŋ Nephi, man ekwɔrɔ ikɔ Abasi enɔ mme Lamanite.

9 Ndien edikem ete ke mmɔ ema esaŋa ke uwak usen ke wilderness, ndien mmɔ etre udia eti eti enyuŋ ebɔŋ akam eti eti ete Jehovah ɔnɔ mmɔ ubak Spirit esie ndika ye mmɔ, nyuŋ ndu ye mmɔ, man mmɔ edi ŋkpɔ utom ke mme ubɔk Abasi ndida, edieke edide mmem mmem, nditɔ eka mmɔ, mme Lamanite, ndi ifiɔk akpanikɔ, ndifiɔk ibak ibak ido mme ete mmɔ, emi mikidihe nnen nnen.

10 Ndien edikem ete ke Jehovah ama edise mmɔ ye Spirit esie, onyuŋ ɔdɔhɔ mmɔ ete: Edoŋesit. Ndien mmɔ ema edoŋesit.

11 Ndien Jehovah ɔdɔhɔ mmɔ ŋko ete: Ka ke otu mme Lamanite, nditɔ eka mbufo, enyuŋ esiak ikɔ mi; edi mbufo eyenyene ime ke anyan ime ye mme ukut, man mbufo ewut eti uwut ŋkpɔ enɔ mmɔ ke ami, ndien ami nyenam fi ŋkpɔ utom ke ubɔk mi nnɔ erinyaŋa uwak ukpɔŋ.

12 Ndien edikem ete mme esit nditɔ iren Mosiah, ŋko ye mbon emi ekedude ye mmɔ, esɔŋ ndika mbine mme Lamanite man ekwɔrɔ ikɔ Abasi enɔ mmɔ.

13 Ndien edikem kini mmɔ ema ekesim ke mme adaŋa isɔŋ mme Lamanite, ete mmɔ ebahare idem mmɔ enyuŋ ediaŋare ekpɔŋ kiet eken, eberedem ke Jehovah ete ke mmɔ eyefiak esobo ke utit idɔk mmɔ; koro mmɔ ema ekere ete ke utom ama okpon emi mmɔ ekekade ndinam.

14 Ndien ke akpanikɔ ama okpon, koro mmɔ ema eduak ndikwɔrɔ ikɔ Abasi nnɔ mbon ikɔt ye mme nsɔŋ ibuot ye mbon afai; mbon emi ekenemde esit ke ndiwot mme Nephite, ye ndikan mmɔ ubɔk nyuŋ ndia ŋwo; ndien esit mmɔ esine ke inyene, mme ke gold ye sidibe, ye mme nsɔŋ urua itiat; edi mmɔ ekeyom ndinyene mme ŋkpɔ emi ke ndiwot owo ye ndidia ŋwo, man mmɔ ekuda mme ubɔk mmɔ eŋwana mmɔ.

15 Ke ntem mmɔ ekedi ata mbon ifu, ediwak mmɔ ekpono mme ndem, ndien isuŋi Abasi ama odoro mmɔ ke idem ke ntak mme ido mme ete mmɔ; kpa ye oro ema enɔ mmɔ mme eŋwɔŋɔ Jehovah emi ekekɔŋɔde ke erikabare esit.

16 Ke ntak oro, emi ekedi ntak emi nditɔ iren Mosiah ekeduakde ndinam utom, ete ke ekeme ndidi ke mmɔ ekeme ndida mmɔ nnɔ erikabare esit; ete ke ekeme ndidi ke mmɔ ekeme ndida mmɔ edifiɔk uduak erifak.

17 Ke ntak oro mmɔ ediaŋare idem mmɔ ekpɔŋ kiet eken, enyuŋ eka ke otu mmɔ, owo kiet kiet ke idem esie, nte asaŋade ye ikɔ ye odudu Abasi emi ekenɔde enye.

18 Idahaemi ke Ammon ekedide ada ibuot ke otu mmɔ, mme midihe enye ama aŋwam mmɔ, ndien enye ɔwɔrɔ ɔkpɔŋ mmɔ, ke enye ama ɔkɔdiɔŋ mmɔ nte asaŋade ye nsio nsio utom mmɔ, ke amaketiŋ ikɔ Abasi ɔnɔ mmɔ, mme ndiŋwam mmɔ mbemiso enye adaha; ndien ke ntem mmɔ emen mme ediwak isaŋ mmɔ ke ofuri isɔŋ.

19 Ndien Ammon aka isɔŋ Ishmael, isɔŋ emi ekekotde edian nditɔ iren Ishmael, emi ekekabarede edi mme Lamanite ŋko.

20 Ndien nte Ammon okodukde isɔŋ Ishmael, mme Lamanite emum enye enyuŋ ebɔp enye, nte ido mmɔ ekedide ndibɔp kpukpru mme Nephite emi ekedukde mme ubɔk mmɔ, enyuŋ emen mmɔ eka iso edidem; ndien ke ntem ke ekesine ke ubɔk edidem ndiwot mmɔ, mme ndinim mmɔ ke ŋkpɔkɔbi, mme ndisin mmɔ ke ufɔk ŋkpɔkɔbi, mme ndibin mmɔ nsio ke isɔŋ esie, nte asaŋade ye uduak ye udɔŋ esie.

21 Ndien ke ntem ema emen Ammon eka iso edidem emi akakarade isɔŋ Ishmael; ndien enyiŋ esie ekedi Lamoni; ndien enye okoto ubon Ishmael.

22 Ndien edidem obup Ammon mme ekedi udɔŋ esie ndiduŋ ke isɔŋ oro ye mme Lamanite, mme ke otuikɔt esie.

23 Ndien Ammon ɔdɔhɔ enye ete: Iŋ, ami nyene udɔŋ ndiduŋ ke otu mbon emi ke esisit ini; iŋ, ndien ekeme ndidi tutu usen emi ami mkpade.

24 Ndien edikem ete edidem Lamoni ama enem esit eti eti ye Ammon, onyuŋ anam ete etat enye mme uruk; ndien enye oyom ete Ammon ada eyen\ aŋwan esie kiet nte ŋwan ndɔ.

25 Edi Ammon ɔdɔhɔ enye ete: Iŋ iŋ, edi ami nyedi eyen ufɔk fo. Ke ntak oro Ammon akabare edi eyenufɔk ɔnɔ edidem Lamoni. Ndien edikem ete enim enye ke otu nditɔ ufɔk eken ete ekpeme mme ufene Lamoni, nte asaŋade ye ido mme Lamanite.

26 Ndien kini enye ama akanam utom ɔnɔ edidem ke usen ita, nte enye akasaŋade ye mme nditɔ ufɔk Lamanitish ye mme ufene mmɔ aka ebiet mmɔŋ, emi ekekotde mmɔŋ Sebus, ndien kpukpru mme Lamanite ebin mme ufene mmɔ eka do, man mmɔ enyene mmɔŋ—

27 Ke ntak oro, nte Ammon ye nditɔ ufɔk edidem ekebinde mme ufene mmɔ eka ebiet mmɔŋ emi, sese, ibat mme Lamanite ifaŋ, emi ekesaŋade ye mme ufene mmɔ eka ebiet mmɔŋ, eda enyuŋ esuan mme ufene Ammon ye nditɔ ufɔk edidem, ndien mmɔ esuan mmɔ tutu ete mmɔ efehe eduk nsio nsio usuŋ.

28 Idahaemi nditɔ ufɔk edidem etɔŋɔ ndikuni, ete: Idahaemi edidem oyowot nnyin, nte enye okowotde nditɔ eka nnyin ke ntak emi ekesuande mme ufene mmɔ ke ntak ibak mme irenowo emi. Ndien mmɔ etɔŋɔ ndiseme ata eti eti, ete: Sese, esuan mme ufene nnyin kaŋa.

29 Idahaemi mmɔ eketua eyet ke ntak ndik ndikpa. Idahaemi kini Ammon okokutde emi esit esie ama ɔyɔhɔ ye idara; koro, enye ɔdɔhɔ ete, ami nyowut nditɔ ufɔk nte ami emi odudu mi, mme odudu emi odude ke ami, ke ndifiak mmen mme ufene emi nnɔ edidem, man ami nyene esit nditɔ ufɔk nte ami emi, man ami nda mmɔ usuŋ ndibuɔt idem ke mme ikɔ mi.

30 Ndien idahaemi, emi ekedi mme ekikere Ammon, kini enye okokutde mme ukut mbon emi enye okokotde nditɔ eka esie.

31 Ndien edikem ete enye ekpek mmɔ ye mme ikɔ esie, ete: Nditɔ eka mi, edara esit enyuŋ eyak nnyin ika ikiyom mme ufene oro, ndien nnyin iyibok mmɔ ɔtɔ kiet inyuŋ ifiak ida mmɔ idi ebiet mmɔŋ; ndien ke ntem nnyin iyitim mme ufene emi inim inɔ edidem ndien enye idiwotke nnyin.

32 Ndien edikem ete mmɔ eka ekeyom mme ufene oro, ndien mmɔ ema etiene Ammon, ndien mmɔ esɔp efehe enɔ iso iso enyuŋ ebiɔŋɔ mme ufene edidem, ndien efiak ebok mmɔ ke ebiet mmɔŋ.

33 Ndien mme iren oro efiak eda ndisuan mme ufene mmɔ; edi Ammon ɔdɔhɔ nditɔ eka esie ete: Ekanare mme ufene emi ekuk man mmɔ ekufehe; ndien ami nyaka nyuŋ ŋwana ye mme iren emi emi esuande mme ufene nnyin.

34 Ke ntak oro, mmɔ enam nte Ammon okɔnɔde mmɔ uyo, ndien enye aka onyuŋ ada ndiŋwana ye mbon emi ekedade ke mben mme mmɔŋ Sebus; ndien mmɔ ke ibat ikidighe ekpri.

35 Ke ntak oro mmɔ ikifeheke Ammon, koro mmɔ ekekere ke eren mmɔ kiet oyowot enye nte asaŋade ye inemesit mmɔ, koro mmɔ ikifiɔkke ite ke Jehovah ama ɔŋwɔŋɔ ɔnɔ Mosiah ete ke enye ayanam nditɔ esie ebɔhɔ ke ubɔk mmɔ; ŋko mmɔ ikifiɔkke ŋkpɔ ndomo kiet ibaŋa Jehovah; ke ntak oro mmɔ enemesit ke nsobo nditɔ eka mmɔ; ndien ke ntak emi mmɔ eda ndisuan mme ufene edidem.

36 Edi Ammon ada onyuŋ ɔtɔŋɔ nditop mmɔ mme itiat ye ikaŋ ɔkpɔ esie; iŋ, ye akwa odudu enye ama otop mme itiat ke otu mmɔ; ndien ke ntem enye owot ibat owo mmɔ ifaŋ tutu ete idem ɔtɔŋɔ ndikpa mmɔ mbaŋa odudu esie; edi mmɔ ema eyatesit ke ntak mkpa nditɔ eka mmɔ, ndien mmɔ ema ebiere ete ke ana nte enye ɔduɔ; ke ntak oro, ke ekutde ete ke mmɔ ikanke itɔ enye ke mme itiat mmɔ, mmɔ edi ye mme eto ndiwot enye.

37 Edi sese, kpukpru eren emi ekemende eto esie ndimia Ammon, enye esibe ubɔk mmɔ osio ye akaŋkaŋ esie; koro enye ama ɔyɔ ita mmɔ ke ndikpi ubɔk mmɔ ye mben akaŋkaŋ esie, tutu ete idem ɔtɔŋɔ ndikpa mmɔ, enyuŋ etɔŋɔ ndifehe ke iso esie; iŋ, ndien mmɔ ikikprike ke ibat; ndien enye anam mmɔ efehe oto ke odudu ubɔk esie.

38 Idahaemi owo mmɔ itiokiet ema eduɔ eto ke ikaŋ ɔkpɔ, edi enye ikiwotke owo ndomo kiet ye akaŋkaŋ esie ibɔhɔke ada ibuot mmɔ; ndien enye ama esibe kpa nte ediwak ubɔk emi ekemenere ebaŋa enye, ndien mmɔ ikidihe ekpri.

39 Ndien kini enye ekebinde mmɔ eka anyan usuŋ, enye ɔnyɔŋ edi ndien mmɔ enɔ mme ufene mmɔ mmɔŋ enyuŋ eda mmɔ enyɔŋ ebiet udia ufene edidem, ndien eka ebine edidem, ekama mme ubɔk emi ekesibede esio ye akaŋkaŋ Ammon, eto mbon emi ekeyomde ndiwot enye; ndien ekemen mmɔ ekewut edidem nte uwut ŋkpɔ mme ŋkpɔ emi mmɔ ekenamde.