Fare Babyor ku Alma
Fare Pagael Ni Fak Alma

1 Chiney e yibi buch u lan e bin sommʼon e duw ko lung, rokʼ fapi tapuf-oloboch ko fapi gidiiʼ rokʼ Nephi, e ngiyalʼ innʼey iyaen nga mʼon, ma fare pilung i Mosiah e ke yaen iyaen u dakean e nam, ma bachan e ki i mael nib felʼ rogon e mael ni i tay, ma ku bachan e ke yaen nib matʼaw u pʼoewchen Got, ni de pag beeʼ ni nge mang ire gagyeg ni nge mun liw; ma ire yarmiy e pi motochiyel, nib mʼagaenʼ fapi gidiiʼ ngay; ere arayfan ni mʼagaenʼraed ngay ni ngar fol gaed ko pi motochiyel ni ngongoliy.

2 Me yibi buch u lan e bin mʼon e duw ko lung rokʼ Alma ni bay u gilʼ e tapuf-oloboch, ma immoy beeʼ nib moʼon nni fek iyib ngakʼ ni nge pithig e oloboch rokʼ, beeʼ nib moʼon nib gaaʼ, mab gilbugwan u fini yargael.

3 Ma ke yaen iyaen u fithikʼ fapi gidiiʼ, ni be machib nag ngoraed e pinʼen ni be yoeg ni thin rokʼ Got, nibe yibi togopluw ko fare galasia; ni be yoeg ko fapi gidiiʼ ni gubin e priest nge sensey ma thingari gilbugwan; ma thingar dab kur muruwel gaed nga paʼraed, ya fapi gidiiʼ e ngar ayuweged raed.

4 Ma ki micheg ko fapi gidiiʼ, ni gubin e gidiiʼ ma yaedra thap ko bin tomur e rran, ma de tʼuf ni ngar rus gaed ara ngar tonʼ gaed, ma ngar puged oewchraed ngalang ngar falfalaenʼ gaed; ya fare Somoel e sunmiy gubin e gidiiʼ, ma ki bayuliy gubin e gidiiʼ, ma ra yaen i taw ko tomur, ma gubin e gidiiʼ nra yog ngoraed e yafos ni gubinfen.

5 Me yibi buch ni fil e pinnʼey iyaen ma arame ri yoʼor e gidiiʼ ni michaenʼraed ko thin rokʼ, ni rib yoʼor ni arame ra tabab gaed i ayuweg ma yaed be piiʼ e salpiy ngakʼ.

6 Ma arame tabab ni ke langlang ngalang ko ʼufʼuf u lan gumʼirchaʼen, ni be chuw nga mad nib totolang puluwon, arragon, ni arame ki tabab i sunmiy ba galasia u yalen e machib nibe tay.

7 Me yibi buch u napan ni be yaen, ni nge machib nag e piʼin ni ke michaenʼraed ko thin rokʼ, me madaʼ nag beeʼ nib moʼon nib mang ko fare galasia rokʼ Got, arragon, niʼir reb fapi sensey roraed; me tabab ko togopluw ngakʼ nib almarin, ni gomanga yog ni wawliy nga orel fapi gidiiʼ ko fare galasia; machane fare moʼon e tʼaer nga dakean, ni be fonow nag ko fapi thin rokʼ Got.

8 Chiney e fithingan e re moʼon nem e Gideon; ma ir fachaʼ ni immoy nib talin e muruwel u lani paʼ Got u napan ni chuweg fapi gidiiʼ rokʼ Limhi u kalbus.

9 Ere, bachan e ke tʼaer Gideon nga dakean ko fare thin rokʼ Got ma arame damomuw ngakʼ Gideon, me girngiy e sayden rokʼ me tabab i liiʼ. Ma ngiyalʼ ney e ke pilibthir Gideon, ere dakir yog ni nge sibthiy e sayden rokʼ, ere nlii ngemʼ ko sayden.

10 Ma fapi gidiiʼ ko fare galasia e ra feked fare moʼon ni cham, min fek iyaen nga pʼoewchen Alma, ni ngan pufthin nag u rogon e pi oloboch ni ke bucheg.

11 Me yibi buch ni sakʼiy u pʼoewchen Alma nge i wenig nag ir ni be weliy salapen nib tamilang.

12 Machane me gaʼar Alma ngakʼ: Musap, ireray e sommʼon riy ni kan fek e gamʼing nib falʼngakʼ iyib nga fithikʼ e pi gidiiʼ ney. Ere musap, gur e gathi kemus ni yigoʼ gamʼing nib falʼngakʼ e bbuch e roem riy, ya kum nomeg ni ngam gagyeg ko sayden; ma faʼanra gamʼing nib falʼngakʼ e ngan gagyeg nag, u fithikʼ e pi gidiiʼ ney ma ra thang oewchraed ni yaed gubin.

13 Ma gur e kam puʼoeg rachaʼen beeʼ nib moʼon nib matʼaw, arragon, beeʼ nib moʼon nib yoʼor banʼen nib mangil ni ke rinʼ u fithikʼ e pi gidiiʼ ney; ma faʼanra nggu paged gur ma rachaʼen e ra yibi aw nib togopluw ngomaed.

14 Ere gur e kan dugliy ni nga mumʼ nibe yaen u rogon fare motochiyel ni piiʼ Mosiah ngomaed, niʼir e bin tomur e pilung romaed; ma ke yaeni aw nib mʼagaenʼ e pi gidiiʼ ney ngay; ere pi gidiiʼ ney e thingar rafol gaed ko motochiyel.

15 Me yibi buch ni rafeked; e chaʼanem ni fithingan e Nehor; mar feked iyaen nga dakean e ted ni Manti, nu roem e yoeg riy, ara roem e micheg riy, u thilin e tharmiy nge fayleng, ni pinnʼey ni ke fil ko fapi gidiiʼ e ba togopluw ko fare thin rokʼ Got; ma ireram e gin ni gafgow riy u ba yamʼ nib tamraʼ thin.

16 Yug aram rogon machane, biney ni kan rinʼ e detileg e gamʼing nib falʼngakʼ ni nga dab ki garar u dakean fare nam; ya bayoʼor e piʼin ni yaed baʼadag e tinu fayleng banʼen, ere ranoed iyaen ni yaed be yoeg e machib ni baen; ma biney e rrinʼed ni fan ko falaʼab nge taʼfan.

17 Machane, daryog roraed ni ngar baen gaed, ni faʼanra kan nang raed riy, ya yaed be rus ko motochiyel, ya piʼin ma baen e yima gechig nagraed; ere yaed be dake machib u rogon e mich roraed; ma fare motochiyel e dariy gelingin ni nge gagyeg nag beeʼ ni bachan e mich rokʼ.

18 Ma darur moroʼroʼ gaed, ya yaed be rus ko fare motochiyel, ya chaʼan rarinʼ e yira gechig nag; fa lingeg banʼen, ara thang e pogofan, ya enra thang e pogofan e yira gechig nag ni yamʼ.

19 Machane yibi buch ni piʼin ni dar manged ko fare galasia rokʼ Got e ra tabab gaed i gafgow nag e piʼin yaed bamang ko fare galasia rokʼ Got, ma kar feked nga dakeanraed fithingan Kristus

20 Arragon, ra gafgow niged raed, mar abngeyed raed ko gubin mite thin, nrinʼ e biney ngoraed ni bachan e sobutʼaenʼ roraed; ma bachan e darur ʼufʼuf gaed, nge ku bachan e yaed be weliy e thin rokʼ Got, ngoraed roraed, ni darur feked puluwon ni salpiy.

21 Chiney e immoy ba motochiyel nib noemow u fithikʼ fapi gidiiʼ ko fare galasia, nibe yoeg ni dariy beeʼ, nib mang ko fare galasia, ni nge puw ngalang nge gafgow nag e piʼin dar manged ko fare galasia, ma thingari siy e paʼan gafgow nigey u thilraed ngoraed.

22 Machane, immoy boʼor i yaed u fithikʼraed ni tabab ko ʼufʼuf, mar tabab gaed ko togopluw ngakʼ e pi toʼogor roraed, nge yaeni madaʼ ko ngiyalʼ ni kan tug, arragon, ni yaed be tuguyed yaed nga paʼraed.

23 Chiney e buch e biney u lan e bin lʼagruw e duw ko lung rokʼ Alma, ma ireram tapgin e gafgow ni gaaʼ ni aw ko fare galasia; arragon, ireram tapgin e magawon ko fare galasia.

24 Ya boʼor e piʼin nra ʼelʼel niged gumʼirchaʼraed, min chuweg fithingraed, ni arame da kun lemnagraed nga fithikʼ fapi gidiiʼ rokʼ Got. Ma kub yoʼor e piʼin nra palog niged yaed u fithikʼraed.

25 Ere chiney e biney e rib gel e gafgow riy ngakʼ e piʼin ni kar yuluyed yaed ko fare mich; machane, kar chichiʼiyed yaed ma darur chef gaed nga orel ko pi motochiyel rokʼ Got, ma yaed be athamgil u fithikʼ e gumʼaenʼ ko pi thibthib ni yibe tay ngoraed.

26 Ma napʼan ni fapi priest e ra paged e muruwel roraed ni ngar weliyed fare thin rokʼ Got ngakʼ fapi gidiiʼ, ma arame fapi gidiiʼ e kur paged e pi muruwel roraed ni ngar rungʼaged e thin rokʼ Got. Ma napʼan ni weliy fare priest fare thin rokʼ Got ngoraed, ma yaed gubin nra suloed bayay nib kolchiyaʼ ko pi muruwel roraed; ma fare priest, e dar lemnag niʼir e ba felʼ ngakʼ e piʼin nibe motoyil ngakʼ, ya tamachib e de mangil ngakʼ beeʼ nib tamotoyil, ara sensey e ba felʼ ngakʼ e en tafil banʼen; ere yaed gubin ma taʼareb rograed, ni yaed gubin nra muruwel gaed, ni gubin e gidiiʼ nra beeʼ ma be yaen u rogon gelingin.

27 Mar piiʼed e tin bay roraed, ni gubin e gidiiʼ nra beeʼ ma rogon ni bay rokʼ, ngakʼ e piʼin gafgow, nge piʼin nib tʼuf roraed banʼen, nge piʼin nib mʼar, nge piʼin nibe gafgow ko amith; ma darur chuw gaed nga mad nib totolang puluwon, machane yaed bbiʼech mab gumud yaʼaraed.

28 Ere aray rogon nra gagyeg niged fapi gamʼing ko fare galasia; ma aray rogon nra tabab niged e paer u fithikʼ e gapas bayay, ni yug aram rogon fini yoʼor e pi gafgow ni yibe rinʼ ngoraed.

29 Ere chiney, e bachan e miyuluy ni tay fare galasia, mar falaʼab gaed iyaen, ni yoʼor gubin banʼen roraed ni pinʼen nib tʼuf roraed—ni yoʼor e gamanman nge yu ulung i garbaw roraed, nge fak e gamanman nib sugsug ni gubin mit, nge grain nib yoʼor, nge gol, nge silber, nge tin thʼabi gaʼfan banʼen, nge silk ni yoʼor, nge mad ni kan firgiy nib felʼ nge gubin mite mad nib felʼ nib gamog u tabinaew.

30 Ere aray rogon, nra monʼog gaed iyaen, ma darpaged ni piʼin ni dariy e mad roraed e nga ranoed ngar chuw gaed, ara piʼin ni kar mʼaed ko bilig, ara piʼin ni kar mʼaed ko balel, ara piʼin nib mʼar, ara piʼin ni dawor ni duruwʼiy raed; ma dar tayed gumʼirchaʼraed nga dakean e falaʼab; ere ba thumʼ paʼraed ngakʼ gubin e gidiiʼ, ni pilibthir nge bitir, ni tin kalbus nge tin ni de kalbus, ni pumoʼon nge ppin, ni demutrug ko yaed buʼun ko galasia fa dangay, ni bachan e dariy beeʼ nib tʼuf, ma bay beeʼ nib gasey.

31 Ere aray rogon nra monʼog gaed mar falaʼab gaed nge gel e thil riy ko piʼin ni dar manged ko fare galasia roraed.

32 Ya piʼin ni dar manged gidiiʼen e galasia roraed e kar yunʼuyed e pig ni machmach, ma yaed be tay fan e liyos ara kar bangeyed e gameed, nge nonnon nge moʼowaenʼ nge togopluw; ni yaed be chuw nga mad nib totolang puluwon; ni kar nʼufed yaed ngalang ko ʼufʼuf u pʼoewchraed; ni yaed be thibthib, nge baen, nge iring, nge moroʼroʼ, nge denen ni galong, nge fek pogofan nib miith morngaʼagen, nge gubin mite denen ni ubchiyaʼ; machane, fare motochiyel e ni gagyeg nag nga dakean gubin e piʼin ni yaed be thʼaeb, nrogon ni rayog ni ngan rinʼ.

33 Me yibi buch ni aray rogon nni gagyeg nag fare motochiyel nga dakeanraed, ni gubin e gidiiʼ nra beeʼ min gechig nag u rogon e nʼen ni ke bucheg, mar dugil gaed, ma daki sukʼ ngaenʼraed ni ngar rinʼed rebe denen ni faʼanra yaed manang; ere, arame yib e gapas nga fithikʼ fapi gidiiʼ ku Nephi nge yaeni madaʼ ko ngiyalʼ ni ke gaman lal e duw napʼan e lung ko fapi tapuf-oloboch.