1 Me yibi buch u tomuren lʼagruw e rran nge lʼagruw e nepʼ ma ranoed ni ngar feked e dowef rokʼ ni ngar tayed nga langgin e kahol, ni kar falʼeged ni fan ko gidiiʼ roraed ni ngar kʼeyaged.

2 Chiney e faʼen ni leʼengin e pilung e ke rungʼag morngaʼagen e gilbugwan ku Ammon, ere malʼog nge yaen ngakʼ ni baʼadag ni nge yaeni guy.

3 Me yibi buch ni Ammon e rinʼ ni woed ni kanoeg ngakʼ, me yaeni guy faʼen ni leʼengin e pilung, ni baʼadag ni nge nang ko manga baʼadag ni nge rinʼ.

4 Me gaʼar ngakʼ: Fapi tapigpig ko pumoʼon rog e karoeged ngog ni gur e profet nib thothup ku Got, ma gur e bay e gelingin rom ni gabe rinʼ e maʼangʼang u fithingan;

5 Ere, faʼanra aray rogon, ma gubaʼadag ni ngam man ngam guy figirngig, ya ke paer nib mol u dakean e bet rokʼ ni ke gaman lʼagruw e rran nge lʼagruw e nepʼ; ma bay boech e gidiiʼ ni be yoeg ni dawori yimʼ, ma bay boech ni be yoeg ni ke yimʼ ma ke meal, ni thingar ni tay nga langgin e kahol; machane gag, ni gagrog e dawori meal.

6 Ere chiney, e ireray e nʼen ni be athapeg Ammon, ya manang ni pilung i Lamoni e immoy u tan gelingin Got; manang ni farengi lumor ni be inge lem e kan chuweg ko tafnaey rokʼ, nge fare tamilang ni be gaelʼ e tafnaey rokʼ, niʼir fare tamilang ko rir rokʼ Got, ni ba tamilang nib maʼangʼang u falʼngin—arragon, rengi tamilang ney e yognag e falfalaenʼ nga fithikʼ i doew ni poloʼ, ma farengi manileng nib lumor e kan chuweg, ma farengi tamilang ko yafos ni dabimus biʼid e ke gaelʼ fithikʼ i doew ni poloʼ, arragon, ke nang ni rennʼey e ke gel ko dagur rokʼ, ma kan fek iyaen ni ke nang Got—

7 Ere, tin ni be athapeg faʼen leʼengin e pilung ni nge rinʼ faʼanem e kemus ni pinʼen ni be athapeg faʼanem. Ere yaen nge guy fare pilung ni boed rogon ni be athapeg faʼen leʼengin e pilung ni nge rinʼ; me guy fare pilung ma manang ni dawori yimʼ.

8 Me gaʼar ngakʼ faʼen leʼengin e pilung: Dawori yimʼ, machane ire ke mol u paʼ Got, ma ra gabul ma bayi od bayay; ere dab ni kʼeyag.

9 Me gaʼar Ammon ngakʼ: Be mich u wunʼum e rennʼey? Me gaʼar ngakʼ: Dariy banʼen ni be micheg ngog ma kemus ni thin rom, nge thin ko fapi tapigpig romow; machane be mich u wunʼug nra yaeni aw ni boed rogon ni kamoeg.

10 Me gaʼar Ammon ngakʼ: Nge felʼ waʼatham ni bachan e mich rom nib gel; gube gaʼar ngom, fare ppin, dawor ni pirʼeg beeʼ ni erfini gel e mich rokʼ u fithikʼ fapi gidiiʼ ko Nephites.

11 Me yibi buch ni paer nge matangiy e bet rokʼ figirngin, ko ngiyalʼ nem nge madaʼ ko bin gabul e rran ni ke dugliy Ammon ni nge od riy.

12 Me yibi buch ni od nge suwon ngalang, ni boed rogon e thin ni yoeg Ammon; ere napʼan ni suwon ngalang, me kʼiyeg paʼ nga mʼon ngakʼ fare ppin, me gaʼar: Kari magaer Got, ma nge felʼ waʼatham.

13 Ya rogon fini riyulʼ ni gab fos, ere musap, kug guy e Tabiyul rog; ma bay yib, ma bay ni gargeleg rokʼ beeʼ nib ppin, ma ra bayuliy gubin e gidiiʼ nra michaenʼraed nga fithingan. Chiney, e napʼan ni yoeg e pi thin ney, me ʼoebʼoeb gumʼirchaʼen ko falfalaenʼ, me aw bayay nga butʼ ko falfalaenʼ; ma faʼen ni leʼengin fare pilung e ki aw nga butʼ, ni bachan e ke sug ko fare Kan ni Thothup.

14 Chiney e napʼan ni guy Ammon fare Kan ni Thothup ku Somoel ni kan piiʼ nga dakeanraed u rogon e meybil rokʼ nga dakean fapi Lamanites, ni walagen, ni yaed tapgin e kirbaenʼ nga fithikʼ fapi Nephites, ara fithikʼ gubin fapi gidiiʼ ku Got ni bachan e pi denen roraed nge pi yalen roraed, me ragbug nga butʼ, me tabab i piiʼ ir ni poloʼ u fithikʼ e meybil nge moʼog magaer ngakʼ Got ko nʼen ni ke rinʼ ni fan ngakʼ pi walagen; ma ki sug ko falfalaenʼ; ere aray rogon ni yaed dalip ni kar aw gaed nga butʼ.

15 Chiney, e napʼan ni fapi tapigpig ko fare pilung e kar guyed ni kar aw gaed nga butʼ, ma kur tabab gaed ko meybil ngakʼ Got, ya ki yib madguwan fare Somoel ngoraed, ya yaed fa piʼinem ni ra sakʼiy gaed nga pʼoewchen fare pilung ngar weliyed ngakʼ morngaʼagen gelingin faʼanem i Ammon.

16 Me yibi buch nra pininged fithingan fare Somoel, u gelingraed, nge yaeni madaʼ ko ngiyalʼ ni yaed gubin ni kar aw gaed nga butʼ, ma kemus ni taʼabeeʼ nib ppin ko fapi Lamanites e magaey, ni fithingan e Abish, ni ke michaenʼ ngakʼ Somoel ni ke yoʼor e duw ni ke yaen, ni bachan ba piliyeg changar ni tay e chitamangin—

17 Aray rogon, ni bachan e michaenʼ rokʼ ngakʼ Somoel, ma dawor nnang, ere, napʼan ni guy ni gubin fapi tapigpig ku Lamoni ni kar aw gaed nga butʼ, nge matin rokʼ, ni faʼen ni leʼengin e pilung, nge fare pilung, nge Ammon ni kar thig gaed u butʼ ni yaed ba pithig e changeg, ma manang ni ireram fare gelingin ku Got; me lemnag ni ireray napʼan, ni nge guy rogon nge nang fapi gidiiʼ ko manga ke buch u fithikʼraed, ni nge yog nra guyed e biney e gagyeg me michaenʼraed ko fare gelingin ku Got, ere miil fare ppin iyaen u rebo naʼun ngo reb, ni be wereg e thin riy ko gidiiʼ.

18 Ere ra tabab gaed i kunuyed yaed nga taʼabang u tafen fare pilung. Me yib buʼulung i gidiiʼ, me faʼtal laniyaenʼraed, ni kar guyed fare pilung, nge faʼen leʼengin, nge fapi tapigpig rorow ni yaed ba pithig e changeg u butʼ, ma yaed gubin ni yaed ba thig u butʼ ni gowa kar mʼaed; ma kur guyed Ammon, mar guyed, niʼir ba Nephite.

19 Ere chiney e fapi gidiiʼ e ra tabab gaed ko nonnon u fithikʼraed; boechi yaed e be yoeg nib gagyeg ko moʼoniyanʼ nib gaaʼ ni ke yib nga dakeanraed, ara dakean fare pilung nge tabinaew rokʼ, ni bachan e ke pag fare Nephite nge paer u lan e binaw.

20 Machane boechi yaed e ra fonow niged, ni yaed be gaʼar: Fare pilung e ke miliy e biney e gechig nga dakean e tabinaew rokʼ, ya bachan e ke liiʼ fatinem e tapigpig rokʼ kar mʼaed ni yaed e kar paged e gamanman roraed nge miil ko farengi raen nu Sebus.

21 Ma ki fonow nagraed fapi pumoʼon ni faʼan ur sakʼiy gaed u charen farengi raen nu Sebus nga ur tulufed fapi gamanman ni fak fare pilung, ya kar damomuw gaed ngakʼ Ammon ni bachan walagraed nib yoʼor kan liiʼraed kar mʼaed u charen farengi raen nu Sebus, u napʼan ni be matangiy fapi gamanman ko fare pilung.

22 Chiney, e bay bagyaed, ni bay walagen ni yimʼ ko sayden ku Ammon, ni kari damomuw ngakʼ Ammon, ere girngiy e sayden rokʼ me kan nga mʼon ni nge toey ngakʼ Ammon, ni nge liiʼ nge yimʼ; me pug e sayden ngalang ni nge toey ngakʼ, me thig nga butʼ ni ke yimʼ.

23 Ere chiney e kadguyed ni Ammon e dabiyog ni ngan liiʼ ngemʼ, ya fare Somoel e ke gaʼar ngakʼ Mosiah, ni chitamangin: Bay gu tay ni dabi yimʼ, ma nʼen nira buch rokʼ e be yaen u rogon e mich rom—ere, Mosiah mpag nga paʼ Somoel.

24 Me yibi buch u napʼan ni guy fare ulung i gidiiʼ fare moʼon ni ke thig nga butʼ ni ke yimʼ, niʼir faram e pug e sayden ngalang ni nge liiʼ Ammon, me yib e murus ngoraed ni yaed gubin, ma daki soraenʼraed ni ngar math gaed ngakʼ ara bagyaed fa piʼin ni ke aw nga butʼ; ma arame ki tabab e balyangaenʼ bayay u fithikʼraed ko manga ke rinʼ ma bay e biney e gelingin nib gel, ara manga be yipʼ fan gubin e pinnʼey.

25 Me yibi buch ni bayoʼor i yaed u fithikʼraed ni be yoeg ni Ammon e ire fa Bin Gaaʼ e Kan, ma boechi yaed e yoeg ni fa Bin Gaaʼ e Kan e ke lʼoeg;

26 Machane boechi yaed e ra fonow niged raed ni yaed gubin, ni yaed be yoeg nib kan, ni kan lʼoeg ke yib rokʼ fapi Nephites ni nge gafgow nagraed.

27 Ma bay boech ni yoeg ni Ammon e ke lʼoeg fa Bin Gaaʼ e Kan ni nge gechig nagraed ni bachan e pi denen roraed; ma ireram fa Bin Gaaʼ e Kan ni gubin e ngiyalʼ ma bay ko fapi Nephites, niʼir e ka aram napʼan iyib nibe chuwegraed u paʼraed; ma roegned ni ireray fa Bin Gaaʼ e Kan ni ke gatheay boʼor i walagraed, ni fapi Lamanites.

28 Ma arame tabab e maleʼeg thin nib almarin u fithikʼraed. Ma napʼan ni yaed be maleʼeg thin, ma fare ppin ni tapigpig niʼir e guy rogon ni nge mukun fare ulung i gidiiʼ nga taʼabang e yib, me guy e maleʼeg thin ni be yaen u fithikʼ fare ulung i gidiiʼ mari kirbaenʼ, nge madaʼ ko ngiyalʼ ni ke yoer.

29 Me yibi buch ni yaen nge yaeni koel paʼ faʼen leʼengin e pilung, ni gomanga yog ni suwon nag ngalang; ma napʼan ni math nga paʼ me suwon me sakʼiy ngalang, me non ni rib gaaʼ laman, ni be gaʼar: O soerokʼ Yesus, niʼir e ke thapegeg kug chuw u infierno! O soerokʼ Got, murnguy e pi gidiiʼ ney!

30 Ma napʼan ni yoeg e rennʼey, me weywey nag paʼ, ni kari falfalaenʼ, ni be yoeg yu bugithin ni danur nang fan; ma napʼan ni ke rinʼ e biney, me koel paʼ fare pilung, i Lamoni, me suwon me sakʼiy ngalang.

31 Me guy ni ku chingiyalʼ nem, fare maleʼeg thin u fithikʼ fapi gidiiʼ rokʼ, me yaeni tabab i fonow nagraed, me fil ngoraed fapi thin ni ke rungʼag rokʼ Ammon ngoraed; ma gubin e piʼin ni rungʼaged e pi thin rokʼ me mich u wunʼraed, me michaenʼraed ngakʼ Somoel.

32 Machane boʼor i yaed u fithikʼraed ni dar motoyil gaed ko thin rokʼ; ere ranoed ko gin ni yaed baʼadag ni ngar sor gaed ngay.

33 Me yibi buch u napʼan ni suwon Ammon ngalang ma ki weliy ngoraed, nge ku aram rogon ni rinʼ fapi tapigpig ku Lamoni; ma yaed gubin nra weliyed ko fapi gidiiʼ taʼbanʼen—ni gumʼirchaʼraed e ke thil; ni dakur araʼareged ni ngar rinʼed e tin nib kireb.

34 Ere musap gaed, rib yoʼor e piʼin ni weliy ngakʼ fapi gidiiʼ ni kar guyed e angel ma kar nonnaed ngoraed; ere aray rogon ni kar weliyed ngoraed e pinʼen ni morngaʼagen Got, nge morngaʼagen fini matʼaw.

35 Me yibi buch ni nib yoʼor e piʼin ni michaenʼraed ko thin roraed; ma gubin e piʼin ni michaenʼraed e ni tawfe nagraed; mar manged bogi gidiiʼ nib matʼaw, mar yarmiyed ba galasia u fithikʼraed.

36 Ere aray rogon fare muruwel ku Somoel ni tabab u fithikʼ fapi Lamanites; ma aray rogon ni fare Somoel e tabab i piiʼ e Kan ni Thothup rokʼ nga dakeanraed; ere kad guyed nibe kʼiyeg paʼ ngakʼ gubin e gidiiʼ ni ra kalngaenʼ me michaenʼ nga fithingan.