1 Me yibi buch ni fare pilung i Lamoni e yoeg ko fapi tapigpig rokʼ ni ngar baed ra sakʼiy gaed nga mʼon ngar micheged gubin e pinʼen ni kar guyed ni nib lʼeag rogon ko biney e paʼ.

2 Ma napʼan ni kar micheged ni yaed gubin e pinʼen ni kar guyed, ma ke nang fini yulʼyulʼ Ammon i ayuweg e gamanman rokʼ, nge gelingin u napʼan e cham ni tay ngakʼ e piʼin ni ur gayed rogon ni ngar liiʼed ngemʼ, me gin oewchen ngay me gaʼar: Rriyulʼ, ni biney e dabiyog rokʼ taʼbeeʼ. Musap gaed, gathi ireray fa Bin Gaaʼ e Kan ni ke piiʼ e gechig nga dakean e pi gidiiʼ ney, ni bachan e mathang fan ni yaed be tay?

3 Mar fulweged lungun fare pilung, mar gaʼar gaed: Gomanga ir fa Bin Gaaʼ e Kan fa kemus nib gidiiʼ, ma dagnanged; machane baʼaray rogon e tin ni gamaed manang, ni dabiyog rokʼ fapi toʼogor ko fare pilung ni ngar liiʼed nge yimʼ; ara yog nra tulufed fapi gamanman rokʼ pilung u napʼan ni bay romaed, ni bachan e rib cheag ma rib gel; ere, gamaed manang niʼir e tafagear rokʼ fare pilung. Ere chiney, O pilung, dar mich u wunʼmaed ni bay beeʼ nib moʼon ni arfini gel, ya gamaed manang ni dabiyog ni ngan liiʼ nge yimʼ.

4 Ere chiney, e napʼan ni fare pilung e rungʼag e pi thin ney, me gaʼar ngoraed: Chiney e kugnang ni ireray fa Bin Gaaʼ e Kan; ma ke yib nga butʼ ko ngiyalʼ ney ni nge ayuwegmed, ni nge siy gu liiʼmed ni boed rogon nug rinʼ ngakʼ pi walagmed. Ere ireray fa Bin Gaaʼ e Kan ni i weliy e pi chitamangdaed morngaʼagen.

5 Chiney e aray rogon e chep ku Lamoni, ni piiʼ e chitamangin ngakʼ, ni bay ba Kan nib Gaaʼ. Yug aram rogon nib michaenʼraed nga ba Kan nib Gaaʼ, ma yaed be lemnag ni demutrug ko mang e kar rinʼed mab mangil; machane, Lamoni e yib e murus ngakʼ nib gel, ni ke rus ya kenang nib kireb ni ke liiʼ e tapigpig rokʼ kar mʼaed;

6 Ya rib yoʼor i yaed e ke liiraed kar mʼaed ni bachan pi walagraed ni kar tulufed e gamanman roraed ko fagin bay e raen riy; ere arfan kan liiʼraed ngar mʼaed, bachan e ni tuluf e gamanman roraed.

7 Chiney e ke mang ba muruwel ngakʼ e tiney e Lamanites ni ngar sakʼiy gaed u charen farengi raen nu Sebus ni ngar tulufed e pi gamanman ko gidiiʼ, ni nge yog riy nra suruyed boech nib yoʼor e tin ni ke garar iyaen nga dakean e giroraed e binaw, ya paʼan moroʼroʼ e ke paer ni ke mang muruwel u fithikʼ raed.

8 Me yibi buch ni pilung i Lamoni e fith e pi tapigpig rokʼ, nibe gaʼar: Biyuʼuw e re moʼon ney ni bay e binir e gelingin rokʼ?

9 Mar gaʼar gaed ngakʼ: Musap, be duruwʼiy e pi os rom. Ere fare pilung e yoeg u mʼon ngakʼ fapi tapigpig rokʼ, ni mʼon ko ngiyalʼ ni ngar piiʼed e raen ko gamanman roraed, ma ngar falʼeged rogon e os rokʼ nge karro ko os rokʼ, mar powiʼiyed ko fare binaw ku Nephi; ya bay ba tagmog ni kan dugliy ni ngan tay ko fare binaw ku Nephi, ni ke dugliy e chitamangin Lamoni, niʼir e pilung ko gubin yang e binaw.

10 Ere napʼan ni pilung i Lamoni e rungʼag ni Ammon e be falʼeg rogon e pi os rokʼ nge pi karro ko os rokʼ ma fin arame rigel e gin laniyaenʼ ni ke tay, ni bachan e yulʼyulʼ ku Ammon, me gaʼar: Rriyulʼ dariy rebe tapigpig u fithikʼ gubin e tapigpig rog ni arfini yulʼyulʼ ni boed e re moʼon ney; ya be tay gubin e motochiyel rog u waenʼ ma be gagyeg nag.

11 Ma chiney e kar gunang ni ireray fa Bin Gaaʼ e Kan, ma gubaʼadag ni nge yib nga naʼun rog, machane gube rus ngay.

12 Me yibi buch u napʼan ni ke muʼ Ammon i falʼeg rogon fapi os nge pi karro ko os ko fare pilung nge tapigpig rokʼ, me yaen nga naʼun ngakʼ fare pilung, me guy oewchen fare pilung ni ke thil; me pigichel ni nge sul nge chuw u pʼoewchen.

13 Me gaʼar reb fapi tapigpig ko fare pilung ngakʼ, Rabbanah, ni kan piliyeg fan kanoeg, ni yargael ara pilung ni gaaʼ, ya yaed be tay ni pi pilung roraed e yaed ba yargael; ere gaʼar ngakʼ: Rabbanah, fare pilung e baʼadag ni ngam paer.

14 Ere Ammon e chel nge sap ko fare pilung, me gaʼar ngakʼ: Mang e gabaʼadag ni nggu rinʼ ni fan ngom, O pilung? Ma fare pilung e de piiʼ e fulweg riy ngakʼ u napʼan ba awa, u rogon ni yaed be tanmeg e tayim roraed, ya denang ko mang e thingari yoeg ngakʼ.

15 Me yibi buch ni Ammon e gaʼar ngakʼ bayay: Manga gabaʼadag ni nggu rinʼ? Machane de piiʼ fare pilung e fulweg ngakʼ.

16 Me yibi buch ni Ammon, e bachan e ke sug ko fare Kan ni Thothup ku Got, ere manang e tafnaey rokʼ fare pilung. Me gaʼar ngakʼ: Gathi bachan e kam rungʼag ni kug ayuweg e pi tapigpig roem nge pi gamanman roraed, mug liiʼ medilip i walagraed ko gawul nge sayden, mug thʼaeb paʼ boechi yaed nge mul, ni nge yog nni ayuweg e pi gamanman rom nge tapigpig rom; musap, gathi ire ke balyang anʼum ngay?

17 Gube gaʼar ngom, mang e nʼen, ni kari balyang anʼum ngay? Musap, gag e gub gidiiʼ, ma gub tapigpig rom; ere, demutrug banʼen ni gabaʼadag nib matʼaw, ma gura rinʼ.

18 Chiney e napʼan ni rungʼag fare pilung e tiney e thin, maki balyangaenʼ bayay, ya ke guy ni Ammon e rayog ni nge nang e tafnaey rokʼ; machane yug aray rogon, ma fare pilung i Lamoni e bing lʼugun nge non, me gaʼar ngakʼ: Miniiʼ gur? Gur fa Bin Gaaʼ e Kan ni manang gubin banʼen?

19 Me fulweg Ammon nge gaʼar ngakʼ: Gathi gag.

20 Ere fare pilung e gaʼar: Buʼuw rogon ni gabe nang laninʼug? Gur e rayog ni ngam non nib matabgol nib paganʼum, mag weliy ngog morngaʼagen e pinnʼey; ma kag yoeg ngog ko ba mang e re gelingin ni kam cham ngay, kam liiʼ ma kam thʼaeb nge mul paʼ pi walageg ni kar tulufed e pi gamanman rog—

21 Ere chiney, faʼan gara yoeg ngog morngaʼagen e pinnʼey, ma demutrug banʼen ni gabaʼadag ma gura piiʼ ngom; ma faʼanra batʼuf, ma gura matangiyem ko salthaw rog; machane gumnang ni gur e kagab gel ngoraed ni yaed gubin; yug aram rogon machane, demutrug ko bamang e gabaʼadag ma gura piiʼ ngom.

22 Ere chiney e bachan e Ammon e be gonop, machane dabi cham, me gaʼar ngakʼ Lamoni: Gara motoyil ko thin rog, ni faʼan gura yoeg ngom ko mang e re gelingin e gube rinʼ riy e pinnʼey? Ma ireray e nʼen ni gubaʼadag ni ngam rinʼ.

23 Me fulweg fare pilung ngakʼ, me gaʼar: Arragon, ra mich u wunʼug gubin e thin rom. Ma arame ke aw ko luguy.

24 Ere Ammon e tabab ko numon ngakʼ ni ke pagaenʼ, me gaʼar ngakʼ: Ba mich u wunʼum ni bay ba Got?

25 Me fulweg, ni gaʼar ngakʼ: Dagur nang ko mang e be yipʼ e binir fan.

26 Ma arame gaʼar Ammon: Ba mich u wunʼum ni bay ba Kan nib Gaaʼ?

27 Me gaʼar, Arragon.

28 Me gaʼar Ammon: Ireray Got. Me gaʼar Ammon ngakʼ bayay: Ba mich u wunʼum ni re Kan ney nib Gaaʼ, niʼir Got, e sunmiy gubin banʼen ni bay u tharmiy ngu fayleng?

29 Me gaʼar: Arragon, gumnang ni sunmiy gubin banʼen ni bay u fayleng; machane dagnang fan e tharmiy.

30 Me gaʼar Ammon ngakʼ: Tharmiy e bangi tagilʼ niʼir e ma paer Got riy nge gubin e pi angel rokʼ nib thothup.

31 Me gaʼar pilung i Lamoni: Bay ngalang ko fayleng?

32 Me gaʼar Ammon: Arragon, ma be sap nga butʼ nga dakean gubin e gidiiʼ; ma manang gubin e pi tafnaey nge athap ko gumʼirchaʼ; ya paʼ e sunmiy raed ngay aram ko tabolngin.

33 Ere pilung i Lamoni e gaʼar: Ke mich u wunʼug gubin e pinnʼey ni kam weliy. Gur e ke lʼugem Got?

34 Me gaʼar Ammon ngakʼ: gag e gub gidiiʼ; ma gidiiʼ e ni sunmiy aram ko tabolngin ni boed yaʼan Got, ma ke piningeg fare Kan ni Thothup rokʼ ni nggu fil e pinnʼey ngakʼ e pi gidiiʼ ney, ni nge yog ni tamilang laniyaenʼraed ko tin nib matʼaw mab riyulʼ;

35 Ma bay fare Kan ni Thothup ni be paer boech rog, niʼir e be piiʼ e tamilang ngog, nge ku gelingig ni be yaen u rogon e mich rog nge mʼagaenʼ rog ngakʼ Got.

36 Chiney e napʼan ni yoeg Ammon e pi thin ney, me tabab ko tabolngin nni sunmiy e fayleng, nge ku ngiyalʼ nni sunmiy Adam, me weliy ngakʼ gubin e pinʼen ni morngaʼagen e mul ni tay e gidiiʼ, me weliy ngakʼ me dag ngakʼ e pinʼen ni bay u lan fapi chep nge fapi chep nib thothup ni morngaʼagen e gidiiʼ, niʼir e ki i weliy e pi profet morngaʼagen, ni aram iyib nge madaʼ ko ngiyalʼ ni chitamangraed, i Lehi, e chuw u Jerusalem.

37 Ma ki weliy ngoraed (ni fare pilung nge fapi tapigpig rokʼ) gubin rogon fapi milekag ko pi chitamangraed u lan wuruʼ e binaw, nge gubin e pi gafgow roraed ko makʼiy nge balel, nge pi muruwel nra gafgow gaed riy, nge ku boech.

38 Ma ki weliy ngoraed morngaʼagen fapi togopluw ku Laman nge Lemuel, nge fapi pagael ni fak Ishmael, arragon, gubin e pi togopluw roraed me weliy ngoraed; me tamilngeg ngoraed gubin fapi chep nge pi chep nib thothup ko ngiyalʼ ni chuw Lehi u Jerusalem nge madaʼ ko ngiyalʼ ney.

39 Machane gathi kemus aray; ya ki tamilngeg ngoraed rogon fare woʼen e bayul, niʼir e ni yarmiy ngan tay ni aram ko sommʼon nni sunmiy e fayleng; ma ki weliy ngoraed morngaʼagen fare wub nra tay Kristus, me weliy rogon gubin e pi muruwel ku Somoel ngoraed.

40 Me yibi buch u tomuren ni ke yoeg gubin e pinnʼey, me weliy nib tamilang ngakʼ fare pilung, ma arame michaenʼ fare pilung ko gubin e thin rokʼ.

41 Me tabab ko meybil ngakʼ Somoel, ni be gaʼar: O Somoel, wureng anʼum; ni boed rogon fini gele murnguy rom ngakʼ fapi gidiiʼ ku Nephi, ku aram rogon ni nge wureng anʼum ngog, nge gidiiʼ rog.

42 Ma arame, napʼan ni yoeg e rennʼey, me thig nge aw nga butʼ, ni gowa ke yimʼ.

43 Me yibi buch ni fapi tapigpig rokʼ e ra chibiyed ngar feked iyaen ngakʼ leʼengin, mar maleged nga dakean e bet rokʼ; me paer nib thig u butʼ ni gowa ke yimʼ u lan lʼagruw e rran nge lʼagruw e nepʼ; ma leʼengin, nge pi pagael ni fak, nge pi ppin ni fak e ur yoer niged, ni boed ni ma rinʼ fapi Lamanites, ni kari kirbaenʼ raed ngakʼ.