1 Ndien edikem ete kini usen iba ye okoneyo iba ema ekebe mmɔ ema eyom ndimen idem esie nyuŋ nnim ke udi, emi mmɔ ekenamde enɔ ndibuk mme akpa mkpa mmɔ.

2 Idahaemi Ɔbɔŋ-aŋwan ke ama okokop etop Ammon, ke ntak oro enye ɔdɔŋ onyuŋ ebeŋe ete enye oduk edi ebine enye.

3 Ndien edikem ete Ammon anam nte ekenɔde enye uyo, onyuŋ oduk ebine ɔbɔŋ-aŋwan, onyuŋ oyom ndifiɔk se enye oyomde ete enye anam.

4 Ndien enye ɔdɔhɔ enye ete: Nditɔ ufɔk ebe mi enam mi mfiɔk ete ke afo edi prophet edisana Abasi, ndien ke afo emenyene odudu ndinam ediwak ikpɔ ŋkpɔ ke enyiŋ esie;

5 Ke ntak oro, edieke emi edide ntre, ami moyom nte yak afo oduk aka onyuŋ ese ebe mi, koro enim enye ke ŋkpɔ nna esie ke ufaŋ usen iba ye okoneyo iba; ndien usuk mme owo edɔhɔ ete ke enye ikpaha, edi mbon efen edɔhɔ ete ke enye akpa ndien ke enye etebe, ndien ke ana nte enim enye ke udi; edi eke idem mi, ke ami enye itebeke.

6 Idahaemi, emi ekedi se Ammon okoyomde, koro enye ama ɔfiɔk ete ke edidem Lamoni okodu ke idak odudu Abasi; enye ama ɔfiɔk ete ke emen obubit ɔfɔŋ okofukde iso eke unana mbuɔtidem esio efep ke esit esie, ndien uŋwana akayamade ke esit esie, emi ekedide uŋwana ubɔŋ Abasi, emi ekedide utibe uŋwana ufɔn esie—iŋ, uŋwana emi adade utɔ idaresit emi edi ke esit ukpɔŋ esie, ke ama okosio obubit enyɔŋ, ndien ete ke ema edomo uŋwana nsinsi uwem ke ukpɔŋ esie, iŋ, enye ama ɔfiɔk ete ke emi ama akan idem esie nte obot edide, ndien ema emen enye eka ke Abasi—

7 Ke ntak oro, se ɔbɔŋ-aŋwan okoyomde oto enye edi se enye ebeŋe. Ke ntak oro, enye oduk aka ndise edidem nte ɔbɔŋ-aŋwan okoyomde enye anam; ndien enye okut edidem, onyuŋ ɔfiɔk ete ke enye ikpaha.

8 Ndien enye ɔdɔhɔ ɔbɔŋ-aŋwan ete: Enye ikpaha, edi enye ede idap ke Abasi, ndien mkpɔŋ enye ayafiak adaha ada; ke ntak oro kubuk enye.

9 Ndien Ammon ɔdɔhɔ enye ete: Ndi afo ɔmɔbuɔtidem ke emi? Ndien enye ɔdɔhɔ enye ete: ami nyeneke ntiense ndomo kiet ke mibɔhɔke ikɔ fo, ye ikɔ nditɔ ufɔk nnyin; edi ami mɔbuɔtidem nte ke eyedi nte afo etiŋde.

10 Ndien Ammon ɔdɔhɔ enye ete: Ɔfɔfɔn ɔnɔ fi ke ntak ɔkpɔsɔŋ mbuɔtidem fo; ami ndɔhɔ fi, eyen aŋwan, akananam utɔ akwa mbuɔtidem emi iduhe ke otu kpukpru mbon mme Nephite.

11 Ndien edikem ete enye ekpeme ŋkpɔ nna ebe esie, tɔŋɔ kini oro tutu kpa ini oro ke mkpɔŋ emi Ammon ekenimde ete ke enye ayadahada.

12 Ndien edikem ete enye adahada, nte asaŋade ye mme ikɔ Ammon; ndien nte enye akadahade ada, enye anyan ubɔk esie ɔnɔ ŋwan oro, onyuŋ ɔdɔhɔ ete: Ekɔm enyene enyiŋ Abasi, ndien ɔfɔfɔn ɔnɔ fi.

13 Koro ma uwem fo, sese, ami mokut Andifak mi; ndien enye eyedi, onyuŋ amana oto eyen aŋwan, ndien enye ayafak kpukpru owo emi ebuɔtde idem ke enyiŋ esie. Idahaemi, kini enye ama eketiŋ mme ikɔ emi, esit esie ama ɔyɔhɔ ye idara, ndien enye afiak ɔduɔ ye idaresit; ndien ɔbɔŋ-aŋwan ɔduɔ ŋko ke isɔŋ, ke ɔkɔyɔhɔde ye Spirit.

14 Idahaemi ke Ammon okutde nte Spirit Jehovah aŋwaŋade nte asaŋade ye mme akam esie odoro mme Lamanite, nditɔ eka esie, emi ekedide ntak uwak mfuhɔ ɔnɔ mme Nephite, mme ɔnɔ kpukpru mbon Abasi ke ntak mme ukwaŋ-ŋkpɔ mmɔ ye mme ido mmɔ, enye ɔduɔ ke erɔŋ esie, onyuŋ ɔtɔŋɔ ndiŋwaŋa ukpɔŋ esie ke akam ye ekɔm nnɔ Abasi ke se enye anamde ɔnɔ nditɔ eka esie; ndien enye ŋko ama ɔyɔhɔ ye idaresit; ndien ke ntem kpukpru mmɔ mbita eduɔ ke isɔŋ.

15 Idahaemi, kini nditɔ ufɔk edidem ema ekekut ete ke mmɔ eduɔ, mmɔ ŋko etɔŋɔ ndiseme nnɔ Abasi, koro ndik Jehovah ama odoro mmɔ ke idem nko, koro edi mmɔ ekeda edidem ke iso enyuŋ etie ntiense enɔ enye ebaŋa akwa odudu Ammon.

16 Ndien edikem ete mmɔ ema ekot enyiŋ Jehovah, ye ukeme mmɔ, tutu kpukpru mmɔ ema eduɔ ke isɔŋ, ibɔhɔke eyen aŋwan mme Lamanite kiet, emi enyiŋ esie ekedide Abish, ke enye ama akakabade esit ɔnɔ Jehovah ke ediwak isua, ke ntak utibe mbuk ŋkukut ete esie—

17 Ke ntem, ke ama akakabade esit ɔnɔ Jehovah, ndien inamke mme owo efiɔk, ke ntak oro, kini enye okokutde ete ke kpukpru nditɔ ufɔk Lamoni ema eduɔ ke isɔŋ, ŋko ye eka ufɔk esie, ɔbɔŋ-aŋwan, ye edidem, ye Ammon enyanare ena ke isɔŋ, enye ama ɔfiɔk ete ke edi odudu Abasi; ndien ke ekerede ete ke ufaŋ emi, ke ndinam mme owo efiɔk se ikitibede ke otu mmɔ, ete ke ekutde sitibede emi ayanam mmɔ ebuɔtidem ke odudu Abasi, ke ntak oro enye efehe aka ke ufɔk ke ufɔk, anam mme owo efiɔk.

18 Ndien mmɔ etɔŋɔ ndisobo idem mmɔ ɔtɔ kiet ke ufɔk edidem Ndien otu owo edi, ndien ke mkpaidem mmɔ, mmɔ ekut edidem, ye ɔbɔŋ-aŋwan, ye nditɔ ufɔk mmɔ nte enyanare ena ke isɔŋ, ndien kpukpru mmɔ ena do nte mmɔ ekpakpa; ndien mmɔ ekut Ammon ŋko, ndien sese, enye ekedi owo Nephite.

19 Ndien idahaemi mme owo etɔŋɔ ndikuni ke otu mmɔ; usuk ete ke ekedi akwa idiɔk edidoro mmɔ ke idem, mme edidem ye ufɔk esie, ke ntak emi enye akayakde ete Nephite oro odu ke isɔŋ oro.

20 Edi mbon efen esua enɔ mmɔ, ete: Edidem ada idiɔk emi ɔnɔ ufɔk esie, ke ntak emi enye okowotde nditɔ ufɔk esie emi ekesuandesuan mme ufene mmɔ ke mme mmɔŋ Sebus.

21 Ndien mme owo emi ekedade ke mme mmɔŋ Sebus ekenyuŋ esuande mme ufene edidem esua enɔ mmɔ ŋko, koro mmɔ ema eyaresit ye Ammon ke ntak ibat nditɔ eka mmɔ emi enye okowotde ke mme mmɔŋ Sebus, kini enye eke ekpemede mme ufene edidem.

22 Idahaemi, kiet ke otu mmɔ, emi okowotde eyen eka esie ye akaŋkaŋ Ammon, ke akayatde esit ata eti eti ye Ammon, osio akaŋkaŋ esie onyuŋ aka man enye ayak enye ekpi Ammon, man owot enye; ndien nte enye emenere akaŋkaŋ esie man ekpi enye, sese, enye ɔduɔ akpa.

23 Idahaemi nnyin ikut ite ke owo ikemeke ndiwot Ammon, koro Jehovah ama ɔdɔhɔ Mosiah, ete esie ete: Ami nyenyaŋa enye, ndien edidi inɔ enye nte mbuɔtidem fo edide—ke ntak oro, Mosiah ama ayak enye esin Jehovah ke ubɔk.

24 Ndien edikem ete kini otu owo oro ekutde ete ke owo oro ama ɔduɔ akpa, emi ekemenede akaŋkaŋ ndiwot Ammon, ndik omum kpukpru mmɔ, ndien mmɔ inyeneke uko ndisio ubɔk mmɔ ntuk enye mme owo ndomo kiet emi ɔkɔduɔde; ndien mmɔ etɔŋɔ ndiyik ke otu mmɔ se ekpedide ntak utɔ akwa odudu emi, mme se kpukpru ŋkpɔ emi ɔkpɔwɔrɔde.

25 Ndien edikem ete ke ediwak ema edu ke otu mmɔ emi ekedɔhɔde ete ke Ammon edi Akwa Spirit, ndien mbon efen edɔhɔ ke edi Akwa Spirit ɔdɔŋ enye;

26 Edi mbon efen esua enɔ kpukpru mmɔ, edɔhɔ ke enye ekedi idiɔk unam, emi mme Nephite ekedɔŋde ete edituhɔre mmɔ.

27 Ndien usuk ema edu emi ekedɔhɔde ete ke edi Akwa Spirit ɔkɔdɔŋ Ammon ete edikut mmɔ ke ntak mme ukwaŋ-ŋkpɔ mmɔ; ndien ete ke edi Akwa Spirit esikpeme mme Nephite kpukpru ini, emi akanamde mmɔ ebɔhɔ ke ubɔk mmɔ; ndien mmɔ edɔhɔ ke ekedi Akwa Spirit emi okowot ata ediwak nditɔ eka mmɔ, mme Lamanite.

28 Ndien ke ntem eneni ɔtɔŋɔ ndiwɔrɔ nda ata eti eti ke otu mmɔ. Ndien kini mmɔ ekenenide ntem, eyen ufɔk anwan emi akanamde otu owo eboho ɔtɔ kiet edi, ndien kini enye okokutde eneni emi okodude ke otu mme owo enye ama ɔfuhɔ ata eti eti, tutu ke mmɔŋ eyet.

29 Ndien edikem ete enye ama aka onyuŋ omum ɔbɔŋ-aŋwan ke ubɔk, ete mme enye akpakan emenere enye ke isɔŋ; ndien ke adaŋa ini emi enye otukde ubɔk esie enye adahada onyuŋ ada ke ukot esie, onyuŋ ofiori ke ɔkpɔsɔŋ uyo, ete: O ekɔm Jesus, emi anyaŋade mi osio ke enyene ndik hell! O ekɔm Abasi, tua mbon emi mbɔm!

30 Ndien kini enye ama eketiŋ emi, enye afat ubɔk esie, ke ɔkɔyɔhɔde ye idaresit, etiŋ ediwak ikɔ emi mikiŋwaŋake owo; ndien kini enye ama kanam emi, enye omum edidem, Lamoni, ke ubɔk, ndien sese enye adahada onyuŋ ada ke ukot esie.

31 Ndien enye, ke ndondo oro, ke okutde eneni emi odude ke otu ikɔt esie, aka onyuŋ akasua ɔnɔ mmɔ, onyuŋ ekpep mmɔ mme ikɔ emi enye okokopde ke inua Ammon; ndien kpa nte ediwak emi ekekopde mme ikɔ esie ebuɔtidem, ndien ekabare esit enɔ Jehovah.

32 Edi ediwak ema edu ke otu mmɔ emi mikimaha ndikop mme ikɔ esie; ke ntak oro mmɔ eka usuŋ mmɔ.

33 Ndien edikem ete kini Ammon akadahade ada enye ŋko anam ŋkpɔ ɔnɔ mmɔ, ndien ŋko ɔnɔ kpukpru nditɔ ufɔk Lamoni; ndien kpukpru mmɔ etiŋ enɔ mme owo kpa ukem ŋkpɔ oro—ete ke esit mmɔ ama ɔkpuhɔde; ete ke mmɔ ikinyeneke udɔŋ aba ndinam idiɔk.

34 Ndien sese, ediwak ema etiŋ enɔ mme owo ete ke mmɔ ema ekut mme angel ndien ke ema eneme nneme ye mmɔ; ndien ke ntem mmɔ ema edɔhɔ mmɔ mme ŋkpɔ Abasi, ye nnen nnen ido esie.

35 Ndien edikem ete ke ediwak ema edu emi ekebuɔtde idem ke mme ikɔ mmɔ; ndien kpa nte ediwak emi ekebuɔtde idem ema eduɔk mmɔŋ; ndien mmɔ ekabare edi ndinen owo, ndien mmɔ ema esiak ufɔk Abasi ke otu mmɔ.

36 Ndien ke ntem ke utom Jehovah ɔkɔtɔŋɔ ke otu mme Lamanite; ke ntem Jehovah ɔtɔŋɔ ndiŋwaŋa Spirit esie nnɔ mmɔ; ndien nnyin ikut ite ke ubɔk esie anyanade ɔnɔ kpukpru owo emi ekabarede esit enyuŋ ebuɔtde idem ke enyiŋ esie.